Infittxu Wħud li Jixirqilhom fil-​Kenja

IL-​KENJA hija art taʼ ġmiel naturali kbir. Dan il-​pajjiż huwa mżejjen b’foresti kbar, pjanuri vasti, deżerti jikwu bis-​sħana, u muntanji miksijin bis-​silġ. Fil-​Kenja jgħixu iżjed minn miljun antelop Afrikan kif ukoll għadd taʼ rinoċeronti li dejjem qed jonqsu fin-​numru. Wieħed jistaʼ jara wkoll qtajjaʼ taʼ ġiraffi għaddejjin minn ġol-​pjanuri miksijin bil-​ħaxix.

Fil-Kenja hemm ukoll ammont kbir taʼ tajr. Fosthom insibu l-​ajkla, li ttir fl-​għoli b’saħħa enormi, u l-​mirjadi t’għasafar taʼ l-​għana kuluriti li jimlew l-​arja bil-​melodiji ferriħin tagħhom. U min jistaʼ ma jagħtix kas taʼ l-​iljunfanti u l-​iljuni? Ix-​xeni u l-​ħsejjes tal-​Kenja ma jintesew qatt!

Madankollu, f’dan il-​pajjiż mill-​isbaħ jinstemaʼ ħoss ieħor. Dan huwa l-​ħoss t’eluf taʼ ilħna li qed jagħtu messaġġ taʼ tama. (Isaija 52:​7, 8 [52:​7, NW]) Dawn l-​ilħna qed jaslu għand iktar minn 40 tribù u lsien. F’dan is-​sens, il-​Kenja hija wkoll art taʼ ġmiel spiritwali kbir.

Ħafna min-​nies tal-​Kenja huma reliġjużi, u huma lesti li jiddiskutu fuq affarijiet spiritwali. Minkejja dan, m’huwiex faċli li ssib maʼ min titkellem, għaliex bħal ħafna pajjiżi oħrajn, il-​Kenja bħalissa għaddejja minn bidla.

Ħafna ġew imġagħlin jibdlu l-​mod taʼ ħajja tagħhom minħabba l-​kundizzjonijiet ekonomiċi diffiċli li jeżistu. In-​nisa, fejn qabel kienu jaħdmu d-​dar, issa qed isibu xogħol f’xi uffiċċju jew inkella ssibhom maʼ xi ġenb tat-​triq ibigħu l-​frott, il-​ħaxix, il-​ħut, u l-​basktijiet magħmulin mill-​qasab. L-​irġiel jaħdmu sigħat ibsin u twal biex imantnu l-​familji tagħhom. Saħansitra t-​tfal, b’idejhom ċkejknin mimlijin pakketti taʼ karawett inkaljat u bajd mgħolli, iduru t-​toroq biex jipprovaw ibigħuhom. Għalhekk, ftit huma n-​nies li jkunu d-​dar matul il-​ġurnata. Għal din ir-​raġuni kien neċessarju li l-​proklamaturi taʼ l-​aħbar tajba tas-​Saltna jagħmlu xi aġġustamenti.

Il-kongregazzjonijiet tax-​Xhieda taʼ Jehovah ngħataw il-​parir biex jikkonċentraw iżjed fuq dawk in-​nies li ma jkunux id-​dar, li jkunu għaddejjin bid-​dmirijiet tagħhom taʼ kuljum, kif ukoll fuq il-​ħbieb, il-​qraba, uħud li jaħdmu fil-​qasam kummerċjali, u sħabhom tax-​xogħol. L-​aħwa hekk għamlu, billi tkellmu maʼ kulmin iltaqgħu miegħu. (Mattew 10:11) Ħalla xi frott l-​isforz tagħhom biex jilħqu iktar nies? Iva, u kif! Ikkunsidra xi eżempji.

