‘Bõe la m tõe n maane?’
1 ‘Bõe la m tõe n maane?’ Sãmbg sẽn ka be, woto ra yaa sʋkr Biibl zãmsdb sull a Charles Taze Russell sẽn sigl yʋʋmd 1870 tɛk pi-gĩndã pʋgẽ neb sẽn da tar b yamẽ. B sẽn da bɩt Wẽnnaam daabã võor-wʋmb pʋgẽ wã, pipi Biibl zãmsdb kãensã ra tog n sʋkda b mens n dat n bãng bũmb ning b sẽn da tõe n maan n sõng neb a taabã tɩ b bãng Wẽnnaam daabã n paase. Taas dũniyã gill neb Biiblã bãngr b sẽn da paamdã ra yaa tʋʋm kẽeng menga.
2 Tõnd zu-noogã, b tõoga tʋʋmdã. Wãn-wãn to? Ned kam fãa kẽesa a menga, baa sã n wõnd paoodame. Rẽ kɩtame tɩ rũndã b mii a Zeova Kaset rãmbã dũniyã gill zugu. B lebga siglg sẽn tar koe-moondb milyõ a yoob la bala, sẽn sõgend tigims 90 000 sẽn be tẽns la ko-sʋk tẽns 234 pʋsẽ!—Ezai 60:22.
3 Kõ-y y teelg zãnga: Tara yõod tɩ tõnd ned kam fãa kẽes a meng tʋʋm-kãseng ning a Zezi sẽn deng n togs tɩ na n maana yaoolem dayã pʋgẽ wã. (Mark 13:10) Yaa vẽeneg tɩ pa kẽem dãmbã sõor sẽn paoodã bal n tõe n maan tʋʋm kãngã ye. Leb n ka so-pakdbã bal n tog n maan moonegã tʋʋmd ye. Sɩd-sɩda, kiris-ned fãa sẽn dɩk a meng n kõ tõe n kẽesa a meng sõma tʋʋmdã pʋgẽ. Tõnd fãa tõe n kẽesa d mens moonegã tʋʋmd neng a ye pʋgẽ. (1 Tɩm. 1:12) Baa d sẽn maand dẽ wã sẽn zem to-to fãa, d nafda d mens la neb a taabã.—1 Tɩm. 4:16.
4 Tõnd ned kam fãa le tõeeme n teel kiris-neb sẽn yaa d saam-biisã zãng-zãng ne manesem a taab sẽn tar yõodo. D tõe n teela tigingã tigissi, d sã n kẽnd-b n ka vaandẽ la d kẽesd d mens b pʋsẽ ne yẽesem. (Yɩɩl 122:1, 8, 9) Sẽn zems ne tõnd tarem, d tõe n teela dũni gill tʋʋmdã ne ligdi. D tõe n sõngame n pɩɩs Rĩungã roogo. Ned kam fãa tõe n sõngame n kɩt tɩ yamleoog la nonglem ne zems-n-taar zĩnd tigingã pʋgẽ, n sõng nin-paalsã, kambã, la sẽn kʋʋl-bã me.—Kol. 3:12, 14.
5 Dẽ y tõe n sʋkda y menga, ‘Bõe la m tõe n maane?’ Baa ne sẽn tõe n wõnd yãmb mengã modgr ka zem fʋɩ wã, y tõe n sõngame n kɩt tɩ tigingã tall pãnga, laafɩ la a yɩ yẽesenga. Dẽ tõnd fãa tõe n maana tʋʋmd sẽn tar yõod sẽn na yɩl n waoog a Zeova yʋʋrã!