Ismaʼ X’Inhu Jgħid l-​Ispirtu!

“Min għandu widnejn, ħa jismaʼ x’jgħid l-​ispirtu [“lill-​kongregazzjonijiet,” “NW”].”—Apokalissi 3:22.

1, 2. Liema parir hu ripetut dwar il-​messaġġi taʼ Ġesù lis-​sebaʼ kongregazzjonijiet imsemmijin f’Apokalissi?

IL-​QADDEJJA taʼ Jehovah iridu joqogħdu attenti għall-​kliem li Ġesù Kristu qal bid-​direzzjoni taʼ l-​ispirtu qaddis lis-​sebaʼ kongregazzjonijiet imsemmijin fil-​ktieb Bibliku t’Apokalissi. Tabilħaqq, kull wieħed minn dawn il-​messaġġi fih dan il-​parir: “Min għandu widnejn, ħa jismaʼ xi jgħid l-​Ispirtu [“lill-​kongregazzjonijiet,” NW].”—Apokalissi 2:​7, 11, 17, 29; 3:​6, 13, 22.

² Diġà kkunsidrajna l-​messaġġi taʼ Ġesù lill-​anġli, jew l-​indokraturi, f’Efesu, Żmirna, u Pergamu. Kif nistgħu nibbenefikaw minn dak li qal bl-​ispirtu qaddis lill-​erbaʼ kongregazzjonijiet l-​oħra?

Lill-​Anġlu f’Tjatira

3. Fejn kienet Tjatira, u għal liema prodott kienet magħrufa?

³ “L-​Iben taʼ Alla” jfaħħar kif ukoll iwiddeb lill-​kongregazzjoni taʼ Tjatira. (Aqra Apokalissi 2:​18-29.) Tjatira (issa Akhisar) inbniet tul ix-​xmara żgħira li toħroġ mix-​Xmara Gediz (Ermu tal-​qedem) fil-​punent taʼ l-​Asja Minuri. Il-​belt kienet magħrufa għal diversi snajjaʼ. Dawk li kienu jagħmlu ż-​żebgħa kienu jużaw l-​għeruq tar-​robbja biex joħorġu l-​famuż kulur skarlatt, jew il-​vjola. Lidja, li saret Kristjana matul iż-​żjara taʼ Pawlu ġewwa Filippi fil-​Greċja, kienet “mara minn Tijatira, neguzjanta tal-​porpra.”—Atti 16:​12-15.

4. Għalxiex ġiet imfaħħra l-​kongregazzjoni f’Tjatira?

⁴ Ġesù jfaħħar lill-​kongregazzjoni taʼ Tjatira għall-​għemejjel tajbin, l-​imħabba, il-​fidi, is-​sabar, u x-​xogħol fil-​ministeru. Fil-​fatt, ‘l-​opri tagħhom taʼ l-​aħħar kienu aħjar minn dawk tal-​bidu.’ Madankollu, anki jekk għandna reputazzjoni tajba xorta waħda m’għandna qatt nittraskuraw il-​morali tagħna.

5-7. (a) Min kienet ‘il-​mara Ġeżabel’ u x’kellu jsir mill-​influwenza tagħha? (b) Il-​messaġġ taʼ Kristu lill-​kongregazzjoni taʼ Tjatira x’jgħinhom jagħmlu lin-​nisa devoti lejn Alla?

⁵ Il-​kongregazzjoni f’Tjatira kienet qed tittollera l-​idolatrija, it-​tagħlim falz, u l-​immoralità sesswali. F’nofshom kien hemm ‘il-​mara Ġeżabel’—forsi xi grupp taʼ nisa bi drawwiet bħal dawk tar-​Reġina kiefra Ġeżabel tas-​Saltna b’għaxar tribujiet taʼ Iżrael. Xi studjużi jissuġġerixxu li l-​‘profetessi’ taʼ Tjatira pprovaw iħajru lill-​Kristjani għall-​qima taʼ l-​allat tax-​xirka tan-​negozjanti u biex jipparteċipaw fil-​festi li jinvolvu sagrifiċċji taʼ l-​ikel lill-​idoli. Jalla ma jkun hemm ebda profetessa li taħtar lilha nfisha biex tinfluwenza lill-​oħrajn fil-​kongregazzjoni Kristjana llum!