Il-​Qraba Huma l-​Egħżeż Proxxmu Tagħna

Najrobi, il-​belt kapitali tal-​Kenja fiha madwar tliet miljun abitant. Fil-​lvant tal-​belt kien jgħix wieħed maġġur taʼ l-​armata li kien irtirat. Għal żmien twil, dan ma kienx jaħmilhom lix-​Xhieda taʼ Jehovah minkejja li, b’dispjaċir kbir għalih, ibnu stess kien Xhud. Darba minnhom fi Frar, dan l-​uffiċjal irtirat żar lil ibnu li kien jgħix madwar 160 kilometru ’l bogħod, fil-​belt taʼ Nakuru fejn hemm ir-​Rift Valley. Sakemm dam hemmhekk, ibnu tah bħala rigal il-​ktieb Għarfien Li Jwassal Għall-​Ħajja Taʼ Dejjem.* Missieru aċċettah u telaq lura d-​dar.

L-uffiċjal irtirat ta l-​ktieb lil martu. Din bdiet taqrah mingħajr ma ntebħet li kien pubblikat mix-​Xhieda taʼ Jehovah. Bil-​mod il-​mod, il-​verità tal-​Bibbja messitilha qalbha u bdiet taqsam din l-​informazzjoni maʼ żewġha. Min-​naħa tiegħu, dan ukoll beda jaqra l-​ktieb għax għelbitu l-​kurżità. Meta rrealizzaw min kien ippubblika l-​ktieb, indunaw li ma kinux qalulhom il-​verità dwar ix-​Xhieda taʼ Jehovah. Ikkuntattjaw lix-​Xhieda lokali u nbeda studju tal-​Bibbja. Meta qraw il-​ktieb, huma stess kienu ndunaw li ma kienx xieraq għal Kristjan li juża jew ibigħ it-​tabakk. (Mattew 22:39; 2 Korintin 7:1) Għalhekk, mingħajr ma qagħdu jaħsbuha darbtejn, qerdu s-​sigaretti kollha li kellhom fil-​ħanut tagħhom. Wara diversi xhur ikkwalifikaw bħala pubblikaturi mhux mgħammdin, u ftit żmien wara tgħammdu waqt konvenzjoni distrettwali.

Joħroġ Teżor mill-​Iskart

Mifruxin ’l hawn u ’l hemm mad-​distrett kapitali hemm villaġġi li fihom jgħixu mijiet t’eluf taʼ nies. Hawnhekk wieħed isib ringieli sħaħ taʼ djar mibnijin bit-​tajn, injam, fdalijiet tal-​metall, jew pjanċi tal-​ħadid. Meta jkun hemm nuqqas taʼ xogħol fl-​industriji u l-​fabbriki, in-​nies jiddobbaw b’li jsibu. Ħaddiema li jissejħu Jua kali (“xemx qalila” bis-​Swaħili), jaħdmu iebes f’xemx tisreġ biex jagħmlu s-​sandlijiet mit-​tajers taʼ karozzi antiki jew lampi tal-​pitrolju minn laned mormijin. Oħrajn iqallbu fil-​munzelli u l-​laned taʼ l-​iskart biex isibu karti, bottijiet tal-​landa, u fliexken tajbin għar-​riċiklaġġ.

Jistaʼ joħroġ xi teżor mill-​iskart? Iva! Wieħed ħu jiftakar: “Wieħed raġel b’saħħtu, maħmuġ, u b’dehra raffa baqaʼ dieħel fil-​ġnien tas-​Sala taʼ l-​Assemblea b’borża tal-​plastik kbira mimlija gazzetti u rivisti mormijin. Wara li introduċa lilu nnifsu bħala William, staqsieni: ‘Għandkom il-​ħarġiet reċenti taʼ It-​Torri taʼ l-​Għassa?’ Għall-​ewwel bqajt daqsxejn lura għax ma kontx naf x’kellu f’moħħu. Meta wrejtu ħames kopji tar-​rivista, hu tahom daqqa t’għajn waħda waħda u qalli: ‘Se neħodhom kollha.’ Kollni mistagħġeb mort lejn kamarti u ġibtlu l-​ktieb Int Tistaʼ Tgħix Għal Dejjem Fil-​Ġenna Fuq l-​Art.a Urejtu l-​istampa tal-​Ġenna taʼ l-​art u spjegajtlu li aħna nistudjaw il-​Bibbja man-​nies mingħajr ħlas. Imbagħad issuġġerejtlu: ‘William, għalfejn ma tiġix għada u nibdew studju?’ U hekk għamel!

