Għala l-Ikla taʼ fil-Għaxija tal-Mulej Għandha Tifsira Għalik

ĠESÙ KRISTU istitwixxa l-​Ikla taʼ fil-​Għaxija tal-​Mulej fl-​aħħar lejl tal-​ħajja umana tiegħu. Dak kien il-​Ħamis fil-​għaxija, il-​31 taʼ Marzu, u Ġesù miet il-​Ġimgħa wara nofs in-​nhar, fl-​ewwel t’April. Ladarba l-​jiem tal-​kalendarju Lhudi kienu jgħoddu minn fil-​għaxija taʼ jum għal fil-​għaxija tal-​għada, l-​Ikla taʼ fil-​Għaxija tal-​Mulej u l-​mewt taʼ Ġesù t-​tnejn li huma seħħew fl-​14 taʼ Nisan, tas-​sena 33 E.K.

Ġesù għala istitwixxa din l-​ikla? X’inhu s-​sinjifikat tal-​ħobż u tal-​inbid li huwa uża? Min għandu jieħu sehem minnhom? Kemm kellha tiġi osservata taʼ spiss? U kif jistaʼ jkollha tifsira għalik?

Għala Istitwita?

Rigward l-​Ikla taʼ fil-​Għaxija tal-​Mulej, Ġesù qal lid-​dixxipli tiegħu: “Ibqgħu agħmlu dan b’tifkira tiegħi.” Skond verżjoni oħra, hu qal: “Agħmlu dan bħala mafkar tiegħi.” (1 Korintin 11:​24; The New English Bible) Fil-​fatt, l-​Ikla taʼ fil-​Għaxija tal-​Mulej hija taʼ spiss irreferuta bħala l-​Mafkar tal-​Mewt taʼ Ġesù.

Ġesù miet bħala wieħed li żamm fil-​għoli l-​integrità lejn is-​sovranità taʼ Jehovah u b’hekk ta prova li Satana hu nibbiexi giddieb billi tefaʼ l-​akkuża li bnedmin retti jaqdu lil Alla biss għall-​mottivi egoistiċi. (Ġob 2:1-5) Il-​mewt tiegħu ferrħet lil qalb Alla.—Proverbji 27:11.

Permezz tal-​mewt tiegħu bħala bniedem perfett, Ġesù wkoll ‘ta lil ruħu bħala rahan bi bdil għal ħafna.’ (Mattew 20:28) Billi dineb kontra Alla, l-​ewwel raġel tilef id-​dritt taʼ ħajja umana perfetta u l-​prospetti tagħha. Imma “Alla tant ħabb lid-​dinja [tal-bnedmin] li ta l-​Iben uniġenitu tiegħu, sabiex kulmin qiegħed jeżerċita fidi fih jistaʼ ma jinqeridx imma jkollu l-​ħajja taʼ dejjem.” (Ġwann 3:16) Iva, “il-​ħlas li d-​dnub iħallas hu l-​mewt, imma l-​għotja li jagħti Alla hi ħajja taʼ dejjem bi Kristu Ġesù l-​Mulej tagħna.”—Rumani 6:23.

“Irċevejt mingħand il-​Mulej”

Biex jitfaʼ dawl fuq il-​kommemorazzjoni tal-​mewt taʼ Kristu nsibu l-​kliem tal-​appostlu Pawlu: “Jien irċevejt mingħand il-​Mulej dak li jien ukoll newwiltilkom, li l-​Mulej Ġesù fil-​lejl li kien sejjer ikun ikkunsinnat ħa ħobża u, wara li iżża ħajr, qasamha u qal: ‘Din tfisser il-​ġisem tiegħi li hu għan-​nom tagħkom. Ibqgħu agħmlu dan b’tifkira tiegħi.’ Hu għamel l-​istess rigward il-​kies ukoll, wara li ħa l-​ikla taʼ fil-​għaxija, billi qal: ‘Dan il-​kies ifisser il-​patt il-​ġdid minħabba d-​demm tiegħi. Ibqgħu agħmlu dan, kemm-il darba tixorbuh, b’tifkira tiegħi.’ Għax kull darba li tieklu din il-​ħobża u tixorbu dan il-​kies, intom tibqgħu ixxandru l-​mewt tal-​Mulej, sakemm jasal.”—1 Korintin 11:23-26.

