Bijografija

Ngħatajt ‘Dak li Xtaqet Qalbi’

KIF RAKKONTATA MINN DOMINIQUE MORGOU

F’Diċembru taʼ l-​1998, fl-​aħħar wasalt l-​Afrika! Ħolma li kelli meta kont żgħira issa saret realtà. Dejjem kont inħossni affaxxinata meta naħseb dwar il-​postijiet kbar taʼ l-​Afrika fil-​miftuħ u n-​natura mill-​isbaħ. Issa kont ninsab f’dan il-​post! Fl-​istess ħin, ħolma oħra kienet saret realtà. Kont qed naqdi bħala evanġelizzatriċi full-time f’pajjiż barrani. Għal ħafna, din setgħet dehret xi ħaġa impossibbli. Id-​dawl t’għajnejja hu batut ħafna, u nimxi fit-​toroq ramlin taʼ l-​irħula Afrikani bl-​għajnuna taʼ kelba li tmexxi lill-​għomja mħarrġa biex tagħmel dan fit-​toroq tal-​bliet Ewropej. Ħalli nirrakkontalkom kif sar possibbli għalija li naqdi ġewwa l-​Afrika u kif Ġeħova ‘tani dak li xtaqet qalbi.’—Salm 37:4.

JIEN twilidt fid-​9 taʼ Ġunju taʼ l-​1966, fin-​nofsinhar taʼ Franza. Kont l-​iżgħar waħda minn sebaʼ aħwa—żewġ subien u ħamest ibniet—u l-​ġenituri tagħna kienu jieħdu ħsiebna u jħobbuna ħafna. Madankollu, meta kont żagħżugħa għaddejt minn żmien diffiċli. Bħal nannti, ommi, u waħda minn ħuti, jien għandi marda ereditarja li eventwalment tagħmina għalkollox.

Bħala adoloxxenti, kelli nkampa mar-​razziżmu, il-​preġudizzju, u l-​ipokrisija, li ġagħluni nirribella kontra s-​soċjetà in ġenerali. Kien matul dan iż-​żmien diffiċli li morna noqogħdu fir-​reġjun taʼ Hérault. Hemmhekk ġrat xi ħaġa sabiħa.

Darba waħda, il-​Ħadd fil-​għodu, tnejn mix-​Xhieda taʼ Ġeħova ġew iħabbtulna. Ommi kienet tafhom u qaltilhom biex jidħlu. Waħda min-​nisa staqsiet lil ommi jekk kinitx tiftakar li darba wegħditha li kienet se taċċetta studju tal-​Bibbja. Ommi ftakret u staqsiet, “Meta ħa nibdew?” Ftiehmu li jiltaqgħu kull nhar taʼ Ħadd fil-​għodu, u b’hekk ommi bdiet titgħallem “il-​verità taʼ l-​aħbar tajba.”—Galatin 2:14.

Nikseb id-​Dehen

Ommi għamlet kull sforz biex tiftakar dak li kienet tgħallmet. Peress li kienet għamja, kellha timmemorizza kollox. Ix-​Xhieda kienu paċenzjużi ħafna magħha. Imma jien, kulmeta kienu jiġu, kont immur nistaħba f’kamarti u noħroġ biss meta kienu jitilqu. Madankollu, darba minnhom wara nofsinhar, Eugénie, waħda mix-​Xhieda taʼ Ġeħova, iltaqgħet miegħi u kellmitni. Hi qaltli li s-​Saltna t’Alla kienet se ttemm l-​ipokrisija, il-​mibegħda, u l-​preġudizzju kollu fid-​dinja. Hi qaltli, “Alla biss għandu s-​soluzzjoni.” Ridt jien inkun naf iktar? L-​għada bdejt l-​istudju tiegħi tal-​Bibbja.