“Darba waħda, meta kien il-​Ħadd, ġie għall-​ewwel laqgħa tiegħu. Dak in-​nhar kont qed nagħti t-​taħdita pubblika jien. Meta William daħal ġewwa, ta daqqa t’għajn lejn l-​udjenza, rani fuq il-​platform, u b’ġirja waħda ħareġ ’il barra mis-​sala. Iktar tard staqsejtu għalfejn kien għamel hekk. B’ċerta mistħija qalli: ‘In-​nies kienu nodfa wisq, u nfxilt.’

“Hekk kif William għamel progress fl-​istudju tiegħu, il-​verità tal-​Bibbja bdiet tbiddillu ħajtu. Inħasel, qataʼ xagħru, libes ħwejjeġ nodfa u puliti, u fi żmien qasir beda jattendi l-​laqgħat b’mod regulari. Meta ħareġ il-​ktieb Għarfien Li Jwassal Għall-​Ħajja Taʼ Dejjem, bdejna nistudjaw minn fuqu. Sadattant, William kien diġà ta żewġ taħditiet fl-​Iskola tal-​Ministeru Teokratiku u kien sar pubblikatur mhux mgħammed. Kemm fraħt meta tgħammed f’jum t’assemblea speċjali u stajt nilqgħu bħala ħija spiritwali!”

William minfejn kien ra għall-​ewwel darba l-​valur li fiha r-​rivista t-​Torri taʼ l-​Għassa? “Sibt xi ħarġiet tar-​rivista qalb xi karti mormija fl-​iskart.” Iva, kien sab teżor b’mod mhux mistenni!

Xiehda fuq il-​Post tax-​Xogħol

Qegħdin dejjem attenti biex naħtfu kull opportunità biex nagħtu xiehda informali fuq il-​post tax-​xogħol? James, anzjan f’kongregazzjoni ġewwa Najrobi, sar jaf il-​verità tal-​Bibbja b’dan il-​mod. Min-​naħa tiegħu, hu uża b’mod effettiv dan l-​istess metodu biex jilħaq lil oħrajn. Per eżempju, darba minnhom James ra lil wieħed minn sħabu tax-​xogħol dieħel l-​uffiċċju liebes beġġ bil-​kliem “Ġesù Jsalva.” Billi imita lil Filippu l-​evanġelizzatur, James staqsa lil sieħbu: “Int taf eżatt x’ifisser dak il-​kliem?” (Atti 8:​30) B’din il-​mistoqsija nbdiet diskussjoni mill-​aħjar. Inbeda studju tal-​Bibbja, u xi żmien wara, ir-​raġel tgħammed. Kellu iżjed suċċess James? Ħa jgħidilna hu stess:

“Jien u Tom konna naħdmu maʼ l-​istess kumpanija. Taʼ spiss konna nirkbu l-​vann tax-​xogħol flimkien. Għodwa waħda nzertajna bil-​qegħda ħdejn xulxin. Jien kont qed naqra wieħed mill-​kotba tagħna, u żammejtu b’tali mod u manjiera li Tom żgur setaʼ jarah sew. Ġara eżatt kif xtaqt jien. Tom wera interess, u jien bil-​qalb kollha selliftlu l-​ktieb. Hu baqaʼ impressjonat ferm b’dak li qara u aċċetta li jibda studju tal-​Bibbja. Issa kemm hu u kemm martu huma qaddejja mgħammdin taʼ Jehovah.”

