Proklamaturi tas-Saltna Jirrapportaw

Il-Verità tal-Bibbja Tgħaqqad lil Familja

ILLUM, f’ħafna partijiet tad-​dinja, l-​unità tal-​familja hija kważi xi ħaġa taʼ l-​imgħoddi. Madankollu, il-​Bibbja tirrivela s-​sigriet taʼ l-​unità tal-​familja. Ikkunsidra l-​kliem taʼ Ġesù: “Kulmin jismaʼ dawn il-​qwiel minn tiegħi u jagħmilhom se jkun imxebbah maʼ raġel għaqli, li bena daru fuq il-​blata.” (Mattew 7:24) Eluf taʼ familji fost ix-​Xhieda taʼ Jehovah kisbu l-​unità billi applikaw dan il-​kliem u billi użaw il-​Bibbja bħala pedament biex jibnu familja tassew magħquda. Oħrajn qegħdin ukoll jiksbu unità bħal din, kif turi din l-​esperjenza li ġejja.

Waqt li Daniel kien qiegħed jaqdi fl-​armata fi Franza, kappillan taʼ l-​armata ssuġġerixxa li Daniel jixtri Bibbja, u hekk għamel, u beda jaqraha regolarment. Eventwalment ġie trasferit lejn Taħiti. Xi ftit mis-​suldati sħab Daniel kienu Avventisti, u oħrajn kienu Mormoni. Il-​konversazzjonijiet tagħhom taʼ spiss waqgħu fuq is-​suġġett tar-​reliġjon. Darba waħda surġent-maġġur introduċa lil Daniel mal-​mara tiegħu, li kienet waħda mix-​Xhieda taʼ Jehovah. Hi qattgħet nofs taʼ nhar sħiħ twieġeb il-​ħafna mistoqsijiet li kellu Daniel u kkuntattjatu maʼ waħda mill-​kongregazzjonijiet lokali tax-​Xhieda taʼ Jehovah f’Taħiti. F’qasir żmien beda studju regulari tal-​Bibbja.

Il-ġenituri taʼ Daniel lura fi Franza kienu Kattoliċi sinċieri ħafna. Missieru kien counselor taʼ l-​iskola u kien inkarigat mill-​istruzzjoni reliġjuża fi skola Kattolika. Billi ried jaqsam mal-​ġenituri tiegħu xi ftit mid-​dehen spiritwali u prezzjuż li kien qiegħed jitgħallem, Daniel beda bil-​mod il-​mod iżerżqilhom xi ħsibijiet Bibliċi fl-​ittri tiegħu.

Għall-ewwel omm Daniel tant kienet ferħana, imma mbagħad ixxokkjat ruħha meta sabet l-​isem Jehovah f’waħda mill-​ittri taʼ binha. Ftit jiem wara, semgħet programm tar-​radju li ppreżenta lix-​Xhieda taʼ Jehovah bħala “setta perikoluża.” Hi kitbet lil Daniel, billi talbitu biex jaqtaʼ kull kuntatt max-​Xhieda immedjatament. Madankollu, Daniel kompla jagħmel progress fl-​istudju tiegħu tal-​Bibbja u malajr għamel arranġamenti biex iħalli l-​armata u jerġaʼ lura lejn Franza.

Hekk kif reġaʼ lura d-​dar, Daniel qattaʼ kull għaxija​—xi drabi sa tard bil-​lejl—​f’diskussjonijiet twal fuq il-​Bibbja maʼ ommu. Fl-​aħħar hi aċċettat li tmur maʼ Daniel il-​Kingdom Hall. Meta attendiet l-​ewwel laqgħa tagħha, tant kienet impressjonata li bdiet studju tal-​Bibbja hija stess b’mod regulari. Hi għamlet progress mgħaġġel u wara qasir żmien tgħammdet.

Missier Daniel kien raġel tolleranti ħafna imma kien iddedikat ferm lejn il-​professjoni u l-​attivitajiet reliġjużi tiegħu. Xorta waħda, darba minnhom wassal lil martu u lil Daniel għal konvenzjoni distrettwali. Kien l-​14 taʼ Lulju, u kellu f’moħħu li jara l-​parata taʼ Jum il-​Bastilja fil-​belt. Waqt li kien qiegħed jistenna, għelbitu l-​kurżità, u ttawwal fis-​sala tal-​konvenzjoni. Kien impressjonat bl-​ordni u bil-​paċi li ra fost in-​nies taʼ Jehovah, u hekk kif mexa mid-​diversi dipartimenti tal-​konvenzjoni kulħadd beda jsejjaħlu “ħu.” Hu nesa għalkollox dwar il-​parata taʼ Jum il-​Bastilja u baqaʼ sat-​tmiem tal-​konvenzjoni. Hu talab għal studju tal-​Bibbja u għamel progress mgħaġġel f’li jitgħallem il-​verità. Madankollu, iktar ma tgħallem, iktar beda jħossu barra minn loku fix-​xogħol tiegħu, u għalhekk fl-​età taʼ 58 sena, ħalla l-​impjieg tiegħu. Issa t-​tlieta fil-​familja huma ddedikati u mgħammdin u qegħdin f’unità jaqdu lil Jehovah flimkien.

Kienet il-​verità tal-​Bibbja li għamlet lill-​familja taʼ Daniel unita. Tistaʼ wkoll tagħmel lil familji oħrajn uniti jekk huma jitgħallmuha u japplikawha b’qalbhom kollha. (w94 4/1)