Kif Tistaʼ Tibqaʼ Ħaj fl-​Aħħar taʼ Din id-​Dinja?

IL-​BIBBJA tpinġi t-​tmiem taʼ din is-​sistema t’affarijiet bħala “jum taʼ korla . . . , jum taʼ dwejjaq u niket, jum taʼ qerda u diqa, jum taʼ dlam u swied, jum imsaħħab u taʼ ċpar magħqud.” (Sofonija 1:15) Żgur li dan m’huwiex it-​tip taʼ jum li s-​soltu tħares ’il quddiem għalih! Madankollu, l-​appostlu Pietru wissa lill-​Kristjani sħabu biex ‘jistennew b’ħerqa kbira l-​miġja tal-​Jum taʼ Alla. Hu minħabba f’dan il-​Jum li s-​smewwiet jinħarqu u jinħallu, u l-​elementi tad-​dinja jinqerdu bin-​nar. Imma aħna, skond il-​wegħda tiegħu, nistennew smewwiet ġodda u art ġdida, li fihom tgħammar il-​ġustizzja.’—2 Pietru 3:​12, 13.

Hawnhekk Pietru ma kienx qed jitkellem dwar il-​qerda tas-​smewwiet u l-​art letterali. Is-​“smewwiet” u l-​“art” li Pietru qed jirreferi għalihom fil-​kuntest jissimbolizzaw lill-​gvernijiet umani korrotti u lis-​soċjetà taʼ bnedmin taʼ mingħajr Alla. “Jum il-​Mulej” mhux se jeqred lill-​art infisha iżda se “jeqred minnha l-​midinbin.” (Isaija 13:9) Għaldaqstant, għal dawk li qed “inewħu u jitniehdu minħabba l-​mistkerrhiet kollha” li qed isiru fis-​soċjetà umana ħażina taʼ llum, il-​jum taʼ Jehovah se jkun jum taʼ salvazzjoni.—Eżekjel 9:​4, Saydon.

Allura, kif jistaʼ individwu jsalva f’“Jum il-​Mulej, kbir u tal-​biżaʼ”? “Il-​kelma tal-​Mulej” li ngħatat lill-​wieħed mill-​profeti tiegħu tipprovdi r-​risposta għal din il-​mistoqsija: “Kull min isejjaħ isem il-​Mulej [“Jehovah,” NW] jinħeles.” (Ġoel 1:1; 3:​4, 5 [2:​31, 32, NW]) Ix-​Xhieda taʼ Jehovah se jieħdu pjaċir jgħinuk titgħallem xi jfisser li ssejjaħ isem Jehovah.