James ikompli jgħid: “Fuq ix-​xogħol, taʼ spiss ikollna konversazzjonijiet interessanti waqt il-​waqfa taʼ nofsinhar. Kien f’ żewġ okkażjonijiet bħal dawn li ltqajt maʼ Ephraim u Walter. It-​tnejn kienu jafu li jien kont wieħed mix-​Xhieda taʼ Jehovah. Ephraim ried ikun jaf għalfejn kien hemm daqstant ostilità lejn ix-​Xhieda taʼ Jehovah. Min-​naħa tiegħu, Walter ried ikun jaf x’differenza hemm bejn ix-​Xhieda u reliġjonijiet oħrajn. It-​tnejn kienu sodisfatti ferm bit-​tweġibiet Skritturali li tajthom, u aċċettaw li jibdew jistudjaw. Ephraim malajr għamel progress. Maż-​żmien, kemm hu u kemm martu ddedikaw ħajjithom lil Jehovah. Issa hu qed jaqdi bħala anzjan, u martu hija pijuniera regulari. Min-​naħa l-​oħra, Walter tant sab oppożizzjoni ħarxa li rema l-​ktieb li kien juża għall-​istudju. Iżda minħabba li bqajt insus warajh, reġaʼ beda jistudja. Issa huwa wkoll qed igawdi l-​privileġġ li jaqdi bħala anzjan.” B’kollox ħdax-il persuna saru Kristjani veri minħabba li James ħataf kull opportunità biex jagħti xiehda informali fuq il-​post tax-​xogħol.

Riżultat Tassew taʼ l-​Għaġeb

Ġo villaġġ żgħir fuq ix-​xatt taʼ Lake Victoria, diversi qraba u ħbieb inġabru flimkien biex jattendu għal funeral. Fost il-​ġemgħa mnikkta kien hemm Xhud imdaħħal fiż-​żmien. Hu resaq lejn waħda għalliema taʼ l-​iskola jisimha Dolly u spjegalha dwar il-​kundizzjoni tal-​mejtin u l-​iskop taʼ Jehovah li jneħħi l-​mewt għal dejjem. Billi nnota kemm ħadet pjaċir tisimgħu, hu żguraha: “Meta terġaʼ tmur lura fejn toqgħod, xi ħadd mill-​missjunarji tagħna jiġi jżurek u jgħallmek il-​Bibbja.”

Dolly kienet toqgħod fit-​tielet mill-​akbar bliet fil-​Kenja. Dik il-​ħabta kien hemm biss erbaʼ Xhieda missjunarji jaqdu hemmhekk. Il-​ħu mdaħħal fiż-​żmien fil-​fatt ma kienx qalilhom lill-​missjunarji biex iżuru lil Dolly, imma kien ċert mija fil-​mija li hekk kien se jsir. U veru hekk sar! Ftit taż-​żmien wara, oħt missjunarja ltaqgħet maʼ Dolly u bdiet studju magħha. Issa Dolly hija mgħammda, bintha ż-​żgħira hija miktuba fl-​Iskola tal-​Ministeru Teokratiku, u ż-​żewġ uliedha subien huma mgħammdin ukoll. Hi ferħana wkoll li attendiet għall-​Iskola tas-​Servizz taʼ Pijunier.

Jieħdu Ħsieb iż-​Żjieda

Din l-​enfasi fuq ix-​xiehda informali tat opportunità lil eluf oħrajn fil-​Kenja biex jisimgħu l-​aħbar tajba. Issa hemm iżjed minn 15,000 pubblikatur li qed jaħdmu iebes f’dan ix-​xogħol ferm importanti. Barra minn hekk, is-​sena l-​oħra ’l fuq minn 41,000 ruħ attendew il-​Mafkar tal-​mewt taʼ Kristu. Fil-​Kenja kollha, l-​attendenza għal-​laqgħat spiss tkun id-​doppju tan-​numru taʼ pubblikaturi tas-​Saltna. B’hekk inħasset il-​ħtieġa għal iżjed Swali tas-​Saltna.

Qed jinbnew Swali tas-​Saltna kemm fil-​bliet il-​kbar kif ukoll f’postijiet imwarrbin. Wieħed minn dawn il-​postijiet iżolati jinsab fid-​distrett taʼ Samburu, madwar 320 kilometru fil-​grigal taʼ Najrobi. Fl-​1934, il-​belt ġiet imsejħa “Maralal,” li bis-​Samburu jfisser “ilellex.” Dan ġara għaliex l-​ewwel saqaf magħmul mill-​pjanċi tal-​ħadid li sar hemmhekk kien ileqq fix-​xemx. Tnejn u sittin sena wara nbniet binja oħra f’Maralal bis-​saqaf magħmul mill-​pjanċi tal-​ħadid. Dan ukoll “jixgħel” u “jiddi” għaliex huwa l-​post lokali għall-​qima vera.

