“Ejjew Għandi, . . . U Jiena Nserraħkom”

‘Ix-​Xandir tal-​Kelma’ Jġib is-​Serħan

KIEN raġel perfett b’missjoni importanti. Il-​metodi li kien juża biex jgħallem tant kienu effettivi li “n-​nies baqgħu mistagħġba bit-​tagħlim tiegħu.” (Mattew 7:28) Ukoll, ma kienx jegħja jippriedka. Il-​ħin, l-​enerġija, u r-​riżorsi tiegħu kien jużahom primarjament biex jippriedka dwar is-​Saltna t’Alla. Fil-​fatt, Ġesù Kristu vvjaġġa minn naħa s’oħra taʼ pajjiżu bħala predikatur u għalliem uniku.—Mattew 9:35.

Il-missjoni urġenti taʼ Ġesù kienet li jippriedka “l-​Evanġelju tas-​Saltna” lin-​nies taʼ żmienu u jħarreġ lid-​dixxipli tiegħu biex jagħmlu l-​istess xogħol fuq skala globali. (Mattew 4:23; 24:14; 28:​19, 20) Kienu s-​segwaċi tiegħu, bl-​imperfezzjonijiet u l-​limitazzjonijiet kollha tagħhom, se jħossuhom ma jafux fejn se jaqbdu jagħtu rashom bir-​responsabbiltà tqila u l-​urġenza taʼ l-​inkarigu tagħhom taʼ l-​ippridkar? U kienu se jħossu li din l-​attività kienet waħda kbira ħafna għalihom?

Żgur li le! Wara li istruwixxa lid-​dixxipli tiegħu biex jitolbu lil “Sid il-​ħsad,” Alla Jehovah, għal iktar ħaddiema, Ġesù bagħathom jedukaw lin-​nies. (Mattew 9:38; 10:1) Imbagħad żgurahom li r-​responsabbiltà li jkunu s-​segwaċi tiegħu—inkluż l-​inkarigu li jippridkaw—kien se jġibilhom serħan u faraġ veru. Ġesù qal: “Ejjew għandi, . . . u jiena nserraħkom.”—Mattew 11:28.

Sors taʼ Ferħ

Kemm tirrifletti mogħdrija, imħabba, u qalb tajba din l-​istedina! Tesprimi t-​tħassib sensittiv li għandu Ġesù għas-​segwaċi tiegħu. Id-​dixxipli tiegħu jsibu serħan meta jwettqu r-​responsabbiltà tagħhom li jippridkaw l-​aħbar tajba tas-​Saltna t’Alla. Dan iġibilhom ferħ u sodisfazzjon veru.—Ġwann 4:36.

Ħafna qabel ma Ġesù kien fuq l-​art, l-​Iskrittura enfasizzat li l-​ferħ għandu jkun karatteristika tas-​servizz sagru lil Alla. Dan ħareġ ċar meta s-​salmista kanta: “Għajjtu bil-​ferħ lill-​Mulej, nies kollha taʼ l-​art, aqdu bil-​ferħ lill-​Mulej, idħlu quddiemu b’għana ferrieħi.” (Salm 100:​1, 2) Illum, nies minn kull ġens jifirħu f’Jehovah, u jesprimu t-​tifħir tagħhom bħalma armata vittorjuża tgħajjat bir-​rebħa. Dawk li tassew huma devoti lejn Alla jiġu fil-​preżenza tiegħu “b’għana ferrieħi.” U dan jixraq, tabilħaqq, għax Jehovah huwa “Alla hieni,” li jrid lill-​qaddejja tiegħu jwettqu d-​dedikazzjoni tagħhom lejh bil-​ferħ.—1 Timotju 1:​11, NW.

Il-​Ministri Jsibu Serħan

Kif jistaʼ jkun li xogħol iebes fil-​ministeru taʼ l-​għalqa ma jifliġniex imma fil-​fatt iserraħna? Sewwa, għal Ġesù, li jagħmel ix-​xogħol taʼ Jehovah kien bħal ikel li jagħti s-​saħħa mill-​ġdid. Hu qal: “L-​ikel tiegħi hu li nagħmel ir-​rieda taʼ min bagħatni u li nwassal fit-​tmiem l-​opra tiegħu.”—Ġwann 4:34.

B’mod simili, il-​Kristjani li jippridkaw b’żelu llum iħossu l-​ferħ hekk kif ‘ixandru l-​kelma.’ (2 Timotju 4:2) Connie, Kristjana taʼ mezz’età li tqattaʼ iktar minn 70 siegħa fix-​xahar fix-​xogħol taʼ l-​ippridkar, tgħid: “Wara li nkun ħadt sehem fil-​ministeru, inħoss sens taʼ sodisfazzjon u kuntentizza, avolja nkun għajjiena fl-​aħħar tal-​ġurnata.”