⁶ Kristu kien ‘se jixħetha marida ġo sodda, u ’l dawk li waqgħu fiż-​żína magħha jibgħat fuqhom taħbit kbir jekk ma jerġgħux lura mill-​għemejjel tagħha.’ L-​indokraturi ma jażżardawx iċedu għal tagħlim u influwenzi malizzjużi bħal dawn, u ebda Kristjan m’għandu għalfejn jiżni spiritwalment jew fiżikament jew jieħu sehem fl-​idolatrija sabiex jirrealizza li “t-​tagħlim moħbi fil-​fond tax-​Xitan” huwa kompletament mill-​agħar. Jekk nagħtu kas it-​twissija taʼ Ġesù, se nżommu tajjeb dak li diġà għandna, u d-​dnub mhux se jaħkimna. Minħabba li ċaħdu prattiċi midinba, xenqiet sesswali, u ċerti miri, il-​midlukin irxoxtati jirċievu “setgħa fuq il-​ġnus” u se jingħaqdu maʼ Kristu biex ikissru lil dawn il-​ġnus. Il-​kongregazzjonijiet taʼ llum għandhom kwiekeb simboliċi, u l-​midlukin se jingħataw “il-​Kewkba tiddi taʼ filgħodu,” l-​Għarus, Ġesù Kristu, meta jiġu rxoxtati għas-​sema.—Apokalissi 22:16.

⁷ Il-​kongregazzjoni taʼ Tjatira ġiet imwissija biex ma tittollerax l-​influwenza kiefra tan-​nisa apostati. Il-​messaġġ imnebbaħ taʼ Ġesù lill-​kongregazzjoni jgħin lin-​nisa devoti llum biex iżommu posthom kif irid Alla. Huma ma jipprovawx jeżerċitaw awtorità fuq l-​irġiel u ma jħajrux lill-​aħwa rġiel għaż-​żína spiritwali jew fiżika. (1 Timotju 2:12) Minflok, dawn in-​nisa jagħtu eżempju b’għemejjel mill-​aqwa u b’servizz għall-​glorja t’Alla. (Salm 68:12 [68:​11, NW]; 1 Pietru 3:​1-6) Jekk il-​kongregazzjoni tgħasses dak li għandha—it-​tagħlim pur u l-​kondotta u s-​servizz għażiż tas-​Saltna—Kristu se jiġi b’rigali meraviljużi, mhux bil-​qerda.

Lill-​Anġlu f’Sardi

8. (a) Fejn kienet Sardi, u x’dettalji għandna dwarha? (b) Il-​kongregazzjoni f’Sardi għala kellha bżonn l-​għajnuna?

⁸ Il-​kongregazzjoni f’Sardi kellha bżonn l-​għajnuna b’mod urġenti għax kienet mejta spiritwalment. (Aqra Apokalissi 3:​1-6.) Sardi, madwar 50 kilometru lejn in-​nofsinhar taʼ Tjatira, kienet belt prosperuża. Il-​kummerċ, l-​art fertili, u l-​produzzjoni tad-​drapp u t-​twapet tas-​suf għenu biex jagħmluha belt sinjura li darba kellha 50,000 resident. Skond l-​istudjuż taʼ l-​istorja Ġużeppi Flavju, f’Sardi kien hemm komunità Lhudija kbira fl-​ewwel seklu Q.E.K. Fost il-​fdalijiet li nstabu minn din il-​belt hemm sinagoga u tempju t’Artemi, l-​alla mara t’Efesu.

