Aħna Dejjem Se Jkollna Bżonn l-​Armati?

L-​ARMATI ħatfu parti kbira mir-​riżorsi umani u lill-​bniedem qerdulu ħafna mill-​ferħ tiegħu. Minħabba f’hekk xi nies staqsew, ‘Tistaʼ qatt l-​umanità tikseb dik ix-​xorta taʼ sigurtà dinjija fejn l-​armati jkunu jistgħu jiġu xolti?’ Ladarba issa sar possibbli li tiġi meqruda kull ħajja b’armi li jeqirdu bil-​massa, il-​mistoqsija saret waħda urġenti. Kemm huwa realistiku li nittamaw għal dinja mingħajr armati?

Għadd kbir taʼ preċedenti juru li meta relazzjonijiet internazzjonali tajbin jipproduċu l-​fiduċja, dan jistaʼ jwassal għal ċertu ammont taʼ diżarmament. Bis-​saħħa tal-​ħbiberija in ġenerali li teżisti bejn il-​Kanada u l-​Istati Uniti, per eżempju, il-​fruntiera taʼ 5,000 kilometru li taqsam iż-​żewġ naħiet ilha ma tiġi protetta mill-​armati għal iktar minn seklu u nofs. In-​Norveġja u l-​Isvezja laħqu ftehim simili, bħalma għamlu ħafna nazzjonijiet oħrajn. Jistaʼ xi ftehim bejn in-​nazzjonijiet kollha jwassal għal dinja mingħajr armati? Bl-​orruri li ġabet magħha l-​Ewwel Gwerra Dinjija, l-​idea kisbet popolarità liema bħalha.

Meta ntlaħqet il-​paċi fl-​1918, wieħed mill-​iskopijiet tat-​trattat taʼ paċi taʼ Varsavja kien “li jintgħamel possibbli l-​bidu taʼ limitazzjoni ġenerali fuq l-​armamenti tan-​nazzjonijiet kollha.” Matul is-​snin segwenti, il-​paċifiżmu sar popolari. Xi paċifisti tteorizzaw li l-​gwerra hija l-​agħar ħaġa li tistaʼ tiġri lil nazzjon u hi għaldaqstant agħar milli kieku jsofri telfa. Dawk kontra l-​paċifiżmu ma qablux maʼ dan, billi qalu li matul is-​sekli, il-​Lhud fi nħawi mdaqqsa ftit li xejn waqfulhom bl-​armi lill-​attakkanti, iżda xorta baqgħu għaddejjin l-​attentati krudili sabiex jeqirduhom. L-​Afrikani ma tantx setgħu jirreżistu lil dawk li ġarrewhom lejn l-​Amerka bħala skjavi, u madankollu, ġew immaltrattati bl-​aħrax għal sekli sħaħ.

Bit-tfaqqigħ tat-​Tieni Gwerra Dinjija, madankollu, ħafna paċifisti kkonkludew li l-​pajjiżi jeħtieġu l-​protezzjoni. Għalhekk, meta twaqqfet il-​Ġnus Magħquda wara t-​Tieni Gwerra Dinjija, ma saritx daqstant enfasi fuq id-​diżarmament imma iktar fuq il-​kooperazzjoni internazzjonali sabiex tiġi evitata l-​aggressjoni. Il-​membri ttamaw li permezz taʼ din is-​sigurtà mogħtija lin-​nazzjonijiet, dawn kienu se jkunu iktar fiduċjużi li jnaqqsu l-​armi.

Imbagħad feġġet problema oħra. Taʼ spiss, iktar ma nazzjon kien jistinka biex jipproteġi lilu nnifsu, iktar kien iħossu mhux protett in-​nazzjon ġar tiegħu. Dan iċ-​ċirku vizzjuż wassal għal tellieqa taʼ l-​armamenti. Imma iktar reċenti, ir-​relazzjonijiet imtejbin bejn in-​nazzjonijiet il-​kbar saħħew it-​tama tad-​diżarmament. Minn dak in-​nhar ’l hawn, madankollu, il-​Gwerra tal-​Golf u l-​inkwiet li nqalaʼ fl-​ex-Jugoslavja neħħew kull tama taʼ diżarmament għal ħafna wħud. Madwar ħames snin ilu, ir-​rivista Time ikkummentat: “Għalkemm il-​gwerra bierda spiċċat, id-​dinja saret post iktar perikoluż, minflok inqas.”

