निर्गम
११ मग यहोवा मोशेला म्हणाला: “मी फारोवर आणि इजिप्तवर आणखी एक पीडा आणणार आहे. त्यानंतर तो तुम्हाला इथून पाठवून देईल+ आणि त्या वेळी तर तो तुम्हाला अक्षरशः घालवून देईल.+ २ म्हणून लोकांना सांग, की प्रत्येक पुरुषाने आणि प्रत्येक स्त्रीने आपापल्या शेजाऱ्‍याकडून सोन्याचांदीचे दागिने मागावेत.”+ ३ यहोवाने इजिप्तच्या लोकांना इस्राएली लोकांवर कृपा करायला लावली. शिवाय, इजिप्त देशातले लोक आणि फारोचे सेवकही मोशेचा खूप आदर करायला लागले होते.
४ मग मोशे म्हणाला: “यहोवा असं म्हणतो, ‘आज मध्यरात्री मी इजिप्तमधून जाईन,+ ५ आणि राजासनावर बसणाऱ्‍या फारोपासून ते जात्यावर दळणाऱ्‍या दासीपर्यंत सर्वांचे प्रथमपुत्र, तसंच जनावरांचेही प्रथम जन्मलेले सगळे मरतील.+ ६ संपूर्ण इजिप्त देशात कधीही झाला नाही, आणि पुढे कधीही होणार नाही इतका मोठा हाहाकार होईल.+ ७ पण, इस्राएली लोकांवर आणि त्यांच्या जनावरांवर कुत्राही भुंकणार नाही. यावरून तुम्हाला कळेल, की यहोवा इस्राएलच्या आणि इजिप्तच्या लोकांमध्ये फरक करू शकतो.’+ ८ आणि तुमचे सगळे सेवक येऊन जमिनीवर डोकं टेकवून मला नमन करतील आणि म्हणतील, ‘तू आणि तुझे सर्व लोक इथून निघून जा.’+ मग त्यानंतर मी निघून जाईन.” इतकं बोलून तो फारोसमोरून रागाच्या भरात निघून गेला.
९ तेव्हा यहोवा मोशेला म्हणाला: “इजिप्त देशात मला आणखी चिन्हं दाखवता यावीत, म्हणून फारो तुमचं ऐकणार नाही.”+ १० मोशे आणि अहरोन यांनी ही सगळी चिन्हं फारोसमोर दाखवली.+ पण यहोवाने फारोचं मन कठोर होऊ दिलं, म्हणून फारोने इस्राएली लोकांना आपल्या देशातून जाऊ दिलं नाही.+