9. X’għandu jsir jekk l-​attivitajiet tagħna taʼ servizz qed nagħmluhom bla ħeġġa taʼ xejn?

⁹ Kristu qal lill-​anġlu tal-​kongregazzjoni f’Sardi: “Jiena naf l-​opri tiegħek, inti għandek fama li inti ħaj, iżda int mejjet.” Iżda xi ngħidu jekk għandna r-​reputazzjoni li aħna mqajmin spiritwalment iżda ninsabu reqdin sew għall-​privileġġi Kristjani u l-​attivitajiet tas-​servizz tagħna nagħmluhom bla ħeġġa, u spiritwalment ‘wasalna biex ninqerdu’? F’dan il-​każ irridu ‘niftakru f’dak li rċivejna u smajna’ dwar il-​messaġġ tas-​Saltna, u għandna nerġgħu nibdew nistinkaw fis-​servizz sagru. Żgur li għandna nibdew nieħdu sehem b’qalbna kollha fil-​laqgħat Kristjani. (Lhud 10:​24, 25) Kristu wissa lill-​kongregazzjoni f’Sardi: “Għax jekk ma tistenbaħx, niġik bħal ħalliel, bla ma tkun taf is-​siegħa li fiha niġik.” Xi ngħidu għal żmienna? Aħna dalwaqt se jkollna nagħtu kont.

10. Saħansitra f’sitwazzjoni bħal dik f’Sardi, x’jistaʼ jkun minnu għal xi ftit Kristjani?

¹⁰ Anki f’sitwazzjoni bħal dik f’Sardi, għandu mnejn ikun hemm xi ftit li ‘ma tebbgħux ilbieshom, u li jistgħu jimxu maʼ Kristu lebsin l-​abjad, għax jistħoqqilhom.’ Huma jżommu l-​identità Kristjana tagħhom, jibqgħu bla tebgħa, mingħajr ebda tinġis morali jew reliġjuż taʼ din id-​dinja. (Ġakbu 1:27) Għalhekk, Ġesù ‘mhux talli ma jħassrilhomx isimhom minn ktieb il-​ħajja, imma jistqarrilhom isimhom quddiem Missieru u quddiem l-​anġli Tiegħu.’ Deskritti bħala li jixirqilhom jimxu maʼ Kristu, il-​klassi taʼ l-​għarusa taʼ wħud midlukin huma lebsin ilbies taʼ l-​għażel li jgħammex l-​għajnejn, nadif, u fin li jfisser l-​għemejjel tajbin tal-​qaddisin t’Alla. (Apokalissi 19:8) Il-​privileġġi meraviljużi taʼ servizz li hemm jistennewhom fis-​sema jqanqluhom biex joħorġu rebbiħin fuq din id-​dinja. Hemm barkiet lesti wkoll għal dawk li qed jistennew li jiksbu l-​ħajja taʼ dejjem fuq l-​art. L-​ismijiet tagħhom ukoll jinsabu miktubin fil-​ktieb tal-​ħajja.

11. X’għandna nagħmlu jekk qed nonogħsu spiritwalment?

¹¹ Ħadd minna ma jrid jispiċċa fis-​sitwazzjoni spiritwali tal-​biki li kienet fiha l-​kongregazzjoni taʼ Sardi. Iżda x’se nagħmlu jekk nindunaw li qed nonogħsu spiritwalment? Irridu naġixxu malajr għall-​ġid tagħna stess. Ejja ngħidu li qed ninġibdu lejn prattiċi midinba jew qed nittraskuraw il-​laqgħat jew il-​ministeru. F’dan il-​każ, ejja nfittxu l-​għajnuna taʼ Jehovah permezz taʼ talb ħerqan. (Filippin 4:​6, 7, 13) Jekk kuljum naqraw u nistudjaw il-​Bibbja u l-​pubblikazzjonijiet tal-​“prokuratur leali” se niġu megħjunin nibqgħu mqajmin spiritwalment. (Luqa 12:​42-44, NW) Imbagħad se nkunu bħal dawk f’Sardi li kellhom l-​approvazzjoni taʼ Kristu, u se nkunu taʼ barka għal sħabna fit-​twemmin.

