यहेज्केल

९ मग तो मोठ्या आवाजात म्हणाला: “शहराला शिक्षा करणाऱ्‍यांना बोलावून घ्या; प्रत्येकाला आपल्या हातात नाशाचं हत्यार घेऊन यायला सांगा!”

२ तेव्हा पाहा! मला उत्तरेकडे तोंड असलेल्या वरच्या दरवाजाच्या दिशेने सहा माणसं येताना दिसली.+ त्या प्रत्येकाच्या हातात चुराडा करण्यासाठी शस्त्र होतं. त्यांच्यामध्ये मलमलीचे कपडे घातलेला एक माणूसही होता. आणि त्याच्या कमरेला सचिवाची* दौत अडकवलेली होती. ते सगळे येऊन तांब्याच्या वेदीजवळ+ उभे राहिले.

३ नंतर, करुबांच्या वर असलेलं इस्राएलच्या देवाचं तेज+ तिथून निघून मंदिराच्या दरवाजाच्या उंबरठ्यावर आलं.+ मग, मलमलीचे कपडे घातलेल्या आणि कमरेला सचिवाची दौत अडकवलेल्या माणसाला तो हाक मारू लागला. ४ यहोवा त्याला म्हणाला: “संपूर्ण यरुशलेम शहरात फिर, आणि शहरात होत असलेल्या घृणास्पद गोष्टींमुळे+ जी माणसं रडत आहेत आणि शोक करत आहेत+ त्यांच्या कपाळावर खूण कर.”

५ आणि त्याच्यासोबत असलेल्या इतरांना तो मोठ्या आवाजात म्हणाला: “त्याच्यामागे शहरात जा आणि लोकांची कत्तल करा. कोणाचीही गय करू नका आणि कोणालाही दयामाया दाखवू नका.+ ६ म्हातारे-कोतारे, तरुण-तरुणी, लहान मुलं आणि स्त्रिया अशा सगळ्यांना मारून टाका.+ पण, ज्यांच्या कपाळावर खूण आहे त्यांच्याजवळ जाऊ नका.+ माझ्या मंदिरापासूनच सुरुवात करा.”+ तेव्हा त्यांनी मंदिराच्या समोर असलेल्या वडीलजनांपासून सुरुवात केली.+ ७ मग तो त्यांना म्हणाला: “जा! मंदिर अपवित्र करा आणि मंदिराची सगळी अंगणं कत्तल झालेल्या लोकांच्या प्रेतांनी भरून टाका.”+ तेव्हा ते गेले आणि शहरातल्या लोकांना त्यांनी मारून टाकलं.

८ ते लोकांची कत्तल करत होते, त्या वेळी मी एकटाच उरलो. तेव्हा मी जमिनीवर पालथा पडलो आणि मोठ्याने म्हणालो: “हे सर्वोच्च प्रभू यहोवा! तू यरुशलेमवर आपल्या क्रोधाचा वर्षाव करून इस्राएलच्या उरलेल्या सगळ्या लोकांचा नाश करणार आहेस का?”+

९ त्यावर तो मला म्हणाला: “इस्राएलच्या आणि यहूदाच्या घराण्याचा अपराध अतिशय मोठा आहे.+ सगळा देश रक्‍तपाताने भरलाय+ आणि शहरात सगळीकडे भ्रष्टाचार माजलाय.+ कारण ते म्हणत आहेत, ‘यहोवा हा देश सोडून गेलाय. यहोवा काही आपल्याला बघत नाही.’+ १० पण, मला मात्र त्यांच्याबद्दल अजिबात वाईट वाटणार नाही आणि मी त्यांना जरासुद्धा दयामाया दाखवणार नाही.+ त्यांच्या दुष्ट कामांचे परिणाम मी त्यांना भोगायलाच लावीन.”

११ मग मी पाहिलं, की मलमलीचे कपडे घातलेला आणि कमरेला दौत अडकवलेला तो माणूस परत आला आणि म्हणाला: “तू आज्ञा दिली होतीस, तसंच मी केलं.”