Segwi d-Dawl tad-Dinja

“Min isegwini . . . se jippossjedi d-​dawl tal-​ħajja.”—ĠWANN 8:12.

1. Kemm hu vitali d-​dawl?

X’NAGĦMLU mingħajr dawl? Immaġinak tqum kull ġurnata tas-​sena għal 24 siegħa taʼ dlam. Immaġina dinja mingħajr kuluri, għax mingħajr dawl m’hemm ebda kulur. Tabilħaqq, li kieku ma eżistiex id-​dawl, lanqas aħna ma konna neżistu! Għala le? Għaliex, fil-​proċess tal-​fotosintesi, pjanti ħodor jużaw id-​dawl biex jagħmlu l-​ikel li nieklu—qmuħ, ħxejjex, u frott. Veru, xi drabi aħna nieklu l-​laħam tal-​annimali. Imma dawk l-​annimali kielu l-​pjanti jew annimali oħrajn li kienu jgħixu fuq il-​pjanti. B’hekk, il-​ħajjiet fiżiċi tagħna totalment jiddependu fuq id-​dawl.

2. Liema sorsi qawwijin taʼ dawl hemm, u dan x’igħidilna dwar Jehovah?

² Id-​dawl tagħna jiġi mix-​xemx, li hi stilla. Fil-​waqt li x-​xemx tagħna tagħti kwantità tremenda taʼ dawl, xorta waħda hija biss stilla taʼ daqs medju. Ħafna huma bil-​wisq ikbar. U l-​grupp taʼ stilel li ngħixu fih aħna, il-​galassa Triq tal-​Ħalib, fih iktar minn mitt biljun stilla. Jerġaʼ, hemm biljuni bla għadd taʼ galassi fl-​univers. Xi sfilata tremenda taʼ stilel! Xi kwantitajiet enormi taʼ dawl joħorġu minnhom! X’sors setgħan taʼ dawl hu Jehovah, li ħalaqhom kollha! Isaija 40:26 jiddikjara: “Erfgħu għajnejkom ’il fuq u araw. Min ħalaq dawn l-​affarijiet? Huwa Dak li qiegħed joħroġ l-​armata tagħhom saħansitra bil-​għadd, li lkoll kemm huma jsejħilhom saħansitra bl-​isem. Minħabba l-​abbundanza tal-​enerġija dinamika, billi hu wkoll vigoruż fil-​qawwa, lanqas waħda minnhom m’hi nieqsa.”

Xorta Oħra taʼ Dawl

3. Kemm hu importanti dawl spiritwali mingħand Jehovah?

³ Jehovah hu wkoll is-​Sors taʼ xorta oħra taʼ dawl, wieħed li jgħinna biex ikollna viżjoni spiritwali, tidwil spiritwali. Dizzjunarju wieħed jiddefinixxi “jdawwal” b’dan il-​mod: “Li jforni għarfien lil: jistruwixxi; jagħti dehen spiritwali lil.” Jiddefinixxi “imdawwal” bħala: “meħlus mill-​injoranza u nuqqas taʼ informazzjoni.” Tidwil spiritwali mingħand Jehovah hu pprovdut permezz taʼ għarfien eżatt tal-​Kelma tiegħu, il-​Bibbja. Dak hu li jgħinna nkunu nafu min hu Alla u x’inhuma l-​iskopijiet tiegħu. “Alla hu li qal: ‘Ħalli d-​dawl jiddi ’l barra mid-​dlam,’ u hu idda fuq qlubna biex idawwalhom bil-​għarfien glorjuż t’Alla bil-​wiċċ taʼ Kristu.” (2 Korintin 4:6) B’hekk, il-​veritajiet fil-​Kelma t’Alla jeħilsuna mill-​injoranza u n-​nuqqas taʼ informazzjoni. Ġesù qal: “Se tkunu tafu l-​verità, u l-​verità se tagħmilkom liberi.”—Ġwann 8:32.

4, 5. Għarfien mingħand Jehovah kif jaqdi bħala dawl fil-​ħajjiet tagħna?