Lill-​Anġlu f’Filadelfja

12. Kif tiddeskrivi s-​sitwazzjoni reliġjuża f’Filadelfja tal-​qedem?

¹² Ġesù faħħar lill-​kongregazzjoni f’Filadelfja. (Aqra Apokalissi 3:​7-13.) Filadelfja (issa Alasehir) kienet iċ-​ċentru prosperuż taʼ reġjun li jipproduċi l-​inbid fil-​punent taʼ l-​Asja Minuri. Fil-​fatt, l-​alla prinċipali tagħha kien Djonisju, l-​alla taʼ l-​inbid. Jidher ċar li l-​Lhud f’Filadelfja pprovaw jipperswadu lill-​Kristjani Lhud t’hemmhekk biex iżommu ċerti prattiċi tal-​Liġi Mosajka jew biex jerġgħu lura għalihom.

13. Kristu kif uża “l-​muftieħ taʼ David”?

¹³ Kristu “għandu l-​muftieħ taʼ David,” u għalhekk ġie fdat bl-​interessi kollha tas-​Saltna u bit-​tmexxija tad-​dar tal-​fidi. (Isaija 22:22; Luqa 1:32) Ġesù uża dan il-​muftieħ biex jiftaħ opportunitajiet u privileġġi tas-​Saltna lill-​Kristjani f’Filadelfja tal-​qedem u f’postijiet oħra. Sa mill-​1919, hu qiegħed quddiem “il-​prokuratur leali” “bieb kbir miftuħ” li jwassal għall-​ippridkar tas-​Saltna li ħadd minn dawk li jopponu ma jistaʼ jagħlqu. (1 Korintin 16:9; Kolossin 4:​2-4) M’għandniex xi ngħidu, il-​bieb għall-​privileġġi tas-​Saltna ngħalaq għal dawk tas-​“sinagoga tax-​Xitan,” għax huma m’humiex Iżraelin spiritwali.

14. (a) Ġesù liema wegħda għamel lill-​kongregazzjoni f’Filadelfja? (b) Kif nistgħu ma naqgħux fis-​“siegħa tat-​tiġrib”?

¹⁴ Ġesù għamel din il-​wegħda lill-​Kristjani f’Filadelfja tal-​qedem: “Talli int ħarist it-​tagħlim tiegħi dwar is-​sabar, jiena wkoll inħares lilek mis-​siegħa tat-​tiġrib li ġejja fuq id-​dinja kollha.” L-​ippridkar jeħtieġ l-​istess sabar li wera Ġesù. Hu qatt ma ċeda għall-​għadu iżda kompla jagħmel ir-​rieda taʼ Missieru. Minħabba f’hekk, Ġesù ġie rxoxtat għal ħajja immortali fis-​sema. Jekk inżommu sod id-​deċiżjoni tagħna li naduraw lil Jehovah u nappoġġaw is-​Saltna billi nippridkaw l-​aħbar tajba, se niġu mħarsin milli naqgħu matul il-​perijodu taʼ prova li qed inġarrbu bħalissa, is-​“siegħa tat-​tiġrib.” Aħna se ‘nżommu sħiħ dak li għandna’ mingħand Kristu billi nistinkaw biex inżidu dawk l-​interessi tas-​Saltna. Il-​fatt li l-​midlukin jagħmlu dan se jwassalhom għall-​kuruna imprezzabbli tas-​sema u lil sħabhom leali għall-​ħajja taʼ dejjem fuq l-​art.

