SAK 37
Biiblã pʋgẽ, bõe lab yet tʋʋmã laligdã wɛɛngẽ?
Yãmb zoe n maana yɩɩr wʋsg tʋʋmã la ligdã wɛɛngẽ bɩ? Mi n tõe n yɩɩ toog tɩ d bao n kõ noorã, la d tũ a Zeova wa sẽn segdã. Sagls n be Biiblã pʋgẽ n tõe n sɩd sõng-do.
1. Biiblã pʋgẽ, bõe lab yet tʋʋmã wɛɛngẽ?
Wẽnnaam datame tɩ d paam sũ-noog d tʋʋmã pʋgẽ. Biiblã pʋgẽ, b yetame tɩ “bũmb ka be sẽn yaa noog ne ninsaal n yɩɩd a sẽn na n . . . maan sũ-noog ne a tʋʋmd ye.” (Koɛɛg soaba 2:24) A Zeova tʋmda wʋsgo. D sã n dɩkd a togs-n-taare, n tʋmd ne d pãng fãa, d noogda a sũuri, la tõnd me paamda sũ-noogo.
Tʋʋm tara yõodo. La d pa segd n bas tɩ tʋʋmã tall yõod ne-do, n yɩɩg a Zeova tũudmã ye. (Zã 6:27) A pʋlmame tɩ d sã n lʋɩɩsd yẽ raabã taoore, a na n gesame tɩ d paamd bũmb nins sẽn yaa tɩlɛ ne-dã.
2. Tall tagsg sẽn zems ligdã wɛɛngẽ wã rat n yeelame tɩ bõe?
Baa ne b sẽn wilg Biiblã pʋgẽ tɩ ‘ligd kogenda ninsaalã,’ b wilgame me tɩ ligdã bal pa tõe n kõ ned sũ-noog ye. (Koɛɛg soaba 7:12, MN) Rẽ n so tɩ b sagend tõnd tɩ d ra nong ligdi, la tɩ d kɩt tɩ ‘bũmb nins d sẽn tarã sekdo.’ (Karm-y Ebre-rãmb 13:5.) D sã n kɩtdẽ tɩ d sẽn tar bũmb ninsã sekd tõndo, d pa na n wa maand sũ-sãang d sẽn tagsd tɩ d sẽn tarã pa waoog yĩng ye. Na n sõng-d lame tɩ d ra wa kẽ sam zaalem ye. (Yel-bũnã 22:7) Leb n na n sõng-d lame tɩ d ra wa pard n baood ligdi, wall n wa kẽed yɛl d sẽn tagsd tɩ na n kɩtame tɩ d paam ligd tao-tao ye.
3. Wãn to lad tõe n wilg tɩ d yaa kõatba?
A Zeova yaa Wẽnnaam sẽn yaa kõata. D sã n yaa ‘kõtba, n pʋɩt bũmb nins d sẽn tarã’ ne d taabã, d rɩkda a togs-n-taare. (1 Tɩmote 6:18) D tõe n kõo ligd n sõng ne tigingã tʋʋma, la d sõng neb sẽn be sõngr raab pʋgẽ, sẽn yɩɩd fãa, d tẽed-n-taasã. A Zeova sẽn getã pa ligd sõor ning d sẽn kõtã ye. Yaa bũmb ning sẽn kɩt tɩ d kõtẽ wã la a get n yɩɩda. D sã n kõt ne d sũur fãa, na n nooga d sũuri, la noog a Zeova sũur me.—Tʋʋma 20:35.
D BAO N BÃNG N PAASE
D ges nafa nins d sẽn paamde, d sã n tall tagsg sẽn zems tʋʋmã wɛɛngẽ, la d kɩtdẽ me tɩ d sẽn tarã sekd tõndo.
4. Modg-y tɩ y sẽn tʋmd to-to wã waoogd a Zeova
Tõnd tagsg sẽn yaa a soab ne tʋʋmã bee ne tõnd ne a Zeova zoodã sẽn yaa to-to wã. Ges-y VIDEO wã, tɩ rẽ poor bɩ y leok sogsgã.
Video wã pʋgẽ, bõe n yɩ yãmb noog a Zak yel-manesmã sẽn yaa to-to a tʋʋmã zĩigẽ wã wɛɛngẽ?
Bõe n sõng-a t’a ra tar tagsg sẽn zems tʋʋmã wɛɛngẽ?