⁴ Jehovah, is-​Sors tat-​tidwil spiritwali veru, hu “perfett fil-​għarfien.” (Ġob 37:16) Ukoll, Salm 119:105 jiddikjara dwar Alla: “Il-​kelma tiegħek hi musbieħ għal sieqi, u dawl għal triqti.” Mela hu jistaʼ jdawwal spiritwalment mhux biss il-​pass li jmiss tal-​ħajjiet tagħna imma wkoll it-​triq quddiemna. Mingħajr dan, il-​ħajja tkun bħal meta wieħed isuq minn triq imserpa fil-​muntanji f’lejl mudlam mingħajr dwal fil-​karozza jew x’imkien ieħor. Dawl spiritwali mingħand Alla jistaʼ jitqabbel mad-​dawl ipprovdut mill-​fanali taʼ quddiem tal-​karozza. Id-​dawl idawwal it-​triq sabiex inkunu nistgħu naraw eżatt fejn sejrin.

⁵ Il-​profezija f’​Isaija 2:2-5 turi li fi żmienna Alla qed jiġbor mill-​ġnus kollha nies li jridu tidwil spiritwali sabiex ikunu jistgħu jitgħallmu u jipprattikaw il-​qima vera. Vers 3 jgħid: “Hu se jistruwina dwar il-​mogħdijiet tiegħu, u aħna se nimxu fil-​passaġġi tiegħu.” Vers 5 jistieden lil dawk li jfittxu l-​verità: “Ejjew u ħalli nimxu fid-​dawl taʼ Jehovah.”

6. Id-​dawl mingħand Jehovah fejn se jwassalna eventwalment?

⁶ B’hekk, Jehovah hu s-​sors taʼ żewġ għamliet taʼ dawl vitali għall-​ħajja: il-​fiżiku u l-​ispiritwali. Id-​dawl fiżiku jgħin lill-​iġsma fiżiċi tagħna biex jibqgħu ħajjin issa, forsi għal xi 70 jew 80 sena. Imma d-​dawl spiritwali jwassal għall-​ħajja eterna f’ġenna tal-​art. Huwa bħalma qal Ġesù f’talba lil Alla: “Dan ifisser il-​ħajja taʼ dejjem, li jieħdu għarfien dwarek, l-​uniku veru Alla, u dwar dak li inti bgħatt, Ġesù Kristu.”​—Ġwann 17:3.

Dinja fi Dlam Spiritwali

7. Għala għandna bżonn tidwil spiritwali issa iżjed minn qatt qabel?

⁷ Illum iżjed minn qatt qabel għandna bżonn dawl spiritwali. Profeziji bħalma huma Mattew 24 u 2 Timotew kapitlu 3 juru li aħna qrib it-​tmiem taʼ din is-​sistema taʼ affarijiet. Dawn u profeziji oħrajn bassru l-​affarijiet tal-​biżaʼ li seħħew fi żmienna, billi b’hekk ġagħluna nkunu nafu li qegħdin fl-​“aħħar jiem.” Fi qbil maʼ dawn il-​profeziji, dan is-​seklu ġarrab gwaj wara l-​ieħor. Il-​kriminalità u l-​vjolenza laħqu proporzjonijiet tal-​biżaʼ. Il-​gwerer ħadu iktar minn mitt miljun ħajja. Il-​mard, bħalma hu l-​AIDS li jkexkxek, jaħkem lil miljuni, waqt li xi 160,000 diġà mietu mill-​AIDS fl-​Istati Uniti biss. Il-​ħajja tal-​familja tkissret u l-​moralità sesswali titqies bħala antikwata.

8. Liema sitwazzjoni tiffaċċja issa lill-​umanità, u għala?

⁸ L-​ex-segretarju ġenerali tal-​Ġnus Magħquda Javier Pérez de Cuéllar qal: “Is-​sitwazzjoni dinjija toffri evidenza abbundanti li l-​faqar [qed iherri] il-​għaqda fis-​soċjetajiet.” Hu nnota li “’l fuq minn biljun ruħ issa jgħixu f’faqar assolut” u li “dan ħeġġeġ il-​forzi li jwasslu għal ġlied vjolenti.” Dawn “it-​tbatijiet gravi,” hu qal, “jisfidaw ir-​rimedji li jistgħu jamministraw il-​gvernijiet.” U l-​kap taʼ organizzazzjoni influwenti afferma: “Il-​problema ċentrali li qiegħda tiffaċċja lis-​soċjetà hi dik li din saret ingovernabbli.” Kemm huma veri l-​kliem taʼ Salm 146:3: “Tpoġġux il-​fiduċja tagħkom fin-​nobbli, lanqas f’bin il-​bniedem tal-​art, li lilu ma tappartjeni ebda salvazzjoni.”

