Għala Ħafna Jiddubitaw li r-​Reliġjon Tistaʼ Tgħaqqad lill-​Umanità

“ĦOBB lill-​proxxmu tiegħek.” (Mattew 22:39) Din ir-​regola bażika taʼ mġiba hija mfaħħra minn ħafna reliġjonijiet. Kieku dawn ir-​reliġjonijiet effettwaw lill-​membri tagħhom billi għallmuhom iħobbu lill-​proxxmu, kieku dawn kienu jkunu miġbudin lejn xulxin u magħqudin. Madankollu, qed tara li dan qed iseħħ? Huma r-​reliġjonijiet qawwa li tgħaqqad? Fi stħarriġ li sar dan l-​aħħar fil-​Ġermanja saret il-​mistoqsija: “Ir-​reliġjonijiet jgħaqqdu lin-​nies, jew inkella iktar hemm ċans li jifirduhom?” Minn dawk li wieġbu, 22 fil-​mija ħassew li r-​reliġjonijiet jgħaqqdu lin-​nies, imma 52 fil-​mija ħassew li dawn iġibu l-​firda. Forsi n-​nies f’pajjiżek iħossuhom bejn wieħed u ieħor l-​istess.

Għala hemm ħafna li ma tantx għandhom fiduċja li r-​reliġjon tistaʼ tgħaqqad lill-​umanità? Forsi minħabba dak li jafu mill-​istorja. Minflok m’għaqqdet lin-​nies, ir-​reliġjon spiss firdithom minn xulxin. Kultant, ir-​reliġjon kienet l-​iskuża taʼ ħafna mill-​atroċitajiet tal-​biżaʼ li seħħew. Ikkunsidra xi eżempji li seħħew f’dawn l-​aħħar 100 sena biss.

Influwenzati mir-​Reliġjon

Matul it-​tieni gwerra dinjija, il-​Kroati Kattoliċi Rumani u s-​Serbi Ortodossi fil-​Balkani kienu jinsabu fi ġlieda bejniethom. Iż-​żewġ gruppi sostnew li kienu jsegwu lil Ġesù, li għallem lis-​segwaċi tiegħu jħobbu lill-​proxxmu. Però, kif qal wieħed riċerkatur, il-​ġlied tagħhom wassal għal “wieħed mill-​iktar massakri ċivili terribbli magħrufin fl-​istorja.” Id-​dinja tkexkxet bir-​rata taʼ l-​imwiet taʼ iktar minn 500,000 ruħ, li kienu jinkludu rġiel, nisa, u tfal.

Fl-​1947, is-​sottokontinent Indjan kien fih maʼ l-​400 miljun ruħ​—xi 20 fil-​mija mill-​umanità​—primarjament Ħindu, Musulmani, u Sikh. Meta l-​Indja nqasmet, feġġ il-​ġens Islamiku tal-​Pakistan. Dak iż-​żmien, mijiet t’eluf taʼ refuġjati miż-​żewġ pajjiżi ġew maħruqa, imsawta, torturati, u maqtula bl-​armi tan-​nar f’massakru reliġjuż wara l-​ieħor.

U bħallikieku l-​eżempji taʼ qabel ma kinux biżżejjed taʼ diqa, malli dħalna fis-​seklu ġdid spikkat it-​theddida tat-​terroriżmu. Illum, minħabba t-​terroriżmu d-​dinja kollha tinsab ansjuża, u ħafna gruppi terroristiċi jsostnu li jappartjenu lil xi reliġjon. In-​nies ma jħarsux lejn ir-​reliġjon bħala xi ħaġa li ġġib l-​għaqda. Minflok, spiss jorbtuha mal-​vjolenza u l-​firda. Mhux taʼ b’xejn, mela, li l-​ġurnal Ġermaniż FOCUS qabbel ir-​reliġjonijiet il-​kbar tad-​dinja​—il-​Buddiżmu, il-​Ġudaiżmu, il-​Ħinduiżmu, l-​Islam, il-​Konfuċjaniżmu, il-​Kristjaneżmu, u t-​Taoiżmu​—mat-​trab tal-​porvli.

Dibattiti Interni

Waqt li xi reliġjonijiet jinsabu fi ġlieda bejniethom, oħrajn jinsabu mifluġa b’dibattiti interni. Per eżempju, f’dawn l-​aħħar snin il-​knejjes tal-​Kristjaneżmu kienu maqsuma minħabba dibattiti kontinwi dwar kwistjonijiet taʼ tagħlim. Kemm il-​kleru u kemm il-​lajċi jistaqsu: Huwa permess il-​kontroll tat-​tqala? Xi ngħidu dwar l-​abort? Għandhom in-​nisa jinħatru bħala qassisin? Il-​knisja kif għandha tħares lejn l-​omosesswalità? Għandha r-​reliġjon tapprova l-​gwerra? Meta jaraw firda bħal din, ħafna jistaqsu, ‘Kif tistaʼ r-​reliġjon tgħaqqad lill-​umanità meta lanqas biss tistaʼ tgħaqqad lill-​membri tagħha stess?’

Jidher ċar li r-​reliġjon b’mod ġenerali ma rnexxilhiex tkun qawwa li tgħaqqad. Imma r-​reliġjonijiet kollha fihom il-​firda? Hemm xi reliġjon li hi differenti​—waħda li tistaʼ tgħaqqad lill-​umanità?

[Stampa f’paġna 3]

Pulizija mweġġgħa waqt ġlieda bejn gruppi reliġjużi fl-​Indja fl-​1947

[Sors]

Photo by Keystone/Getty Images