Żommu l-​Unità f’Dawn l-​Aħħar Jiem

“Ġibu ruħkom kif jixraq lil l-​Evanġelju . . . , qawwija fi spirtu wieħed, u tissieltu b’ruħ waħda għall-​fidi taʼ l-​Evanġelju.”—FILIPPIN 1:27.

1. Liema kuntrast hemm bejn ix-​Xhieda taʼ Jehovah u d-​dinja?

DAWN huma “l-​aħħar jiem.” Mingħajr dubju, “żminijiet kritiċi li iebes biex issib tarfhom” qegħdin hawn. (2 Timotju 3:1-5, NW) F’dan iż-​“żmien taʼ l-​aħħar,” bit-​taqlib tiegħu fis-​soċjetà umana, ix-​Xhieda taʼ Jehovah jispikkaw f’kuntrast qawwi minħabba l-​paċi u l-​unità tagħhom. (Danjel 12:4) Imma kull individwu li jappartjeni lill-​familja globali t’adoraturi taʼ Jehovah jiġi mitlub biex jaħdem iebes biex iżomm din l-​unità.

2. Pawlu x’qal dwar li nżommu l-​unità, u liema mistoqsija se nikkunsidraw?

² L-​appostlu Pawlu ammonixxa lill-​Kristjani sħabu biex iżommu l-​unità. Hu kiteb: “Ġibu ruħkom kif jixraq lil l-​Evanġelju taʼ Kristu, ħalli sew jekk niġi narakom, sew jekk inkun ’il bogħod, nismaʼ fuqkom li intom tinsabu qawwija fi spirtu wieħed, u tissieltu b’ruħ waħda għall-​fidi taʼ l-​Evanġelju, bla xejn ma tibżgħu minn dawk li joħduha magħkom. Dan ikun għalihom prova tat-​telfien tagħhom, imma għalikom prova tas-​salvazzjoni; u dan kollu ġej minn Alla.” (Filippin 1:27, 28) Il-​kliem taʼ Pawlu juri biċ-​ċar li rridu naħdmu flimkien bħala Kristjani. Mela, allura, x’se jgħinna biex inżommu l-​unità Kristjana tagħna f’dawn iż-​żminijiet taʼ prova?

Issottometti Ruħek Għar-​Rieda Divina

3. L-​ewwel Ġentili mhux ċirkonċiżi meta u kif saru segwaċi taʼ Kristu?

³ Mod wieħed kif inżommu l-​unità tagħna huwa li nissottomettu ruħna għar-​rieda divina f’kull żmien. Dan jistaʼ jitlob għal xi aġġustament fil-​mod kif naħsbuha. Ikkunsidra d-​dixxipli Lhud bikrin taʼ Ġesù Kristu. Meta l-​appostlu Pietru ppriedka għall-​ewwel darba lil Ġentili mhux ċirkonċiżi fis-​sena 36 E.K., Alla xerred l-​ispirtu qaddis fuq dawn in-​nies tal-​ġnus, u ġew mgħammdin. (Atti, kapitlu 10) Sa dak iż-​żmien, Lhud, proseliti għall-​Ġudaiżmu, u Samaritani biss, kienu saru segwaċi taʼ Ġesù Kristu.—Atti 8:4-8, 26-38.

4. Wara li spjega x’kien seħħ f’konnessjoni maʼ Kornelju, Pietru x’qal, u dan liema prova ppreżenta għad-​dixxipli Lhud taʼ Ġesù?

⁴ Meta l-​appostli u aħwa oħrajn f’Ġerusalemm saru jafu dwar il-​konverżjoni taʼ Kornelju u taʼ Ġentili oħrajn, kienu interessati f’li jisimgħu r-​rapport taʼ Pietru. Wara li spjega dak li kien ġara f’konnessjoni maʼ Kornelju u l-​Ġentili kredenti l-​oħrajn, l-​appostlu kkonkluda bil-​kliem: “Mela jekk Alla tahom [lil dawk il-​Ġentili kredenti] l-​istess don [taʼ spirtu qaddis] kif tah lilna [il-Lhud] meta emminna fil-​Mulej Ġesù Kristu, jien x’jien biex stajt inżomm lil Alla?” (Atti 11:1-17) Dan kien taʼ prova għas-​segwaċi Lhud taʼ Ġesù Kristu. Kienu huma se jissottomettu ruħhom għar-​rieda t’Alla u jaċċettaw lil Ġentili kredenti bħala adoraturi sħabhom? Jew kienet se tiġi pperikolata l-​unità tal-​qaddejja taʼ Jehovah fuq l-​art?