Ladarba Pawlu ma kienx preżenti maʼ Ġesù u l-​ħdax-il appostlu fl-​14 taʼ Nisan tas-​sena 33 E.K., din l-​informazzjoni kienet b’mod evidenti ‘rċevuta mingħand il-​Mulej’ b’rivelazzjoni mnebbħa. Ġesù istitwixxa l-​Mafkar “fil-​lejl li kien sejjer ikun ikkunsinnat” minn Ġuda lill-​għedewwa reliġjużi Lhud, li ġagħalu lir-​Rumani jsammru lil Kristu maʼ zokk. Dawk li huma intitolati biex jieħdu sehem mill-​ħobż u nbid emblematiċi kellhom jagħmlu dan b’tifkira tiegħu.

Jiġi Osservat Kemm-il Darba?

X’ifisser il-​kliem taʼ Pawlu: “Kemm-il darba tieklu din il-​ħobża u tixorbu dan il-​kies, intom tibqgħu ixxandru l-​mewt tal-​Mulej, sakemm jasal”? Kristjani midlukin u leali kellhom jieħdu sehem mill-​emblemi tal-​Mafkar “kemm-il darba” sakemm imutu, biex iktar tard jiġu rxoxtati għal ħajja fis-​sema. Quddiem Alla u d-​dinja, kellhom b’hekk kemm-il darba jistqarru l-​fidi tagħhom fil-​provvediment taʼ Jehovah tas-​sagrifiċċju taʼ Ġesù. Għal kemm żmien? “Sakemm jasal,” qal Pawlu, billi b’mod evidenti ried ifisser li dawn l-​osservanzi kellhom ikomplu sal-​wasla taʼ Ġesù biex jilqaʼ lis-​segwaċi midlukin tiegħu fis-​sema b’irxoxt matul il-​“preżenza” tiegħu. (1 Tessalonkin 4:14-17) Dan huwa fi qbil mal-​kliem taʼ Kristu lill-​ħdax-il appostlu leali: “Jekk immur fi triqti u nħejji post għalikom, nerġaʼ niġi u se nilqagħkom id-​dar għandi, biex fejn inkun jien tistgħu tkunu intom ukoll.”—Ġwann 14:3.

Il-mewt taʼ Kristu għandha tiġi kkomemorata kuljum jew forsi kull ġimgħa? Sewwa, Ġesù istitwixxa l-​Ikla taʼ fil-​Għaxija tal-​Mulej u ġie maqtul fil-​Qbiż, li kkommemorat il-​ħelsien taʼ Iżrael mill-​iskjavitù Eġizzjan. Fil-​fatt, hu msejjaħ “Kristu l-​qbiż tagħna” għaliex hu l-​ħaruf issagrifikat għall-​Kristjani. (1 Korintin 5:7) Il-​Qbiż kien jinżamm darba biss fis-​sena, fl-​14 taʼ Nisan. (Eżodu 12:6, 14; Levitiku 23:5) Dan jissuġġerixxi li l-​mewt taʼ Ġesù għandha tiġi kkommemorata biss taʼ spiss daqs kemm kien il-​Qbiż​—kull sena, mhux kuljum jew kull ġimgħa.

