SAK 57
Y sã n wa maan yel-wẽn-kãseng yẽ?
Baa y nonga a Zeova ne y sũur fãa, la y maood y sẽn tõe to-to fãa n pa rat n wa maan bũmb n sãam a suuri, y na n mi n kongame. Yaa sɩd tɩ yel-wẽn kẽer wẽnem yɩɩda a taaba. (1 Korẽnt rãmbã 6:9, 10) Y sã n wa maan yel-wẽn-kãsenga, tẽeg-y tɩ pa rat n yeel t’a Zeova pa le nong-y ye. A rat n kõ-y-la sugr la a sõng-yã.
1. Bõe la d segd n maan n paam t’a Zeova kõ-d sugri?
Neb nins sẽn nong a Zeova wã sã n wa bãng tɩ b maana yel-wẽn-kãsẽnga, b sũur sãamda wʋsgo. La bũmb ning a Zeova sẽn pʋlem a nin-buiidã belsd-b lame. A yeelame yaa: “Baa yãmb yel-wẽnã sã n yaa miuug wa saag-pag-a-minamina, b na n lebga pɛɛlg wa lampalga.” (Ezayi 1:18) D sã n sɩd tek yam n kos sugri, a Zeova na n kõ-d-la sugr zãnga. Bõe n wilgd tɩ d teka yam? Yaa d sũur sẽn na n sãam wʋsg ne yell ning d sẽn maanã, tɩ d bas n pa le maandẽ, la d yõk a Zeova sɛɛg t’a kõ-d sugri. Rẽ poore, d maanda d sẽn tõe fãa n bas tags-wẽns la minim-wẽns nins sẽn kɩt tɩ d wa maan yel-wẽndã, la d modg n tũud a Zeova no-tɩrsã.—Karm-y Ezayi 55:6, 7.
2. D sã n wa maan yel-wẽnde, wãn to la a Zeova tũnugd ne kãsem-dãmbã n sõngd tõndo?
D sã n wa maan yel-wẽn-kãsenga, a Zeova yeta tõnd tɩ d “bool tigingã kãsem-dãmba.” (Karm-y Zak 5:14, 15.) Kãsem-dãmbã nonga a Zeova, la b nong neb nins sẽn tũud-a wã me. B paama zãmsgo, n tar minim n tõe n sõng-d tɩ d lebg n maneg tõnd ne a Zeova zoodã.—Karm-y Galat-rãmb 6:1.
Bõe la kãsem-dãmbã maand n sõngd tõndo, d sã n wa maan yel-wẽn-kãsenga? Kãsem-dãmb a yiib bɩ a tãab n na n sõng-d ne Biiblã maasem tɩ d bãng tɩ d sẽn maanã yaa wẽnga. B leb n na n kõ-d-la sagls sẽn na n sõng-d tɩ d ra maan yel-wẽndã n yɩlem ye. B tõe n kɩtame tɩ kaoos bilf tɩ d pa le tar sor n maand bũmb kẽer tigingã pʋgẽ, hal n tãag tõnd ne a Zeova zoodã sẽn na n le wa tar pãnga. Sẽn na yɩl n kogl tigingã, kãsem-dãmbã yiisda ned ning fãa sẽn maan yel-wẽnde, n pa rat n tek yam n kos sugri.
D BAO N BÃNG N PAASE
D maneg n ges a Zeova sẽn maand to-to n sõngd tõndo, d sã n wa maan yel-wẽn-kãsenga.
3. D sã n vẽneg d yel-wẽndã n togse, na n sõng-d lame tɩ d le paam a Zeova zoodo
D sã n maan yel-wẽnde, yaa a Zeova la d beeg-yã. Dẽnd segdame tɩ d vẽneg n togs-a. Karm-y Yɩɩn-sõamyã 32:1-5, tɩ rẽ poor bɩ y leok sogsgã:
Bõe yĩng tɩ d segd n vẽneg d yel-wẽnã n togs a Zeova, la d ra bao n solg-ba?
Vẽneg d yel-wẽnã n togs a Zeova wã sẽn yãk a toogo, d sã n bao kãsem-dãmbã me sõngre, d paamda yolsgo. Ges-y VIDEO wã, tɩ rẽ poor bɩ y leok sogsgã.
Video wã pʋgẽ, bõe la kãsem-dãmbã maan n sõng a Kano t’a lebg n wa a Zeova nengẽ?
D segd n pelga d pʋg ne kãsem-dãmbã. B bee tõnd sõngr yĩnga. Karm-y Zak 5:16, tɩ rẽ poor bɩ y leok sokrã:
D sã n pelg d pʋg ne kãsem-dãmbã, bõe yĩng tɩ na n yɩ nana ne-b tɩ b sõng tõndo?