Dak kollu li tgħallimt kien ġdid għalija. Issa bdejt nifhem li Alla qiegħed jippermetti l-​ħażen fuq l-​art għal ftit minħabba raġunijiet tajbin. (Ġenesi 3:​15; Ġwanni 3:​16; Rumani 9:​17) Tgħallimt ukoll li Ġeħova ma jħalliniex mingħajr tama. Hu tana l-​wegħda sabiħa tiegħu li ngħixu għal dejjem f’art magħmula ġenna. (Salm 37:29; 96:​11, 12; Isaija 35:​1, 2; 45:18) F’dik il-​Ġenna taʼ l-​art, se nkun nistaʼ nerġaʼ nikseb il-​vista tiegħi li kont qed nitlef ftit ftit.—Isaija 35:5.

Bdejt Naqdi fis-​Servizz Full-Time

Fit-​12 taʼ Diċembru taʼ l-​1985, issimbolizzajt id-​dedikazzjoni tiegħi lil Ġeħova permezz tal-​magħmudija fl-​ilma, u b’hekk ngħaqadt m’oħti Marie-Claire, li kienet diġà tgħammdet. Ħija Jean-Pierre malajr għamel l-​istess, u l-​għażiża ommi tgħammdet ukoll.

Fil-kongregazzjoni li kont nissieħeb magħha, kien hemm bosta pijunieri regulari, jew evanġelizzaturi full-time. Jien ġejt inkuraġġita mill-​ferħ u l-​entużjażmu li kellhom għall-​ministeru. Anki Marie-Claire, li kellha marda f’għajnejha u kienet tilbes ċertu apparat f’sieqha, bdiet taqdi fis-​servizz full-time. Hi għadha tinkuraġġini b’mod spiritwali sa llum il-​ġurnata. Peress li kont imdawra bil-​pijunieri, kemm fil-​kongregazzjoni u kemm fil-​familja, żviluppajt xewqa biex nibda naqdi fis-​servizz full-time jien stess. Għalhekk, f’Novembru taʼ l-​1990, bdejt naqdi f’Béziers bħala pijuniera.—Salm 94:​17-19.

Inkampa maʼ l-​Iskuraġġiment

Waqt il-​ministeru, il-​pijunieri l-​oħrajn kienu jieħdu ħsiebi ħafna. Minkejja dan, minn żmien għal żmien, ħassejtni skuraġġita minħabba l-​limitazzjonijiet tiegħi u xtaqt li stajt nagħmel iktar. Madankollu, Ġeħova sostnieni waqt dawk il-​mumenti taʼ skuraġġiment. Kont nagħmel riċerki fil-​Watch Tower Publications Index, u kont infittex bijografiji taʼ pijunieri li bħali kellhom vista batuta. Bqajt mistagħġba dwar kemm kien hemm! Dawn l-​esperjenzi prattiċi u inkuraġġanti għallmuni biex napprezza dak li stajt nagħmel u naċċetta l-​limitazzjonijiet tiegħi.

Sabiex nieħu ħsieb il-​bżonnijiet tiegħi, kont innaddaf fil-​ħwienet maʼ xi Xhieda oħrajn. Darba minnhom indunajt li sħabi tax-​xogħol kienu qegħdin inaddfu l-​postijiet li kont għadni kif naddaft. Ovvjament, ma kontx qed innaddaf sew. Mort nara lil Valérie, li kienet il-​pijuniera inkarigata biex tieħu ħsieb it-​tim tagħna tat-​tindif, u staqsejtha biex tkun onesta miegħi u tgħidli jekk kontx qiegħda nagħmilha diffiċli għall-​oħrajn. Hi bil-​ħlewwa ħalliet f’idejja biex niddeċiedi jekk ridtx inkompli jew le. F’Marzu taʼ l-​1994, waqaft mix-​xogħol tat-​tindif li kelli.

Għal darb’oħra bdejt inħossni li ma kont tajba għal xejn. Tlabt ħafna lil Ġeħova u kont naf li hu kien se jismaʼ t-​talb tiegħi. L-​istudju tal-​Bibbja u l-​pubblikazzjonijiet Kristjani għal darb’oħra għenuni ħafna. Minkejja dan, filwaqt li l-​vista bdiet tmur għall-​agħar, ix-​xewqa tiegħi li naqdi lil Ġeħova kienet qed tiżdied. Xi stajt nagħmel?

