Филиппой
3 Эцэст нь ах дүү нар аа, Эзэнд үйлчлэн баяр хөөртэй яваарай. Та нарт бичсэнээ дахиад бичихээс би төвөгшөөхгүй. Харин ч та нарыг хамгаалах гэсэн юм.
2 Бузар хүмүүсээс, бусдад гай тарьдаг хүмүүсээс, хөвч таслахыг уриалдаг* хүмүүсээс болгоомжил. 3 Учир нь бид жинхэнэ ёсоор хөвч таслуулсан хүмүүс. Бид Бурхны агуу хүчээр удирдуулан ариун ажилд оролцдог, Христ Есүсээр бахархдаг бөгөөд махан биедээ найддаггүй. 4 Гэхдээ би бусадтай адил махан биедээ найдаж болно л доо.
Махан биедээ найдах үндэстэй гэж боддог хүн байгаа бол тийн бодох үндэс миний хувьд бүр ч их бий. 5 Найм хоногтойдоо хөвч таслуулсан, израйл үндэстэн, Бениамин овгийнх, еврейгээс төрсөн еврей, хуулиар бол фарисай, 6 хичээл зүтгэлээр бол хурлынхныг хавчигч, хуулийг биелүүлдгээрээ бол гэм зэмгүй хүн. 7 Гэхдээ миний хувьд ололт байсан энэ бүхнийг би Христийн төлөө дуртайяа орхисон. 8 Цаашлаад, бүхнээс үнэтэй зүйл буюу Эзэн Христ Есүсийн тухай мэдлэгийг олж авахын тулд бүх юмыг дуртайяа орхисон. Бүх юмыг орхиж, хог гэж үздэг минь Христтэй дотно байх, 9 дагалдагч нь гэдгээ батлах гэснийх юм. Итгэдэг хүнийг Бурхан таалдаг. Би Хууль сахиж Бурханд таалагдахыг бус, харин Христэд итгэн Бурханд таалагдахыг хүсдэг. 10 Миний зорилго бол түүнийг болон түүнийг амилуулсан нэгний хүчийг мэдэх явдал юм. Түүнтэй адил зовж, түүн шиг үхэж, 11 болж өгвөл, эхэлж амилах хүмүүсийн тоонд багтах явдал юм.
12 Би хэдийн хүлээж авсан эсвэл төгс болчихсон юм биш, харин Христ Есүс ямар зорилгоор намайг сонгосон*, түүнд нь хүрэх гэж зүтгэж явна. 13 Ах дүү нар аа, би авчихсан гэж боддоггүй. Харин миний хийдэг ганц юм бол ард үлдсэнийг мартаж, урдах зүйлс рүүгээ зүтгэн тэмүүлдэг. 14 Би тэнгэрт амьдрах гэж тэмүүлдэг. Бурхан энэ шагналыг Есүс Христээр дамжуулж өгнө. 15 Тиймээс төлөвшсөн хүний бодол, хандлага ийм байг. Хэрэв та нар ийм хандлагагүй бол зөв хандлагатай болоход Бурхан тусална. 16 Гэхдээ ахиж дэвшихийн төлөө хийсэн бүхнээ хийсээр байя.
17 Ах дүү нар аа, намайг дуурайцгаа. Бидний үлгэр жишээг дагадаг хүмүүсийг ажиглаж бай. 18 Учир нь Христийн тарчлаах шонгийн* дайсан мэт хүн олон байна. Би тэдний талаар байнга бичиж байсан. Одоо уйлан байж бичиж байна. 19 Тэдний төгсгөл бол сүйрэл, тэдний бурхан бол ходоод. Тэд үнэндээ ичмээр юмаар бахархдаг, ертөнцийнхний боддогийг л боддог. 20 Бид тэнгэрийн иргэн. Бид аврагч нэгэн буюу тэнгэрт байгаа Эзэн Есүс Христийг хүлээж байна. 21 Бүхнийг захирах хүчтэй тэрээр бидний сул дорой биеийг өөрийнхөө сүр жавхлант биетэй адил болгон хувиргана.