Xi ngħidu jekk il-​messaġġ tas-​Saltna ma jintlaqax tajjeb? Connie tissokta: “Iwieġbu kif iwieġbu n-​nies, qatt ma kien hemm xi darba fejn iddispjaċieni li ħadt sehem fil-​ministeru. Minbarra li naf li qed nagħmel dak li jogħġob lil Jehovah, jien nitgħaxxaq nitkellem dwar il-​verità għax waqt li nagħmel dan, it-​tama taʼ l-​għaġeb li hemm fil-​Bibbja tissaħħaħ ġewwa qalbi.”

Oħrajn isibu li waqt li jgħinu lin-​nies jiksbu l-​għarfien eżatt dwar Alla, dan jagħtihom tifsir f’ħajjithom stess. Meloney, żagħżugħa li tqattaʼ regolarment iktar minn 50 siegħa kull xahar fix-​xogħol taʼ l-​ippridkar, tikkummenta: “Il-​ministeru jġibli serħan għax jagħti direzzjoni u skop lil ħajti. Il-​problemi persunali u l-​ansjetajiet taʼ kuljum isiru inqas importanti meta nieħu sehem fis-​servizz.”

Millicent, ministru żeluża oħra tax-​Xhieda taʼ Jehovah, tgħid: “Bil-​ministeru, ikun hemm iżjed tifsir f’kull ġurnata li nqattaʼ nitkellem m’oħrajn dwar l-​iskop t’Alla għall-​bnedmin u nispjegalhom kif l-​art se terġaʼ tiġi Ġenna. Dan jgħinni biex Jehovah ikun reali għalija kull jum u jagħtini paċi u hena ġewwieni li ma jistgħu jinkisbu bl-​ebda mod ieħor.”

Dawk li Jilqgħu l-​Kelma Jsibu Serħan

Il-​predikaturi tas-​Saltna żgur li jsibu serħan bil-​ministeru Kristjan, u dawk li jaċċettaw il-​messaġġ li jagħti l-​ħajja jħossuhom imfarrġin. Għalkemm kienet ġiet imħarrġa mis-​sorijiet u l-​qassisin, ċerta għalliema fi skola fil-​Portugall ħasset li l-​bżonnijiet spiritwali tagħha ma kinux qed jiġu ssodisfati mill-​knisja tagħha. Kienet għadha ma ngħatatx tweġibiet għall-​mistoqsijiet li kellha dwar il-​Bibbja. Meta bdiet studju tal-​Bibbja regulari maʼ waħda mix-​Xhieda taʼ Jehovah, bdiet tikseb dehen Skritturali b’mod progressiv. L-​għalliema ħassitha eċċitata. “Kont nistennieh bil-​ħerqa l-​istudju tiegħi kull nhar taʼ Erbgħa,” qalet hi, “għax il-​mistoqsijiet li kelli kienu jiġu mweġbin waħda waħda bi provi mill-​Bibbja li kienu jikkonvinċuni.” Illum, din il-​mara hija qaddejja dedikata taʼ Jehovah, u hi wkoll qed tgħin lil oħrajn isibu serħan bil-​verità tal-​Bibbja.

Mela jidher ċar li x-​Xhieda taʼ Jehovah ma jħossuhomx li ma jafux fejn se jaqbdu jagħtu rashom minħabba s-​serjetà taʼ l-​inkarigu tagħhom li jippridkaw jew minħabba li t-​territorju tagħhom mad-​dinja kollha huwa daqstant vast. Lanqas ma jħallu l-​apatija u l-​oppożizzjoni jiskuraġġuhom. Huma ngħataw b’ruħhom u b’ġisimhom biex iwettqu l-​inkarigu tagħhom li jippridkaw is-​Saltna. Dawn jaqsmu l-​aħbar tajba man-​nies kulfejn jistgħu jinstabu—f’post fl-​Istati Uniti fejn jieqfu t-​trakkijiet (1), f’ajruport fil-​Korea (2), fl-​Andes (3), jew f’ħanut f’Londra (4). Is-​segwaċi taʼ Ġesù llum ikomplu jwettqu x-​xogħol premjanti tagħhom mad-​dinja kollha bil-​ferħ. U fi qbil mal-​wegħda tiegħu, Ġesù serraħhom u użahom biex iserrħu lil ħafna oħrajn.—Apokalissi 22:17.