Vẽneg-y y yel-wẽnã n togse, pelg-y y pʋg ne kãsem-dãmbã, la y sak t’a Zeova sõng-y ne nonglem
4. Yel-wẽn-maandbã yiisg sẽn wat ne nafa ninsi
Ned sẽn maan yel-wẽn-kãseng sã n tõdg t’a kõn tũ a Zeova noyã, a pa tõe n kell n yɩ tigingã ned ye. B yiisda a soab tigingã pʋgẽ, tɩ d pa le tõe n maan tũud-n-taar ne-a, bɩ n pʋd n gom ne-a ye. Karm-y 1 Korẽnt rãmb 5:6, 11 la 2 Zã 9-11, tɩ rẽ poor bɩ y leok sokrã:
Wa rabɩll sẽn wukd zom-nagdgã, tigingã neb sã n maand tũud-n-taar ne yel-wẽn-maand sẽn pa rat n tek yam, wãn to la rẽ tõe n wa ne yelle?
Neb wʋsg b sẽn da yiis tigingã pʋgẽ wa n lebg n waame, bala baa ne kiblgã b sẽn paamã sẽn da pa nana wã, kɩtame tɩ b bãng tɩ b sẽn maanã yaa wẽnga. (Yɩɩn-sõamyã 141:5) Ges-y VIDEO wã, tɩ rẽ poor bɩ y leok sokrã.
VIDEO: D sak a Zeova sẽn yet fãa (9:28)
Video wã pʋgẽ, b sẽn yiis a Sõnza tigingã pʋgẽ wã sõngame t’a bãng bõe?
B sã n yiis yel-wẽn-maand tigingã pʋgẽ, . . .
wãn to la rẽ kɩtd t’a Zeova yʋʋrã paamd waoogre?
wãn to la rẽ wilgd t’a Zeova yaa maan-tɩ-zems la nonglem soaba?
5. D sã n tek yam n kos sugri, a Zeova kõt-d-la sugri
A Zeezi rɩka makr sẽn sõngd tõnd tɩ d bãng a Zeova manesem sẽn yaa to-to, yel-wẽn-maand sã n wa tek yam. Karm-y Luk 15:1-7, tɩ rẽ poor bɩ y leok sokrã:
Bõe la woto sõngd tõnd tɩ d bãng a Zeova zugu?
Karm-y Ezekɩyɛll 33:11, tɩ rẽ poor bɩ y leok sokrã:
Bõe la d segd n maane, tɩ wilg tɩ d sɩd teka yam n kot sugri?
A Zeova geta a nin-buiidã yell neere, wa pe-kɩɩm sẽn get a piis yell to-to wã
NEB KẼER SẼN YETE: “M yɛɛsda m na wa n togs kãsem-dãmbã yel-wẽnd ning m sẽn maanã, tɩ b wa yiis-ma.”
Bõe la y tõe n yeel ned sẽn tagsd woto?
KƲMSGO
D sã n maan yel-wẽn-kãsenga, tɩ d sũur sãam wʋsg ne d sẽn maanã, tɩ d yãk yam n bas wẽngã maanego, a Zeova na n kõ-d-la sugri.
Lebg-n-gese
Bõe yĩng tɩ d segd n vẽneg d yel-wẽnã n togse?
Bõe la d segd n maan t’a Zeova sak n kõ tõnd d yel-wẽnã sugri?
D sã n wa maan yel-wẽn-kãsenga, bõe yĩng tɩ d segd n bao kãsem-dãmbã sõngre?
BŨMB A TAABA
Rao sẽn paam t’a Zeova kõ-a sugri, wa sẽn zems Ezayi 1:18 sẽn wilgdã.
B sã n yiis yel-wẽn-maand tigingã pʋgẽ, wãn to la tõe n naf yẽ la neb nins fãa yellã sẽn namsdã?
Wãn to la y tõe n bilg ned sẽn pa a Zeova Kaset soab d sẽn yiisd yel-wẽn-maandbã tigingã pʋgẽ wã võore?
“Yãmb yiisda neb nins sẽn pa le naagd yãmbã y sʋkã bɩ?” (Bee jw.org)
Rao a ye kibare. A ra zãag n basa tigingã. Bõe n kɩt t’a kɩs sɩd tɩ yaa a Zeova n tak yẽ t’a lebg n wa? A kibarã gom-zug yaa: “M da ratame n lebg n wa a Zeova nengẽ.”
“Biiblã toeemda neba” (Yʋʋmd 2012 tʋʋl-nif kiuug pipi daar Gũusg Gasgã)