Ix-​Xewqa għal “Pulizija” Globali

Ħafna osservaturi jikkonkludu li l-​umanità teħtieġ awtorità dinjija unika b’armata qawwija biżżejjed sabiex tipproteġi lil kulħadd. Peress li la l-​organizzazzjoni tal-​Ġnus Magħquda u lanqas il-​qawwiet militari prinċipali tad-​dinja m’huma kapaċi jagħmlu dan, xi wħud iħossu li ftit li xejn teżisti tama għall-​futur. Imma jekk int taċċetta l-​Bibbja bħala l-​Kelma t’Alla, forsi ġiek f’moħħok jekk Alla li Jistaʼ Kollox huwiex se jissodisfa dan il-​bżonn urġenti.

Biex jinforza l-​ġustizzja, se juża l-​qawwa militari dak il-​Wieħed li l-​Bibbja ssejjaħlu “Alla taʼ l-​imħabba u s-​sliem”? Jekk iva, liema armata? Ħafna mill-​armati tal-​lum isostnu li għandhom l-​appoġġ t’Alla, imma qegħdin huma verament iwettqu r-​rieda t’Alla? Jew għandu Alla xi mezz ieħor kif jintervieni u jipprovdi l-​paċi u s-​sigurtà?—2 Korintin 13:11.

Fl-ewwel irvell, Alla li Jistaʼ Kollox kien keċċa lil Adam u Eva minn Għeden u poġġa lill-​kerubini biex ma jħalluhomx jerġgħu lura. Hu kien ħabbar ukoll l-​iskop tiegħu li jfarrak kull irvell ieħor kontra s-​sovranità tiegħu. (Ġenesi 3:15) Jistaʼ dan jinvolvi l-​użu taʼ xi armata min-​naħa t’Alla?

Il-Bibbja ssemmi okkażjonijiet meta Alla kien fil-​fatt uża l-​armati sabiex jesegwixxi l-​ġudizzji tiegħu. Per eżempju, is-​saltniet fl-​art taʼ Kangħan kienu jipprattikaw relazzjonijiet sesswali mal-​bhejjem, jissagrifikaw lit-​tfal, u jiggwerraw b’mod sadistiku. Alla ddikjara l-​qerda totali tagħhom u nqeda bl-​armata taʼ Ġożwè biex jesegwixxi s-​sentenza. (Dewteronomju 7:1, 2) Bl-​istess mod, l-​armata tas-​Sultan David esegwiet il-​ġudizzju t’Alla kontra l-​Filistej bħala turija taʼ kif Alla se jeqred kull ħażen fil-​jum finali taʼ ġudizzju tiegħu.

Dawk il-​ġrajjiet tawna x’nifhmu. Jehovah wera li hu jistaʼ juża armata biex jipprovdi sigurtà lill-​poplu tiegħu. Tabilħaqq, Jehovah għandu xorta t’armata unika li se jużaha kontra l-​irvell universali li qam kontra l-​ħakma tiegħu.

“Il-​Mulej taʼ l-​Eżerċti”

Il-​Bibbja tuża l-​espressjoni “Il-​Mulej taʼ l-​Eżerċti” għal iktar minn 250 darba. L-​espressjoni tirreferi bażikament għall-​pożizzjoni t’Alla bħala l-​kmandant taʼ qawwiet kbar t’anġli. F’okkażjoni minnhom, il-​profeta Mikajja qal lis-​Slaten Aħab u Ġosafat: “Jien rajt lill-​Mulej bilqiegħda fuq it-​tron tiegħu, u l-​eżerċti kollha tas-​sema qegħdin fuq il-​lemin u fuq ix-​xellug tiegħu.” (1 Slaten 22:19) Hawnhekk qed jirreferi għal armati t’anġli. Jehovah kien uża lil dawn l-​armati biex jipproteġi lill-​poplu tiegħu. Meta kienet ġiet assedjata l-​belt taʼ Dotan, il-​qaddej t’Eliżew kien qataʼ qalbu għalkollox. Madankollu, biex iserraħlu moħħu, Alla wrieh dehra mirakoluża taʼ l-​armata tiegħu taʼ ħlejjaq spirti. “U l-​Mulej fetaħ għajnejn il-​qaddej, u dan ra l-​għolja mimlija żwiemel u karrijiet tan-​nar.”—2 Slaten 6:15-17.