9. Min huma l-​iktar responsabbli għad-​dlam li jostor lill-​umanità, u min jistaʼ jeħlisna minn din l-​influwenza?

⁹ Is-​sitwazzjoni llum hi bħalma bassar Isaija 60:2: “Ħares! dalma nfisha se tiksi l-​art, u swidija kbira l-​gruppi nazzjonali.” Din id-​dalma li qiegħda tiksi lill-​maġġoranza vasta tal-​abitanti tal-​art hi minħabba li huma ma jassorbux id-​dawl spiritwali mingħand Jehovah. U l-​kawża ewlenija tad-​dlam spiritwali hu Satana x-​Xitan u d-​demonji tiegħu, il-​għedewwa prinċipali taʼ Dak Alla tad-​dawl. Huma “l-​ħakkiema tad-​dinja taʼ dan id-​dlam.” (Efesin 6:12) Kif igħid it-​2 Korintin 4:4, ix-​Xitan hu “l-​alla taʼ din is-​sistema taʼ affarijiet,” li “għama l-​imħuħ taʼ dawk li ma jemmnux, biex id-​dawl tal-​aħbar tajba glorjuża dwar il-​Kristu, li hu x-​xbiha t’Alla, jistaʼ ma jiddix.” L-​ebda ħakma umana ma tistaʼ teħles lid-​dinja mill-​influwenza taʼ Satana. Alla biss jistaʼ.

“Dawl Kbir”

10. Isaija kif bassar li fi żmienna dawl kellu jiddi fuq l-​umanità?

¹⁰ Madankollu, waqt li dalma ħoxna tiksi lill-​biċċa l-​kbira tal-​umanità, il-​Kelma t’Alla pprofetizzat ukoll f’​Isaija 60:​2, 3: “Fuqek Jehovah se jiddi, u fuqek il-​glorja tiegħu stess se tkun tidher. U ġnus ċertament li se jmorru lejn dawlek.” Dan hu fi qbil maʼ Isaija kapitlu 2, li wiegħed li l-​qima vera mdawla taʼ Jehovah se tiġi stabbilita f’dawn l-​aħħar jiem u, kif igħidu versi 2 u 3, “lejha l-​ġnus kollha jridu jiġru bħal xmara. U ħafna popli ċertament li se jmorru u jgħidu: ‘Ejjew u ħalli nitilgħu lejn il-​muntanja taʼ Jehovah,’” jiġifieri, lejn il-​qima vera eżaltata tiegħu. Mela għalkemm id-​dinja hija kkontrollata minn Satana, dawl mingħand Alla qed jiġi mitfugħ u qed jillibera qtajjiet kbar taʼ nies mid-​dlam.

11. Min kellu jkun l-​iktar prominenti f’li jirrifletti d-​dawl taʼ Jehovah, u Simeon kif identifikah?

¹¹ Il-​profezija f’​Isaija 9:2 bassret li Alla kien se jibgħat lil xi ħadd fid-​dinja biex jirrifletti d-​dawl tiegħu. Hija tgħid: “In-​nies li kienu qegħdin jimxu fid-​dlam raw dawl kbir. Inkwantu għal dawk li joqogħdu fl-​art tad-​dell fond, dawl innifsu idda fuqhom.” Dan id-​“dawl kbir” hu l-​Kelliemi taʼ Jehovah, Ġesù Kristu. Ġesù qal: “Jien id-​dawl tad-​dinja. Min isegwini b’ebda mod ma se jimxi fid-​dlam, imma se jippossjedi d-​dawl tal-​ħajja.” (Ġwann 8:12) Dan kien magħruf minn xi wħud saħansitra meta Ġesù kien għadu tfajjel ċkejken. Luqa 2:25 igħid li raġel jismu Simeon kien “twajjeb u reverenzjali” u li “l-​ispirtu qaddis kien fuqu.” Meta Simeon ra lit-​tfajjel ċkejken Ġesù, hu qal f’talba lil Alla: “Għajnejja raw il-​mezz tiegħek taʼ salvazzjoni li int lestejt quddiem wiċċ il-​popli kollha, dawl biex jitneħħa l-​velu mill-​ġnus.”—Luqa 2:30-32.

12. Ġesù meta u kif beda jneħħi l-​velu taʼ dalma li jostor lin-​nies?