L-​Ewwel Nistenna, Imbagħad Nieħu Deċiżjoni Malajr

Applikajt għat-​taħriġ fiċ-​Ċentru tar-​Riabilitazzjoni għall-​Għomja u Dawk b’Vista Batuta f’Nîmes u eventwalment wara tliet xhur ġejt aċċettata. Iż-​żmien li qattajt hemm kien wieħed utli. Irrealizzajt kemm kienet serja l-​kundizzjoni tiegħi u tgħallimt nadatta ruħi għaliha. Meta bdejt nissieħeb maʼ nies li kienu qed ibatu minn kull tip taʼ diżabilità, ġejt megħjuna biex nirrealizza kemm kienet prezzjuża t-​tama Kristjana li għandi. Jien almenu kelli mira u stajt nagħmel xi ħaġa produttiva. Barra minn hekk, tgħallimt il-​Braille bil-​Franċiż.

Meta mort lura d-​dar, il-​familja tiegħi nnotat kemm kien għenni t-​taħriġ. Madankollu, dak il-​bastun abjad li kelli nuża kien verament idejjaqni. Kien diffiċli ħafna għalija li naċċetta dan il-​bastun. Kien ikun aħjar kieku kelli xi ħaġa oħra bħala għajnuna—forsi kelb li jgħin biex imexxi lill-​għomja.

Applikajt għal kelb iżda qaluli li kien hemm lista twila taʼ wħud li kienu qegħdin jistennew biex jingħataw wieħed. Barra minn hekk, l-​aġenzija kien se jkollha tagħmel investigazzjoni. Kelb bħal dan ma jingħatax lil kulħadd. Darba minnhom, waħda mara li kienet tieħu ħsieb assoċjazzjoni taʼ l-​għomja qaltli li klabb lokali tat-​tennis kien se jagħti kelb li jmexxi lill-​għomja lil xi ħadd għama jew lil xi ħadd li kellu vista batuta u li kien joqgħod fl-​inħawi tagħna. Hi qaltli li kienet ħasbet fija. Kont se naċċetta? Jien ħassejt il-​gwida taʼ Ġeħova f’din il-​ħaġa u aċċettajt l-​offerta ġentili tagħha. Minkejja dan, kelli nistenna għall-​kelb.

Nibqaʼ Naħseb dwar l-​Afrika

Waqt li kont qed nistenna, dawwart l-​attenzjoni tiegħi lejn xi ħaġa oħra. Bħalma semmejt iktar kmieni, minn meta kont żgħira kelli interess kbir fl-​Afrika. Minkejja li l-​vista tiegħi kienet sejra għall-​agħar, dak l-​interess kiber iktar minn qatt qabel, speċjalment meta sirt naf li ħafna nies fl-​Afrika kienu interessati fil-​Bibbja u f’li jaqdu lil Ġeħova. Xi ftit taż-​żmien qabel, lil Valérie kont semmejtilha fuq fuq li xtaqt inżur l-​Afrika. Kienet hi se tiġi miegħi? Hi aċċettat, u ktibna lil diversi uffiċċji tal-​fergħa tax-​Xhieda taʼ Ġeħova fl-​Afrika fejn kienu jitkellmu bil-​Franċiż.

Waslet risposta minn Togo. B’entużjażmu kbir, staqsejt lil Valérie biex taqrahieli. L-​ittra kienet inkuraġġanti, u għalhekk Valérie qalet: “Iva, għala ma mmorrux?” Wara li ktibna lill-​aħwa fil-​fergħa, huma qaluli biex nikkuntattja lil Sandra, pijuniera f’Lomé, il-​belt kapitali. Aħna ddeċidejna li mmorru fl-​1 taʼ Diċembru taʼ l-​1998.

X’differenza, imma x’ferħ! Wara li nżilna f’Lomé, ħriġna mill-​ajruplan u ħassejna ssħana soffokanti taʼ l-​Afrika. Sandra ltaqgħet magħna. Qatt ma konna ltqajna qabel, iżda mill-​ewwel ħassejna qisu konna ilna nafu lil xulxin. Ftit qabel ma wasalna, Sandra u seħbitha, Christine, ġew maħturin bħala pijunieri speċjali f’Tabligbo, raħal żgħir fiċ-​ċentru. Issa kellna l-​privileġġ li mmorru magħhom fuq l-​inkarigu l-​ġdid tagħhom. Qgħadna hemm għal madwar xahrejn, u meta tlaqna, kont naf li se nerġaʼ mmur.

