Kapitlu 127

Midfun il-​Ġimgħa​—Qabar Vojt il-​Ħadd

HUWA issa tard il-​Ġimgħa wara nofs in-​nhar, u s-​Sibt tal-​15 taʼ Nisan se jibda f’inżul ix-​xemx. Il-​ġisem mejjet taʼ Ġesù huwa mdendel bla ħajja fuq iz-​zokk, imma ż-​żewġ ħallelin li qegħdin ħdejh għadhom ħajjin. Il-​Ġimgħa wara nofs in-​nhar huwa msejjaħ Tħejjija għaliex dan hu meta n-​nies iħejju ikliet u jlestu kwalunkwe xogħol ieħor taʼ bil-​fors li ma jistax jistenna sa wara s-​Sibt.

Is-Sibt li dalwaqt se jibda mhux biss xi Sibt regulari (is-sebaʼ jum tal-​ġimgħa) imma wkoll Sibt doppju, jew “kbir.” Huwa msejjaħ hekk għaliex il-​15 taʼ Nisan, li hu l-​ewwel jum tal-​Festa tal-​Ażżmi li ddum sebat ijiem (u huwa dejjem Sibt, jiġi f’liema jum jiġi tal-​ġimgħa), jaħbat fl-​istess jum bħas-​Sibt regulari.

Skond il-​Liġi t’Alla, l-​iġsma ma jridux jitħallew imdendlin maʼ zokk bil-​lejl. Mela l-​Lhud jitolbu lil Pilatu li l-​mewt taʼ dawk li qed jiġu maqtulin tiġi mgħaġġla billi jiksrulhom riġlejhom. Is-​suldati, għalhekk, jiksru r-​riġlejn taż-​żewġ ħallelin. Imma ladarba Ġesù jidher li hu mejjet, riġlejh ma jinkisrux. Dan iwettaq l-​iskrittura: “Lanqas għadma minn tiegħu ma se titfarrak.”

Madankollu, biex ineħħi kull dubju li Ġesù huwa verament mejjet, wieħed mis-​suldati idaħħallu lanza f’ġenbu. Il-​lanza tinfed lejn fejn hemm qalbu, u minnufih joħroġ demm u ilma. L-​appostlu Ġwanni, li ra b’għajnejh, jirrapporta li dan iwettaq skrittura oħra: “Huma se jħarsu lejn Dak li lilu nifdu.”

Preżenti wkoll fl-​eżekuzzjoni hemm Ġużeppi mill-​belt taʼ Arimatea, membru magħruf sewwa tas-​Sinedriju. Hu ma riedx jivvota favur l-​azzjoni inġusta tal-​qorti għolja kontra Ġesù. Ġużeppi huwa attwalment dixxiplu taʼ Ġesù, għalkemm kien jibżaʼ li jidentifika lilu nnifsu bħala wieħed. Issa, madankollu, irabbi l-​kuraġġ u jmur għand Pilatu biex jitlob il-​ġisem taʼ Ġesù. Pilatu jsejjaħ lill-​fizzjal tal-​armata li kien qed jieħu ħsieb, u wara li l-​fizzjal jikkonferma li Ġesù huwa mejjet, Pilatu jagħti l-​katavru f’idejn ħaddieħor.

Ġużeppi jieħu l-​ġisem u jgeżwru f’għażel fin u nadif bi tħejjija għad-​difna. Huwa mgħejjun minn Nikodemu, membru ieħor tas-​Sinedriju. Nikodemu wkoll naqas li jistqarr il-​fidi tiegħu f’Ġesù minħabba li beżaʼ li jitlef il-​pożizzjoni tiegħu. Imma issa hu jġib romblu li fih madwar mitt libbra Rumana taʼ mirra u sabbara li jiswew il-​flus. Il-​ġisem taʼ Ġesù huwa mgeżwer b’faxex li fihom dawn il-​ħwawar, sewwa sew bħalma l-​Lhud għandhom id-​drawwa li jħejju l-​iġsma għad-​difna.

Il-ġisem imbagħad jitpoġġa fil-​qabar ġdid tal-​mafkar taʼ Ġużeppi li huwa mnaqqax fil-​blat fil-​ġnien fil-​qrib. Fl-​aħħarnett, ġebla kbira ħafna tiġi mgerbba quddiem il-​qabar. Biex id-​difna ssir qabel is-​Sibt, it-​tħejjija tal-​ġisem issir bil-​għaġla. Għalhekk, Marija Maddalena u Marija omm Ġakbu l-​Wieħed Inqas, li forsi kienu qed igħinu fit-​tħejjija, igħaġġlu lejn id-​dar biex iħejju iktar ħwawar u żjut tal-​fwieħa. Wara s-​Sibt, huma għandhom il-​ħsieb li jikkuraw iktar il-​ġisem taʼ Ġesù sabiex jippreservawh għal perijodu itwal taʼ żmien.

Il-għada, li hu s-​Sibt, il-​qassisin ewlenin u l-​Fariżej imorru għand Pilatu u jgħidu: “Sinjur, aħna ftakarna li dak l-​impustur qal meta kien għadu ħaj, ‘Wara tlett ijiem għandi niġi mqajjem.’ Għalhekk ikkmanda li l-​qabar jintgħamel fis-​sigur sat-​tielet jum, biex id-​dixxipli qatt ma jistgħu jiġu u jisirquh u jgħidu lin-​nies, ‘Hu ġie mqajjem mill-​imwiet!’ u dan l-​impustur tal-​aħħar ikun agħar minn tal-​ewwel.”

“Għandkom gwardja,” iwieġeb Pilatu. “Morru u agħmluh fis-​sigur kif tafu intom.” Mela huma jmorru u jagħmlu l-​qabar fis-​sigur billi jissiġillaw il-​ġebla u jpoġġu suldati Rumani bħala gwardji.

Kmieni l-​Ħadd fil-​għodu Marija Maddalena u Marija omm Ġesù, flimkien maʼ Salomè, Ġovanna, u nisa oħrajn, iġibu ħwawar lejn il-​qabar biex jikkuraw il-​ġisem taʼ Ġesù. Fit-​triq huma jgħidu lil xulxin: “Min se jgerbeb il-​ġebla minn quddiem il-​bieb tal-​qabar tal-​mafkar għalina?” Imma malli jaslu, huma jsibu li seħħ terremot u li l-​anġlu taʼ Jehovah gerbeb il-​ġebla ’l hemm. Il-​gwardji m’humiex hemm, u l-​qabar huwa vojt! Mattew 27:57–28:2; Mark 15:42–16:4; Luqa 23:50–24:​3, 10; Ġwann 19:​14, Ġwann 19:31–20:1; Ġwann 12:42; Levitiku 23:​5-7; Dewteronomju 21:​22, 23; Salm 34:20; Żakkarija 12:10.

▪ Il-​Ġimgħa għala hi msejħa Tħejjija, u x’inhu Sibt “kbir”?

▪ Liema skritturi huma mwettqin f’konnessjoni mal-​ġisem taʼ Ġesù?

▪ Ġużeppi u Nikodemu x’għandhom x’jaqsmu mad-​difna taʼ Ġesù, u x’relazzjoni għandhom maʼ Ġesù?

▪ Il-​qassisin x’jitolbuh lil Pilatu, u hu kif iwieġeb?

▪ X’jiġri kmieni l-​Ħadd fil-​għodu?