¹² Ġesù beda jneħħi l-​velu taʼ dlam mill-​umanità ftit wara l-​magħmudija tiegħu. Mattew 4:12-16 igħidilna li dan wettaq Isaija 9:​1, 2, li tkellem dwar id-​“dawl kbir” li kellu jibda jiddi fuq nies li kienu mexjin fi dlam spiritwali. Mattew 4:17 igħid: “Minn dak iż-​żmien ’il quddiem Ġesù beda jippriedka u jgħid: ‘Indmu, għax is-​saltna tas-​smewwiet resqet fil-​qrib.’” Billi ppriedka dwar l-​aħbar tajba tas-​Saltna t’Alla, Ġesù dawwal lin-​nies dwar l-​iskopijiet t’Alla. Hu “tafaʼ dawl fuq il-​ħajja u n-​nuqqas taʼ taħsir permezz tal-​aħbar tajba.”—2 Timotew 1:10.

13. Ġesù kif iddeskriva lilu nnifsu, u għala setaʼ jagħmel hekk b’tant ċertezza?

¹³ Ġesù bil-​fedeltà rrifletta d-​dawl t’Alla. Hu qal: “Jien ġejt bħal dawl fid-​dinja, sabiex kulmin qiegħed ipoġġi fidi fija jistaʼ ma jibqax fid-​dlam. . . . Jien ma tkellimtx minn jeddi, imma l-​Missier innifsu li bagħatni tani kmandament dwar x’irrid ingħid u x’irrid nitkellem. Ukoll, jien naf li l-​kmandament tiegħu jfisser ħajja taʼ dejjem.”—Ġwann 12:​44-50.

“Permezz Tiegħu Kienet il-​Ħajja”

14. Ġesù kif inhu identifikat fi Ġwann 1:​1, 2?

¹⁴ Iva, Jehovah bagħat lil Ibnu lejn l-​art biex ikun dawl biex juri lin-​nies it-​triq għall-​ħajja taʼ dejjem. Innota kif dan hu ppreżentat fi Ġwann 1:1-16. Versi 1 u 2 jaqraw: “Fil-​bidu kien il-​Kelma, u l-​Kelma kien maʼ Alla, u l-​Kelma kien wieħed alla. Dan il-​wieħed kien fil-​bidu maʼ Alla.” Hawn Ġwanni jsejjaħ lil Ġesù qabel sar bniedem bit-​titlu l-​“Kelma.” Dan jidentifika l-​funzjoni li kien iwettaq bħala l-​Kelliemi taʼ Alla Jehovah. U meta Ġwanni jistqarr li “fil-​bidu kien il-​Kelma,” dan ifisser li l-​Kelma kien il-​bidu tax-​xogħlijiet taʼ ħolqien taʼ Jehovah, “il-​bidu tal-​ħolqien minn Alla.” (Rivelazzjoni 3:14) Il-​pożizzjoni mill-​iktar distinta tiegħu fost il-​ħlejjaq t’Alla tagħti bażi vera biex hu jissejjaħ “wieħed alla,” wieħed setgħan. Isaija 9:6 isejjaħlu “Alla Setgħan,” għalkemm mhux Alla li Jistaʼ Kollox.

15. Liema informazzjoni oħra jagħtina Ġwann 1:​3-5 dwar Ġesù?

¹⁵ Ġwann 1:3 jistqarr: “L-​affarijiet kollha bdew jeżistu permezz tiegħu, u mingħajru lanqas saħansitra ħaġa waħda ma bdiet teżisti.” Kolossin 1:16 igħid li “permezz tiegħu l-​affarijiet l-​oħra kollha nħolqu fis-​smewwiet u fuq l-​art.” Ġwann 1:4 igħid li “permezz tiegħu kienet il-​ħajja, u l-​ħajja kienet id-​dawl tal-​bnedmin.” Mela permezz tal-​Kelma, il-​għamliet l-​oħrajn kollha taʼ ħajja ġew maħluqin; ukoll permezz taʼ Ibnu, Alla jagħmilha possibbli għall-​umanità midinba, li qiegħda tmut, biex tikseb ħajja taʼ dejjem. Ċertament Ġesù hu l-​wieħed setgħan li Isaija 9:2 isejjaħlu “dawl kbir.” U Ġwann 1:5 igħid: “[I]d-dawl qiegħed jiddi fid-​dlam, imma d-​dlam ma għelbux.” Id-​dawl jirrappreżenta l-​verità u t-​tjieba, f’kuntrast mad-​dlam, li jirrappreżenta l-​iżball u n-​nuqqas taʼ tjieba. B’hekk Ġwanni juri li d-​dlam mhux se jikkonkwista lid-​dawl.