Ifissru ġrajjiet bħal dawn li Alla jappoġġja l-​armati tal-​lum? Xi armati tal-​Kristjaneżmu għandhom mnejn isostnu li huma l-​armati t’Alla. Ħafna minnhom talbu lill-​membri tal-​kleru biex ibirkuhom. Imma l-​armati tal-​Kristjaneżmu taʼ spiss jiġġieldu kontra xulxin, kontra kredenti sħabhom. Iż-​żewġ gwerer dinjin taʼ dan is-​seklu bdew bejn armati li kienu jsostnu li huma Kristjani. Dan ma jistax ikun li ġej minn Alla. (1 Ġwann 4:20) Fil-​waqt li dawn il-​qawwiet militari forsi jsostnu li qegħdin jiġġieldu għall-​paċi, qal Ġesù lis-​segwaċi tiegħu biex jorganizzaw armati bħal dawn f’attentat biex iwarrbu min-​nofs lil dawk li joħolqu l-​ksur tal-​paċi fid-​dinja?

Darba kien seħħ ksur serju tal-​paċi meta marmalja armata ħatfet lil Ġesù waqt li kien fi ġnien jitlob mad-​dixxipli tiegħu. Wieħed mid-​dixxipli darab b’sejf lil wieħed raġel mill-​marmalja. Ġesù uża dik l-​okkażjoni biex jispjega prinċipju importanti. Hu qal: “Erġaʼ daħħal sejfek f’postu għax kull min jaqbad is-​sejf, bis-​sejf jinqered. Taħseb int li ma nistax nitlob lil Missieri u jibgħatli issa stess aktar minn tnax-il leġjun taʼ anġli?” Ġesù kellu armata vasta għad-​dispożizzjoni tiegħu, imma Pietru ma kienx ġie ingaġġat bħala suldat fiha, u lanqas ma ġie ebda bniedem ieħor. Minflok, Pietru u l-​bqija tas-​segwaċi taʼ Ġesù kienu ġew imsejħin biex ikunu “sajjieda tal-​bnedmin.” (Mattew 4:19; 26:47-53) Ftit tas-​sigħat wara, Ġesù ċċara s-​sitwazzjoni lil Pilatu. Hu qal: “Is-​saltna tiegħi m’hijiex taʼ din id-​dinja. Li kieku saltnati kienet taʼ din id-​dinja, l-​għases tiegħi kienu jiġġieldu biex ma ningħatax f’idejn il-​Lhud; imma tabilħaqq saltnati m’hijiex taʼ hawn.” (Ġwann 18:36) Kuntrarju għas-​saltna taʼ David li kienet ġiet stabbilita fuq l-​art, is-​Saltna li Alla ta lil Ġesù qiegħda fis-​sema u din se ġġib il-​paċi fuq l-​art.

L-​Armati t’Alla Joħorġu għall-​Gwerra

L-​armati t’Alla dalwaqt se jieħdu azzjoni. Hu u jiddeskrivi l-​konflitt li jrid iseħħ, il-​ktieb t’Apokalissi jsejjaħ lil Ġesù “l-​Verb taʼ Alla.” Naqraw: “Mexjin warajh, fuq żwiemel bojod, kien hemm l-​eżerċti tas-​sema, lebsin l-​għażel abjad bla nikta. Minn fommu ħierġa xabla misnuna, biex joqtol il-​ġnus.” Il-​Bibbja tgħid li dan l-​inkontru se jirriżulta fit-​tmiem tas-​“slaten kollha taʼ l-​art u l-​eżerċti tagħhom.” Inkwantu għal dawk l-​oħrajn li jonqsu li juru l-​lealtà tagħhom lejn Alla, il-​profezija żżid: “U l-​bqija sfaw maqtula bix-​xabla li kienet ħarġet minn fomm dak li kien riekeb fuq iż-​żiemel.” Anki Satana x-​Xitan se jitneħħa min-​nofs. B’hekk, se jkun verament possibbli li jkun hawn dinja taʼ paċi mingħajr armati.—Apokalissi 19:11-21; 20:1-3.

