Nawfraġju fuq Gżira

ARA! Il-​bastiment qiegħed fl-​inkwiet! Qed jitfarrak biċċiet! Qed tarahom in-​nies li qabżu ġol-​ilma? Xi wħud minnhom ġa waslu x-​xatt. Dak Pawlu hemm? Ejja naraw minn xiex għadda.

Ftakar, għal sentejn Pawlu nżamm priġunier f’Ċesarija. Imbagħad, hu u xi priġunieri oħrajn jitpoġġew fuq bastiment u jerħulha għal Ruma. Meta jgħaddi minn ħdejn il-​gżira taʼ Kreta tqum maltempata terribbli. Ir-​riħ tant jonfoħ li l-​irġiel ma jistgħux jidderieġu l-​bastiment. U ma jistgħux jaraw ix-​xemx matul il-​ġurnata jew l-​istilel matul il-​lejl. Fl-​aħħar, wara ħafna ġranet, dawk fuq il-​bastiment jaqtgħu qalbhom għalkollox li se jiġu salvati.

Imbagħad iqum Pawlu u jgħid: ‘Ħadd minnkom mhu se jitlef ħajtu; il-​bastiment biss se jintilef. Għax il-​bieraħ filgħaxija anġlu t’Alla ġie u qalli, “Tibżax Pawlu! Int trid tidher quddiem il-​ħakkiem Ruman Ċesari. U Alla se jsalva lil dawk kollha li qed jivvjaġġaw miegħek.”’

F’xi nofsillejl fl-​14-​il jum wara li bdiet il-​maltempata, il-​baħrin indunaw li l-​ilma kien qed isir inqas fond! Huma beżgħu li minħabba d-​dlam jibqgħu deħlin fil-​blat, għalhekk niżżlu l-​ankri. L-​għada filgħodu raw bajja. Huma ddeċidew li jipprovaw jidderieġu l-​bastiment dritt sax-​xatt.

Meta jaslu iktar viċin tax-​xatt, il-​bastiment jolqot sikka tar-​ramel u jeħel hemm. Imbagħad il-​mewġ jibda jfarrku biċċiet. L-​uffiċjal tal-​armata li qed jieħu ħsieb jgħid: ‘Dawk kollha li jafu jgħumu jistgħu jaqbżu l-​baħar l-​ewwel u jgħumu sax-​xatt. Il-​bqija aqbżu warajhom u aqbdu biċċa injama li tfarrket mill-​bastiment u żommu magħha.’ U hekk jagħmlu. B’dan il-​mod, il-​276 persuna kollha li kienu fuq il-​bastiment jaslu sax-​xatt qawwijin u sħaħ, eżatt kif wiegħed l-​anġlu.

Il-​gżira jisimha Malta. In-​nies huma qalbhom tajba ħafna, u jieħdu ħsieb lil dawk tal-​bastiment. Meta t-​temp jitjieb, Pawlu ­jittieħed fuq bastiment ieħor lejn Ruma.