16. Ġwanni l-​Għammied kif ipponta lejn l-​iskop tax-​xogħol taʼ Ġesù?

¹⁶ Ġwanni issa jargumenta f’versi 6 sa 9: “Kien hemm raġel li kien mibgħut bħala rappreżentant t’Alla: kien jismu Ġwanni [l-Għammied]. Dan ir-​raġel ġie għal xiehda, sabiex jagħti xiehda dwar id-​dawl, biex nies taʼ kull xorta jistgħu jemmnu permezz tiegħu. Hu [Ġwanni] ma kienx dak id-​dawl, imma ġie biex jagħti xiehda dwar dak id-​dawl [Ġesù]. Il-​veru dawl li jagħti dawl lil kull xorta taʼ bniedem kien wasal biex jiġi fid-​dinja.” Ġwanni pponta lejn il-​Messija li kien ġej u dawwar lis-​segwaċi tiegħu Lejh. Maż-​żmien, kull xorta taʼ nies ingħataw l-​opportunità biex jaċċettaw id-​dawl. Mela Ġesù ma ġiex biss għall-​benefiċċju tal-​Lhud imma għall-​benefiċċju tal-​umanità kollha​—sinjuri jew fqar, huma taʼ liema razza huma.

17. Ġwann 1:​10, 11 x’jgħidilna dwar il-​qagħda spiritwali tal-​Lhud fi żmien Ġesù?

¹⁷ Versi 10 u 11 ikomplu: “Hu kien fid-​dinja, u d-​dinja bdiet teżisti permezz tiegħu, imma d-​dinja ma kinetx tafu. Hu ġie f’daru stess, imma niesu stess ma daħħluhx ġewwa.” Ġesù, fl-​eżistenza tiegħu qabel sar bniedem, kien il-​wieħed li permezz tiegħu ġiet maħluqa d-​dinja taʼ bnedmin. Meta kien fuq l-​art, iżda, hu ġie rrifjutat mill-​biċċa l-​kbira taʼ niesu stess, il-​Lhud. Huma ma ridux li jinkixfu l-​ħażen u l-​ipokrezija tagħhom. Ippreferew id-​dlam mid-​dawl.

18. Ġwann 1:​12, 13 kif juri li xi wħud setgħu jsiru tfal t’Alla b’wirt speċjali?

¹⁸ Ġwanni jgħid f’versi 12 u 13: “Madankollu, dawk kollha li laqgħuh, lilhom ta l-​awtorità li jsiru t-​tfal t’Alla, għaliex huma kienu qegħdin jeżerċitaw fidi f’ismu; u huma twieldu, mhux mid-​demm jew minn rieda tal-​laħam jew mir-​rieda tal-​bniedem, imma minn Alla.” Dawn il-​versi juru li għall-​ewwel, is-​segwaċi taʼ Ġesù ma kinux ulied Alla. Qabel ġie Ġesù fuq l-​art, la l-​istat taʼ iben bħal dan u lanqas xi tama għas-​sema ma kienu miftuħin għall-​bnedmin. Imma bil-​mertu tas-​sagrifiċċju bħala rahan taʼ Kristu li eżerċitaw il-​fidi fih, xi bnedmin ġew addottati bħala wlied u setgħu jkollhom it-​tama taʼ ħajja bħala slaten maʼ Kristu fis-​Saltna tas-​sema t’Alla.

19. Ġesù għala jinsab fl-​aħjar pożizzjoni biex jirrifletti d-​dawl t’Alla, bħalma jidher fi Ġwann 1:14?

¹⁹ Vers 14 jirraġuna: “Mela l-​Kelma sar laħam u għammar fostna, u aħna kellna dehra tal-​glorja tiegħu, glorja bħalma tappartjeni lil iben uniġenitu minn missier.” Fuq l-​art, Ġesù rrifletta l-​glorja t’Alla bħalma setaʼ jagħmel biss l-​Iben imwieled l-​ewwel t’Alla. Għaldaqstant, b’mod uniku, hu kien l-​aħjar wieħed ikkwalifikat biex jirrivela lil Alla u l-​iskopijiet Tiegħu lin-​nies.

