Proklamaturi tas-Saltna Jirrapportaw
Programm Televiżiv Wassalha biex Tigglorifika lil Alla
L-APPOSTLU Pawlu qal li ‘xi wħud lil Kristu jxandruh imqanqlin mill-għira u l-pika, imma oħrajn minn qalbhom.’ (Filippin 1:15) Kultant, anki dawk li jipprovaw iġibu għajb fuq in-nies taʼ Jehovah mingħajr ma jridu, iġagħlu lil dawk taʼ qalbhom tajba jersqu lejn il-verità.
F’Novembru taʼ l-1998, fuq it-televixin nazzjonali taʼ Franza kien hemm dokumentarju li fih dehru xeni minn Betel, il-faċilitajiet tal-fergħa tax-Xhieda taʼ Jehovah ġo Louviers, fi Franza. Minkejja r-reazzjonijiet differenti li rċiviet, il-programm ipproduċa riżultati pożittivi b’modi mhux mistennijin.
Fost dawk li raw il-programm kien hemm Anna-Paula, li tgħix biss 60 kilometru ’l bogħod minn Betel. Anna-Paula, omm divorzjata b’żewġt itfal, kienet qed tfittex impjieg. Għalhekk, l-għada fil-għodu ċemplet Betel biex tara jekk tistax taħdem hemm. “Jien stajt nara li kien hemm ambjent sabiħ u li x-xogħol li kien isir hemmhekk kien taʼ benefiċċju,” qalet hi. Kemm stagħġbet meta saret taf li dawk kollha li jaqdu f’Betel huma ministri li jagħtu l-ħin tagħhom b’xejn! Wara diskussjoni qasira dwar l-attivitajiet tax-Xhieda taʼ Jehovah, hi aċċettat li waħda Xhud tmur iżżurha d-dar.
Meta Léna, ministru full-time fil-kongregazzjoni lokali, marret iżżurha, kellhom konversazzjoni twila, u Anna-Paula aċċettat il-ktieb Għarfien Li Jwassal Għall-Ħajja Taʼ Dejjem.a Sakemm reġgħet żaritha, Anna-Paula kienet qrat il-ktieb minn qoxra sa qoxra u kellha ħafna mistoqsijiet. Hi mill-ewwel aċċettat studju tal-Bibbja. Anna-Paula qalet: “Għalija, din kienet opportunità biex niskopri l-Kelma t’Alla. Qatt ma kelli Bibbja f’idejja qabel.”
F’Jannar, Anna-Paula żaret Betel, u l-ġimgħa taʼ wara attendiet l-ewwel laqgħa Kristjana tagħha. Ftit wara dan, bdiet tistudja l-Bibbja maʼ wliedha u bdiet tagħti xiehda lil sħabha. “Ma stajtx inżomm dak li kont qed nitgħallem għalija biss,” tgħid hi. “Ridt naqsam il-veritajiet tal-Bibbja man-nies u nfarraġhom.” Wara li ssieltet biex tegħleb diversi problemi persunali, Anna-Paula bdiet tattendi l-laqgħat regolarment. Hi malajr għamlet progress u tgħammdet fil-5 taʼ Mejju tas-sena 2002.
Iżjed minn hekk, bħala riżultat taʼ l-eżempju tajjeb taʼ Anna-Paula u l-ippridkar żeluż tagħha, ommha bdiet tistudja l-Bibbja u ma damitx ma tgħammdet. “M’hemm ebda kelma li tistaʼ tesprimi l-ferħ li qed inħoss,” tgħid Anna-Paula. “Nirringrazzja lil Jehovah kuljum talli ħallieni nsir nafu u għall-barkiet kollha li hu tani.”
[Nota taʼ taħt]
a Pubblikat mix-Xhieda taʼ Jehovah.
[Stampi f’paġna 8]
Fuq: Anna-Paula
Taħt: Id-dħul għall-uffiċċji tal-fergħa fi Franza