5. L-​appostli u l-​aħwa l-​oħrajn kif wieġbu għall-​fatt li Alla kien iffavorixxa ndiema lill-​Ġentili, u x’nistgħu nitgħallmu minn din l-​attitudni?

⁵ Ir-​rakkont jgħid: “Meta [l-appostli u aħwa oħrajn] semgħu dan il-​kliem siktu, u bdew jagħtu glorja lil Alla u jgħidu: ‘Mela Alla lill-​pagani wkoll tahom l-​indiema li twassal għall-​ħajja!’” (Atti 11:18) Dik l-​attitudni ppreservat u ppromwoviet l-​unità tas-​segwaċi taʼ Ġesù. F’biss qasir żmien, ix-​xogħol taʼ ppridkar avanza fost il-​Ġentili, jew nies tal-​ġnus, u l-​barka taʼ Jehovah kienet fuq attivitajiet bħal dawn. Aħna nfusna għandna nbaxxu rasna meta tintalab il-​koperazzjoni tagħna f’konnessjoni mal-​formazzjoni taʼ xi kongregazzjoni ġdida jew meta jsir xi aġġustament teokratiku taħt il-​gwida taʼ l-​ispirtu qaddis t’Alla. Il-​koperazzjoni tagħna mill-​qalb se togħġob lil Jehovah u se tgħinna nżommu l-​unità tagħna f’dawn l-​aħħar jiem.

Iggranfa Mal-​Verità

6. Il-​verità liema rabta għandha maʼ l-​unità taʼ l-​adoraturi taʼ Jehovah?

⁶ Bħala parti mill-​familja t’adoraturi taʼ Jehovah, aħna nżommu l-​unità għaliex ilkoll kemm aħna ‘mgħallmin minn Alla’ u nżommu sod mal-​verità rrivelata tiegħu. (Ġwann 6:45; Salm 43:3) Ladarba t-​tagħlim tagħna huwa bbażat fuq il-​Kelma t’Alla, ilkoll kemm aħna nitkellmu fi qbil. Aħna naċċettaw bil-​ferħ l-​ikel spiritwali magħmul disponibbli minn Jehovah permezz taʼ “l-​irsir leali u diskret.” (Mattew 24:45-47, NW) Tagħlim uniformi bħal dan jgħinna nżommu l-​unità tagħna mad-​dinja kollha.

7. Jekk aħna individwalment insibu diffikultà biex nifhmu xi punt, x’għandna nagħmlu, u x’m’għandniex nagħmlu?

⁷ Xi ngħidu jekk aħna individwalment ikollna diffikultà nifhmu jew naċċettaw xi punt partikulari? Għandna nitolbu għall-​għerf u nagħmlu riċerka fl-​Iskrittura u f’pubblikazzjonijiet Kristjani. (Proverbji 2:4, 5; Ġakbu 1:5-8) Diskussjoni maʼ xi anzjan tistaʼ tgħin. Jekk il-​punt xorta waħda ma jistax jiġi mifhum, għandu mnejn l-​aħjar ħaġa tkun li tħalli l-​biċċa toqgħod. Jistaʼ jagħti l-​kas li iktar informazzjoni fuq is-​suġġett tiġi ppubblikata, u mbagħad il-​fehma tagħna se tiċċara. Ikun żbaljat, madankollu, li nipprovaw nikkonvinċu lil oħrajn fil-​kongregazzjoni biex jaċċettaw l-​opinjoni kuntrarja tagħna stess. B’dan inkunu qegħdin niżirgħu n-​nuqqas taʼ qbil, mhux naħdmu biex nippreservaw l-​unità. Kemm hu aħjar li nibqgħu “mexjin fil-​verità” u ninkuraġġixxu lil oħrajn biex jagħmlu hekk!—3 Ġwann 4.

8. Liema attitudni lejn il-​verità hija xierqa?

⁸ Fl-​ewwel seklu, Pawlu qal: “Bħalissa naraw bħallikieku f’mera, imċajpar, imma mbagħad naraw wiċċ imb’wiċċ. Issa nagħraf biċċa, imbagħad nagħraf bħalma jien magħruf issa.” (1 Korintin 13:12) Għalkemm il-​Kristjani bikrin ma rawx id-​dettalji kollha, huma baqgħu magħqudin. Issa aħna għandna fehma wisq iżjed ċara taʼ l-​iskop taʼ Jehovah u tal-​Kelma tiegħu taʼ verità. Ejjew għalhekk inkunu grati għall-​verità li rċevejna permezz taʼ “l-​irsir leali.” U ejjew inkunu grati li Jehovah mexxiena permezz taʼ l-​organizzazzjoni tiegħu. Fil-​waqt li mhux dejjem kellna l-​istess ammont t’għarfien, ma konniex bil-​ġuħ jew bil-​għatx spiritwalment. Minflok, ir-​Ragħaj tagħna, Jehovah, żammna magħqudin u ħa ħsiebna tajjeb.—Salm 23:1-3.

