SAK 38
D wilg tɩ d nanda vɩɩmã
D sẽn vɩ wã kɩtame tɩ d tõe n paam n maan bũmb toor-toor sẽn be yamleoogo. Baa d sã n tar zu-loeese, bũmb kẽer n be d sẽn ket n tõe n maan tɩ kõ-d sũ-noogo. Wãn to la d tõe n wilg a Zeova tɩ d nanda vɩɩmã a sẽn kõ-dã? Pʋd n yaa bõe n kɩt tɩ d segd n maan woto?
1. Bõe yĩng tɩ d segd n nand vɩɩmã?
D segd n nanda vɩɩmã, bala yaa kũun d Ba a Zeova sẽn nong-dã sẽn kõ-do. ‘Vɩɩmã ko-bundum’ bee a Zeova nengẽ, rat n yeel tɩ yẽ n naan bõn-vɩɩsã fãa. (Yɩɩn-sõamyã 36:10) Yẽ “meng n kõt ninsaalbã fãa vɩɩm, vʋʋsem la bũmb fãa.” (Tʋʋma 17:25, 28) A Zeova kõta tõnd bũmb nins sẽn yaa tɩlɛ ne-d sẽn na yɩl tɩ d kell n vɩɩmdã. La pa rẽ bal ye. A leb n maana bũmb toor-toor sẽn kɩt tɩ d tõe n vɩɩmd ne sũ-noogo.—Karm-y Tʋʋm 14:17.
2. Wãn to la d tõe n wilg a Zeova tɩ d nanda vɩɩmã a sẽn kõ-dã?
Yãmb ma wã sẽn dɩk yãmb pʋgã tɛka, a Zeova geta y yelle. Wẽn-sakd a ye yʋʋr sẽn boond t’a Davɩɩd ra yeela Wẽnnaam pʋʋsg pʋgẽ yaa: “Mam sẽn wa n nan ka tar naande, yãmb dag n nee maam.” (Yɩɩn-sõamyã 139:16) A Zeova nanda yãmb vɩɩmã hal wʋsgo. (Karm-y Matiye 10:29-31.) Ned sã n yãk a to yõor ne yamleoogo, baa yaa a mengã yõore,a sãamda a Zeova sũur hal wʋsgo. (Yikri 20:13) D sã n nong n ningd d vɩɩmã yell pʋgẽ, wall d pa gũusd ne d taabã vɩɩm, sãamda a sũur me. D sã n gũusd ne d vɩɩmã, la d gũusd ne d taabã me vɩɩm, d wilgdame tɩ d nanda vɩɩmã sẽn yaa kũun-kãsengã.
D BAO N BÃNG N PAASE
D na n yãa bũmb kẽer d sẽn tõe n maan n wilg tɩ d nanda vɩɩmã.
3. Get-y y laafɩ wã yell sõma
Kiris-ned sã n dɩk a meng n kõ a Zeova, a tũud-a-la a vɩɩmã tõre. Yaa wa a sẽn dɩk a yĩngã n maan maoong n kõ Wẽnnaam. Karm-y Rom dãmb 12:1, 2, tɩ rẽ poor bɩ y leok sogsgã:
Bõe n segd n kɩt tɩ y rat n get y laafɩ wã yell sõma?
Togs-y bũmb kẽer y sẽn tõe n maan y laafɩ yell gesg wɛɛngẽ.
4. Maand-y gũusg ne y vɩɩmã, la y taabã me vɩɩm
Biiblã pʋgẽ, b sagenda tõnd tɩ d gũus ne bũmb ning fãa sẽn tõe n wa kɩt tɩ tõnd mengã wall ned a to pogle, bɩ n ki. Ges-y VIDEO wã n bãng bũmb kẽer y sẽn tõe n maan n kogl y vɩɩmã, la y taabã me vɩɩm.
Karm-y Yel-bũn 22:3, tɩ rẽ poor bɩ y gom d sẽn tõe n maan to-to n kogl tõnd ne d taabã vɩɩm . . .
d zakã pʋgẽ.
d tʋʋmã zĩigẽ.
d sã n wa maand ɛspoore.
d sã n wa zao montɛɛr bɩ mobilli.
5. D wilg tɩ d nanda baa biig sẽn nan ket a ma pʋgẽ vɩɩm
A Davɩɩd wilgame tɩ baa biig sẽn nan ket a ma pʋgẽ yell paka a Zeova. Karm-y Yɩɩn-sõamyã 139:13-17, tɩ rẽ poor bɩ y leok sokrã:
A Zeova nifẽ, biig vɩɩm sɩngda a rogmẽ bɩ, bɩ sɩngda a ma sẽn wat n dɩk pʋgã sasa?
