Kapitlu 13

Nitgħallmu mit-​Tentazzjonijiet taʼ Ġesù

IMMEDJATAMENT wara l-​magħmudija tiegħu, Ġesu jiġi mmexxi mill-​ispirtu t’Alla lejn ix-​xagħri tal-​Ġudea. Għandu ħafna fuqiex jaħseb, għax mal-​magħmudija tiegħu “is-​smewwiet infetħu,” biex b’hekk setaʼ jifhem ħwejjeġ tas-​sema. Tabilħaqq, għandu ħafna fuqiex jimmedita!

Ġesù jqattaʼ 40 jum u 40 lejl fix-​xagħri u ma jiekol xejn matul dan iż-​żmien. Imbagħad, meta Ġesù jinsab bil-​ġuħ ferm, ix-​Xitan jersaq lejh biex jittantah, billi jgħidlu: “Jekk int iben t’Alla, għid lil dawn il-​ġebliet biex isiru ħobżiet.” Imma Ġesù jaf li huwa ħażin li juża l-​qawwiet mirakolużi tiegħu biex jissodisfa xewqat persunali. Mela jirrifjuta t-​tentazzjoni.

Imma x-​Xitan ma jaqtax qalbu. Jipprova xi ħaġ’oħra. Hu jisfida lil Ġesù biex jaqbeż minn fuq il-​ħajt tat-​tempju biex jiġu l-​anġli t’Alla u jsalvawh. Imma Ġesù ma jaqax għat-​tentazzjoni li jagħmel wirja spettakulari bħal din. Billi jikkwota mill-​Iskrittura, Ġesù juri li huwa ħażin li tqiegħed lil Alla fi prova b’dan il-​mod.

Fit-tielet tentazzjoni, ix-​Xitan juri lil Ġesù s-​saltniet kollha tad-​dinja b’xi mod mirakoluż u jgħidlu: “Dawn l-​affarijiet kollha se nagħtihomlok jekk int taqaʼ u tagħmel att taʼ qima lili.” Imma għal darb’oħra Ġesù jirrifjuta li jċedi għat-​tentazzjoni li jagħmel dak li hu ħażin, u jagħżel li jibqaʼ lejali lejn Alla.

Nistgħu nitgħallmu minn dawn it-​tentazzjonijiet taʼ Ġesù. Juru, per eżempju, li x-​Xitan mhux xi sempliċi kwalità taʼ ħażen, bħalma jsostnu xi wħud, imma huwa persuna vera u inviżibbli. It-​tentazzjoni taʼ Ġesù turi wkoll li l-​gvernijiet kollha tad-​dinja huma l-​propjetà tax-​Xitan. Għax kif setgħet l-​offerta tagħhom mix-​Xitan lil Kristu tkun tentazzjoni vera jekk ma kinux verament tiegħu?

U Aħseb dwar dan: Ix-​Xitan qal li kien lest jippremja lil Ġesù għal att wieħed taʼ qima, saħansitra billi jagħtih is-​saltniet kollha tad-​dinja. Ix-​Xitan jistaʼ sewwa jittanta lilna bl-​istess mod, forsi billi jpoġġi quddiemna opportunitajiet li jħajruna biex niksbu ġid, poter, jew pożizzjoni, fid-​dinja. Imma kemm inkunu għaqlin li nsegwu l-​eżempju taʼ Ġesù billi nibqgħu lejali lejn Alla tkun xi tkun it-​tentazzjoni! Mattew 3:16; 4:​1-11; Mark 1:​12, 13; Luqa 4:​1-13.

▪ X’inhuma l-​affarijiet li mid-​dehra Ġesù jimmedita fuqhom matul l-​40 jum tiegħu fix-​xagħri?

▪ Ix-​Xitan kif jipprova jittantah lil Ġesù?

▪ X’nistgħu nitgħallmu mit-​tentazzjonijiet taʼ Ġesù?