१ शमुवेल
३१ पलिष्टी लोक इस्राएलशी लढले,+ तेव्हा इस्राएली माणसांनी पलिष्ट्यांपुढून पळ काढला. आणि अनेक जण गिलबोवा+ डोंगरावर मरून पडले. २ पलिष्टी सैनिक शौलचा व त्याच्या मुलांचा पाठलाग करत त्यांच्या जवळ आले. त्यांनी शौलच्या मुलांना,+ म्हणजे योनाथान,+ अबीनादाब आणि मलकीशुवा यांना मारून टाकलं. ३ शौलविरुद्ध लढाईचा जोर वाढला, आणि तिरंदाजांनी त्याला गाठून फार जखमी केलं.+ ४ मग शौल आपल्या शस्त्रवाहकाला म्हणाला: “तुझी तलवार काढ आणि मला भोसक. नाहीतर हे बेसुंती*+ लोक येऊन माझ्याशी निर्दयीपणे वागतील* आणि मला भोसकून मारून टाकतील.” पण त्याचा शस्त्रवाहक तसं करायला तयार झाला नाही, कारण तो खूप घाबरला होता. म्हणून मग शौलने स्वतःच आपली तलवार काढली आणि तो तिच्यावर पडला.+ ५ शौल मेला आहे+ हे पाहून, त्याचा शस्त्रवाहकही आपल्या तलवारीवर पडून त्याच्यासोबत मेला. ६ अशा प्रकारे शौल, त्याची तीन मुलं, त्याचा शस्त्रवाहक आणि त्याची सगळी माणसं त्याच दिवशी मेली.+ ७ इस्राएली सैनिक पळून गेले आहेत आणि शौल व त्याची मुलं मेली आहेत, हे खोऱ्‍यात आणि यार्देनच्या प्रदेशात राहणाऱ्‍या इस्राएली लोकांनी पाहिलं, तेव्हा ते आपापली शहरं सोडून पळून जायला लागले.+ नंतर पलिष्टी लोक त्या शहरांमध्ये येऊन राहिले.
८ दुसऱ्‍या दिवशी, पलिष्टी लोक मेलेल्या लोकांच्या वस्तू लुटायला आले, तेव्हा गिलबोवा डोंगरावर त्यांना शौल आणि त्याची तीन मुलं मरून पडलेली दिसली.+ ९ मग त्यांनी शौलचं डोकं कापलं आणि त्याच्या अंगावरचं चिलखत* काढून घेतलं. त्यांनी पलिष्ट्यांच्या संपूर्ण देशात आपली माणसं पाठवून, मूर्तींच्या देवळांत+ आणि सर्व लोकांत ही बातमी जाहीर केली.+ १० त्यांनी शौलचं चिलखत* अष्टारोथच्या मंदिरात ठेवलं, आणि त्याचा मृतदेह बेथ-शान+ शहराच्या भिंतीवर टांगला. ११ पलिष्टी लोकांनी शौलच्या बाबतीत जे काही केलं, ते जेव्हा याबेश-गिलादच्या+ लोकांनी ऐकलं, १२ तेव्हा त्यांच्यातले योद्धे निघाले आणि रात्रभर प्रवास करून ते बेथ-शानला पोहोचले. त्यांनी शौल व त्याच्या मुलांचे मृतदेह बेथ-शानच्या भिंतीवरून काढले आणि याबेशमध्ये आणून ते जाळले. १३ मग त्यांनी त्यांच्या अस्थी+ याबेशमध्ये+ एशेल* झाडाखाली पुरल्या आणि सात दिवस उपास केला.