Tẽegd-y n pʋʋsd-y y taabã yĩnga

1. Bõe n kɩt tɩ d miẽ tɩ d pʋʋsgã tara yõod wʋsg ne a Zeova?

PƲƲSGÃ yaa bõn-kãsenga. Tags-y n ges-y-yã: A Zeova kõo malɛgsã tʋʋm kẽere. (Yɩɩn. 91:11) A kõo a Biigã me tʋʋm-kãsemse. (Mat. 28:18) La pʋʋsgã yẽ? A Zeova pa kɩt t’a Biigã wall malɛk kelgd tõnd pʋʋsgã ye. Yaa yẽ meng a toor sẽn yaa “Soab ning sẽn wʋmd pʋʋsgã” n kelgde.—Yɩɩn. 65:2.

2. Bõe yĩng tɩ d tõe n yeel t’a Poll kõo mak-sõng pʋʋs neb a taabã yĩngã wɛɛngẽ?

² Yaa sɩd tɩ d tõe n basa d yam n pʋʋs a Zeova, n wilg-a bũmb nins sẽn pak tõndã. La d segd n pʋʋsda d taabã yĩng me. Tẽn-tʋmd a Poll ra maanda woto. Wala makre, a yeela Efɛɛz tigingã neb yaa: “Mam sã n wa pʋʋsdẽ, m gomda yãmb yell wakat fãa.” (Efɛɛ. 1:16) A Poll ra pʋʋsda neb kẽer yĩng me. Wala makre a yeela a Tɩmote yaa: “Mam pʋʋsda Wẽnnaam barka. . . . Mam tẽegda fo yell m se-yõkr sasa wĩndg la yʋngo, n pa basdẽ ye.” (2 Tɩm. 1:3) A Poll ra tara a mengã zu-loees n tõe n pʋʋs rẽ yĩnga. (2 Kor. 11:23; 12:7, 8) La a ra baooda sẽk n pʋʋsd neb a taabã yĩng me.

3. Bõe n mi n kɩt tɩ d yĩmd n pa pʋʋsd d taabã yĩnga?

³ Wakat ninga d mi n yĩmame n pa pʋʋsd d taabã yĩng ye. Bõe yĩnga? Saam-bi-poak a ye yʋʋr sẽn boond t’a Sabrinaa togsa bũmb a ye sẽn mi n kɩt tɩ yaa woto wã n yeel yaa: “Dũni-kãngã pʋgẽ, ned kam fãa tara bũmb wʋsg n maandẽ. D tõe n tagsda d zu-loeesã yell wʋsgo, tɩ kɩt tɩ d sã n wa pʋʋsdẽ bɩ yaa bũmb nins sẽn pak tõndã yell bal la d gomda.” Mi n yaa woto yãmb me nengẽ bɩ? Sã n yaa rẽ, sõs-kãngã na n sõng-y lame. A na n wilga sẽn tar yõod tɩ d pʋʋsd d taabã yĩngã võore, la a kõ sagls d sẽn tõe n maan dẽ to-to wã wɛɛngẽ.

BÕE YĨNG TƖ D SEGD N PƲƲSD D TAABÃ YĨNGA?

4-5. Bõe yĩng tɩ d tõe n yeel tɩ tõnd sẽn pʋʋsd d taabã yĩngã “tara pãng wʋsgo, n sɩd tõe n sõng neda”? (Zak 5:16)

⁴ Pʋʋs d taabã yĩngã “tara pãng wʋsgo, n sɩd tõe n sõng neda.” (Karm-y Zak 5:16.) D sã n pʋʋsd d taabã yĩnga, sɩd tõe n sõngame tɩ b yɛlã toeeme bɩ? N-yẽe. A Zeezi sẽn da mi tɩ pa na n kaoos la tẽn-tʋmd a Pɩyɛɛr kɩɩs t’a pa mi-a wã, a yeel-a lame: “Mam yõka Wẽnnaam sɛɛg fo yĩng sẽn na yɩl tɩ f tẽebã ra koms zãng ye.” (Luk 22:32) A Poll me ra miime tɩ pʋʋsgã tõe n sõnga ned wʋsgo. B sẽn wa n maan-a pãng n yõk-a n pag bãens roog Rommã, a gʋlsa lɛtr n tool a Filemo n yeel yaa: “M saagdame tɩ yãmb pʋʋsgã maasem yĩnga, mam na n paama m meng n wa yãmb nengẽ.” (File. 22) Sɩd yɩɩ woto. Pa yã n kaoos la b yiis a Poll bãensã roogẽ, t’a le sɩng koɛɛgã mooneg ye.

