Int Imħejji għas-​Salvazzjoni?

“Idħol int, u darek kollha fl-​arka, għax quddiemi jiena lilek sibt ġust fost in-​nies taʼ dan iż-​żmien.”—ĠENESI 7:1.

1. Liema provvediment għas-​salvazzjoni għamel Ġeħova fi żmien Noè?

ĠEĦOVA “ġab dilluvju fuq dinja taʼ nies bla devozzjoni lejn Alla” fi żmien Noè, imma għamel ukoll provvediment għas-​salvazzjoni. (2 Pietru 2:5) L-​Alla l-​veru ta lir-​raġel ġust Noè istruzzjonijiet dettaljati dwar kif kellu jibni l-​arka ħalli tiġi preservata l-​ħajja matul id-​dilluvju globali. (Ġenesi 6:​14-16) Bħalma nistgħu nistennew minn qaddej leali taʼ Ġeħova, Noè “għamel kull ma ordnalu Alla.” Tabilħaqq, “hekk għamel.” Parti mir-​raġuni għala aħna ħajjin illum hija l-​ubbidjenza taʼ Noè.—Ġenesi 6:22.

2, 3. (a) Dawk li kienu jgħixu fi żmien Noè kif irreaġixxew għall-​attività tiegħu? (b) Noè b’liema fiduċja daħal fl-​arka?

² Il-​bini taʼ l-​arka ma kienx xi biċċa xogħol faċli. Wisq probabbli, ħafna nies impressjonaw ruħhom b’dak li bdew iwettqu Noè u familtu. Però, dan ma kienx biżżejjed biex jikkonvinċihom li huma setgħu jsalvaw biss jekk jidħlu fl-​arka. Fl-​aħħar, il-​paċenzja t’Alla maʼ dik id-​dinja ħażina ntemmet.—Ġenesi 6:3; 1 Pietru 3:20.

³ Wara snin sħaħ taʼ xogħol iebes minn Noè u familtu, Ġeħova qal lil Noè: “Idħol int, u darek kollha fl-​arka, għax quddiemi jiena lilek sibt ġust fost in-​nies taʼ dan iż-​żmien.” B’fidi u fiduċja fil-​kelma taʼ Ġeħova, “daħal Noè u miegħu wliedu, martu, u n-​nisa taʼ wliedu.” Ġeħova għalaq il-​bieb sabiex jipproteġi lill-​aduraturi tiegħu. Meta ġie d-​Dilluvju fuq l-​art, l-​arka kienet provvediment taʼ min joqgħod fuqu mingħand Alla li ppreservalhom ħajjithom.—Ġenesi 7:​1, 7, 10, 16.

Xebh Modern maʼ Żmien Noè

4, 5. (a) Ġesù maʼ xiex qabbel iż-​żmien tal-​preżenza tiegħu? (b) Liema xebh hemm bejn żmien Noè u żmienna?

⁴ “Bħalma kienu jiem Noè, hekk tkun il-​preżenza taʼ Bin il-​bniedem.” (Mattew 24:37) B’dan il-​kliem, Ġesù indika li ż-​żmien tal-​preżenza inviżibbli tiegħu kien se jkun simili għal jiem Noè, u dan wera li hu tassew minnu. Speċjalment mill-​1919 ’l hawn, messaġġ taʼ twissija simili għal dak li ta Noè ġie dikjarat lin-​nies tal-​ġnus kollha. B’mod ġenerali, ir-​reazzjoni tagħhom hija simili għal dik tan-​nies taʼ żmien Noè.

⁵ Permezz tad-​Dilluvju, Ġeħova aġixxa kontra dinja li “mtliet bil-​vjolenza.” (Ġenesi 6:13) Kulħadd setaʼ jara b’mod ċar li Noè u familtu qagħdu lura milli jieħdu sehem f’din il-​vjolenza u li, minflok, b’mod paċifiku baqgħu għaddejjin bix-​xogħol tagħhom tal-​bini taʼ l-​arka. F’dan ukoll naraw ix-​xebh maʼ żmienna. Dawk li huma sinċieri issa jistgħu ‘jagħrfu jagħżlu bejn il-​ġust u l-​ħażin, bejn min jaqdi ’l Alla u min ma jaqdihx.’ (Malakija 3:18) L-​onestà, il-​qalb tajba, il-​paċi, u l-​bżulija li juru x-​Xhieda taʼ Ġeħova huma ammirati minn uħud mhux preġudikati li josservawhom u dawn il-​kwalitajiet juru li n-​nies t’Alla huma differenti mid-​dinja in ġenerali. Ix-​Xhieda jiċħdu kull tip taʼ vjolenza u jħallu lill-​ispirtu taʼ Ġeħova jimmotivahom. Għal din ir-​raġuni huma mberkin bil-​paċi u jipprovaw jgħixu ħajja ġusta.—Isaija 60:17.