Għal bosta sekli ħafna li sostnew li kienu Kristjani kkommemoraw il-​mewt taʼ Ġesù darba fis-​sena. Minħabba li għamlu dan fl-​14 taʼ Nisan, huma kienu jissejħu Kwartodeċimani, li tfisser “tal-​erbatax.” Rigward dawn l-​uħud, J. L. von Mosheim, kittieb tal-​istorja, kiteb: “Il-​Kristjani tal-​Asja Minuri kellhom id-​drawwa li jiċċelebraw din il-​festa sagra, li tikkommemora l-​istituzzjoni taċ-​ċena tal-​Mulej, u l-​mewt taʼ Ġesù Kristu, fl-​istess ħin meta l-​Lhud kienu jieklu l-​ħaruf tal-​Għid tagħhom, jiġifieri fil-​lejla tal-​erbatax-il jum tal-​ewwel xahar [Nisan]. . . . Huma kkunsidraw l-​eżempju taʼ Kristu bħala li jippossjedi l-​qawwa tal-​liġi.”

Is-​Sinjifikat tal-​Emblemi

Pawlu qal li Ġesù “ħa ħobża u, wara li iżża ħajr, qasamha.” Dik il-​ħobża qisha gallettina magħmula minn dqiq u ilma mingħajr ħmira kellha tiġi maqsuma biex tittiekel. Fis-​simboliżmu tal-​Bibbja, il-​ħmira tagħti stampa taʼ dnub jew korruzzjoni. F’li jħeġġeġ lill-​Kristjani Korintin biex ikeċċu raġel immorali mill-​kongregazzjoni, Pawlu qal: “Ma tafux li ftit ħmira tiffermenta l-​ħbejża kollha? Neħħu l-​ħmira l-​qadima, biex tkunu ħbejża ġdida, skond kif intom ħielsa minn xi ferment. Għax, tabilħaqq, Kristu l-​qbiż tagħna ġie ssagrifikat. Għaldaqstant ejjew inżommu l-​festa, mhux bi ħmira qadima, lanqas bi ħmira taʼ ħażen u qerq, imma bi ftajjar mhux iffermentati taʼ sinċerità u verità.” (1 Korintin 5:6-8) Bħalma naqra taʼ taħlita qarsa tħemmer it-​taħlita kollha, jew għaġna, tal-​ħobż, hekk il-​kongregazzjoni ma kinetx tibqaʼ nadifa f’għajnejn Alla jekk l-​influwenza li tikkorrompi tal-​bniedem midneb ma tiġix imneħħija. Huma kellhom bżonn li jneħħu l-​“ħmira” minn ġo nofshom, sewwa sew bħalma l-​Iżraeliti ma setgħu jkollhom l-​ebda ħmira fi djarhom matul il-​Festa tal-​Ażżmi li segwiet il-​Qbiż.

Rigward il-​ħobża bla ħmira tal-​Mafkar, Ġesù qal: “Din tfisser il-​ġisem tiegħi li hu għan-​nom tagħkom.” (1 Korintin 11:24) Il-​ħobż jirrappreżenta l-​ġisem perfett tal-​laħam taʼ Ġesù, li dwaru Pawlu kiteb: “Meta [Ġesù] jiġi fid-​dinja hu jgħid: ‘“Sagrifiċċju u offerta int ma ridtx, imma int ħejjejt ġisem għalija. Int m’approvajtx offerti maħruqin sħaħ u offerta għad-​dnub.” Imbagħad jien għedt, “Ħares! Jiena ġejt (fir-romblu tal-​ktieb huwa miktub dwari) biex nagħmel ir-​rieda tiegħek, O Alla.”’ . . . Bl-​imsemmija ‘rieda’ aħna ġejna mqaddsin permezz tal-​offerta tal-​ġisem taʼ Ġesù Kristu darba għal dejjem.” (Ebrej 10:5-10) Il-​ġisem uman u perfett taʼ Ġesù kien bla dnub u serva bħala sagrifiċċju b’rahan għall-​umanità.—Ebrej 7:26.