⁵ La woto pa rat n yeel tɩ tõnd sã n pʋʋse, tõe n modga a Zeova t’a maan bũmb ye. A kelgda tõnd sẽn pʋʋsd n kot bũmb ninsã, n mi n yãk yam n maan bũmb tõnd sẽn kose. D sẽn mi rẽ wã tõe n sõng-d lame tɩ d pʋʋs a Zeova yell ning wɛɛngẽ ne d sũur fãa, tɩ rẽ poor bɩ d bas yellã a nugẽ, n kɩs sɩd t’a mii a sẽn na n welg-a to-to tɩ yɩ sõma n yɩɩda.—Yɩɩn. 37:5; ges-y 2 Korẽnt rãmb 1:11.

6. D sã n pʋʋsd d taabã yĩnga, wãn to la tõe n toeem d sẽn get-b to-to wã? (1 Pɩyɛɛr 3:8)

⁶ D sã n pʋʋsd d taabã yĩnga, sõng-d lame tɩ d maneg ‘n zoe b nimbãanega.’ (Karm-y 1 Pɩyɛɛr 3:8.) Ned sẽn yaa nimbãan-zoɛt sã n yã a to sẽn namsde a miime tɩ pa nana ne-a, n dat n sõng-a. (Mark 1:40, 41) Kãsem-soab a ye yʋʋr sẽn boond t’a Mikayɛll yeelame: “M sã n mi n pʋʋsd n gomd bũmb nins sẽn pak m taabã yelle, m manegd n neeme tɩ b maooda wʋsgo, tɩ kɩt tɩ m maneg n nand-ba. M neeme tɩ m sẽn nong-b to-to wã pãng paasdame, baa b sẽn tõe n pa mi rẽ wã.” A Risaar me sẽn yaa kãsem-soabã wilga bũmb a to wɛɛngẽ pʋʋsd d taabã yĩngã sẽn nafd tõndo. A yeelame: “D sã n pʋʋs ned yĩnga, manegd n kɩtame tɩ d rat n sõng a soabã.” A paasame: “D sã n maan bũmb takɩ n sõng ned ning yĩng d sẽn pʋʋsdã, yaa wa d sẽn sõngd n leokd d pʋʋsgã.”

7. D sã n pʋʋsd d taabã yĩnga, wãn to la tõe n sõng-d tɩ d ra tagsd d zu-loeesã yell wʋsgo? (Filip rãmbã 2:3, 4) (Ges-y fot-rãmbã me.)

⁷ D sã n pʋʋsd d taabã yĩnga, tõe n sõnga tõnd tɩ d ra le tagsd d zu-loeesã yell wʋsg ye. (Karm-y Filip rãmb 2:3, 4.) Dũniyã sẽn be a Sʋɩtãan nugẽ wã yĩnga, tõnd ned kam fãa tara zu-loeese. (1 Zã 5:19; Vẽn. 12:12) D sã n minim n pʋʋsd d taabã yĩnga, tẽegda tõnd tɩ d “saam-biisã fãa sẽn be dũniyã zugã me paamda namsg a woto buudu.” (1 Pɩy. 5:9) A Katerin sẽn yaa so-pakdã yeelame: “M sã n pʋʋsd neb a taabã yĩnga, tẽegda maam tɩ bãmb me tara zu-loeese. Rẽ sõngda maam tɩ m pa tagsd m zu-loeesã yell wʋsg ye.”

B RATAME TƖ D PƲƲSD B YĨNGA

8. Ãnd dãmb yĩng la d tõe n pʋʋse?