6, 7. (a) X’ma rrealizzawx in-​nies taʼ żmien Noè, u n-​nies kif inhuma l-​istess illum? (b) X’eżempji juru li x-​Xhieda taʼ Ġeħova ġeneralment jintgħarfu bħala li huma differenti?

⁶ Dawk li kienu jgħixu fi żmien Noè ma rrealizzawx li Noè kellu l-​appoġġ divin u li kien qed jaġixxi skond id-​direzzjoni t’Alla. Allura huma ma ħadux l-​ippridkar tiegħu bis-​serjetà u m’aġixxewx fi qbil mal-​messaġġ tiegħu taʼ twissija. Xi ngħidu għal-​lum? Għalkemm ħafna jimpressjonaw ruħhom bix-​xogħol u l-​imġiba tax-​Xhieda taʼ Ġeħova, bosta wħud ma jiħdux l-​aħbar tajba u t-​twissijiet tal-​Bibbja bis-​serjetà. Il-​ġirien, dawk li jimpjegawhom, jew il-​qraba għandhom mnejn ifaħħru l-​kwalitajiet mill-​aqwa tal-​Kristjani veri imma mbagħad jilmentaw, “Mhux li kien m’humiex Xhieda taʼ Ġeħova!” Dak li ma jarawx dawn l-​osservaturi hu li x-​Xhieda juru kwalitajiet bħall-​imħabba, il-​paċi, il-​qalb tajba, it-​tjubija, il-​ħlewwa, u r-​rażna minħabba li huma gwidati mill-​ispirtu qaddis t’Alla. (Galatin 5:​22-25) Dan għandu jġagħalhom jemmnu iktar il-​messaġġ li jwasslulhom.

⁷ Per eżempju, fir-​Russja, ix-​Xhieda taʼ Ġeħova kienu qed jibnu Sala tas-​Saltna. Raġel li waqaf ikellem lil wieħed mill-​ħaddiema osserva: “Kemm hu post taʼ kostruzzjoni differenti—la tipjip, la dagħa, u ħadd m’hu fis-​sakra! Jaqaw int wieħed mix-​Xhieda taʼ Ġeħova?” Il-​ħaddiem staqsieh, “Temminni jekk ngħidlek li le?” Ir-​raġel wieġbu mill-​ewwel, “Ma tantx.” F’belt Russa oħra, is-​sindku baqaʼ impressjonat ħafna meta ra lix-​Xhieda jibnu s-​Sala tas-​Saltna l-​ġdida tagħhom. Hu qal li għalkemm darba kien iħares lejn il-​gruppi reliġjużi kollha bħala li huma l-​istess, wara li ra s-​sinċerità u n-​nuqqas t’egoiżmu tax-​Xhieda taʼ Ġeħova fl-​azzjoni, hu biddel fehmtu. Dawn huma biss żewġ eżempji li juru li n-​nies taʼ Ġeħova huma differenti minn dawk li ma jżommux mal-​livelli tal-​Bibbja.

8. Minn xiex tiddependi s-​salvazzjoni tagħna fi tmiem din id-​dinja ħażina?

⁸ Matul l-​aħħar perijodu tad-​“dinja tal-​qedem” li nqerdet fid-​Dilluvju, Noè kien “predikatur tal-​ġustizzja.” (2 Pietru 2:5) F’dawn l-​aħħar jiem tas-​sistema preżenti, il-​poplu taʼ Ġeħova qed jgħarraf il-​livelli ġusti t’Alla u qed jiddikjara l-​aħbar tajba dwar il-​possibbiltà taʼ salvazzjoni fid-​dinja l-​ġdida. (2 Pietru 3:​9-13) L-​istess bħalma Noè u familtu, li kellhom il-​biżaʼ t’Alla, ġew preservati fl-​arka, is-​salvazzjoni taʼ kull individwu llum tiddependi mill-​fidi u s-​sħubija leali tiegħu mal-​parti taʼ l-​organizzazzjoni universali li għandu Ġeħova fuq l-​art.