Uża L-​Ilsien Kif Jixraq!

9. L-​ilsien kif jistaʼ jintuża biex jippromwovi l-​unità?

⁹ Li tuża l-​ilsien biex tinkuraġġixxi lil oħrajn huwa mod importanti biex tippromwovi l-​unità u spirtu taʼ fratellanza. L-​ittra li solviet kwistjoni fuq iċ-​ċirkonċiżjoni, bħalma ntbagħtet mill-​ġemgħa li tiggverna taʼ l-​ewwel seklu, kienet sors taʼ inkuraġġiment. Wara li qrawha, id-​dixxipli Ġentili f’Antijokija “ferħu għall-​faraġ li tathom.” Ġuda u Silas, li kienu ntbagħtu minn Ġerusalemm bl-​ittra, “farrġu lil l-​aħwa u wettquhom b’ħafna kliem.” Bla dubju, il-​preżenza taʼ Pawlu u Barnabas ukoll inkuraġġiet u saħħet lil kredenti sħabhom f’Antijokija. (Atti 15:1-3, 23-32) Hekk nistgħu nagħmlu aħna meta ninġabru għal-​laqgħat Kristjani u ‘nagħmlu l-​qalb lil xulxin’ permezz tal-​preżenza tagħna u kummenti li jibnu.—Lhud 10:24, 25.

10. Biex tinżamm l-​unità, x’għandu mnejn li jkollu jsir jekk iseħħ xi tgħajjir?

¹⁰ Madankollu, l-​użu żbaljat taʼ l-​ilsien jistaʼ jhedded l-​unità tagħna. “L-​ilsien: huwa biċċa ċkejkna fil-​ġisem, imma jistaʼ jiftaħar li jagħmel ħwejjeġ kbar,” kiteb id-​dixxiplu Ġakbu. “Ara, ftit nar jistaʼ jqabbadlek foresta sħiħa.” (Ġakbu 3:5) Jehovah jobgħod lil dawk li jikkaġunaw il-​ġlied. (Proverbji 6:16-19) Kliem bħal dan jistaʼ jikkaġuna firda. Mela, allura, xi ngħidu jekk isir tgħajjir, jiġifieri, tfigħ taʼ kliem abbużiv lejn xi ħadd jew li tissuġġettah għal kliem insolenti? L-​anzjani se jipprovaw jgħinu lil dak li żbalja. Madankollu, wieħed li jgħajjar u li ma jkunx niedem għandu jiġi maqtugħ mis-​sħubija sabiex il-​paċi, l-​ordni, u l-​unità tal-​kongregazzjoni jistgħu jinżammu. Wara kollox, Pawlu kiteb: “Tagħmluhiex maʼ min jissejjaħ ħukom u jkun . . . insolenti . . . ; maʼ dan l-​anqas biss tieklu ma għandkom.”—1 Korintin 5:11.

11. L-​umiltà għala hija importanti jekk inkunu għedna xi ħaġa li kkaġunat tensjoni bejna u bejn kredent seħibna?

¹¹ Li nliġġmu lsienna jgħinna nżommu l-​unità. (Ġakbu 3:10-18) Imma nassumu li xi ħaġa li nkunu għedna tkun ikkaġunat tensjoni bejna u bejn xi Kristjan bħalna. Ma jkunx xieraq li nieħdu l-​inizjattiva biex nagħmlu l-​paċi maʼ ħuna, billi nitolbu apoloġija jekk ikun hemm bżonn? (Mattew 5:23, 24) Veru, dan jirrikjedi l-​umiltà, jew trażżin tal-​moħħ, imma Pietru kiteb: “Ilbsu l-​umiltà maʼ xulxin għax Alla jeqfilhom lill-​kburin, imma lil l-​umli jagħtihom il-​grazzja tiegħu.” (1 Pietru 5:5) L-​umiltà se tqanqalna biex ‘insegwu l-​paċi’ maʼ ħutna, billi nammettu l-​iżbalji tagħna u billi nitolbu apoloġija xierqa. Dan jgħinna nżommu l-​unità tal-​familja taʼ Jehovah.—1 Pietru 3:10, 11.

