Kapitlu 128

Ġesù Huwa Ħaj!

META n-​nisa jsibu l-​qabar taʼ Ġesù vojt, Marija Maddalena titlaq tiġri biex tgħid lil Pietru u lil Ġwanni. Madankollu, in-​nisa l-​oħra b’mod evidenti jibqgħu ħdejn il-​qabar. Malajr, jidher anġlu u jistedinhom biex jidħlu ġewwa.

Hawnhekk in-​nisa jaraw saħansitra anġlu ieħor, u wieħed mill-​anġli jgħidilhom: “Tkunux beżgħanin, għax jien naf li qed tfittxu lil Ġesù li ġie mdendel. M’huwiex hawn, għax ġie mqajjem, bħalma qal hu. Ejjew, araw il-​post fejn kien mimdud. U morru malajr u għidu lid-​dixxipli tiegħu li hu ġie mqajjem mill-​imwiet.” Mela bil-​biżaʼ u b’ferħ kbir, dawn in-​nisa jitilqu jiġru wkoll.

Sa dan il-​ħin, Marija sabet lil Pietru u lil Ġwanni, u tirrapportalhom: “Lill-​Mulej ħaduh minn ġol-​qabar tal-​mafkar, u aħna ma nafux fejn qegħduh.” Minnufih iż-​żewġ appostli jitilqu jiġru. Ġwanni huwa l-​iktar wieħed li jiġri​—b’mod evidenti għax huwa iżgħar​—u jasal l-​ewwel wieħed ħdejn il-​qabar. Sa dan il-​ħin in-​nisa telqu, u għalhekk m’hemm ħadd hemmhekk. Billi jmil ’il quddiem, Ġwanni jittawwal ġol-​qabar u jara l-​faxex, imma jibqaʼ barra.

Meta jasal Pietru, hu ma jaħsibhiex darbtejn imma jibqaʼ dieħel dritt ġewwa. Hu jara l-​faxex mitluqin hemmhekk u wkoll iċ-​ċarruta wżata biex igeżwru ras Ġesù. Hija mgerbba f’post wieħed. Ġwanni issa wkoll jidħol fil-​qabar, u jemmen ir-​rapport taʼ Marija. Imma la Pietru u lanqas Ġwanni ma jifhmu li Ġesù ġie mqajjem, għalkemm Hu spiss kien qalilhom li hekk kien se jiġri. Imħawdin, it-​tnejn li huma jmorru lura d-​dar, imma Marija, li ġiet lura lejn il-​qabar, tibqaʼ hemm.

Sadanittant, in-​nisa l-​oħra qed igħaġġlu biex igħidu lid-​dixxipli li Ġesù ġie rxoxtat, bħalma l-​anġli kkmandawhom biex jagħmlu. Waqt li qed jiġru b’kemm jifilħu, Ġesù jiltaqaʼ magħhom u jgħid: “Il-​jum it-​tajjeb!” Billi jaqgħu ħdejn saqajh, huma jmilu quddiemu. Imbagħad Ġesù jgħid: “Ħa ma jkollkom ebda biżaʼ! Morru, irrapportaw lil ħuti, biex huma jistgħu jitilqu ġewwa l-​Galilija; u hemm se jarawni.”

Iktar kmieni, meta seħħ it-​terremot u dehru l-​anġli, is-​suldati li kienu għassa baqgħu mbellhin u saru bħal bnedmin mejtin. Malli stejqru, huma minnufih marru ġewwa l-​belt u lill-​qassisin ewlenin qalulhom x’kien ġara. Wara li kkonsultaw mal-​“irġiel ixjeħ” tal-​Lhud, ittieħdet id-​deċiżjoni biex jippruvaw imewtu l-​kwistjoni billi jxaħħmu lis-​suldati. Huma ngħataw l-​istruzzjoni: “Għidu, ‘Id-​dixxipli tiegħu ġew bil-​lejl u serquh waqt li konna reqdin.’”