Il-​Fidi Meħtieġa għas-​Salvazzjoni

9, 10. Għala hija essenzjali l-​fidi jekk irridu nsalvaw fi tmiem is-​sistema taʼ Satana?

⁹ Individwu xi jrid jagħmel biex isalva mill-​qerda imminenti taʼ din id-​dinja li qiegħda taħt il-​qawwa taʼ Satana? (1 Ġwanni 5:19) L-​ewwelnett irid jirrealizza li għandu bżonn il-​protezzjoni. Imbagħad irid juża din il-​protezzjoni. In-​nies taʼ żmien Noè baqgħu għaddejjin bl-​attivitajiet tagħhom taʼ kuljum bħas-​soltu u ma raw ebda bżonn għall-​protezzjoni mill-​periklu li kien riesaq. Huma kellhom xi ħaġa oħra nieqsa—il-​fidi f’Alla.

¹⁰ Mill-​banda l-​oħra, Noè u familtu rrikonoxxew li kellhom bżonn il-​protezzjoni u l-​ħelsien. Ukoll, huma wrew fidi fis-​Sovran Universali, Alla Ġeħova. “Mingħajr fidi impossibbli li togħġbu sew [lil Ġeħova],” kiteb l-​appostlu Pawlu, “għax min jersaq lejn Alla jrid jemmen li hu jeżisti u li jippremja lil dawk li jfittxuh bil-​ħeġġa.” Pawlu żied: “Bil-​fidi Noè, wara li ngħata twissija divina dwar affarijiet li kienu għadhom ma dehrux, wera l-​biżaʼ t’Alla u bena arka biex isalva lin-​nies taʼ daru; u permezz taʼ din il-​fidi kkundanna lid-​dinja, u sar werriet tal-​ġustizzja li tiġi permezz tal-​fidi.”—Ebrej 11:​6, 7.

11. X’nistgħu nitgħallmu minn kif Ġeħova pprovda l-​protezzjoni fil-​passat?

¹¹ Biex nibqgħu ħajjin wara t-​tmiem taʼ din is-​sistema mill-​agħar, irridu nagħmlu iktar milli sempliċement nemmnu li se tinqered. Irridu neżerċitaw fidi u nieħdu vantaġġ sħiħ mill-​provvedimenti t’Alla għas-​salvazzjoni. M’għandniex xi ngħidu, irridu neżerċitaw fidi fis-​sagrifiċċju bħala fidwa taʼ l-​Iben t’Alla, Ġesù Kristu. (Ġwanni 3:​16, 36) Madankollu, aħna nagħmlu tajjeb jekk niftakru li dawk biss li fil-​fatt kienu fl-​arka taʼ Noè salvaw mid-​Dilluvju. B’mod simili, il-​bliet tal-​kenn f’Iżrael tal-​qedem ipprovdew il-​protezzjoni għal min joqtol lil xi ħadd bi żball biss jekk l-​ewwel jaħrab lejn il-​belt u mbagħad jibqaʼ fiha sal-​mewt tal-​qassis il-​kbir. (Numri 35:​11-32) Fl-​għaxar kastig fuq l-​Eġittu fi żmien Mosè nqatlu l-​ewwel imweldin taʼ l-​Eġizzjani kollha, imma taʼ l-​Iżraelin baqgħu ħajjin. Għala? Ġeħova ta l-​istruzzjoni lil Mosè: “[L-Iżraelin] jieħdu mid-​demm tiegħu [tal-ħaruf tal-​Qbiż], u jroxxuh fuq il-​ġnub u l-​blata tal-​bibien tad-​djar fejn ikunu se jikluh. . . . Ħadd minnkom ma joħroġ mill-​bieb taʼ daru ’l barra qabel filgħodu.” (Eżodu 12:​7, 22) Liema wieħed mill-​ewwel imweldin taʼ Iżrael kien se jażżarda jinjora dawn l-​istruzzjonijiet mogħtijin minn Alla billi joħroġ barra mid-​dar bil-​ġnub u l-​blata tal-​bibien imraxxa bid-​demm?

