Kapitlu 15

L-​Ewwel Miraklu taʼ Ġesù

ILU biss xi ġurnata jew tnejn mindu Indrì, Pietru, Ġwanni, Filippu, Natanjel, u x’aktarx Ġakbu saru l-​ewwel dixxipli taʼ Ġesù. Dawn issa jinsabu fi triqithom lejn darhom fid-​distrett tal-​Galilija, minfejn ilkoll kemm huma oriġinaw. Id-​destinazzjoni tagħhom hi Kana, il-​belt fejn joqgħod Natanjel, li tinsab fuq il-​għoljiet mhux ’il bogħod minn Nazzaret, fejn trabba Ġesù stess. Ġew ilkoll mistednin għal festa tat-​tieġ f’Kana.

Omm Ġesù wkoll ġiet għat-​tieġ. Bħala ħabiba tal-​familja tal-​agħrajjes, jidher li Marija kienet involuta f’li taqdi l-​ħtiġijiet tal-​ħafna mistednin li kien hemm. Mela malajr tinduna li jonqos xi ħaġa, u tmur tgħid lil Ġesù: “M’għandhomx inbid.”

Meta Marija b’hekk, fil-​fatt, tissuġġerixxi li Ġesù jagħmel xi ħaġa dwar in-​nuqqas taʼ nbid, Ġesù għall-​ewwel iżomm lura. “X’għandi x’naqsam miegħek?” jistaqsi hu. Bħala s-​Sultan maħtur t’Alla, hu m’għandux jiġi mmexxi fl-​attività tiegħu mill-​familjari u l-​ħbieb. Mela Marija bil-​għaqal tħalli l-​kwistjoni f’idejn binha, billi hi sempliċement tgħid lil dawk li qed iservu: “Hu x’inhu li jgħidilkom, agħmluh.”

Sewwa, hemm sitt ġarar kbar tal-​ġebel għall-​ilma, li kull  waħda minnhom tesaʼ iktar minn għaxar galluni. Ġesù jgħid lill-​​qaddejja: “Imlew il-​ġarar tal-​ilma bl-​ilma.” U jimlewhom sax-​xifer. Imbagħad Ġesù jgħid: “Tellgħu ftit minnu issa u ħuduh lid-​direttur tal-​festa.”

Id-direttur jibqaʼ impressjonat bil-​kwalità mill-​aħjar tal-​inbid, bla ma jirrealizza li dan ġie b’riżultat taʼ miraklu. Waqt li jsejjaħ lill-​għarus, hu jgħidlu: “Kull raġel ieħor joħroġ l-​inbid fin l-​​ewwel, u meta n-​nies ikunu mlaħalħin, l-​inferjuri. Int irriżervajt l-​inbid fin sa issa.”

Dan hu l-​ewwel miraklu taʼ Ġesù, u malli jarawh, il-​fidi tad-​dixxipli l-​ġodda tiegħu tissaħħaħ. Wara, flimkien maʼ ommu u ħutu mill-​omm, huma jivvjaġġaw lejn il-​belt taʼ Kapernahum qrib il-​Baħar tal-​Galilija. Ġwann 2:​1-12.

▪ Meta matul il-​ministeru taʼ Ġesù jseħħ it-​tieġ taʼ Kana?

▪ Ġesù għala joġġezzjona għas-​suġġeriment t’ommu?

▪ Liema miraklu jwettaq Ġesù, u x’effett għandu fuq oħrajn?