Noy nins a Zeova sẽn kõ pĩnd wẽndẽ Israyɛll nebã ra kogenda pag sẽn tʋte, la biigã sẽn nan ket a pʋgẽ wã me. Karm-y Yikr 21:22, 23b sẽn be vẽnegrã pʋgẽ wã, tɩ rẽ poor bɩ y leok sogsgã:
Ned sã n yɩ sabab tɩ biig yõor yãke, baa yaa ne yĩdgu, a Zeova tagsg yaa wãna?
A tagsg yaa wãn yẽ, ned sã n yãk yam n maan woto?c
Y sẽn mi tɩ Wẽnnaam tagsg yaa woto wã, maanda yãmb bõe?
Yell ning taoore, baa pag sẽn nand vɩɩmã tõe n wa getame tɩ tɩɩm kae n zʋʋg pʋgã yiisg ye. Karm-y Ezayi 41:10, tɩ rẽ poor bɩ y leok sogsgã:
B sã n wa pẽdgd pag n dat t’a yiis a pʋga, ãnda nengẽ la a tõe n paam sõngre? Bõe yĩnga?
NEB KẼER SẼN YETE: “Yɛl kẽer mi n kɩtame tɩ yaa tɩlɛ tɩ pag yiis pʋga.”
Bõe n kɩt tɩ y kɩs sɩd t’a Zeova nanda pag sẽn tʋt vɩɩm, la biigã sẽn nan ket a pʋgẽ wã me vɩɩm?
KƲMSGO
Biiblã pʋgẽ, b wilgame tɩ d segd n nonga vɩɩmã sẽn yaa a Zeova kũunã, n nand-a, la d kogend-a, tɩ yaa tõnd mengã vɩɩm tɩ yaa d taabã vɩɩm.
Lebg-n-gese
Bõe yĩng tɩ ninsaal vɩɩmã tara yõod wʋsg a Zeova nifẽ?
Ned sã n yãk a to yõor ne yamleoogo, a Zeova tagsg yaa wãn ne rẽ?
Yãmb sũur nooma ne vɩɩmã sẽn yaa Wẽnnaam kũunã bɩ? Bõe yĩnga?
BŨMB A TAABA
Wãn to la d tõe n pʋʋs a Zeova barka, a sẽn kõ-d vɩɩmã yĩnga?
Pag sã n da yiis pʋga, Wẽnnaam tõe n kõ-a-la sugr bɩ?
Wãn to la d tagsg sẽn yaa a soab vɩɩmã wɛɛngẽ wã segd n sõng tõnd tɩ d ra wa yãk reem sẽn tõe n wa ne yelle?
La ned sã n wa tagsd a mengã yõor yãkr yelle? Ges-y Biiblã sẽn tõe n sõng to-to.
“M dat n kiime—M sã n wa tagsd m mengã yõor yãkr yelle, Biiblã tõe n sõng-m lame bɩ?” (Bee jw.org)
a Neb nins sũy sẽn sãamã yell paka a Zeova hal wʋsgo. (Yɩɩn-sõamyã 34:19) A wʋmda yɛl nins sẽn tõe n wa kɩt tɩ ned rat n yãk a yõorã võore, la a rat n sõng sẽn maood-b ne yell a woto wã. Y sã n dat n bãng Wẽnnaam sõngrã sẽn tõe n naf ned to-to wã bɩ y karem sõsg ning gom-zug sẽn yaa: “M dat n kiime—M sã n wa tagsd m mengã yõor yãkr yelle, Biiblã tõe n sõng-m lame bɩ?” B sõdga sõs-kãngã “Bũmb a taaba” zĩigẽ.
b Yikri 21:22, 23 (MN) “Rap a yiib sã n zabd taaba, n fão pag sẽn tar pʋg t’a rog tɩ pa ta, tɩ yõor yaool n pa yãke, sẽn tar-a taalã segd n yaoo bũmb ning pagã sɩd sẽn na n togsã. La a segd n yaoome tɩ zems bʋ-kaoodbã sẽn na n yãk yam ningã. La yõor sã n yãke, fo segd n kõo vɩɩm vɩɩm yĩnga.”
c Neb nins sẽn yiis pʋsã pa segd n ningd b mens taal tɩ loog nug ye. A Zeova tõe n kõ-b-la sugri. Y sã n dat n bãng n paas bɩ y karem sõsg ning gom-zug sẽn yaa: “Bõe la Biiblã yet pʋsã yiisg wɛɛngẽ?” B sõdga sõs-kãngã “Bũmb a taaba” zĩigẽ.