12. Liema mistoqsija għandna nistaqsu lkoll lilna nfusna, u għala?

¹² Għalhekk, għandna kull raġun biex naħsbu bis-​serjetà dwar is-​sitwazzjoni persunali tagħna. Ninsabu aħna verament fl-​arranġament taʼ protezzjoni spiritwali taʼ Ġeħova? Meta tfaqqaʼ t-​tribulazzjoni l-​kbira, dmugħ taʼ ferħ u gratitudni se jinżel maʼ ħaddejn dawk li fittxew din il-​protezzjoni. L-​oħrajn se jibku biss minħabba n-​niket u d-​dispjaċir.

Titjib Progressiv Iħejjina

13. (a) Għal liema skop serva t-​titjib fl-​organizzazzjoni? (b) Spjega ftit mill-​irfinar progressiv li sar.

¹³ Ġeħova ġab titjib progressiv fil-​parti taʼ l-​organizzazzjoni tiegħu fuq l-​art. Dan serva biex isebbaħ, jistabbilixxi, u jsaħħaħ l-​arranġament tiegħu għall-​protezzjoni spiritwali tagħna. Mill-​1870 sa l-​1932, l-​anzjani u d-​djakni kienu jinħatru bil-​vot tal-​membri tal-​kongregazzjoni. Fl-​1932, minflok l-​anzjani eletti nħatar kumitat tas-​servizz elett mill-​kongregazzjoni biex jgħin lid-​direttur tas-​servizz li jkun inħatar. Matul l-​1938, saru arranġamenti biex il-​qaddejja kollha fil-​kongregazzjoni jinħatru b’mod teokratiku. Mill-​1972 ’l hawn, bid-​direzzjoni tal-​Ġemgħa li Tiggverna tax-​Xhieda taʼ Ġeħova, bdew isiru r-​rakkomandazzjonijiet u jekk dawn jiġu approvati, il-​kongregazzjonijiet jirċievu ittri li jaħtru lill-​indokraturi u lill-​qaddejja ministerjali b’mod teokratiku. Tul is-​snin, l-​irwol li kellha l-​Ġemgħa li Tiggverna żdied u saru xi bidliet biex jeħfief xogħolha.

14. Liema programm taʼ taħriġ beda fl-​1959?

¹⁴ Lura fl-​1950, konsiderazzjoni bir-​reqqa taʼ Salm 45:17 (45:​16, NW) wasslet għal programm taʼ taħriġ kontinwu. Dan il-​vers jgħid: “Flok missirijietek jilħqu wliedek; inti tqegħedhom kapijiet fuq l-​art kollha.” L-​anzjani li issa qed jieħdu t-​tmexxija fil-​kongregazzjoni qed jitħarrġu għall-​inkarigi teokratiċi taʼ issa u taʼ wara Armageddon. (Rivelazzjoni 16:​14, 16) L-​Iskola tal-​Ministeru tas-​Saltna bdiet fl-​1959. Dak iż-​żmien, taħriġ li jdum għaddej xahar kien provdut primarjament għall-​qaddejja tal-​kongregazzjoni, kif kienu jissejħu l-​indokraturi li jippresiedu dak iż-​żmien. Din l-​iskola issa saret tinkludi lil iktar uħud biex toffri istruzzjoni lill-​indokraturi u l-​qaddejja ministerjali kollha. Mill-​banda l-​oħra, dawn l-​aħwa jieħdu t-​tmexxija biex iħarrġu Xhieda taʼ Ġeħova individwali fil-​kongregazzjonijiet rispettivi tagħhom. Għalhekk, ilkoll jingħataw għajnuna spiritwali u jiġu megħjunin isiru iktar effettivi fil-​ministeru tagħhom bħala proklamaturi taʼ l-​aħbar tajba tas-​Saltna.—Marku 13:10.

15. Liema huma żewġ modi kif tiġi protetta lkongregazzjoni Kristjana?

¹⁵ Individwi li jridu jsiru parti mill-​kongregazzjoni Kristjana jridu jwettqu ċerti ħtiġijiet. Loġikament, dawk li jwaqqgħu kollox għaċ-​ċajt illum ma jitħallewx isiru parti mill-​kongregazzjoni Kristjana, l-​istess bħalma wħud bħal dawn ma tħallewx jidħlu fl-​arka taʼ Noè. (2 Pietru 3:​3-7) B’mod partikulari mill-​1952, ix-​Xhieda taʼ Ġeħova taw iktar appoġġ lill-​arranġament li jgħin biex il-​kongregazzjoni tkun protetta—jiġifieri, permezz tal-​qtugħ mis-​sħubija taʼ dawk li jidinbu bla ma jindmu. M’għandniex xi ngħidu, uħud li jkunu dinbu u juru ndiema sinċiera jiġu megħjunin bl-​imħabba biex ‘jiddrittaw il-​mogħdijiet għal saqajhom.’—Ebrej 12:​12, 13; Proverbji 28:13; Galatin 6:1.