12. Kif nistgħu nużaw l-​ilsien biex nippromwovu u nżommu l-​unità tan-​nies taʼ Jehovah?

¹² Aħna nistgħu navanzaw l-​ispirtu tal-​familja fost dawk fl-​organizzazzjoni taʼ Jehovah jekk nużaw ilsienna kif jixraq. Ladarba dak kien li għamel Pawlu, hu setaʼ jfakkar lit-​Tessalonikin: “Aħna, kif tafu, ġibna ruħna maʼ kull wieħed minnkom qisna missier maʼ wliedu: farraġniekom, għamilnielkom il-​qalb, ħeġġiġniekom ħalli timxu kif hu xieraq quddiem Alla.” (1 Tessalonikin 2:11, 12) Billi kien t’eżempju mill-​aħjar f’dan ir-​rigward, Pawlu setaʼ jħeġġeġ lill-​Kristjani sħabu biex ‘ilissnu kliem li jikkonsla lill-​erwieħ dipressi.’ (1 Tessalonikin 5:14, NW) Aħseb dwar kemm ġid nistgħu nagħmlu billi nużaw l-​ilsien biex nikkonslaw, ninkuraġġixxu, u nibnu lil oħrajn. Iva, “kelma f’waqtha, kemm hi sabiħa!” (Proverbji 15:23) Iktar minn hekk, kliem bħal dan jgħin jippromwovi u jżomm l-​unità tan-​nies taʼ Jehovah.

Kun Wieħed Li Jaħfer!

13. Għala għandna nkunu wħud li jaħfru?

¹³ Li taħfer lil min offendiek u talbek apoloġija huwa essenzjali jekk irridu nżommu l-​unità Kristjana. U kemm-il darba għandna naħfru? Ġesù qal lil Pietru: “Ma ngħidlikx sa sebaʼ darbiet . . . imma sa sebgħa u sebgħin darba.” (Mattew 18:22) Jekk ma naħfrux, inkunu qegħdin naħdmu kontra l-​interessi tagħna nfusna. B’liema mod? Sewwa, il-​mibgħeda u li nżommu f’qalbna se jisirqulna l-​paċi tal-​moħħ. U jekk insiru magħrufin għal manjieri ħorox u taʼ bla maħfra, nistgħu nġibu tmaqdir fuqna nfusna. (Proverbji 11:17) Li nżommu f’qalbna ma jogħġobx lil Alla u jistaʼ jwassal għal dnub serju. (Levitiku 19:18) Ftakar li Ġwanni l-​Għammied nqatatlu rasu f’komplott maħsub minn Erodija li kienet mill-​agħar u li kienet “saret tobogħdu.”—Mark 6:19-28.

14. (a) Mattew 6:14, 15 x’jgħallimna dwar il-​maħfra? (b) Għandna dejjem nistennew apoloġija qabel ma naħfru lil xi ħadd?

¹⁴ It-​talba mudell taʼ Ġesù tinkludi dan il-​kliem: “Aħfrilna dnubietna, għax aħna wkoll naħfru lil kull min hu ħati għalina.” (Luqa 11:4) Jekk ma naħfrux, nissograw li xi darba Alla Jehovah ma jibqax jaħfer id-​dnubiet tagħna, għax Ġesù qal: “Għax jekk intom taħfru lill-​bnedmin il-​ħtijiet tagħhom, Missierkom li hu fis-​smewwiet jaħfer lilkom ukoll. Imma jekk intom ma taħfrux lill-​bnedmin il-​ħtijiet tagħhom, anqas Missierkom ma jaħfer lilkom il-​ħtijiet tagħkom.” (Mattew 6:14, 15) Mela jekk aħna verament irridu nagħmlu l-​parti tagħna biex inżommu l-​unità fil-​familja t’adoraturi taʼ Jehovah, se nkunu wħud li jaħfru, forsi billi sempliċement ninsew offiża li għandha mnejn tkun minħabba xi nuqqas taʼ ħsieb u ma saritx b’intenzjoni ħażina. Pawlu qal: “Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-​Mulej ħafer lilkom, hekk agħmlu intom ukoll.” (Kolossin 3:13) Meta nkunu wħud li jaħfru, ngħinu nżommu l-​unità prezzjuża taʼ l-​organizzazzjoni taʼ Jehovah.