⁸ Ãnd dãmb yĩng la d tõe n pʋʋse? D tõe n pʋʋsa neb buud toor-toor yĩnga. Wala makre, d tẽed-n-taas nins sẽn ka laafɩ wã, kom-bɩɩs nins b sẽn yaand lekollẽ wã wall b pẽdgd-b n dat tɩ b maan sẽn pa sõma wã, pa rẽ bɩ d tẽed-n-taas nins kʋʋlmã sẽn namsdã. B namsda d tẽed-n-taas wʋsg b tũudmã yĩnga. Tõe tɩ yaa b zakã rãmba, wall tẽngã taoor dãmb n namsd-ba. (Mat. 10:18, 36; Tʋʋ. 12:5) Yɩɩ tɩlɛ tɩ d tẽed-n-taas kẽer zoe n bas b zagse, zab sẽn be b babgẽ wã yĩnga. Sabab-wẽns n nams sãnda. Tõe tɩ tõnd mengã pa mi nin-kãens ye. La d sã n pʋʋsd b yĩnga, d sakda noor ning a Zeezi sẽn kõ n yeel tɩ d “nong taabã.”—Zã 13:34.

9. Bõe yĩng tɩ d segd n pʋʋsd sẽn lʋɩtb taoor a Zeova siglgã pʋgẽ wã yĩnga, la b pagbã me yĩnga?

⁹ D leb n tõe n pʋʋsa sẽn lʋɩt-b taoor a Zeova siglgã pʋgẽ wã yĩnga. Yaa Siglgã taoor lʋɩtb Sull nebã ne b sõngdbã, filyall-dãmbã taoor lʋɩtb sull nebã, Betɛllẽ taoor lʋɩtbã, tigims sull yel-gɛtbã, kãsem-dãmbã la kãsem-sõngdbã. Saam-bi-kãens kẽer maooda ne zu-loeese, la b tʋmd wʋsg n sõngd tõndo. (2 Kor. 12:15) A Mark sẽn yaa tigims sull yel-gɛtã yeelame: “Bũmb a ye sẽn namsd maam wʋsg yaa m sẽn zãr ne m roagdbã sẽn kʋʋlã. B yiibã fãa laafɩ wã pa waoog ye. Baa mam kẽem-bi-puglã ne a sɩdã sẽn get b yell sõma wã, m sũur sãamda wʋsg m sẽn pa tõe n zĩnd yambẽ n ges b yell n yɩɩg woto wã.” D mii zu-loees nins saam-bi-kãensã sẽn tʋmd wʋsgã sẽn tarã tɩ d pa mi me, yɩta sõma tɩ d pʋʋsd b yĩnga. (1 Tes. 5:12, 13) D tõe n pʋʋsda b pagbã yĩng me, bala b teenda b sɩdbã ne b sũy fãa tɩ b tõe n kell n tʋm b tʋʋmã.

10-11. D sã n pʋʋs d tẽed-n-taasã yĩng n pa pʋd ned yʋʋre nooma a Zeova bɩ? Wilg-y y leoorã võore.

¹⁰ D yãame tɩ d wae n pʋʋsda d tẽed-n-taas buud toor-toor yĩnga, tɩ pa nin-yɛng yĩng la d pʋʋsd ye. Wala makre, d tõe n pʋʋsa a Zeova n kos t’a sõng sẽn be-b bãens roogẽ wã, pa rẽ bɩ a bels neb nins ned sẽn maan kaalmã. Kãsem-soab yʋʋr sẽn boond t’a Donall yeelame: “Saam-biis la saam-bi-pogs wʋsg n namsde, tɩ kɩt tɩ d mi n pʋʋsd sẽn namsd-bã fãa yĩnga, sẽn na yɩl n da wa yĩm kẽer yell ye.”

¹¹ Pʋʋs-kãens buudã tata a Zeova yam bɩ? Vẽenega! Sɩd me, d pa mi d tẽed-n-taasã fãa sẽn dat bũmb ningã takɩ ye. Rẽnd zemsame tɩ d pʋʋsd d tẽed-n-taas buud toor-toor yĩnga. (Zã 17:20; Efɛɛ. 6:18) Pʋʋsg a woto wilgdame tɩ d ‘nonga d saam-biisã fãa.’—1 Pɩy. 2:17.

