Min Huma l-​Anġli u X’Jagħmlu?

Ġeħova jridna nitgħallmu dwar il-​familja li għandu fis-​sema. F’dik il-​familja hemm l-​anġli, li l-​Bibbja tirreferi għalihom bħala ‘l-​ulied t’Alla.’ (Ġob 38:7) Il-​Bibbja x’tgħid dwar l-​anġli? Kif jinfluwenzaw lin-​nies? L-​anġli kollha huma parti mill-​familja t’Alla?

1. Min huma l-​anġli?

Ġeħova ħalaq l-​anġli qabel ma għamel l-​art. Bħalu, huma spirti inviżibbli u jgħixu fis-​sema. (Ebrej 1:14) Hemm miljuni taʼ anġli u kollha għandhom personalità differenti. (Rivelazzjoni 5:11) Huma ‘jwettqu l-​kelma taʼ Ġeħova, billi jisimgħu minn leħnu.’ (Salm 103:20) Fiż-​żminijiet tal-​Bibbja, Ġeħova ġieli bagħat xi anġli biex iwasslu messaġġi. Hu anki użahom biex jgħinu u jsalvaw lin-​nies tiegħu. Illum, l-​anġli jgħinu lill-​Kristjani biex isibu lin-​nies li jridu jitgħallmu dwar Alla.

2. Min huma Satana u d-​dimonji tiegħu?

Xi anġli ma baqgħux leali lejn Ġeħova. L-​ewwel anġlu li ħadha kontra Ġeħova jissejjaħ “Xitan u Satana, li qed iqarraq bl-​art abitata kollha.” (Rivelazzjoni 12:9) Satana ried imexxi lil oħrajn. Allura influwenza lil Adam u Eva u aktar tard lil anġli oħrajn biex ma jibqgħux leali lejn Ġeħova. Dawn l-​anġli ribellużi jissejħu dimonji. Ġeħova keċċiehom mis-​sema għal fuq l-​art u se jeqridhom.​—Aqra Rivelazzjoni 12:​9, 12.

3. Satana u d-​dimonji kif jipprovaw jidħqu bina?

Satana u d-​dimonji jqarrqu b’ħafna nies permezz tal-​ispiritiżmu. Allura, li tikkomunika mal-​ispirti hi xi ħaġa ħażina. Xi nies ifittxu x’jaħsbu l-​astroloġi, lil dawk li jaqraw ix-​xorti, il-​healers, jew is-​sħaħar. Oħrajn jaqraw l-​oroskopju. Jew oħrajn jekk ikunu morda, biex ifiqu jfittxu modi li fihom l-​ispiritiżmu. Xi nies oħra jaħsbu li jistgħu jitkellmu mal-​mejtin. Imma Ġeħova javżana: “Iddurux lejn il-​medji taʼ l-​ispirti, u tikkonsultawx maʼ dawk li xogħolhom hu li jbassru l-​ġrajjiet,” jiġifieri li jgħidu l-​futur. (Levitiku 19:31) Hu javżana biex jipproteġina minn Satana u d-​dimonji tiegħu. Huma l-​għedewwa t’Alla u jixtiequ jweġġgħuna.

TGĦALLEM IŻJED

4. L-​anġli jgħinu lin-​nies isiru jafu lil Ġeħova

L-​anġli t’Alla ma jippritkawx lin-​nies. Imma jistgħu jgħinu lill-​qaddejja t’Alla jsibu lin-​nies li jridu jitgħallmu dwaru. Aqra Rivelazzjoni 14:​6, 7, u mbagħad iddiskuti:

• Għala għandna bżonn l-​għajnuna tal-​anġli biex nippritkaw?

• Jinkuraġġik il-​fatt li l-​anġli jgħinuk issib in-​nies li jridu jkunu jafu dwar il-​Bibbja? Għala?

5. Evita l-​ispiritiżmu

Satana u d-​dimonji huma l-​għedewwa taʼ Ġeħova. Huma l-​għedewwa tagħna wkoll. Aqra Luqa 9:​38-​42, u mbagħad iddiskuti:

• Id-​dimonji kif jittrattawhom lin-​nies?

Aħna ma rridux inħallu lid-​dimonji jinfluwenzawna. Aqra Dewteronomju 18:​10-​12, u mbagħad iddiskuti:

• B’liema modi d-​dimonji jippruvaw jinfluwenzawna u jitkellmu magħna? X’affarijiet taʼ spiritiżmu huma komuni fejn toqgħod int?

• Taħseb li hu tajjeb li Ġeħova ma jaċċettax affarijiet tal-​ispiritiżmu? Għala?

Ara l-​VIDJOW, u mbagħad iddiskuti l-​mistoqsijiet li ġejjin.

VIDJOW: “Opponu lix-​Xitan” (5:​02)

• Il-​brazzuletta li Palesa libbset lit-​tifla, taħseb li kienet perikoluża? Għala?

• Palesa x’kellha tagħmel biex tkun protetta mid-​dimonji?

Il-​Kristjani veri dejjem irreżistew id-​dimonji. Aqra Atti 19:19 u l-​1 Korintin 10:​21, u mbagħad iddiskuti:

• Għala hu importanti li teqred kull ħaġa li għandha x’taqsam mal-​ispiritiżmu?

6. Irbaħ il-​ġlieda kontra Satana u d-​dimonji

Satana jmexxi lid-​dimonji. Imma l-​anġli leali jmexxihom Mikiel, li hu l-​kap tal-​anġli. Mikiel hu isem ieħor għal Ġesù. Kemm hu b’saħħtu Mikiel? Aqra Rivelazzjoni 12:​7-​9, u mbagħad iddiskuti:

• Min hu l-​iżjed b’saħħtu? Mikiel u l-​anġli tiegħu jew Satana u d-​dimonji?

• Taħseb li d-​dixxipli taʼ Ġesù għandhom għal xiex jibżgħu minn Satana u d-​dimonji tiegħu?

Inti tistaʼ tirbaħ il-​ġlieda kontra Satana u d-​dimonji. Aqra Ġakbu 4:​7, u mbagħad iddiskuti:

• Kif tistaʼ tipproteġi lilek innifsek minn Satana u d-​dimonji?

XI DDISKUTEJNA?

L-​anġli leali jgħinuna. Satana u d-​demonji huma l-​għedewwa taʼ Ġeħova. Huma jużaw l-​ispiritiżmu biex iqarrqu bin-​nies.

X’Tgħallimt

• L-​anġli taʼ Ġeħova kif qed jgħinu n-​nies jitgħallmu dwaru?

• Min huma Satana u d-​dimonji?

• Għala ma tridx li jkollok x’taqsam mal-​ispiritiżmu?

ARA IŻJED

Ara kif nafu li Ġesù hu l-​arkanġlu Mikiel.

“Min hu l-​arkanġlu Mikiel?” (Artiklu fuq jw.org)

Sir af li x-​Xitan vera jeżisti u mhuwiex xi ħażen ġo fina.

“Huwa x-​Xitan Reali?” (Artiklu fuq jw.org)

Ara kif mara nħelset mill-​influwenza tad-​dimonji.

“She Found a Purpose in Life” (The Watchtower, July 1, 1993)

Tgħallem kif Satana juża l-​ispiritiżmu biex jidħaq bin-​nies.

“The Truth About Magic, Sorcery, and Witchcraft” (The Road to Everlasting Life, part 5)