Ferħana li Mmur Lura

Fi Franza, mill-​ewwel bdejt nipprepara għat-​tieni vjaġġ tiegħi f’Togo. Bl-​appoġġ tal-​familja tiegħi, stajt nagħmel arranġamenti biex nibqaʼ hemmhekk għal sitt xhur. Għalhekk, f’Settembru taʼ l-​1999, kont għal darb’oħra fuq ajruplan fi triqti lejn Togo. Madankollu, din id-​darba kont waħdi. Immaġina kif ħassewhom il-​familja tiegħi meta rawni nitlaq waħdi minkejja d-​diżabilità tiegħi! Iżda ma kellhomx għalfejn jinkwetaw. Jien aċċertajt lill-​ġenituri tiegħi li sħabi, li kienu diġà saru qishom familja għalija, se jkunu qed jistennewni f’Lomé.

X’ferħ ħassejt li mort lura f’post fejn ħafna nies juru interess fil-​Bibbja! M’hijiex xi ħaġa stramba li tara lin-​nies jaqraw il-​Bibbja fit-​triq. F’Tabligbo n-​nies jgħajtulek sempliċement biex ikollhom diskussjoni fuq il-​Bibbja. U xi privileġġ kelli li naqsam maʼ żewġ pijunieri speċjali l-​akkomodazzjonijiet sempliċi tagħhom! Bdejt nitgħallem dwar kultura oħra u tgħallimt inħares lejn l-​affarijiet b’mod differenti. L-​ewwel u qabel kollox, innotajt li ħutna l-​Kristjani fl-​Afrika jpoġġu l-​interessi tas-​Saltna l-​ewwel f’ħajjithom. Per eżempju, għalkemm ikollhom jimxu kilometri sħaħ biex imorru s-​Sala tas-​Saltna, dan ma jżommhomx lura milli jattendu l-​laqgħat. Tgħallimt ħafna wkoll mill-​imħabba u l-​ospitalità tagħhom.

Ġurnata minnhom meta rritornajt mis-​servizz taʼ l-​għalqa, ftaħt qalbi maʼ Sandra u għedtilha li kont qed nibżaʼ mmur lura Franza. Il-​vista tiegħi marret iktar għall-​agħar. Bdejt naħseb dwar it-​toroq iffollati u storbjużi taʼ Béziers, dwar it-​taraġ fl-​appartamenti, u dwar ħafna affarijiet oħra li jagħmlu l-​ħajja diffiċli għal xi ħadd li għandu vista batuta. B’kuntrast, it-​toroq f’Tabligbo, għalkemm ma kinux lixxi, ma kinux storbjużi—la hemm ħafna nies u lanqas ħafna traffiku. Kif kont se nkampa fi Franza issa li drajt f’Tabligbo?

Jumejn wara ċemplet ommi biex tgħidli li l-​iskola tal-​klieb li jmexxu lill-​għomja kienet qed tistennieni. Kelba tal-​Labrador t’età żgħira li jisimha Océane kienet lesta biex issir “għajnejja.” Għal darb’oħra, il-​bżonnijiet tiegħi ngħataw attenzjoni u l-​ansjetajiet li kelli telqu. Wara sitt xhur naqdi bil-​ferħ f’Tabligbo, erġajt qbadt triqti lejn Franza biex niltaqaʼ m’Océane.

Wara ħafna xhur taʼ taħriġ, fdawli lil Océane. Fil-​bidu, dan ma kienx faċli. Kellna nitgħallmu nifhmu lil xulxin. Bil-​mod il-​mod, però, bdejt nirrealizza kemm kelli bżonn lil Océane. Issa Océane saret qisha parti minni. In-​nies f’Béziers kif irreaġixxew meta rawni ġejja fuq il-​bieb tagħhom b’kelb? Urewni qalb tajba u rispett. Océane saret l-​“eroj” fl-​inħawi tiegħi. Ladarba ħafna nies iħossuhom skomdi fil-​preżenza taʼ persuna b’diżabilità, il-​fatt li kelli kelb għenni biex nitkellem dwar id-​diżabilità tiegħi b’mod naturali. In-​nies kienu jirrilassaw u joqogħdu jisimgħuni. Tabilħaqq, Océane kienet l-​aqwa skuża biex nibda konversazzjoni.