L-​Unità u D-​Deċiżjonijiet Persunali

15. X’jgħin lin-​nies taʼ Jehovah biex iżommu l-​unità meta jieħdu deċiżjonijiet persunali?

¹⁵ Alla għamilna aġenti morali ħielsa bil-​privileġġ u r-​responsabbiltà li nieħdu deċiżjonijiet persunali. (Dewteronomju 30:19, 20; Galatin 6:5) Madankollu, aħna nistgħu nżommu l-​unità tagħna għaliex naġixxu fi qbil mal-​liġijiet u l-​prinċipji tal-​Bibbja. Aħna nikkunsidrawhom meta nieħdu deċiżjonijiet persunali. (Atti 5:​29; 1 Ġwann 5:3) Nassumu li tqum kwistjoni dwar in-​newtralità. Nistgħu nieħdu deċiżjoni persunali informata billi niftakru li ‘m’aħna ebda parti mid-​dinja’ u li ‘bdilna x-​xwabel tagħna f’sikek tal-​moħriet.’ (Ġwann 17:16; Isaija 2:2-4) B’mod simili, meta rridu nieħdu deċiżjoni persunali dwar ir-​relazzjoni tagħna maʼ l-​Istat, aħna nikkunsidraw dak li tgħid il-​Bibbja dwar li nħallsu lura “lil Alla dak li hu taʼ Alla,” fil-​waqt li nissottomettu ruħna lejn ‘l-​awtorità taʼ fuqna’ f’affarijiet sekulari. (Luqa 20:25; Rumani 13:1-7; Titu 3:1, 2) Iva, li nagħtu kas tal-​liġijiet u l-​prinċipji tal-​Bibbja meta nieħdu deċiżjonijiet persunali jgħin biex inżommu l-​unità Kristjana tagħna.

16. Kif nistgħu ngħinu biex inżommu l-​unità meta nieħdu deċiżjonijiet li la huma tajbin u lanqas żbaljati Skritturalment? Agħti tixbieha.

¹⁶ Aħna nistgħu ngħinu biex inżommu l-​unità Kristjana saħansitra meta nieħdu xi deċiżjoni li hija totalment persunali u la hija tajba u lanqas żbaljata Skritturalment. Dan kif? Billi nuru tħassib taʼ mħabba għal oħrajn li jistgħu jiġu effettwati mid-​deċiżjoni tagħna. Biex nagħtu tixbieha: Fil-​kongregazzjoni f’Korintu tal-​qedem, qamet kwistjoni dwar laħam issagrifikat lill-​idoli. M’għandniex xi ngħidu, Kristjan ma kienx se jieħu sehem f’ċerimonja idolatruża. Madankollu, ma kienx dnub li tiekol laħam taʼ din ix-​xorta li kien jibqaʼ żejjed li kien jiġi skarnat b’mod xieraq, u li kien jinbiegħ f’suq pubbliku. (Atti 15:28, 29; 1 Korintin 10:25) Minkejja dan, il-​kuxjenzi taʼ xi Kristjani kienu inkwetati fuq li jittiekel dan il-​laħam. Pawlu għalhekk ħeġġeġ lil Kristjani oħrajn biex jevitaw li jfixkluhom. Fil-​fatt, kiteb: “Jekk l-​ikel jiskandalizza lil ħija, ma niekol qatt iżjed laħam biex ma niskandalizzax lil ħija.” (1 Korintin 8:13) Mela saħansitra jekk ebda liġi jew prinċipju tal-​Bibbja m’huwa involut, kemm huwa taʼ mħabba li tikkunsidra lil oħrajn meta tieħu deċiżjonijiet persunali li jistgħu jeffettwaw l-​unità tal-​familja t’Alla!

17. X’ikun għaqli li nagħmlu meta jkollna nieħdu deċiżjonijiet persunali?

¹⁷ Jekk ma nkunux ċerti liema korsa se nieħdu, ikun għaqli li niddeċiedu b’tali mod li nżommu kuxjenza nadifa, u oħrajn għandhom jirrispettaw id-​deċiżjoni tagħna. (Rumani 14:10-12) M’għandniex xi ngħidu, meta rridu nieħdu deċiżjoni persunali, għandna nfittxu l-​gwida taʼ Jehovah bit-​talb. Bħas-​salmista, nistgħu nitolbu b’fiduċja: “Agħtini widen . . . Inti l-​blata u l-​fortizza tiegħi; f’ġieħ ismek mexxini u wennisni.”—Salm 31:3, 4 [Salm 31:2, 3, NW].