Karm-y Kolos rãmb 3:23, 24, tɩ rẽ poor bɩ y leok sokrã:
Bõe yĩng tɩ d tagsg sẽn yaa a soab tʋʋmã wɛɛngẽ wã tar yõod wʋsgo?
Tʋʋm tara yõodo. La d pa segd n bas tɩ tʋʋmã tall yõod ne-do, n yɩɩg a Zeova tũudmã ye
5. D sã n kɩtdẽ tɩ d sẽn tarã sekd tõndo, nafd-d lame
Neb wʋsg modgdame n na n bao ligd wʋsg n same. La Biiblã pʋgẽ, b pa sagend tõnd tɩ d maan woto ye. Karm-y 1 Tɩmote 6:6-8, tɩ rẽ poor bɩ y leok sokrã:
Bõe la b sagend tõnd Biiblã pʋgẽ tɩ d maane?
Baa d sẽn tarã yaa bilfu, d tõe n paama sũ-noogo. Ges-y VIDEO wã, tɩ rẽ poor bɩ y leok sogsgã.
Baa ne zag-kãensã rãmb sẽn pa tar ligd wʋsgã, bõe n kɩt tɩ b tar sũ-noogo?
La d sã n tarẽ tɩ sekd tõndo, tɩ d ket n dat n paase? A Zeezi rɩka makr n wilg rẽ sẽn tõe n wa ne yell ninga. Karm-y Luk 12:15-21, tɩ rẽ poor bɩ y leok sokrã:
A Zeezi sẽn dɩk makr ningã sõnga yãmb tɩ y bãng bõe?—Ges-y vɛrse 15.
Karm-y Yel-bũn 10:22 la 1 Tɩmote 6:10, tɩ rẽ poor bɩ y leok sogsgã:
Yãmb tagsdame tɩ bõe n tar yõod n yɩɩda? F sẽn na n tar zood sõma ne a Zeova bɩ, bɩ f sẽn na n tar ligd wʋsgo? Bõe yĩnga?
Ned sã n zoet n pʋgd ligdã, tõe n waa ne zu-loe-bʋse?
6. A Zeova na n gesame tɩ d paamd sẽn yaa tɩlɛ ne-dã
D sã n wa tar zu-loees tʋʋmã bɩ ligdã wɛɛngẽ, tõe n maka tõnd tẽebã. Ges-y VIDEO wã, n bãng d sẽn maan to-to, yɛl a woto taoore. Rẽ poor bɩ y leok sogsgã.
Video wã pʋgẽ, zu-loe-bʋs la saam-biigã ra segda?
Bõe n sõng-a t’a tõog n mao ne rẽ?
Karm-y Matiye 6:25-34, tɩ rẽ poor bɩ y leok sokrã:
Bõe la a Zeova pʋlem t’a na n maan n kõo neb nins sẽn lʋɩɩsd a raabã taoorã?
NEB KẼER SẼN YETE: “Mam segd n tʋma wʋsg n ges m zakã rãmb yelle. M pa tõe n kẽnd tigissã semen fãa ye.”
Vɛrse-bʋg n kɩt tɩ yãmb kɩs sɩd tɩ d sã n lʋɩɩsd a Zeova raabã taoore, a na n gesame tɩ d paamd sẽn yaa tɩlɛ wã?
KƲMSGO
Nug-tʋʋmã la ligdã tara yõodo, la d pa tol n segd n bas tɩ b tiis tõnd a Zeova tũubã pʋgẽ ye
Lebg-n-gese
Bõe n tõe n sõng-y tɩ y tall tagsg sẽn zems tʋʋmã wɛɛngẽ?
Y sã n kɩtdẽ tɩ y sẽn tarã sekd-yã, wãn to la rẽ nafd yãmba?
Wãn to la y tõe n wilg tɩ y kɩsa sɩd ne a Zeova sẽn pʋlem t’a na n gesame t’a nin-buiidã paamd sẽn yaa tɩlɛ wã?
BŨMB A TAABA
Biiblã pʋgẽ, b wilgame tɩ ligd pa sõma bɩ?
Kũun bʋs buud n tat Wẽnnaam yam?
Par n bao ligdã yaa wẽng bɩ?
“Biiblã pʋgẽ, bõe la b yet par n bao ligdã wɛɛngẽ” (Yʋʋmd 2015 tʋʋlg kiuug Réveillez-vous ! wã)
Bõe n sõng rao a ye t’a bas par n bao ligdã, la wagdmã?
“Mam da nonga wed-moosã zoeese” (Yʋʋmd 2011 sɩpaolg kiuug pipi daar Gũusg Gasgã)