Lezzjoni dwar il-​Kburija u l-​Umiltà

ĠRAJJA li seħħet fil-​ħajja tas-​Sultan David enfasizzat id-​differenza bejn l-​umiltà vera u l-​kburija ħażina. Dan ġara wara li David kien rebaħ lil Ġerusalemm u għamilha l-​belt kapitali tiegħu. David kien iqis lil Ġeħova bħala dak li verament kien is-​Sultan taʼ Iżrael, għalhekk hu rranġa biex l-​Arka, li kienet tissimbolizza l-​preżenza t’Alla, tinġieb ġol-​belt. Dan l-​avveniment tant kien importanti għal David li hu wera l-​ferħ tiegħu b’mod ċar quddiem kulħadd hekk kif kien qed jimxi wara l-​qassisin li ġarrew l-​Arka. L-​abitanti taʼ Ġerusalemm raw lis-​sultan tagħhom “jaqbeż u jiżfen b’ħiltu kollha.”​—1 Kronaki 15:​15, 16, 29; 2 Samwel 6:​11-​16.

Madankollu, Mikal, il-​mara taʼ David, ma ngħaqditx maʼ dik il-​purċissjoni taʼ ferħ. Hi kienet qed tittawwal mit-​tieqa, u minflok m’ammirat il-​mod kif David beda jfaħħar lil Ġeħova, hi “stmerritu f’qalbha.” (2 Samwel 6:​16) Mikal għala ħassitha b’dan il-​mod? Evidentement, hi kienet qed tagħti wisq importanza lilha nfisha minħabba li kienet it-​tifla taʼ l-​ewwel sultan taʼ Iżrael, Sawl, u issa l-​mara tat-​tieni sultan taʼ Iżrael. Hi setgħet ħasset li r-​raġel tagħha, is-​sultan, ma kellux ibaxxi lilu nnifsu sal-​livell tan-​nies komuni u jingħaqad fiċ-​ċelebrazzjoni tagħhom. Dawn is-​sentimenti taʼ kburija dehru fil-​mod kif hi laqgħet lil David meta rritorna d-​dar. B’sarkażmu hi qalet: “Kemm kien sabiħ illum is-​sultan taʼ Iżrael, mikxuf quddiem għajnejn in-​nisa tal-​qaddejja tiegħu, bħalma jinkixef raġel bla ġieħ!”​—2 Samwel 6:20.

Kif irreaġixxa David għal din il-​kritika? David ċanfar lil Mikal billi qalilha li Ġeħova ċaħad lil missierha, Sawl, u ffavorixxa lilu minflok. David żied: “Anzi niċċekken aktar minn hekk. Ħa nitlef ġieħi f’għajnejk, imma nissebbaħ quddiem il-​qaddejja nisa li semmejt int.”​—2 Samwel 6:​21, 22.

Iva, David kien determinat li jkompli jaqdi lil Ġeħova bl-​umiltà. Din l-​attitudni tgħinna nifhmu għala Ġeħova sejjaħ lil David “raġel għal qalbi.” (Atti 13:22; 1 Samwel 13:14) Fil-​fatt, David kien qed isegwi l-​eżempju mill-​aħjar taʼ l-​umiltà​—dak taʼ Alla Ġeħova nnifsu. Taʼ interess, l-​espressjoni li David uża meta qal lil Mikal, “niċċekken aktar minn hekk” ġejja minn għerq taʼ verb Ebrajk li jintuża wkoll biex jiddeskrivi l-​ħarsa t’Alla dwar l-​umanità. Għalkemm Ġeħova huwa l-​aqwa persunaġġ fl-​univers, Salm 113:​6, 7 jiddeskrivih bħala li “[“jindenja ruħu,” NW] jħares ’l isfel [jinżel mil-​livell jew dinjità meta jittratta maʼ min hu inqas minnu], lejn is-​smewwiet u lejn l-​art. Hu li jqajjem mit-​trab l-​imsejken, u jerfaʼ mill-​miżbla l-​fqajjar.”

Ladarba Ġeħova huwa umli, mhux taʼ b’xejn li hu jobgħod ‘l-​għajnejn merfugħa’ taʼ persuni kburin. (Proverbji 6:​16, 17) Minħabba li wriet din il-​karatteristika mill-​agħar u wriet nuqqas taʼ rispett lejn il-​wieħed li Alla kien għażel bħala sultan, Mikal ġiet imċaħħda mill-​privileġġ li jkollha wild minn David. Hi mietet mingħajr ma kellha tfal. X’lezzjoni importanti għalina! Dawk kollha li jixtiequ li jkollhom il-​favur t’Alla għandhom isegwu dan il-​kliem: “Tħażżmu bl-​umiltà lejn xulxin, għax Alla jopponi lis-​suppervi, imma juri qalb tajba mhix mistħoqqa maʼ l-​umli.”​—1 Pietru 5:5.