Immaġina Dinja Mingħajr Gwerer

Tistaʼ ġġib quddiem għajnejk dinja li tant hi fil-​paċi li m’għandhiex bżonn armati? Wieħed mis-​salmi Bibliċi jgħid: “Ejjew, araw x’għamel il-​Mulej, għemejjel taʼ l-​għaġeb fuq l-​art. Iwaqqaf il-​gwerer sa tarf l-​art.”—Salm 46:9, 10 [Salm 46:8, 9, NW].

X’serħan se jkun dan! Immaġina x’possibbiltajiet se jkollha s-​soċjetà umana meta fl-​aħħar tinħeles mill-​piż taʼ li jkollha toqgħod tħallas għall-​armati u t-​tagħmir tagħhom! In-​nies ikunu jistgħu jikkonċentraw l-​enerġiji tagħhom f’li jtejbu l-​kundizzjonijiet t’għajxien għal kulħadd, f’li jnaddfu l-​art u jħawluha mill-​ġdid. Se jkun hemm opportunitajiet ġodda biex jinħolqu affarijiet li jkunu tassew utli għall-​umanità.

Din il-​wegħda se jkollha twettiq mad-​dinja kollha: “Ma tinstemax aktar dnewwa f’artek, u ħerba u qerda fi trufijietek.” (Isaija 60:18) Il-​miljuni taʼ refuġjati ddisprati qatt iktar m’huma se jaħarbu minn żoni milqutin bil-​gwerer, imġegħlin iħallu warajhom lil djarhom u l-​propjetà tagħhom biex jispiċċaw jgħixu f’kampijiet kollhom miżerja. Qatt iktar m’huma n-​nies se jitniehdu għall-​maħbubin tagħhom li jkunu nqatlu jew ġew immankati f’konflitti bejn in-​nazzjonijiet. Is-​Sultan taʼ Jehovah fis-​sema se jistabbilixxi paċi dinjija permanenti. “Tħaddar f’jiemu l-​ġustizzja, u sliem kotran sa ma jintemm il-​qamar. Jeħlishom mill-​qerq u mill-​moħqrija.”—Salm 72:7, 14.

Saħansitra iktar pjaċevoli se tkun il-​ħajja fost in-​nies li jkunu tgħallmu ma jobogħdux imma jimitaw il-​modi taʼ mħabba t’Alla. Il-​Kelma t’Alla tbassar: “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.” Min jaf kif se jkun li ngħixu maʼ nies li jafu u jħobbu lil Jehovah? L-​istess ktieb ibassar: “Is-​sliem ikun frott il-​ġustizzja, u l-​ħidma tal-​ġustizzja tkun serħan u tama għal dejjem. U l-​poplu tiegħi f’post tas-​sliem, jgħammar bla biżaʼ, mistrieħ fil-​kwiet.”—Isaija 11:9; 32:17, 18.

Dawk in-​nies li l-​fidi tagħhom hi mibnija fuq għarfien Bibliku jagħrfu li l-​armati t’Alla jinsabu għal-​lest biex inaddfu l-​art minn kull għadu tal-​paċi. Dan l-​għarfien jagħtihom il-​fiduċja biex jaġixxu fuq dak li l-​Bibbja tgħid li “għad jiġri fl-​aħħar jiem.” U dan hu: “Huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra ma jitgħallmuhiex iżjed.”—Isaija 2:2-4.

Nies minn ħafna nazzjonijiet li saru Xhieda taʼ Jehovah diġà jżommu lura milli ‘jitgħallmu s-​sengħa tal-​gwerra.’ Huma poġġew il-​fiduċja tagħhom fil-​protezzjoni taʼ l-​armati ċelestjali t’Alla. Billi tistudja l-​Bibbja magħhom, int ukoll tistaʼ trawwem fiduċja simili.

[Sors taʼ l-​Istampa f’paġna 28]

Ritratt tal-​U.S. National Archives