Wara li talab fuq il-​kies taʼ nbid aħmar mhux imħallat, Ġesù qal: “Dan il-​kies ifisser il-​patt il-​ġdid minħabba d-​demm tiegħi.” (1 Korintin 11:25) Verżjoni oħra tgħid: “Dan il-​kies ifisser il-​patt ġdid irratifikat b’demmi.” (Moffatt) Sewwa sew bħalma d-​demm taʼ barrin u bdabad issagrifikati għamlu validu l-​patt tal-​Liġi bejn Alla u l-​ġens taʼ Iżrael, hekk id-​demm taʼ Ġesù mxerred fil-​mewt għamel il-​patt il-​ġdid validu. Li jissemma dak il-​patt jgħinna nidentifikaw lil dawk li b’mod leġġittimu jieħdu sehem mill-​emblemi tal-​Mafkar.

Min Għandu Jieħu Sehem?

Is-​segwaċi midlukin taʼ Ġesù, li qegħdin fil-​patt il-​ġdid, bi dritt jieħdu sehem mill-​emblemi tal-​Mafkar. Dan il-​patt sar bejn Alla u Iżrael spiritwali. (Ġeremija 31:31-34; Galatin 6:16) Imma l-​patt il-​ġdid eventwalment se jġib barkiet għall-​umanità ubbidjenti kollha, u inti tistaʼ tkun fost dawk li se jirċievu dawk il-​barkiet.

Dawk li jieħdu sehem mill-​emblemi tal-​Mafkar iridu jkunu fil-​patt persunali għas-​Saltna li Ġesù għamel. Meta istitwixxa din l-​ikla, Ġesù qal lill-​appostli leali tiegħu: “Nagħmel patt magħkom, sewwa sew bħalma Missieri għamel patt miegħi, għal saltna.” (Luqa 22:29) Il-​patt tas-​Saltna magħmul minn Alla mas-​Sultan David ipponta bil-​quddiem lejn il-​miġja taʼ Ġesù, il-​wieħed li kellu jaħkem għal dejjem fis-​Saltna tas-​sema. Il-​144,000 Iżraeliti spiritwali, li kellhom jaqsmu l-​ħakma miegħu, tingħata stampa tagħhom bħala li huma weqfin fuq il-​Muntanja Sijon tas-​sema mal-​Ħaruf, Ġesù Kristu. Mal-​irxoxt tagħhom, huma se jaħkmu maʼ Kristu bħala slaten u qassisin imseħbin. (2 Samwel 7:11-16; Rivelazzjoni 7:4; 14:1-4; 20:6) Dawk biss li huma fil-​patt il-​ġdid u fil-​patt persunali maʼ Ġesù bi dritt jieħdu sehem mill-​emblemi tal-​Ikla taʼ fil-​Għaxija tal-​Mulej.

L-ispirtu t’Alla jixhed mal-​ispirtu tal-​uħud midlukin li huma t-​tfal Tiegħu u werrieta mseħbin maʼ Kristu. Pawlu kiteb: “L-​ispirtu nnifsu jixhed mal-​ispirtu tagħna li aħna t-​tfal t’Alla. Jekk, allura, aħna tfal, aħna wkoll werrieta: werrieta tabilħaqq t’Alla, imma werrieta bi sħab maʼ Kristu, basta nsofru flimkien biex nistgħu wkoll inkunu gglorifikati flimkien.” (Rumani 8:16, 17) L-​ispirtu qaddis, jew forza attiva, t’Alla joħloq l-​assiguranza ġo wħud midlukin li huma ddestinati għal ħajja fis-​sema. Huma jqisu bħala dirett lejhom kulma tgħid l-​Iskrittura dwar il-​ħajja fis-​sema u lesti li jissagrifikaw l-​affarijiet kollha tal-​art, inkluża l-​ħajja umana. Għalkemm il-​ħajja f’Ġenna tal-​art se tkun tal-​għaġeb, huma m’għandhomx dik it-​tama. (Luqa 23:43) Tama ċerta li ma titbiddilx u li mhix ibbażata fuq ideat reliġjużi foloz tintitolahom biex jieħdu sehem mill-​emblemi tal-​Mafkar.