20. Bħalma nsibu fi Ġwann 1:​15, Ġwanni l-​Għammied x’jgħidilna dwar Ġesù?

²⁰ Imbagħad, l-​appostlu Ġwanni jikteb f’vers 15: “Ġwanni [l-Għammied] ta xiehda dwaru, iva, hu fil-​fatt għajjat​—dan kien il-​wieħed li qal dan—​billi qal: ‘Il-​wieħed li ġej warajja avvanza quddiemi, għaliex hu eżista qabli.’” Ġwanni l-​Għammied twieled xi sitt xhur qabel it-​twelid taʼ Ġesù bħala bniedem. Imma Ġesù għamel ħafna iżjed xogħlijiet minn Ġwanni, biex b’hekk avvanza quddiem Ġwanni b’kull mod. U Ġwanni rrikonoxxa li Ġesù kien eżista qablu, ladarba Ġesù kellu eżistenza qabel sar bniedem.

Għotjiet mingħand Jehovah

21. Ġwann 1:16 għala jgħid li aħna rċevejna “qalb tajba mhix mistħoqqa fuq qalb tajba mhix mistħoqqa”?

²¹ Ġwann 1:16 jirraġuna: “Aħna lkoll irċevejna minn ġol-​milja tiegħu, saħansitra qalb tajba mhix mistħoqqa fuq qalb tajba mhix mistħoqqa.” Għalkemm il-​bnedmin jitwieldu fid-​dnub għaliex jirtuh mingħand Adam, Jehovah għandu l-​iskop li jeqred lil din is-​sistema mill-​agħar, iġib is-​salvazzjoni lil miljuni għal ġod-​dinja ġdida, jagħti l-​irxoxt lill-​mejtin, u jneħħi d-​dnub u l-​mewt, li jwasslu għal ħajja taʼ dejjem f’ġenna tal-​art. Dawn il-​barkiet kollha huma mhux mistħoqqa mill-​bnedmin midinbin, mhux bi ħlas għal xogħolhom. Huma għotjiet mingħand Jehovah permezz taʼ Kristu.

22. (a) L-​akbar għotja t’Alla x’tagħmel possibbli? (b) Liema stedina hija estiża lilna fl-​aħħar ktieb tal-​Bibbja?

²² X’inhi l-​ikbar għotja li tagħmel dan kollu possibbli? “Alla tant ħabb lid-​dinja [tal-umanità] li ta l-​Iben uniġenitu tiegħu, sabiex kulmin qiegħed jeżerċita fidi fih jistaʼ ma jinqeridx imma jkollu l-​ħajja taʼ dejjem.” (Ġwann 3:16) B’hekk, għarfien eżatt dwar Alla u Ibnu, “l-​Aġent Ewlieni tal-​ħajja,” hu vitali għal dawk li jridu dawl spiritwali u ħajja taʼ dejjem. (Atti 3:15) Hu għalhekk li l-​aħħar ktieb tal-​Bibbja jestendi l-​istedina li ġejja lil dawk kollha li jħobbu l-​verità u li jridu l-​ħajja: “‘Ejja!’ U ħalli kulmin qiegħed jismaʼ jgħid: ‘Ejja!’ U ħalli kulmin hu bil-​għatx jiġi; ħalli kulmin jixtieq jieħu l-​ilma tal-​ħajja b’xejn.”​—Rivelazzjoni 22:17.

23. Nies bħal ngħaġ x’se jagħmlu meta jiġu lejn id-​dawl?

²³ Nies umlin, bħal ngħaġ, mhux biss se jiġu lejn id-​dawl tad-​dinja imma se jsegwuh dak id-​dawl: “[I]n-ngħaġ isegwuh, għaliex jagħrfu [t-ton tal-​verità f’]leħnu.” (Ġwann 10:4) Tabilħaqq, huma jitgħaxxqu li ‘jsegwu l-​passi tiegħu mill-​qrib’ għaliex jafu li jekk jagħmlu hekk se jfisser ħajja eterna għalihom.​—1 Pietru 2:21.

Kif Twieġeb Int?

◻ Liema żewġ għamliet taʼ dawl joħorġu mingħand Jehovah?

◻ It-​tidwil spiritwali għala hu tant importanti llum?

◻ Ġesù b’liema mod kien “dawl kbir”?

◻ Ġwann kapitlu 1 x’jgħidilna dwar Ġesù?

◻ Liema għotjiet jiġu għand dawk li jsegwu d-​dawl tad-​dinja?