Żomm Dejjem L-​Unità Kristjana

18. Pawlu kif xebbah l-​unità tal-​kongregazzjoni Kristjana?

¹⁸ Fl-​ewwel Korintin kapitlu 12, Pawlu uża l-​ġisem uman biex ixebbah l-​unità tal-​kongregazzjoni Kristjana. Hu enfasizza d-​dipendenza minn xulxin u l-​importanza taʼ kull membru. “Kieku kollha kellhom ikunu membru wieħed, fejn hu l-​ġisem?” staqsa Pawlu. “Imma ħafna, iva, huma l-​membri, iżda wieħed hu l-​ġisem. Il-​għajn ma tistax tgħid lil l-​id: ‘Jiena ma għandix bżonnok’, anqas ir-​ras tgħid lis-​saqajn: ‘ma għandix bżonnok’.” (1 Korintin 12:19-21) B’mod simili, mhux ilkoll kemm aħna fil-​familja t’adoraturi taʼ Jehovah inwettqu l-​istess inkarigu. Madankollu, aħna magħqudin, u neħtieġu lil xulxin.

19. Kif nistgħu nibbenefikaw mill-​provvedimenti spiritwali t’Alla, u wieħed ħu avanzat fl-​età x’qal f’dan ir-​rigward?

¹⁹ Bħalma l-​ġisem jeħtieġ ikel, attenzjoni, u direzzjoni, aħna neħtieġu l-​provvedimenti spiritwali li Alla jagħtina permezz tal-​Kelma, l-​ispirtu, u l-​organizzazzjoni tiegħu. Biex nibbenefikaw minn dawn il-​provvedimenti, irridu nkunu parti mill-​familja taʼ Jehovah taʼ fuq l-​art. Wara ħafna snin fis-​servizz t’Alla, wieħed ħu kiteb: “Tant jien grat li għext fl-​għarfien taʼ l-​iskopijiet taʼ Jehovah minn dawk is-​snin bikrin eżatt qabel l-​1914 meta ma kienx kollox tant ċar . . . sa llum il-​ġurnata meta l-​verità tiddi bħax-​xemx taʼ nofs in-​nhar. Jekk kien hemm ħaġa waħda li kienet l-​iktar importanti għalija, din kienet il-​kwistjoni taʼ li nżomm qrib maʼ l-​organizzazzjoni viżibbli taʼ Jehovah. L-​esperjenza bikrija tiegħi għallmitni kemm mhux għaqli li tistrieħ fuq raġunar uman. Ladarba moħħi kien deċiż fuq dak il-​punt, kont determinat li nibqaʼ viċin taʼ l-​organizzazzjoni leali. B’liema mod ieħor jistaʼ wieħed jikseb il-​favur u l-​barka taʼ Jehovah?”

20. X’għandna nkunu determinati li nagħmlu dwar l-​unità tagħna bħala n-​nies taʼ Jehovah?

²⁰ Jehovah sejjaħ lin-​nies tiegħu ’l barra mid-​dlam u l-​firda dinjin. (1 Pietru 2:9) Hu ġabna f’unità mbierka miegħu nnifsu u mal-​kredenti sħabna. Din l-​unità se teżisti fis-​sistema ġdida t’affarijiet li issa tant hi qrib. F’dawn l-​aħħar jiem kritiċi, għalhekk, ejjew inkomplu ‘nitlibbsu bl-​imħabba’ u nagħmlu kulma nistgħu biex nippromwovu u nżommu l-​unità prezzjuża tagħna.—Kolossin 3:14. (w96 7/15)

Kif Twieġeb Int?

◻ Li nagħmlu r-​rieda t’Alla u li niggranfaw mal-​verità għala jistaʼ jgħinna nżommu l-​unità?

◻ L-​unità kif inhi relatata maʼ l-​użu xieraq taʼ l-​ilsien?

◻ X’inhu involut f’li tkun wieħed li jaħfer?

◻ Kif nistgħu nżommu l-​unità meta nieħdu deċiżjonijiet persunali?

◻ Għala għandna nżommu l-​unità Kristjana?

[Stampa f’paġna 14]

Sewwa sew bħalma dan ir-​ragħaj iżomm il-​merħla tiegħu flimkien, hekk Jehovah iżomm lin-​nies tiegħu magħqudin

[Stampi f’paġna 16]

Billi umilment nitolbu apoloġija meta noffendu lil xi ħadd, aħna ngħinu biex nippromwovu l-​unità