D PƲƲSD D TẼED-N-TAAS TAKƖ YĨNGA

12. D sã n yaa gũusda, wãn to la na n sõng-d tɩ d pʋʋsd n kot bũmb takɩ d tẽed-n-taasã yĩnga?

¹² Yɩ-y gũusda. D sẽn pʋʋsd d tẽed-n-taas buud toor-toor yĩngã sẽn yãk a toogo, yɩta sõma tɩ d pʋʋsd kẽer yĩnga, n pʋt b yʋya. Ned n be yãmb tigingẽ wã n bẽed bãag sẽn tõt saab bɩ? Bi-bɩɩg n be be n koms raoodo, b sẽn pẽdgd-a lekollẽ wã n dat t’a maan bũmb sẽn pa sõma yĩng bɩ? Roagd n be yãmb tigingẽ wã n yaa a ye n wubd a kamba, n modgd wʋsg sẽn na yɩl n wub a kambã “a Zeova kiblgã la a saglsã pʋsẽ” bɩ? (Efɛɛ. 6:4) Y sã n yaa gũusda, y na n maneg n kʋmda y taabã, tɩ kɩt tɩ y rat n pʋʋs b yĩnga.b—Rom. 12:15.

13. Bõe la d tõe n maan tɩ sõng-d tɩ d pʋʋsd neb nins d sẽn pa mi wã yĩnga?

¹³ Pʋʋsd-y y taabã yĩnga, n pʋt b yʋya. Y tõe n maana woto neb nins y sẽn pa mi wã yĩng menga. Wala makre, tags-y d tẽed-n-taas nins sẽn be bãens rotẽ tẽns wala Krime, Eritre, Risi la Sẽngapʋʋr pʋgẽ wã yelle. D tõe n paama d tẽed-n-taas ning sẽn be bãens rotẽ wã yʋy jw.org pʋgẽ.c Tigims sull yel-gɛt a ye yʋʋr sẽn boond t’a Brayan yeelame: “M gũus n gesame tɩ m sã n gʋls m tẽed-n-taag sẽn be bãens roogẽ yʋʋr sebr zug n zẽk m koɛɛg n karem a yʋʋrã, sõngd-m lame tɩ m tẽr a yelle, tɩ m sã n wa pʋʋsdẽ bɩ m mi n gom a yelle.”

14-15. Bõe la d tõe n maan tɩ sõng-d tɩ d pʋʋsd d taabã yĩng n kot bũmb takɩ?

¹⁴ Pʋʋs-y n kos-y bũmb takɩ d tẽed-n-taasã yĩnga. A Mikayɛll sẽn yaa saam-biig ning yell d sẽn zoe n gomã yeelame: “M sã n wa karemd kibay sẽn gomd d saam-biis nins sẽn be bãens rotẽ wã yell jw.org pʋgẽ, m mamsda m tagsg sẽn da na n yɩ to-to, sã n da yaa maam n be b zĩigẽ. M miime tɩ m da na n maanda yɩɩr m pagã yĩnga. M na n dat n bãnga a sã n paamda bũmb nins sẽn yaa tɩlɛ ne-a wã. Rẽ sõngda maam tɩ m bãng bũmb ning m sẽn tõe n pʋʋs n kos d saam-biis nins sẽn be bãens rotẽ n yaool n tar pagbã yĩnga.”—Ebre. 13:3, notã.

