Kapitlu 126

“Ċertament li Dan Kien Bin Alla”

ĠESÙ m’ilux ħafna fuq iz-​zokk meta, f’nofs in-​nhar, isseħħ dalma misterjuża taʼ tliet sigħat. Eklissi tax-​xemx mhix responsabbli, ladarba dawn iseħħu biss fi żmien il-​qamar ġdid u l-​qamar hu sħiħ fi żmien il-​Qbiż. Barra minn hekk, l-​eklissi tax-​xemx iddum biss ftit minuti. Mela d-​dlam huwa taʼ oriġini divin! X’aktarx li jagħti pawsa lil dawk li qed iwaqqgħu għaċ-​ċajt lil Ġesù, saħansitra jwaqqafhom milli jittantawh.

Jekk il-​fenomenu tal-​biżaʼ jseħħ qabel ma l-​wieħed ħażin jikkritika lil sieħbu u jitlob lil Ġesù biex jiftakar fih, jistaʼ jkun fattur fl-​indiema tiegħu. Forsi huwa matul id-​dalma li erbaʼ nisa, jiġifieri, omm Ġesù u oħtha Salomè, Marija Maddalena, u Marija omm l-​appostlu Ġakbu l-​Wieħed Inqas, jirnexxilhom jersqu qrib iz-​zokk tat-​tortura. Ġwanni, l-​appostlu maħbub taʼ Ġesù, qiegħed hemm magħhom.

Kif tiġi ‘minfuda’ qalb omm Ġesù hekk kif tara lill-​iben li mantniet u rabbiet imdendel hemm f’agunija! Iżda Ġesù jaħseb, mhux dwar l-​uġigħ tiegħu stess, imma dwar min se jieħu ħsiebha. Bi sforz kbir, hu jmejjel rasu lejn Ġwanni u jgħid lil ommu: “Mara, ara! Ibnek!” Imbagħad, billi jmejjel rasu lejn Marija, igħid lil Ġwanni: “Ara! Ommok!”

Ġesù b’hekk jafda l-​kura taʼ ommu, li b’mod evidenti issa hija armla, f’idejn l-​appostlu tiegħu maħbub b’mod speċjali. Hu jagħmel dan għaliex l-​ulied l-​oħra taʼ Marija għadhom ma wrewx fidi fih. B’hekk hu jagħti eżempju mill-​aħjar f’li jipprovdi mhux biss għall-​ħtiġijiet fiżiċi taʼ ommu imma wkoll għal dawk spiritwali tagħha.

F’madwar it-​tlieta taʼ wara nofs in-​nhar, Ġesù jgħid: “Għandi l-​għatx.” Ġesù jħoss li Missieru, bħal li kieku, neħħa l-​protezzjoni minn fuqu sabiex l-​integrità tiegħu tistaʼ tiġi ppruvata sal-​limitu. Mela hu jgħajjat b’leħen għoli: “Alla tiegħi, Alla tiegħi, għala abbandunajtni?” Malli jisimgħu dan, xi wħud li qegħdin bil-​wieqfa hemm fil-​qrib jesklamaw: “Ara! Qed isejjaħ lil Elija.” Minnufih wieħed minnhom jiġri u, billi jpoġġi sponża mxappa b’inbid qares fit-​tarf taʼ qasba taż-​żuf, jagħtih jixrob. Imma oħrajn igħidu: “Ħallih ikun! Ejjew naraw jekk Elija jiġix iniżżlu.”

Meta Ġesù jieħu l-​inbid qares, hu jgħajjat: “Ġie mwettaq!” Iva, hu temm dak kollu li Missieru tas-​sema bagħtu fuq l-​art biex jagħmel. Fl-​aħħarnett, hu jgħid: “Missier, f’idejk nafda l-​ispirtu tiegħi.” Ġesù b’hekk jagħti f’idejn Alla l-​forza tal-​ħajja tiegħu bil-​fiduċja li Alla se jerġaʼ jagħtihielu lura. Imbagħad ibaxxi rasu u jmut.

Fil-mument li Ġesù jieħu l-​aħħar nifs, iseħħ terremot vjolenti, li jiftaħ fi tnejn il-​blatiet. It-​terremot huwa tant qawwi li l-​oqbra tal-​mafkar barra Ġerusalemm jinfetħu u l-​katavri joħorġu b’qawwa kbira minn ġo fihom. Nies li jgħaddu minn hemm u li jaraw l-​iġsma mejtin li ġew esponuti jidħlu fil-​belt u jirrapportaw dan.

Iktar minn hekk, fil-​mument li jmut Ġesù, il-​purtiera kbira ferm li tifred il-​Qaddis mill-​Iktar Qaddis fit-​tempju t’Alla tiġi mċarrta fi tnejn, minn fuq s’isfel. Mid-​dehra din il-​purtiera mżejna sabiħ hi xi 60 pied twila u tqila ferm! Il-​miraklu tal-​għaġeb mhux biss juri l-​għadab t’Alla kontra l-​qattiela taʼ Ibnu imma jissinjifika li l-​mogħdija għal ġol-​Iktar Qaddis, is-​sema nnifsu, saret issa possibbli permezz tal-​mewt taʼ Ġesù.

Sewwa, meta n-​nies iħossu t-​terremot u jaraw l-​affarijiet jiġru, huma jsiru beżgħanin ferm. Il-​fizzjal tal-​armata li qed jieħu ħsieb fl-​eżekuzzjoni jagħti glorja lil Alla. “Ċertament li dan kien Bin Alla,” hu jipproklama. X’aktarx li hu kien preżenti fil-​ġuri taʼ Ġesù quddiem Pilatu meta ġie diskuss dak li Ġesù sostna dwar li hu kien l-​Iben t’Alla. U issa huwa konvint li Ġesù huwa l-​Iben t’Alla, iva, li hu tabilħaqq l-​aqwa bniedem li qatt għex.

Oħrajn ukoll huma mbellhin b’dawn il-​ġrajjiet mirakolużi, u jibdew sejrin lura lejn darhom iħabbtu fuq sidirhom bħala turija tan-​niket u l-​mistħija intensa tagħhom. Josservaw l-​ispettaklu mill-​bogħod hemm ħafna dixxipli nisa taʼ Ġesù li huma mqanqlin b’mod profond minn dawn il-​ġrajjiet importanti ferm. L-​appostlu Ġwanni huwa preżenti wkoll. Mattew 27:​45-56; Mark 15:​33-41; Luqa 23:​44-49; 2:​34, 35; Ġwann 19:​25-30.

▪ Eklissi tax-​xemx għala ma tistax tkun responsabbli għat-​tliet sigħat tad-​dlam?

▪ Ftit qabel il-​mewt tiegħu, Ġesù jipprovdi liema eżempju mill-​aħjar għal dawk li għandhom ġenituri xjuħ?

▪ Liema huma l-​aħħar erbaʼ stqarrijiet taʼ Ġesù qabel ma jmut?

▪ It-​terremot x’iwettaq, u x’inhu s-​sinjifikat taʼ li l-​purtiera tat-​tempju tiċċarrat fi tnejn?

▪ Il-​fizzjal tal-​armata li qed jieħu ħsieb fl-​eżekuzzjoni kif jiġi effettwat mill-​mirakli?