Wãn to la ziri tũudmã sãamd Wẽnnaam yʋʋre?

Wẽnnaam yaa nonglem. Sã n yaa rẽ, bõe yĩng tɩ tũudum toor-toor sẽn yet tɩ b gomda Wẽnnaam yʋʋr yĩngã tʋmd tʋʋm-wẽns wʋsg woto? Koɛɛg-koɛɛga, tũudum-kãensã yaa ziri tũudum. B kɩtame tɩ nebã tẽed yɛl sẽn pa sɩd Wẽnnaam zugu. Wãn to? Wẽnnaam tagsg yaa wãn ne b sẽn maand woto wã? La bõe la a na n wa maan rẽ wɛɛngẽ?

1. Wãn to la ziri tũudmã rãmb sẽn zãmsd nebã bũmb ninsã sãamd Wẽnnaam yʋʋre?

Ziri tũudmã “rɩka Wẽnnaam sɩdã n tek ne ziri.” (Rom dãmbã 1:25) Wala makre, tũudmã fãa la bal pa wilgd nebã Wẽnnaam yʋʋrã ye. La Biiblã pʋgẽ, b yetame tɩ d segd n pʋta Wẽnnaam yʋʋrã. (Rom dãmbã 10:13, 14) Tũudum taoor dãmb kẽer yetame tɩ yel-beed sã n maane, yaa Wẽnnaam daabo. La woto yaa ziri. Wẽnnaam pa tol n maand sẽn yaa wẽng ye. (Karm-y Zak 1:13.) Bʋko, ziri tũudmã rãmb sẽn togsd yɛl sẽn pa sɩd Wẽnnaam zugã kɩtame tɩ nebã zãagd ne Wẽnnaam.

2. Wãn to la ziri tũudmã sẽn maand yɛl ninsã sãamd Wẽnnaam yʋʋre?

Ziri tũudmã rãmb manesmã ne nebã yaa toor fasɩ ne a Zeova. Biiblã pʋgẽ, b yetame tɩ ziri tũudmã “yel-wẽnã zamame n ta saasẽ.” (Vẽnegre 18:5) Na maan yʋʋm kobse, tũudum toɛy-toɛy kẽesa b toog politikã yɛlẽ, b teela zaba, la b yɩ sabab tɩ b kʋ neb tus ka tɛka. Tũudum taoor dãmb kẽer ratame n vɩ naar pʋgẽ. Rẽ kɩtame tɩ b nong n kot b poorẽ dãmbã ligdi. B sẽn maand woto wã wilgdame tɩ b pʋd n pa mi Wẽnnaam, tɩ pa sokd b gom a yʋʋr yĩng ye.​—Karm-y 1 Zã 4:8.

3. Wẽnnaam tagsg yaa wãn ne ziri tũudmã?

Ziri tũudmã rãmb sẽn maand yɛl ninsã sã n yikda yãmb sũuri, yãmb tagsdame tɩ maanda Wẽnnaam me bõe? Wẽnnaam nonga neba, la a sũur puuda wʋsg ne tũudmã taoor dãmb sẽn togsd yɛl sẽn pa sɩd a zugã, la b namsd b poorẽ dãmbã. A pʋlmame t’a na n sãama ziri tũudmã, la tɩ “b pa na n le yã-a a bada.” (Vẽnegre 18:21) Ka la bilfu, Wẽnnaam na n sãama ziri tũudum toor-toorã fãa.​—Vẽnegre 18:8.

D BAO N BÃNG N PAASE

4. Pa tũudmã fãa n tat Wẽnnaam yam ye

Neb wʋsg tagsdame tɩ tũudum toɛy-toɛyã yaa wa soay toɛy-toɛy sẽn tar n dabd Wẽnnaam nengẽ. La yaa sɩd bɩ? Karm-y Matiye 7:13, 14, tɩ rẽ poor bɩ y leok sokrã.

• Biiblã pʋgẽ, bõe la b yet sor ning sẽn tar n dabd vɩɩm zĩigẽ wã wɛɛngẽ?

Ges-y VIDEO wã, tɩ rẽ poor bɩ y leok sokrã.

VIDEO: Tũudmã fãa tata Wẽnnaam yam bɩ?​—B sẽn kʋrge (3:22)

• Biiblã pʋgẽ, b wilgame tɩ tũudum wʋsg n be n tat Wẽnnaam yam bɩ?

5. Wẽnnaam nonglmã pa pukd ziri tũudmã taoor dãmb yel-manesmã pʋgẽ ye

Ziri tũudmã rãmb maanda bũmb toor-toor sẽn sãamd Wẽnnaam yʋʋre. Bũmb a ye sẽn yaa wẽng wʋsgo, yaa b sẽn kẽesd b toog zabã pʋsẽ wã. Sẽn na yɩl n yã makr a ye, bɩ y ges VIDEO wã. Rẽ poor bɩ y leok sogsgã.