Jehovah ikun dispjaċut jekk xi ħadd jirrappreżenta lilu nnifsu bħala wieħed li huwa msejjaħ biex ikun sultan u qassis fis-​sema meta ma jkollu l-​ebda sejħa bħal din. (Rumani 9:16; Rivelazzjoni 22:5) Alla għadda esekuzzjoni fuq Kora li b’mod prużuntuż għamel ix-​xogħol taʼ qassis. (Eżodu 28:1; Numri 16:4-11, 31-35) Mela, xi ngħidu jekk emozzjonijiet qawwijin jew ideat reliġjużi taʼ qabel jġiegħlu lil xi ħadd jieħu sehem b’mod żballjat mill-​emblemi tal-​Mafkar? Imbagħad hu jew hi għandhom jieqfu jieħdu sehem u bl-​umiltà kollha jitolbu lil Alla għall-​maħfra.—Salm 19:13.

Kif Tiġi Effettwat

Ma jirrikjedix li persuna tieħu sehem mill-​emblemi tal-​Mafkar sabiex tkun koperta mis-​sagrifiċċju bħala rahan taʼ Ġesù u tirċievi ħajja taʼ dejjem fuq l-​art. Per eżempju, il-​Bibbja ma tagħti l-​ebda indikazzjoni li nies li kellhom il-​biżaʼ t’Alla bħal Abraham, Sara, Iżakk, Rebekka, Boaż, Rut, u David qatt se jieħdu sehem minn dawn l-​emblemi. Imma huma u l-​oħrajn kollha li jixtiequ ħajja bla tmiem fuq dan il-​globu se jkollhom jeżerċitaw fidi f’Alla u fi Kristu u fil-​provvediment taʼ Jehovah tas-​sagrifiċċju bħala rahan taʼ Ġesù. (Ġwann 3:36; 14:1) L-​osservanza annwali tal-​mewt taʼ Ġesù sservi bħala tfakkira taʼ dak is-​sagrifiċċju kbir.

L-importanza tas-​sagrifiċċju taʼ Ġesù ġiet murija meta l-​appostlu Ġwanni qal: “Qiegħed niktbilkom dawn l-​affarijiet biex ma tagħmlux dnub. U madankollu, jekk xi ħadd jagħmel dnub, għandna wieħed li jgħin mal-​Missier, Ġesù Kristu, wieħed twajjeb. U hu sagrifiċċju taʼ tpattija għal dnubietna, iżda mhux għal tagħna biss imma wkoll għal tad-​dinja kollha.” (1 Ġwann 2:1, 2) Kristjani midlukin jistgħu jgħidu li Ġesù huwa ‘sagrifiċċju taʼ tpattija għal dnubiethom.’ Madankollu, huwa wkoll sagrifiċċju għad-​dnubiet tad-​dinja kollha, billi jagħmel possibbli ħajja taʼ dejjem għall-​umanità ubbidjenti fil-​Ġenna tal-​art li issa hija tant qrib!

Billi tkun preżenti għall-​kommemorazzjoni tal-​mewt taʼ Kristu kull sena, int se tibbenefika minn taħdita Biblika li tqanqal il-​ħsieb. Int se tiġi mfakkar f’kemm Alla Jehovah u Ġesù Kristu għamlu għalina. Huwa wkoll premjanti spiritwalment li tiltaqaʼ bħala ġemgħa maʼ dawk li jimpurtahom b’mod profond dwar Alla u Kristu u dwar is-​sagrifiċċju bħala rahan taʼ Ġesù. L-​okkażjoni tistaʼ issaħħaħ sew ix-​xewqa tiegħek sabiex issir wieħed li tirċievi il-qalb tajba mhix mistħoqqa t’Alla, li twassal għall-​ħajja taʼ dejjem. Li tfakkar il-​mewt taʼ Ġesù Kristu jistaʼ jkollu tifsira kbira għalik.