F’din il-​parti mwarrba tal-​Kenja, il-​15-il pubblikatur għamlu sforz meraviljuż biex jibnu l-​ewwel Sala tas-​Saltna. Ladarba ma tantx kellhom flus, l-​aħwa rġiel kellhom jużaw materjal li setaʼ jinstab f’dawk l-​inħawi. Huma għamlu l-​ħitan mill-​ħamrija billi xarrbuha bl-​ilma u mlew sew bejn l-​arbli weqfin. Imbagħad, illixxaw il-​ħitan u kaħħluhom bil-​ħmieġ tal-​baqar u bl-​irmied. B’hekk tawhom kisja li serviet għal ħafna snin.

Sabiex jakkwistaw l-​arbli għall-​bini, l-​aħwa ġabu permess biex jaqtgħu s-​siġar. Imma l-​eqreb foresta kienet madwar 10 kilometri ’l bogħod. L-​aħwa kellhom jimxu sal-​foresta, jaqtgħu s-​siġar u jqaċċtulhom il-​friegħi, u jġorru l-​arbli lura lejn il-​post fejn kienu qed jibnu. Darba minnhom, huma u ġejjin lura mill-​foresta, l-​aħwa ġew imwaqqfin minn pulizija li qalilhom li l-​permess tagħhom biex jaqtgħu s-​siġar ma kienx validu. Hu qal lil wieħed pijunier speċjali li kien se jarrestah talli qataʼ s-​siġar. Waħda oħt, li kienet toqgħod f’dawk l-​inħawi u li kienet magħrufa sew f’dik il-​komunità u mill-​pulizija, qalet: “Jekk tarresta lil ħuna trid tarresta lilna lkoll, għax aħna kollha qtajna s-​siġar!” Wara dan l-​uffiċjal ħallihom jitilqu kollha kemm huma.

Fil-foresta kien hemm l-​annimali salvaġġi, u għalhekk kien perikoluż li tmur hemmhekk. Darba minnhom, waħda oħt qatgħet siġra. Hekk kif din waqgħet fl-​art, l-​oħt rat annimal jaqbeż u jitlaq jiġri. L-​oħt ħasbet li kien xi antelop Afrikan peress li kienet lemħet xi ħaġa tagħti fil-​kannella, imma iktar tard innotat mill-​marki tas-​saqajn li kien iljun! Minkejja perikli simili, l-​aħwa lestew is-​sala, u issa qed isservi bħala sors “ilellex” taʼ tifħir lil Jehovah.

Fl-​istorja teokratika tal-​Kenja, l-​1 taʼ Frar, 1963, kien jum sinifikanti ħafna. Dak in-​nhar ġie miftuħ l-​ewwel uffiċċju tal-​fergħa. Dan kien kamra waħda taʼ 7.4 metri kwadri. Il-​25 t’Ottubru, 1997, ukoll kienet data importanti fl-​istorja teokratika tal-​Kenja. F’din il-​ġurnata saret id-​dedikazzjoni tal-​kumpless il-​ġdid taʼ Betel, mifrux fuq 7,800 metru kwadru! Il-​proġett lest kien il-​quċċata grandjuża wara tliet snin taʼ xogħol iebes. Il-​volontiera minn 25 pajjiż differenti ħadmu iebes biex minn għalqa taʼ 3.2 ettari kollha tajn u ħaxix ħażin jagħmlu post sabiħ qisu ġnien fejn issa hemm il-​fergħa l-​ġdida li fiha joqogħdu 80 membru tal-​familja Betel.

Għandna kull raġun biex nifirħu b’dak kollu li Jehovah għamel mal-​poplu tiegħu. Nirringrazzjawh talli qanqal il-​qlub tal-​qaddejja tiegħu biex jagħmlu iktar sforz u jaħdmu iktar iebes biex isibu wħud li jixirqilhom fil-​Kenja, u b’hekk jagħmluha art taʼ ġmiel spiritwali kbir.

[Nota taʼ taħt]