Il-Wegħdi taʼ Min Tistaʼ Tafda?
“IL-WEGĦDI tiegħu kienu, bħalma kien hu f’dak iż-żmien, kbar; imma l-azzjonijiet tiegħu, bħalma hu issa, xejn.”—King Henry the Eighth, miktub minn William Shakespeare.
Il-wegħdi kbar li rrefera għalihom Shakespeare kienu dawk tal-kardinal Ingliż Thomas Wolsey, li kellu poter kbir bħala politikant fl-Ingilterra matul is-seklu 16. Xi wħud forsi jgħidu li d-deskrizzjoni taʼ Shakespeare tgħodd ukoll għall-maġġuranza tal-wegħdi li jisimgħu llum. Darba wara l-oħra, in-nies jiġu mwegħdin ħafna imma jirċievu ftit. B’hekk, m’huwiex diffiċli biex tifhem għala n-nies jibdew jiddubitaw kwalunkwe wegħda li ssirilhom.
Id-Diżappunti Joktru
Per eżempju, matul il-konflitt terribbli fil-Balkani fis-snin 90 il-Kunsill tas-Sigurtà tal-Ġnus Magħquda ddikjara l-belt taʼ Srebrenica fil-Bosnia bħala “post taʼ sigurtà.” Din mid-dehra kienet garanzija taʼ min joqgħod fuqha li ngħatat mill-komunità internazzjonali. Eluf taʼ refuġjati Musulmani fis-Srebrenica hekk ħasbu. Madankollu, fl-aħħar mill-aħħar, il-wegħda taʼ menqa taʼ sigurtà ma fissret assolutament xejn. (Salm 146:3) F’Lulju tas-sena 1995, forzi li kienu qed jattakkaw sempliċement injoraw il-forzi tal-Ġnus Magħquda u invadew il-belt. Iktar minn 6,000 Musulman sparixxew, u minn taʼ l-inqas inqatlu 1,200 pajżan Musulman.
Kull qasam tal-ħajja huwa mimli b’wegħdi miksurin. In-nies iħossuhom imbroljati mill-“għadd taʼ reklamar falz u qarrieqi” li qed jiġu bombardjati bih illum. Huma jħossuhom diżappuntati minħabba l-“wegħdi miksurin li saru fil-kampanji elettorali taʼ mijiet taʼ politikanti.” (The New Encyclopædia Britannica, Volum 15, paġna 37) Mexxejja reliġjużi taʼ fiduċja li jwiegħdu li se jieħdu ħsieb il-merħliet tagħhom jabbużaw minnhom bl-iktar mod vili. Anki f’xi professjonijiet bħall-edukazzjoni u l-mediċina—li suppost huma mmexxijin mill-mogħdrija u t-tħassib dwar oħrajn—xi wħud ittradew il-fiduċja tagħhom u sfruttaw, jew saħansitra qatlu, lil dawk fdati f’idejhom. Mhux taʼ b’xejn li l-Bibbja twissina biex naraw sewwa qabel ma nemmnu u biex ma nafdawx kull kelma!—Proverbji 14:15.
Wegħdi li Jiġu Mwettqin
M’għandniex xi ngħidu, ħafna nies iżommu l-kelma tagħhom, saħansitra anki jekk din tkun taʼ sfida kbira għalihom. (Salm 15:4) Il-kelma tagħhom hija l-garanzija tagħhom, u huma jżommuha. Oħrajn b’sinċerità kbira jkunu jridu jżommu l-wegħdi li għamlu b’intenzjoni tajba. Huma ħerqanin u lesti li jagħmlu dak li jkunu wiegħdu imma sempliċement ma jkunux jistgħu. Iċ-ċirkustanzi jistgħu jfixklu anki l-iktar pjanijiet nobbli.—Koħèlet 9:11.
Hi x’inhi r-raġuni, ir-realtà hi li ħafna nies isibuha diffiċli ħafna biex ipoġġu l-fidi tagħhom fil-wegħdi taʼ kulħadd. Għalhekk tqum il-mistoqsija: Hemm xi wegħdi li nistgħu nafdaw? Iva. Aħna nistgħu nafdaw il-wegħdi li nsibu fil-Kelma t’Alla, il-Bibbja. Għala ma teżaminax dak li jgħid l-artiklu li jmiss dwar dan is-suġġett? Int forsi tikkonkludi bħalma diġà għamlu miljuni, li aħna nistgħu verament nafdaw il-wegħdi t’Alla.
[Sors tal-Istampa f’paġna 3]
AP Ritratt/Amel Emric