¹⁵ D sã n mams d saam-biis nins sẽn be bãens rotẽ wã yɛl sẽn segd n yaa to-to wã, tõe n sõnga tõnd tɩ d bãng bũmb a taab d sẽn tõe n pʋʋs n kos b yĩnga. Wala makre, d tõe n pʋʋsame n kos tɩ bãens roog gũudbã bʋk b mens ne-ba. D leb n tõe n pʋʋsa neb nins sẽn tar naamã yĩnga, sẽn na yɩl tɩ b kõ d saam-biisã lohorem tɩ b tũud a Zeova tɩ gɩdgr kae ye. (1 Tɩm. 2:1, 2) D tõe n pʋʋsa a Zeova n kos tɩ b tigimsã neb sẽn ne b sẽn be bãens roogẽ n maand sɩdã keng b raoodo, la tɩ neb nins sẽn pa tẽedbã yã sẽn be-b bãens roogẽ wã manesem-sõngã, tɩ kɩt tɩ b rat n kelg koe-noogã. (1 Pɩy. 2:12) D tõe n tũu sagl-kãensã tɩ sõng-d d sã n wa rat n pʋʋs d tẽed-n-taas nins sẽn tar zu-loees a taabã yĩng me. D sã n yaa gũusdba, d sã n pʋʋsd d taabã yĩng n pʋt b yʋya, la d pʋʋsd b yĩng n kot bũmb takɩ, d tõogd n wilgame tɩ d “nonga taab wʋsgo.”—1 Tes. 3:12.

D TALL TAGSG SẼN ZEMS D PƲƲSGÃ WƐƐNGẼ

16. Bõe yĩng tɩ d segd n tall tagsg sẽn zems pʋʋsgã wɛɛngẽ? (Matiye 6:8)

¹⁶ D yãame tɩ tõnd pʋʋsgã tõe n kɩtame tɩ yɛl toeeme. La d segd n talla tagsg sẽn zems d pʋʋsgã wɛɛngẽ. D segd n tẽegame tɩ d sã n wa pʋʋsdẽ, d sẽn gomd bũmb ning yellã yaa bũmb a Zeova sẽn zoe n miẽ. A leb n pa baood sagls tõnd nengẽ sẽn na yɩl n bãng a sẽn na n welg yell ning to-to ye. A Zeova mii bũmb nins tõnd tẽed-n-taasã sẽn datã, nand meng tɩ tõnd wall bãmb bãng tɩ b rata bõn-kãense. (Karm-y Matiye 6:8.) Woto wã, bõe yĩng masã tɩ d segd n pʋʋsd d taabã yĩnga? Bũmb nins yell d sẽn gom sõs-kãngã pʋgẽ wã sẽn yãk b toogo, d sã n maand woto d wilgdame tɩ d taabã yell pak-d lame. Nonglmã kɩtame tɩ d pʋʋsd taab yĩnga. Sẽn paase, a Zeova sã n neẽ tɩ d rɩkda a togs-n-taar nonglmã wɛɛngẽ, noom-a lame.

17-18. Mak-bʋg n wilgd tɩ d sẽn pʋʋsd d tẽed-n-taasã yĩngã nooma a Zeova?

¹⁷ Baa d sã n pʋʋsd d tẽed-n-taasã yĩng tɩ wõnd yɛlã pa toeemde, wilgdame tɩ d nong-b lame. A Zeova nee rẽ. D rɩk makre. Mams-y wa rao sẽn na n tar bi-ribl ne bi-pugla, tɩ b fãa ket n yaa bõonego. Bi-riblã wã n lʋɩɩ bãag tɩ pa nana ye. Bi-puglã tɩ yeela a ba wã yaa: “M bõos tɩ f sõng m yaoã. A yĩnsã zabda wʋsgo!” Ba wã zoe n mii a sẽn segd n maan bũmb ning yel-kãngã pʋgẽ. A nonga a bi-riblã, n get a yell sõma. La a sẽn yã t’a bi-puglã nonga a yaoã, hal n wa kos t’a sõng-a wã noom-a-la wʋsgo.

¹⁸ Woto me, a Zeova ratame tɩ d pʋʋsd d taabã yĩnga, tɩ wilgdẽ tɩ b yell pak-d lame. D sã n maand woto d wilgdame tɩ pa tõnd mengã yell bal n pak-do, tɩ d nonga d tẽed-n-taasã wʋsgo, t’a Zeova ne rẽ. (2 Tes. 1:3; Ebre. 6:10) Sẽn paase, wakat kẽere pʋʋsgã tõe n kɩtame tɩ yɛl toeem wa d sẽn yã wã. Woto wã, bɩ d tẽegd n pʋʋsd d taabã yĩnga.