Mistoqsijiet mill-​Qarrejja

Ġob kemm dam isofri?

Xi wħud jaħsbu li Ġob dam isofri għal bosta snin, imma l-​ktieb taʼ Ġob ma jindikax li s-​sofferenza damet daqshekk.

L-ewwel fażi tas-​sofferenza taʼ Ġob—meta tilef il-​membri tal-​familja u l-​ġid li kellu—tidher li kienet qasira ġmielha. Naqraw: “Mela darba wlied Ġob, subjien u bniet, kienu qegħdin jieklu u jixorbu l-​inbid għand ħuhom il-​kbir.” Ġob irċieva rapport wara l-​ieħor li kien ġarrab xi telfa—il-​gniedes tiegħu, il-​ħmir tiegħu, l-​imrieħel tiegħu, l-​iġmla tiegħu, u l-​qaddejja li kienu qegħdin jieħdu ħsieb dawn l-​annimali. Milli jidher, eżatt wara dan, Ġob sar jaf bil-​mewt taʼ wliedu subien u bniet, li “kienu qegħdin jieklu u jixorbu l-​inbid għand ħuhom il-​kbir.” Donnu li dan kollu seħħ f’jum wieħed.—Korsiv tagħna; Ġob 1:​13-19.

It-tieni fażi tas-​sofferenza taʼ Ġob bilfors li ħadet iktar żmien. Satana resaq quddiem Jehovah u sostna li Ġob ma kienx se jżomm l-​integrità jekk is-​sofferenza tolqtu personalment—tolqot lil ġismu stess. Imbagħad Ġob intlaqat “bi nfafet qalila minn qiegħ riġlejh sal-​qorriegħa taʼ rasu.” Biex din il-​marda tinfirex maʼ ġismu kollu setaʼ ħa ftit taż-​żmien. U x’aktarx li kellu jgħaddi ż-​żmien biex l-​aħbar taʼ “dan l-​hemm kollu” tasal għand it-​taparsi farraġa tiegħu, li qabdu t-​triq għal għandu.—Ġob 2:​3-11.

Elifaż kien minn Teman fil-​pajjiż t’Edom, u Sofar kien minn inħawi fil-​majjistral taʼ l-​Għarabja, u għalhekk it-​territorji taʼ pajjiżhom ma kinux ’il bogħod minn dawk taʼ Ġob f’Għus, li x’aktarx kienet fit-​tramuntana taʼ l-​Għarabja. Madankollu, Bildad kien Suħi, u huwa mifhum li n-​nies tiegħu kienu jgħixu max-​xtut taʼ l-​Ewfrat. Jekk Bildad kien f’pajjiżu dak iż-​żmien, riedu jgħaddu l-​ġimgħat jew ix-​xhur biex jismaʼ bis-​sitwazzjoni taʼ Ġob u biex jivvjaġġa lejn Għus. M’għandniex xi ngħidu, jistaʼ jkun li t-​tlieta li huma kienu fil-​viċinanza taʼ Ġob meta bdiet is-​sofferenza tiegħu. Kien x’kien il-​każ, meta t-​tlett iħbieb taʼ Ġob waslu ħdejh, huma “qagħdu fl-​art maġenbu għal sebat ijiem u sebat iljieli” mingħajr ma lissnu kelma.—Ġob 2:​12, 13.

Imbagħad waslet l-​aħħar fażi tas-​sofferenza taʼ Ġob. Id-​dettalji taʼ din il-​fażi jimlew ħafna kapitli tal-​ktieb. Kien hemm sensiela taʼ dibattiti jew diskorsi minn dawk it-​taparsi farraġa, u Ġob spiss weġibhom. Meta spiċċa dan, iż-​żagħżugħ Eliħu offra xi twiddib, u Jehovah kkorieġa lil Ġob mis-​smewwiet.—Ġob 32:​1-6; 38:1; 40:​1-6; 42:1.

Għaldaqstant, is-​sofferenza taʼ Ġob u s-​soluzzjoni tagħha għandhom mnejn seħħew fi ftit xhur, forsi f’inqas minn sena. Int x’aktarx li taf mill-​esperjenza li ż-​żminijiet diffiċli donnhom ma jispiċċaw qatt. Madankollu, ma rridux ninsew li jispiċċaw, bħalma spiċċaw taʼ Ġob. Idumu kemm idumu sejrin is-​sofferenzi li niffaċċjaw, ejja nżommu f’moħħna l-​appoġġ t’Alla, kif inhu rifless fil-​kliem ispirat: “Id-​daqsxejn taʼ tbatija tagħna taʼ issa tħejjilna kobor taʼ glorja bla qjies għal dejjem.” (2 Korintin 4:17) L-​appostlu Pietru kiteb: “Mbagħad, wara li tkunu batejtu għal ftit żmien, Alla li jagħti kull grazzja, li sejjħilkom għall-​glorja tiegħu taʼ dejjem fi Kristu, hu nnifsu jerġaʼ jġeddidkom, iwettaqkom, isaħħaħkom u jqegħedkom fis-​sod.”—1 Pietru 5:10.