VIDEO: Egiliiz-​rãmbã sẽn maan bũmb ning dũni gill zabr a yiib-n-soabã sasa (2:22)

• Dũni gill zabr a yiib-n-soabã sasa, bõe la egiliiz-rãmb wʋsg yãk yam n maane?

• Yãmb tagsg yaa wãn ne bũmb ning b sẽn maanã?

Karm-y Zã 13:34, 35 la 17:16, tɩ rẽ poor bɩ y leok sogsgã:

• Sã n yaa ne yãmba, a Zeova tagsg yaa wãna, tũudmã rãmb sẽn kẽesd b toog zabã pʋsẽ wã?

• Ziri tũudmã yɩɩ sabab tɩ yel-beed wʋsg maane. Bõe kaset la yãmb tara, tɩ wilgdẽ tɩ Wẽnnaam nonglmã pa pukd ziri tũudmã rãmb yel-manesmã pʋgẽ?

6. Wẽnnaam datame n sõng nebã tɩ b paam b mens ne ziri tũudmã

Karm-y Vẽnegr 18:4,a tɩ rẽ poor bɩ y leok sokrã:

• Yãmb sẽn bãng tɩ Wẽnnaam datame n sõng neb nins ziri tũudmã sẽn tudgã tɩ b paam b mensã, y tagsg yaa wãna?

7. Ket-y n baood-y n bãngd Wẽnnaam sɩd-sɩdã

Rẽ yĩnga, ziri tũudum toor-toorã sẽn maand bũmb ninsã segd n kɩtame tɩ yãmb tagsg sẽn yaa a soab Wẽnnaam zugã toeem bɩ? Mams-y y yamẽ wa ba sẽn na n kõ a biig sagl-sõma, tɩ biigã zãgs t’a kõn tũ ye. A loog n basa a ba wã zaka, n tɩ vɩ vɩ-yooko. Biigã tʋʋm-tʋmdɩ wã pa tat a ba wã yam ye. Bõe yĩng tɩ pa zems tɩ b ning ba wã taale, a biigã sẽn vɩ to-to wã yĩnga?

• Rẽ yĩnga, d sã n ning a Zeova taale, n pa rat n le bao n bãng-a, ziri tũudmã rãmb tʋʋm-tʋmdɩ wã yĩnga, zemsame sɩda?

KƲMSGO

Ziri tũudmã sẽn zãmsd nebã bũmb ninsã, la b sẽn tʋmd tʋʋm-beedã kɩtame tɩ nebã tẽed yɛl sẽn pa sɩd Wẽnnaam zugu. Wẽnnaam na n wa sãama ziri tũudmã.

Lebg-n-gese

• Yãmb tagsg yaa wãn ne ziri tũudmã rãmb tʋʋm-tʋmdɩ wã, la b sẽn zãmsd nebã bũmb ninsã?

• A Zeova tagsg yaa wãn ne ziri tũudmã?

• Bõe la Wẽnnaam na n wa maan ziri tũudmã?

BŨMB A TAABA

Bũmb a yiib tũudmã fãa la bal sẽn maande, tɩ pa tat Wẽnnaam yam ye.

“Tũudum toor-toorã fãa yaa sõma bɩ? B fãa tata Wẽnnaam yam bɩ?” (Bee jw.org)

Bõe yĩng t’a Zeova rat tɩ d naag neb a taab n tũ-a?

“Yaa tɩlɛ tɩ d yãk tũudum n kẽ bɩ?” (Bee jw.org)

Prɛtr a yembr n wa n maand sãmbs ne a tũudmã. La rẽ pa gɩdg-a t’a pa bao n bãng sɩdã Wẽnnaam zug ye.

“Bõe n kɩt tɩ prɛtr a ye yi n bas a tũudum” (Yʋʋmd 2015 wao-fugdg kiuug Réveillez-vous ! wã)

Na maan yʋʋm kobse, ziri tũudmã rãmb zãmsa neb ziri buud toor-toor sẽn kɩt tɩ nebã tẽed tɩ Wẽnnaam zãra ne-do, la t’a pa tar nimbãan-zoeer ye. Ges-y bũmb a tãab b sẽn togs tɩ pa sɩda, la Biiblã sẽn yete.

“Ziri sẽn kɩt tɩ wõnd Wẽnnaam pa nong tõndo” (Yʋʋmd 2013 sɩpaolg kiuug pipi daar Gũusg Gasgã)