रोमकर यांना पत्र
७ बांधवांनो, (ज्यांना नियम माहीत आहेत अशांसोबत मी बोलत आहे) माणूस जिवंत असेपर्यंतच नियमशास्त्राचा त्याच्यावर अधिकार राहतो, हे तुम्हाला माहीत नाही का? २ उदाहरणार्थ, लग्न झालेली स्त्री तिचा नवरा जिवंत असेपर्यंत नियमशास्त्राप्रमाणे त्याला बांधलेली असते. पण नवऱ्‍याचा मृत्यू झाला, तर ती आपल्या नवऱ्‍याच्या नियमातून मुक्‍त होते.+ ३ त्यामुळे, तिचा नवरा जिवंत असताना जर तिने दुसऱ्‍या पुरुषाशी लग्न केलं, तर तिला व्यभिचारी स्त्री म्हटलं जाईल.+ पण नवऱ्‍याचा मृत्यू झाला, तर ती त्याच्या नियमातून मुक्‍त होते. मग जरी तिने दुसऱ्‍या पुरुषाशी लग्न केलं, तरीसुद्धा ती व्यभिचारी स्त्री ठरत नाही.+
४ त्याच प्रकारे माझ्या बांधवांनो, तुम्हीही ख्रिस्ताच्या शरीराद्वारे नियमशास्त्राच्या बाबतीत मेलेले असे झाला. हे यासाठी झालं की तुम्ही दुसऱ्‍याचे,+ म्हणजे ज्याला मेलेल्यांतून उठवण्यात आलं त्याचे व्हावेत,+ आणि आपल्याला देवासाठी फळ उत्पन्‍न करता यावं.+ ५ कारण जेव्हा आपण शरीराप्रमाणे जगत होतो, तेव्हा नियमशास्त्रामुळे उत्तेजित झालेल्या पापी वासना, मरणाचं फळ उत्पन्‍न करण्यासाठी आपल्या शरीरात* कार्य करत होत्या.+ ६ पण आता आपण नियमशास्त्रातून मुक्‍त झालो आहोत.+ कारण जे आपल्यावर बंधन घालत होतं, त्या नियमशास्त्राच्या बाबतीत आपण मेलो आहोत. हे यासाठी, की आपण लेखी नियमांद्वारे जुन्या अर्थाने नाही,+ तर पवित्र शक्‍तीद्वारे* नव्या अर्थाने दास व्हावं.+
७ तर मग, काय म्हणता येईल? नियमशास्त्रात काही दोष* आहे का? नक्कीच नाही! खरं पाहता, नियमशास्त्र नसतं तर पाप काय आहे हे मला समजलं नसतं.+ उदाहरणार्थ, “लोभ धरू नका,” असं नियमशास्त्रात म्हटलं नसतं, तर लोभ काय असतो हे मला समजलं नसतं.+ ८ पण आज्ञेमुळे मिळालेली संधी साधून, पापाने माझ्यात सर्व प्रकारचा लोभ उत्पन्‍न केला. कारण नियमशास्त्राशिवाय पाप निर्जीव होतं.+ ९ खरं पाहिलं, तर एकेकाळी मी नियमशास्त्राशिवाय जगत होतो. पण आज्ञा आल्यावर पाप पुन्हा जिवंत झालं, मी मात्र मेलो.+ १० आणि ज्या आज्ञेने मला जीवनाकडे न्यायला हवं होतं,+ तिने मला मृत्यूकडे नेलं. ११ कारण आज्ञेमुळे मिळालेली संधी साधून पापाने मला मोहात पाडलं आणि त्याद्वारे मला मारून टाकलं. १२ म्हणून, मुळात नियमशास्त्र हे पवित्र आहे आणि आज्ञा ही पवित्र, नीतिमान आणि चांगली आहे.+
१३ मग, जे चांगलं आहे त्यामुळे मला मृत्यू आला का? नक्कीच नाही! तर पापामुळे मला मृत्यू आला. हे यासाठी, की जे चांगलं आहे त्याच्याद्वारे पापच माझा मृत्यू घडवून आणत आहे हे दिसून यावं;+ आणि अशा रितीने पाप किती वाईट आहे हे आज्ञेद्वारे कळून यावं.+ १४ कारण नियमशास्त्र देवाकडून आहे हे आपल्याला माहीत आहे. पण मी शारीरिक आणि पापाला विकलेला असा आहे.+ १५ कारण मी काय करत आहे हे मला समजत नाही. जे करायची माझी इच्छा असते ते मी करत नाही. उलट, ज्या गोष्टींची मला घृणा वाटते, त्याच मी करतो. १६ पण ज्या गोष्टी करायची इच्छा नसते त्या मी करतो, तर यावरून नियमशास्त्र चांगलं आहे असं मी मान्य करतो. १७ पण खरंतर, ते कृत्य करणारा मी नसून, माझ्यात राहणारं पाप ते करत असतं.+ १८ कारण मला माहीत आहे, की माझ्यात, म्हणजेच माझ्या शरीरात काहीही चांगलं नाही. कारण चांगलं करायची माझी इच्छा तर आहे, पण ते प्रत्यक्षात करणं मला जमत नाही.+ १९ कारण ज्या चांगल्या गोष्टी करायची माझी इच्छा असते त्या मी करत नाही, पण ज्या वाईट गोष्टी करायची माझी इच्छा नसते, त्याच मी करत राहतो. २० तर मग, ज्या गोष्टी करायची माझी इच्छा नसते त्याच मी करतो, तेव्हा त्या गोष्टी करणारा मी नसून, माझ्यात असणारं पाप त्या गोष्टी करत असतं.
२१ म्हणून मला माझ्या बाबतीत हा नियम दिसून येतो: योग्य ते करायची माझी इच्छा असते, तेव्हा मला स्वतःमध्ये वाईटच दिसतं.+ २२ मला देवाचा नियम खरंच, अगदी मनापासून आवडतो.+ २३ पण माझ्या शरीरात* मला दुसराच एक नियम दिसून येतो. तो माझ्या मनातल्या नियमाशी लढतो+ आणि मला माझ्या शरीरात* असलेल्या पापाच्या नियमाचा कैदी* बनवतो.+ २४ खरंच, माझी किती दयनीय अवस्था आहे! मृत्यूच्या अधीन असलेल्या माझ्या या शरीरापासून कोण माझी सुटका करेल? २५ आपल्या प्रभू येशू ख्रिस्ताद्वारे मी देवाचे आभार मानतो! तर मग, मनाने मी देवाच्या नियमाचा दास, पण शरीराने पापाच्या नियमाचा दास आहे.+