Billi s-​suldati Rumani jistgħu jiġu kkastigati bil-​mewt talli raqdu waqt li kienu għassa, il-​qassisin iwiegħdu: “Jekk dan [ir-rapport taʼ li rqadtu] jasal f’widnejn il-​gvernatur, aħna se nipperswaduh u se neħilsukom mill-​inkwiet.” Ladarba l-​ammont tat-​tixħim kien kbir biżżejjed, is-​suldati jagħmlu kif intqalilhom. Bħala riżultat, ir-​rapport falz dwar li l-​ġisem taʼ Ġesù ġie misruq infirex sewwa maʼ kullimkien fost il-​Lhud.

Marija Maddalena, li tibqaʼ wara ħdejn il-​qabar, hija mnikkta ferm. Fejn jistaʼ jkun Ġesù? Billi tmil ’il quddiem biex tħares ġol-​qabar, hi tara ż-​żewġ anġli lebsin abjad, li reġgħu dehru! Wieħed qiegħed bil-​qiegħda ħdejn ir-​ras u l-​ieħor ħdejn is-​sieq taʼ fejn kien ġie mqiegħed il-​ġisem taʼ Ġesù. “Mara, għala qed tibki?” jistaqsu huma.

“Lill-​Mulej tiegħi ħaduh ’il hemm,” twieġeb Marija, “u jien ma nafx fejn qegħduh.” Imbagħad hi ddur lura u tara lil xi ħadd li jirrepeti l-​mistoqsija: “Mara, għala qed tibki?” U dan il-​wieħed jistaqsi wkoll: “Lil min qed tfittex?”

Billi timmaġina li din il-​persuna hija dak li jieħu ħsieb il-​ġnien li fih jinstab il-​qabar, hi tgħidlu: “Sinjur, jekk ġarrejtu ’l hemm, għidli fejn qigħedtu, u jien se nieħdu ’l hemm.”

“Marija!” tgħid il-​persuna. U minnufih hi tinduna, bil-​mod familjari li bih ikellimha, li huwa Ġesù. “Rab·boʹni!” (li tfisser “Għalliem!”) tesklama hi. U b’ferħ bla tarf, hi taqbad qabda miegħu. Imma Ġesù jgħid: “Tibqax imqabbda miegħi. Għax għadni ma tlajtx għand il-​Missier. Imma mur fi triqtek lejn ħuti u għidilhom, ‘Jien tielaʼ għand Missieri u Missierkom u għand Alla tiegħi u Alla tagħkom.’”

Marija issa titlaq tiġri lejn fejn huma miġburin l-​appostli u sħabhom id-​dixxipli. Hi żżid ir-​rakkont tagħha mar-​rapport li n-​nisa l-​oħra diġà taw dwar li raw lil Ġesù rxoxtat. Iżda, dawn l-​irġiel, li ma emmnux lill-​ewwel nisa, mid-​dehra lanqas ma jemmnu lil Marija. Mattew 28:​3-15; Mark 16:​5-8; Luqa 24:​4-12; Ġwann 20:​2-18.

▪ Wara li ssib il-​qabar vojt, Marija Maddalena x’tagħmel, u n-​nisa l-​oħra x’esperjenza għandhom?

▪ Pietru u Ġwanni kif jirreaġixxu meta jsibu l-​qabar vojt?

▪ In-​nisa l-​oħra maʼ liema ħaġa jiltaqgħu huma u sejrin biex jirrapportaw l-​irxoxt taʼ Ġesù lid-​dixxipli?

▪ X’kien ġralu s-​suldat li kien għassa, u x’kienet ir-​risposta għar-​rapport li huma għamlu lill-​qassisin?

▪ X’jiġri meta Marija Maddalena tkun waħedha fil-​qabar, u d-​dixxipli kif iwieġbu għar-​rapporti tan-​nisa?