15. X’inhu meħtieġ minn dawk li jridu jkunu ‘kolonni fit-​tempju t’Alla’?

¹⁵ Kristu jkompli jgħid: “Ir-​rebbieħ nagħmlu kolonna fit-​Tempju taʼ Alla tiegħi, . . . u fuqu nonqox isem Alla tiegħi, isem il-​Belt taʼ Alla tiegħi, Ġerusalemm il-​ġdida li nieżla mis-​sema mingħand Alla tiegħi, u l-​isem il-​ġdid tiegħi.” L-​indokraturi midlukin iridu jappoġġaw il-​qima vera. Iridu jibqgħu jikkwalifikaw bħala membri taʼ “Ġerusalemm il-​ġdida” billi jippridkaw dwar is-​Saltna t’Alla u jibqgħu nodfa spiritwalment. Hekk jeħtieġ li jagħmlu jekk iridu li jkunu kolonni fit-​tempju glorifikat tas-​sema u jkollhom l-​isem tal-​belt t’Alla bħala ċ-​ċittadini tagħha fis-​sema u jkollhom sehem minn isem Kristu bħala l-​għarusa tiegħu. U m’għandniex xi ngħidu, irid ikollhom widnejn li ‘jisimgħu xi jgħid l-​ispirtu lill-​kongregazzjonijiet.’

Lill-​Anġlu f’Laodiċija

16. X’inhuma xi fatti dwar Laodiċija?

¹⁶ Kristu widdeb lill-​kongregazzjoni taʼ Laodiċija li kienet sodisfatta biha nfisha. (Aqra Apokalissi 3:​14-22.) Xi 150 kilometru lejn il-​lvant t’Efesu u bejn iż-​żewġ rotot prinċipali tal-​kummerċ fil-​wied fertili tax-​Xmara Liku, kien hemm Laodiċija, belt li rnexxiet fil-​manifattura u li kellha ċentru bankarju prosperuż ħafna. Il-​ħwejjeġ magħmulin mis-​suf iswed tar-​reġjun kienu magħrufin maʼ kullimkien. Peress li fiha kien hemm skola famuża tal-​mediċina, Laodiċija wisq probabbli kienet tipproduċi mediċina taʼ l-​għajnejn magħrufa bħala t-​trab Friġjan. Asklepju, alla tal-​mediċina, kien wieħed mill-​allat ewlenin tal-​belt. X’aktarx li f’Laodiċija kien hemm għadd konsiderevoli taʼ Lhud, u milli jidher xi wħud minnhom kienu għonja mhux ħażin.

17. Dawk taʼ Laodiċija għala ġew imwiddba?

¹⁷ Meta kien qed jindirizza lill-​kongregazzjoni taʼ Laodiċija permezz taʼ l-​“anġlu” tagħha, Ġesù tkellem bl-​awtorità li kellu bħala “x-​Xhud fidil u veru, . . . il-​bidu tal-​Ħolqien t’Alla.” (Kolossin 1:​13-16) Dawk taʼ Laodiċija ġew imwiddba għax ma kinux ‘la kiesħa u lanqas sħan’ spiritwalment. Talli kienu bierda, Kristu kien se jobżoqhom minn ħalqu. Ma kellux ikun diffiċli għalihom biex jifhmu l-​punt tiegħu. Ħdejn Ġerapoli kien hemm nixxigħat taʼ l-​ilma sħun, u Kolossi kellha l-​ilma kiesaħ. Peress li l-​ilma kellu jgħaddi minn ġol-​kanen sa Laodiċija, li kienet ’il bogħod mhux ħażin, wisq probabbli kien jilħaq jibred sakemm jasal sal-​belt. F’parti mit-​triq kien jgħaddi minn akkwidott. Iktar qrib Laodiċija, kien jgħaddi minn blokok tal-​ġebel imtaqqbin u mwaħħlin flimkien.

18, 19. Kif jistgħu jiġu megħjunin dawk li llum huma bħall-​Kristjani f’Laodiċija?