Fl-​Afrika m’Océane

Ma kontx insejt l-​Afrika, u issa bdejt nipprepara għat-​tielet vjaġġ tiegħi. Din id-​darba, ħadt lil Océane miegħi. Miegħi ġew ukoll il-​koppja Anthony u Aurore, u l-​ħabiba tiegħi Caroline—li kienu kollha pijunieri bħali. Fl-​10 taʼ Settembru tas-​sena 2000, wasalna f’Lomé.

Għall-ewwel, ħafna kienu jibżgħu minn Océane. Ftit kienu n-​nies f’Lomé li qabel kienu raw kelb kbir bħal dan, ladarba bosta mill-​klieb f’Togo huma żgħar. Meta raw ix-​xedd tagħha, xi wħud ħasbu li kienet annimal feroċi li kellu bżonn jinżamm taħt kontroll. Min-​naħa tagħha, Océane kienet tispiċċa turi attitudni difensiva, lesta biex tipproteġini kontra dak li kienet taħsbu periklu. Madankollu, Océane malajr drat l-​ambjent ġdid. Meta tkun liebsa x-​xedd, hi taf li tkun qiegħda fuq xogħolha—dixxiplinata, responsabbli, u toqgħod maġenbi. Meta ma tkunx liebsa xedd, toqgħod tilgħab, u kultant tkun imqarba. Nieħdu ħafna gost flimkien.

Ilkoll kemm aħna konna mistidnin biex noqogħdu maʼ Sandra u Christine f’Tabligbo. Sabiex ngħinu lill-​aħwa lokali jidraw lil Océane, stidinniehom għandna u spjegajnielhom l-​irwol tal-​kelba li tmexxi lill-​għomja, għala kelli bżonnha, u kif kellhom jirreaġixxu quddiemha. L-​anzjani qablu li Océane għandha tiġi miegħi s-​Sala tas-​Saltna. Ladarba f’Togo dan l-​arranġament kien wieħed mhux tas-​soltu, sar avviż lill-​kongregazzjoni li kien jispjega l-​kwistjoni. Rigward il-​ministeru, Océane ġiet miegħi biss meta kont nagħmel iż-​żjajjar lura u meta kont nikkonduċi l-​istudji tal-​Bibbja—sitwazzjonijiet meta l-​preżenza tagħha kienet tiġi mifhuma aħjar.

L-ippridkar f’dan it-​territorju għadu esperjenza sabiħa. Dejjem kont grata għal kemm kienu jieħdu ħsiebi dawn in-​nies ġentili, u dan kienu jagħmluh billi juru qalb tajba miegħi, bħal per eżempju l-​ħerqa tagħhom biex jagħtuni siġġu ħalli noqgħod bil-​qiegħda. F’Ottubru taʼ l-​2001, ommi ġiet miegħi fuq ir-​rabaʼ vjaġġ tiegħi lejn Togo. Wara tliet ġimgħat, hi rritornat Franza, moħħha mistrieħ u ferħana.

Jien grata ħafna lejn Ġeħova li stajt naqdi f’Togo. Inħossni ċerta li Ġeħova se jkompli jagħtini ‘dak li tixtieq qalbi’ hekk kif inkompli nuża dak kollu li għandi fis-​servizz tiegħu.a

[Nota taʼ taħt]

[Stampi f’paġna 10]

Dejjem kont inħossni affaxxinata meta naħseb dwar il-​postijiet kbar taʼ l-​Afrika fil-​miftuħ u n-​natura mill-​isbaħ

[Stampa f’paġna 10]

Océane kienet tiġi miegħi fuq iż-​żjajjar lura

[Stampa f’paġna 11]

L-​anzjani qablu li għandi nġib lil Océane miegħi għal-​laqgħat