16. X’inhi l-​kundizzjoni spiritwali tal-​poplu taʼ Ġeħova?

¹⁶ Il-​kundizzjoni t’għana spiritwali tal-​poplu taʼ Ġeħova la tissorprendina u lanqas ma ġiet b’kumbinazzjoni. Permezz tal-​profeta Isaija, Ġeħova qal: “Araw, il-​qaddejja tiegħi jieklu, imma intom tkunu bil-​ġuħ; araw, il-​qaddejja tiegħi jixorbu, imma intom tkunu bl-​għatx; araw, il-​qaddejja tiegħi jifirħu, imma intom tistħu; araw, il-​qaddejja tiegħi jgħannu bl-​hena taʼ qalbhom, imma intom tgħajjtu bin-​niket taʼ qalbkom, u tixhru bid-​diqa taʼ ruħkom.” (Isaija 65:​13, 14) Ġeħova jkompli jipprovdilna provvista abbundanti taʼ ikel spiritwali f’waqtu li jagħti s-​saħħa u li jżommna qawwijin spiritwalment.—Mattew 24:45.

Kun Imħejji għas-​Salvazzjoni

17. X’se jgħinna nħejju ruħna għas-​salvazzjoni?

¹⁷ Iktar minn qatt qabel, issa hu ż-​żmien li “nagħtu kas xulxin biex nitqanqlu għall-​imħabba u l-​għemejjel tajbin, u ma nabbandunawx il-​laqgħat tagħna flimkien, bħalma ħaduha drawwa jagħmlu xi wħud, imma ninkuraġġixxu lil xulxin.” (Ebrej 10:​23-25) Jekk inkunu attivi u nissieħbu mill-​qrib maʼ waħda mill-​iktar minn 98,000 kongregazzjoni tax-​Xhieda taʼ Ġeħova se niġu megħjunin biex inħejju ruħna għas-​salvazzjoni. Se jkollna l-​appoġġ taʼ sħabna fit-​twemmin hekk kif nistinkaw biex nuru “l-​personalità l-​ġdida” u nagħmlu sforz minn qalbna biex ngħinu lil oħrajn jitgħallmu dwar il-​provvediment taʼ Ġeħova għas-​salvazzjoni.—Efesin 4:​22-24; Kolossin 3:​9, 10; 1 Timotju 4:16.

18. Għala int determinat li tibqaʼ qrib il-​kongregazzjoni Kristjana?

¹⁸ Satana u d-​dinja mill-​agħar tiegħu tassew jixtiequ jaljenawna u jbegħduna mill-​kongregazzjoni Kristjana. Madankollu, aħna nistgħu nibqgħu nagħmlu parti minnha u nibqgħu ħajjin wara t-​tmiem taʼ din is-​sistema mill-​agħar. Jalla l-​imħabba u l-​gratitudni lejn Ġeħova għal dak li jipprovdilna bi mħabbtu jqanqluna nkunu saħansitra iktar determinati biex nopponu l-​isforzi taʼ Satana. Id-​determinazzjoni tagħna se tissaħħaħ jekk nimmeditaw fuq il-​barkiet li għandna issa. Ftit minn dawn il-​barkiet se jiġu diskussi fl-​artiklu li jmiss.

X’Inhuma t-​Tweġibiet Tiegħek?

• Żmienna kif jixbah lil żmien Noè?

• Liema kwalità hija essenzjali għas-​salvazzjoni?

• Liema titjib progressiv saħħaħ l-​arranġament taʼ Ġeħova għall-​protezzjoni tagħna?

• Kif nistgħu personalment inħejju ruħna għas-​salvazzjoni?

[Stampa f’paġna 22]

In-​nies taʼ żmien Noè ma ħaduhx bis-​serjetà lil Noè

[Stampa f’paġna 23]

Ikun taʼ ġid li nieħdu bis-​serjetà l-​messaġġi taʼ twissija t’Alla

[Stampa f’paġna 24]

Liema skop għandha l-​Iskola tal-​Ministeru tas-​Saltna?

[Stampa f’paġna 25]

Issa huwa ż-​żmien li nibqgħu qrib il-​kongregazzjoni Kristjana