Alla jew Bniedem?

“JIEN id-​dawl tad-​dinja. Min jimxi warajja żgur ma jimxix fid-​dlam, imma jkollu d-​dawl tal-​ħajja.” (Ġwanni 8:12) Dan il-​kliem qalu Ġesù Kristu. Wieħed raġel li kellu ħafna skola u li kien jgħix fl-​ewwel seklu kiteb hekk dwaru: “Fih hemm moħbijin bil-​għaqal it-​teżori kollha taʼ l-​għerf u taʼ l-​għarfien.” (Kolossin 2:3) Iktar minn hekk, il-​Bibbja tgħid: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġwanni 17:3) Għarfien eżatt dwar Ġesù huwa essenzjali sabiex inkunu nistgħu nissodisfaw il-​bżonn spiritwali tagħna.

Ħafna nies madwar id-​dinja semgħu dwar Ġesù Kristu. M’hemm l-​ebda dubju li hu influwenza l-​istorja taʼ l-​umanità. Fil-​fatt, il-​kalendarju li huwa użat fil-​biċċa l-​kbira mid-​dinja huwa bbażat fuq is-​sena li hu maħsub li twieled. “Ħafna nies jirreferu għad-​dati qabel dik is-​sena bħala Q.K., jew qabel Kristu,” jispjega The World Book Encyclopedia. “Jużaw A.D., jew anno Domini (fis-sena tal-​Mulej tagħna), għad-​dati li ġew wara dik is-​sena.”

Madankollu, hemm diversi ideat dwar min kien Ġesù. Għal xi wħud, hu kien sempliċement raġel li spikka u li ħalla rekord straordinarju fl-​istorja. Però, oħrajn iqimuh bħala li hu Alla li Jistaʼ Kollox. Xi wħud li jħaddnu t-​twemmin Ħindu qabblu lil Ġesù Kristu maʼ l-​alla Ħindu Krishna, li ħafna jgħidu li hu alla inkarnat. Kien Ġesù sempliċement bniedem, jew kien xi ħadd li għandna nqimuh? Min kien eżattament? Minfejn ġie? X’personalità kellu? U issa fejn qiegħed? Bħalma se naraw fl-​artiklu li jmiss, il-​ktieb li għandu ħafna xi jgħid dwar Ġesù jagħti tweġibiet veri għal dawn il-​mistoqsijiet.