Wãn-wãn la a Zeova na n tẽeg yãmb yelle?

“MAM Wẽnnaam, tẽeg-y mam yelle.” A Nehemi kosa Wẽnnaam woto naoor a wãn ne gom-kãensã. (Nehemi 5:19; 13:14, 31) Nebã sã n wa be zu-loees wʋsg pʋsẽ n togs Wẽnnaam ne bõosg goam woto, yaa bũmb sẽn zemse.

La yaa bõe n be nebã yamẽ, b sã n kot Wẽnnaam t’a tẽeg b yelle? Vẽenega, b saagdame tɩ Wẽnnaam na n maana sẽn yɩɩd a tẽeg b yʋyã yell bala. Sãmbg sẽn ka be, b tara saagr wala tʋʋm-wẽns maand a yembrã b sẽn kʋ n kɛgl a Zezi sẽn tall saagr ningã. Sẽn yaa lebend ne a to wã, nin-kãng soabã bõosa a Zezi woto: “Yãmb sa n wa reeg y naama, bɩ y tẽeg mam yelle.” A ra pa rat bal t’a Zezi tẽeg a sẽn da yaa ned ning ye, la a ra ratame me t’a maan bũmb a yĩnga, t’a vʋʋg-a.—Luk 23:42.

Naoor wʋsgo, Biiblã wilgdame tɩ ne Wẽnnaam, ‘tẽegrã’ rat n yeelame tɩ maan bũmb n sõng neda. Wala makre, tẽngã gill sẽn wa n lim ne koom rasem 150 pʋgẽ wã poore, “Wẽnnaam tẽega a Nowe . . . yelle. Wẽnnaam kɩtame tɩ sobg pɩʋʋg dũniyã zugu, la koom boogame.” (Sɩngre 8:1) Yʋʋm kob-gĩn poore, Filisti nebã sẽn wa n leo a Sãmsõ ninã la b sog-a ne bãensã, a pʋʋsa woto: “Zusoab a Wẽnnaam, tẽeg-y mam yelle n kõ maam pãng masã.” A Zeova tẽega a Sãmsõ yell n kõ-a pãng sẽn yɩɩd ninsaal pãng t’a tõog n dok a sũur ne Wẽnnaam bɛɛbã. (Bʋkaoodba 16:28-30) Sã n yaa ne a Nehemi, Wẽnnaam ninga a modgrã barka, la sɩd balengã paama luglg Zerizalɛm.

“Bũmb fãa sẽn gʋls pĩnda gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare la ne Gʋlsg Sõamyã belsgo,” woto la tʋm-tʋmd a Poll gʋls-yã. (Rom dãmba 15:4) D sã n tẽeg a Zeova yell n bao n maan a raabã, wala a pĩnd wẽndẽ sõgen dãmb sẽn yaa kɩs-sɩd dãmbã, d tõe n talla bas-m-yam t’a Zeova na n tẽega tõnd yell n sõng-d tɩ d paam d daar fãa bõn-datmã, n teel tõnd d makrã pʋsẽ, la a fãag-do, a sã n na n wa pids bʋ-kaoorã wẽn-kɩɩsdbã zutu.—Matɩe 6:33; 2 Pɩɛɛr 2:9.