¹⁸ Individwi li llum jixbhu lil dawk taʼ Laodiċija la huma jaħarqu b’mod li jqanqlek u lanqas kesħin b’mod li jirrifreskak. Bħall-​ilma biered, huma jinbeżqu! Ġesù ma jridhomx bħala l-​kelliema tiegħu, bħala “ambaxxaturi [midlukin] taʼ Kristu.” (2 Korintin 5:20) Jekk ma jindmux, huma jitilfu l-​privileġġ li għandhom bħala proklamaturi tas-​Saltna. Dawk taʼ Laodiċija fittxew ir-​rikkezzi tad-​dinja u ‘ma kinux jafu li huma kienu msejknin, taʼ min jitħassarhom, foqra, għomja, u għerja.’ Biex ineħħu l-​faqar, l-​għama, u l-​għera spiritwali, dawk li llum huma bħalhom iridu jixtru mingħand Kristu ‘d-​deheb imsoffi bin-​nar’ tal-​fidi li tkun ġiet imġarrba, l-​“ilbies abjad” tas-​sewwa, u l-​‘ingwent’ taʼ l-​għajnejn li jinkuraġġixxi ħarsa spiritwali. L-​indokraturi Kristjani huma lesti li jgħinuhom biex ikunu attenti għall-​bżonn spiritwali tagħhom ħalli “jistagħnu fil-​fidi.” (Ġakbu 2:5; Mattew 5:3) Iktar minn hekk, l-​indokraturi jridu jgħinuhom japplikaw l-​‘ingwent’ spiritwali—jaċċettaw u jgħixu fi qbil mat-​tagħlim, il-​pariri, l-​eżempju, u l-​attitudni mentali taʼ Ġesù. Dan hu l-​kura kontra “l-​ġibda tal-​ġisem u l-​ġibda taʼ l-​għajnejn u l-​kburija tal-​ħajja.”—1 Ġwann 2:​15-17.

¹⁹ Ġesù jwiddeb u jiddixxiplina lil dawk kollha li jħobb. L-​indokraturi li huma taħtu jridu jagħmlu l-​istess ħaġa b’tenerezza. (Atti 20:​28, 29) Dawk taʼ Laodiċija riedu jkunu kollhom ‘ħeġġa u jindmu,’ waqt li jbiddlu l-​ħsibijiet u l-​mod taʼ ħajja tagħhom. Per eżempju, drajna aħna xi stil taʼ ħajja li jnaqqas is-​servizz sagru tagħna lil Alla u jagħmlu inqas importanti f’ħajjitna? Mela, ejja ‘nixtru l-​ingwent taʼ l-​għajnejn’ mingħand Ġesù ħalli b’hekk naraw l-​importanza taʼ li nfittxu s-​Saltna l-​ewwel b’żelu kbir.—Mattew 6:33.

20, 21. Illum, min qed iwieġeb kif jixraq għat-​‘taħbita’ taʼ Ġesù, u dawn lejn xiex iħarsu ’l quddiem?

²⁰ “Ara,” jgħid Kristu, “jiena fil-​bieb, u qiegħed inħabbat; jekk xi ħadd jismagħni u jiftaħli l-​bieb, jiena nidħol għandu u niekol miegħu, u hu jiekol miegħi.” Ġesù spiss kien jagħti tagħlim spiritwali meta jkun qed jieħu sehem f’xi ikla. (Luqa 5:​29-39; 7:​36-50; 14:​1-24) Issa hu jħabbat il-​bieb taʼ kongregazzjoni t-​tip taʼ dik taʼ Laodiċija. Kienu l-​membri tagħha se jwieġbu għat-​taħbita, jerġgħu jsiru jħobbuh, jilqgħuh f’nofshom, u jħalluh jgħallimhom? Jekk iva, Kristu se jiċċelebra magħhom għall-​ġid spiritwali kbir tagħhom.

