“Waħda mill-​Isbaħ Ġranet taʼ Ħajti”

“FOST iż-​żgħażagħ, id-​dipressjoni hija l-​iktar problema tas-​saħħa mentali li tiġi rapportata u x’aktarx l-​iktar waħda importanti,” tgħid il-​Beyondblue, aġenzija fl-​Awstralja finanzjata mill-​gvern. L-​istudji juru li madwar 100,000 żagħżugħ u żagħżugħa Awstraljani jsofru mid-​dipressjoni kull sena.

Iż-żgħażagħ Kristjani m’humiex meħlusin mid-​dipressjoni. Madankollu, il-​fidi f’Ġeħova għenet lil ħafna minnhom biex jegħlbu sentimenti negattivi u jirnexxu f’żgħożithom. Billi jagħmlu dan, huma jħallu effett mill-​aqwa fuq oħrajn. Kif?

Ikkunsidra l-​esperjenza taʼ Claire li għandha 18-il sena. Hi u ommha jattendu kongregazzjoni tax-​Xhieda taʼ Ġeħova f’Melbourne. Meta missierha telaq lill-​familja, Claire waqgħet f’dipressjoni. Imma l-​fidi tagħha f’Missierha tas-​sema, Ġeħova, baqgħet b’saħħitha. Jum wieħed, it-​tabiba tal-​familja, Lydia, marret id-​dar taʼ Claire biex tara kif inhi ommha li kienet marida. Imbagħad b’qalb tajba offriet li twassal lil Claire f’ċentru tal-​ħwienet. Fit-​triq staqsiet lil Claire jekk kinitx qed toħroġ maʼ xi ġuvni. Claire spjegatilha li bħala waħda mix-​Xhieda taʼ Ġeħova, hi ma kinitx toħroġ mal-​ġuvintur sempliċement għall-​gost. It-​tabiba baqgħet skantata ħafna b’dan. Imbagħad Claire spjegat kif il-​Bibbja kienet għenitha tieħu deċiżjonijiet għaqlin f’ħajjitha. Fl-​aħħar, Claire offriet li lit-​tabiba ġġibilha kopja taʼ pubblikazzjoni bbażata fuq il-​Bibbja u li tant kienet għenitha. Il-​ktieb kien jismu Iż-​Żgħażagħ Jistaqsu​—Tweġibiet Prattiċi għall-​Mistoqsijiet Tagħhom.

Tlett ijiem wara li rċiviet il-​ktieb, Lydia ċemplet lil omm Claire sabiex tgħidilha kemm kienet ħadet pjaċir taqrah. Imbagħad talbet sitt kotba oħra għall-​kollegi tagħha. Meta Claire ħaditilha l-​kotba, it-​tabiba spjegat kemm kienet baqgħet impressjonata bil-​fidi taʼ Claire. Claire offriet li tistudja l-​Bibbja magħha, u t-​tabiba aċċettat.

Għal diversi xhur, Claire kkonduċiet l-​istudju meta t-​tabiba kienet tieqaf għall-​ikel taʼ nofsinhar. Imbagħad Lydia staqsiet lil Claire jekk kinitx lesta li titkellem f’seminar dwar is-​suġġett tad-​dipressjoni fost iż-​żgħażagħ. Għalkemm kienet ftit beżgħana, Claire aċċettat. Għas-​seminar attendew ’il fuq minn 60 persuna. Erbaʼ professjonisti dwar is-​saħħa mentali​—ilkoll adulti​—kellmu lill-​udjenza. Imbagħad kien imiss lil Claire. Hi enfasizzat kemm hu importanti għaż-​żgħażagħ li jkollhom relazzjoni m’Alla. Spjegat li Alla Ġeħova jimpurtah ħafna miż-​żgħażagħ u jgħin lil dawk kollha li jduru lejh għall-​għajnuna u l-​faraġ. Iktar minn hekk, hi esprimiet il-​konvinzjoni tagħha li Ġeħova dalwaqt se jelimina kull xorta taʼ mard mentali u fiżiku. (Isaija 33:24) X’ħareġ minn din ix-​xiehda eċċellenti?

“Wara s-​sessjoni, ħafna ġew fuqi biex jgħiduli kemm baqgħu impressjonati jisimgħu żagħżugħa titkellem dwar Alla,” qalet Claire. “Ħallejt 23 kopja tal-​ktieb Iż-​Żgħażagħ Jistaqsu. Tliet tfajliet fl-​udjenza tawni n-​numru tat-​telefon tagħhom. Waħda minnhom issa qed tistudja l-​Bibbja. Kienet waħda mill-​isbaħ ġranet taʼ ħajti.”