“Issa Tistaʼ Tweġġaʼ Daqsxejn”

QATT qaluhulek dan il-​kliem? Forsi xi tabib jew infermier qalhomlok qabel ma tak il-​kura li kellek bżonn.

X’aktarx li ma rrifjutajtx li toqgħod għall-​kura sempliċement biex tevita l-​uġigħ li kont taf li se tbati. Minflok, issaportejt l-​uġigħ sabiex tikseb il-​benefiċċji taʼ saħħa aħjar iktar tard. F’każijiet gravi, li taċċetta jew tirrifjuta kura li tikkawża wġigħ tistaʼ tkun kwistjoni taʼ ħajja jew mewt.

Għalkemm mhux dejjem ikollna bżonn l-​għajnuna taʼ tabib, ilkoll kemm aħna bħala bnedmin imperfetti ma nistgħux noqogħdu mingħajr id-​dixxiplina, jew il-​korrezzjoni, anki dik li, xi kultant, tistaʼ tweġġagħna. (Ġeremija 10:23) Biex tenfasizza l-​importanza tad-​dixxiplina għat-​tfal, il-​Bibbja tgħid: “Il-​bluha mqabbda maʼ qalb taʼ tifel, iżda l-​ħatar tat-​twiddib ibegħidha minnu.”—Proverbji 22:​15, Saydon.

Il-ħatar f’dan il-​każ jissimbolizza l-​awtorità tal-​ġenituri. Veru, ftit huma t-​tfal li jħobbu d-​dixxiplina. Jekk din tinkludi xi tip taʼ kastig, jistgħu jobogħduha. Madankollu, ġenituri għaqlin u kollhom imħabba ma jaħsbux biss dwar jekk it-​tfal hux se jħossuhom imweġġgħin iżda dwar il-​ġid li se jiksbu minnha fl-​aħħar mill-​aħħar. Il-​ġenituri Kristjani jafu li dak li tgħid il-​Kelma t’Alla hu minnu meta tgħid: “Bħalissa kull twiddiba ma tferraħniex, imma tnikkitna; iżda mbagħad, lil dawk li jkunu tħarrġu biha, hija troddilhom il-​frott taʼ ħajja mimlija bis-​sliem u l-​ġustizzja.”—Lhud 12:11; Proverbji 13:24.

Dażgur, mhux it-​tfal biss għandhom bżonn id-​dixxiplina. Il-​kbar għandhom bżonnha wkoll. Il-​Bibbja qed titkellem mal-​kbar meta tgħid: “Aqbad mad-​dixxiplina; titlaqhiex. Issalvagwardjaha, għax hija nfisha hija ħajtek.” (Proverbji 4:​13, NW) Iva, min hu għaqli—kemm jekk żgħir jew kbir—se jgħożż ħafna d-​dixxiplina bbażata fuq il-​Kelma t’Alla, il-​Bibbja, għax jekk jagħmel hekk, fl-​aħħar mill-​aħħar, din se ssalvalu ħajtu.