²¹ Illum, in-​“nagħaġ oħra” qegħdin jiftħulu lil Ġesù b’mod simboliku, u dan l-​għemil iwassal għall-​ħajja taʼ dejjem. (Ġwann 10:16; Mattew 25:​34-40, 46) Lil kull wieħed mill-​midlukin li joħroġ rebbieħ, Kristu se jagħtih l-​unur li ‘joqgħod maġenbu fuq it-​tron tiegħu; l-​istess kif hu, meta rebaħ, qgħad maġenb Missieru fuq it-​tron tiegħu.’ Iva, lill-​midlukin li joħorġu rebbiħin, Ġesù jwegħedhom il-​premju kbir li jagħtihom tron miegħu fuq l-​id il-​leminija taʼ Missieru fis-​sema. In-​nagħaġ oħra li joħorġu rebbieħa jħarsu ’l quddiem lejn post mill-​isbaħ fuq l-​art taħt il-​ħakma tas-​Saltna.

Tagħlimiet Għalina Lkoll

22, 23. (a) Kif jistgħu l-​Kristjani kollha jibbenefikaw minn dak li qal Ġesù lis-​sebaʼ kongregazzjonijiet? (b) X’għandna dejjem inkunu determinati li nagħmlu?

²² M’hemm ebda dubju li l-​Kristjani kollha jistgħu jibbenefikaw ferm mill-​kliem taʼ Ġesù lis-​sebaʼ kongregazzjonijiet fl-​Asja Minuri. Per eżempju, il-​fatt li Kristu offra tifħir xieraq iqanqal lill-​anzjani Kristjani kollhom imħabba biex huma wkoll ifaħħru lill-​individwi u l-​kongregazzjonijiet li sejrin tajjeb spiritwalment. Fejn ikun hemm id-​dgħjufijiet, l-​anzjani jgħinu lil sħabhom fit-​twemmin biex japplikaw il-​kura spiritwali. Ilkoll kemm aħna nistgħu nkomplu nibbenefikaw mid-​diversi aspetti tal-​parir li Ġesù ta lis-​sebaʼ kongregazzjonijiet, basta nibqgħu nagħmlu dan bit-​talb u mingħajr dewmien.a

²³ Dan iż-​żmien taʼ l-​aħħar m’huwiex żmien li nkunu sodisfatti bina nfusna, materjalisti, jew xi ħaġa oħra li tistaʼ ġġagħalna nagħmlu mill-​inqas fis-​servizz lil Alla. Għalhekk, jalla l-​kongregazzjonijiet kollha jkomplu jiddu bħall-​kandelabri li Ġesù jżomm f’posthom. Bħala Kristjani leali, jalla dejjem inkunu determinati li nagħtu kas meta Ġesù jitkellem u nisimgħu dak li l-​ispirtu għandu xi jgħid. Imbagħad se jkollna ferħ dejjiemi bħala dawk li jġorru d-​dawl għall-​glorja taʼ Jehovah.

[Noti taʼ taħt]

Int Kif Twieġeb?

• Min kienet ‘il-​mara Ġeżabel,’ u n-​nisa devoti għala ma jimitawhiex?

• F’liema kundizzjoni kienet il-​kongregazzjoni taʼ Sardi, u x’nistgħu nagħmlu biex ma nsirux bħall-​ħafna Kristjani li kienu jgħixu hemm?

• Ġesù x’wiegħed lill-​kongregazzjoni f’Filadelfja, u dawn il-​wegħdi kif japplikaw illum?

• Dawk taʼ Laodiċija għala ġew imwiddba, iżda l-​Kristjani żelużi lejn xiex iħarsu ’l quddiem?

[Stampa f’paġna 16]

Il-​modi kiefra tal-​‘mara Ġeżabel’ iridu jiġu evitati

[Stampi f’paġna 18]

Ġesù poġġa “bieb kbir” li jwassal għall-​privileġġi tas-​Saltna quddiem is-​segwaċi tiegħu

[Stampa f’paġna 20]

Int tilqgħu lil Ġesù u tisimgħu?