Strieħ fuq l-​Ispirtu t’Alla Meta Tiffaċċja Bidliet fil-​Ħajja

“Agħmel l-​almu tiegħek biex tidher quddiem Alla bħala bniedem approvat.”—2 TIMOTJU 2:15, NW.

1. Liema bidliet joħolqu sfida għall-​benesseri spiritwali tagħna?

ID-​DINJA taʼ madwarna tinbidel kontinwament. Qed naraw progress xjentifiku u teknoloġiku impressjonanti, u wkoll il-​valuri morali li sejrin lura immens. Bħalma rajna fl-​artiklu taʼ qabel, il-​Kristjani jridu jirreżistu l-​ispirtu tad-​dinja li jmur kontra Alla. Madankollu, hekk kif id-​dinja tinbidel, aħna wkoll ninbidlu b’ħafna modi. Minn tfal żgħar, nikbru u nsiru adulti. Nistgħu niksbu jew nitilfu l-​ġid materjali, is-​saħħa, jew il-​maħbubin tagħna. Ħafna minn dawn il-​bidliet m’għandniex kontroll fuqhom, u jistgħu joħolqu sfidi ġodda u ebsin għall-​benesseri spiritwali tagħna.

2. X’bidliet kellu David matul ħajtu?

² Ftit huma n-​nies li jġarrbu bidliet daqstant estremi f’ħajjithom daqskemm ġarrab David, bin Ġesse. David inbidel mil-​lejl għan-​nhar, u minn daqsxejn taʼ tfajjel ragħaj komuni kiseb il-​fama u sar eroj nazzjonali. Iktar tard sar bniedem maħrub, ikkaċċjat bħal annimal minn sultan mimli għira. Wara dan, David sar sultan u konkwistatur. Hu dineb serjament u ġarrab il-​konsegwenzi taʼ wġigħ il-​qalb. Bata minħabba traġedji u firda fil-​familja tiegħu. Kiseb l-​għana, xjaħ, u esperjenza t-​tbatijiet tax-​xjuħija. Madankollu, minkejja dawn il-​ħafna bidliet f’ħajtu, David wera fiduċja u tama f’Jehovah u fl-​ispirtu Tiegħu matul ħajtu kollha. Hu għamel l-​almu tiegħu biex jidher “quddiem Alla bħala bniedem approvat,” u Alla bierku. (2 Timotju 2:15, NW) Għalkemm iċ-​ċirkustanzi tagħna huma differenti minn dawk taʼ David, nistgħu nitgħallmu mill-​mod kif hu aġixxa f’sitwazzjonijiet differenti matul ħajtu. L-​eżempju tiegħu jistaʼ jgħinna nifhmu kif aħna nistgħu nibqgħu niġu megħjunin mill-​ispirtu t’Alla hekk kif niffaċċjaw xi bidliet f’ħajjitna.

L-​Umiltà taʼ David—Eżempju mill-​Aqwa

3, 4. David kif minn daqsxejn taʼ tfajjel ragħaj komuni sar eroj nazzjonali?

³ Meta kien għadu tifel, David lanqas fil-​familja tiegħu stess ma kien prominenti. Meta l-​profeta Samwel mar Betlehem, missier David urieh sebgħa mit-​tmien ulied subien li kellu. David, it-​tifel iż-​żgħir, tħalla jirgħa n-​nagħaġ. Madankollu, Jehovah kien għażel lil David biex ’il quddiem ikun is-​sultan taʼ Iżrael. David ġie msejjaħ mill-​għalqa. Imbagħad, ir-​rakkont tal-​Bibbja jgħid: “Samwel ħa f’idejh il-​qarn biż-​żejt, u dilku quddiem ħutu. Minn dak in-​nhar ’il quddiem niżel fuq David u ħakmu l-​ispirtu tal-​Mulej.” (1 Samwel 16:12, 13) David straħ fuq dan l-​ispirtu tul ħajtu kollha.

⁴ Dan ir-​ragħaj ma kellux idum ma jsir magħruf f’pajjiżu. Hu ssejjaħ biex jaqdi lis-​sultan u biex joqgħod idoqq il-​mużika quddiemu. Hu qatel lill-​gwerrier Gulija, ġgant tant feroċi li anki s-​suldati taʼ l-​esperjenza f’Iżrael beżgħu jħabbtuha miegħu. Meta nħatar mexxej tal-​gwerriera, David irnexxielu jegħleb lill-​Filistin. In-​nies kienu jħobbuh u kitbulu għanjiet taʼ tifħir. Iktar qabel, wieħed mill-​konsulenti tas-​Sultan Sawl kien iddeskriva liż-​żagħżugħ David mhux biss bħala wieħed “li jaf idoqq” l-​arpa imma wkoll bħala “bniedem qalbieni, jinqalaʼ għall-​gwerra, għaqli fi kliemu, u raġel sabiħ.”—1 Samwel 16:18; 17:23, 24, 45-51; 18:5-7.

5. X’inhuma xi affarijiet li minħabba fihom David setaʼ sar bniedem arroganti, u kif nafu li ma sarx hekk?

⁵ Fama, sbuħija, żgħożija, abbiltà fil-​kliem, talent mużikali, ħila militari, approvazzjoni divina—David kien jidher li kellu kollox. Kwalunkwe waħda minn dawn l-​affarijiet setgħet għamlitu bniedem arroganti, imma l-​ebda waħda minnhom ma ħallieha tagħmlu hekk. Innota t-​tweġiba taʼ David lis-​Sultan Sawl meta dan offrielu lil bintu biex jiżżewwiġha. Bl-​umiltà kollha, David qallu: “Min jien, u min hi l-​familja taʼ missieri fost Iżrael, biex inkun jien ħaten is-​sultan?” (1 Samwel 18:18) Meta kkummenta fuq dan il-​vers, wieħed studjuż kiteb: “David ried ifisser li, la minħabba l-​kwalifiki persunali, la minħabba l-​qagħda soċjali tiegħu, u lanqas minħabba d-​dixxendenza tiegħu, ma setaʼ qatt jippretendi li jistħoqqlu l-​unur li jkun ir-​raġel taʼ bint is-​sultan.”

6. Għala għandna nikkultivaw l-​umiltà?

⁶ David kien umli minħabba l-​fatt li rrikonoxxa li Jehovah hu bil-​wisq iktar superjuri mill-​bnedmin imperfetti b’kull mod. David skanta kif Alla saħansitra jagħti kas il-​bniedem. (Salm 144:3) David kien jaf ukoll li kwalunkwe kobor li kien kiseb kien kollu grazzi għal Jehovah li wera umiltà u baxxa lilu nnifsu biex isostnih, jipproteġih, u jieħu ħsiebu. (Salm 18:35, NW) X’lezzjoni mill-​isbaħ għalina! Aħna qatt m’għandna nsiru kburin minħabba t-​talenti tagħna, l-​affarijiet li ksibna, u l-​privileġġi li għandna. Tabilħaqq, “x’għandek li ma ngħatalikx?” kiteb l-​appostlu Pawlu. “U jekk ingħatalek, l-​għala tiftaħar bħallikieku ma ngħatalek xejn?” (1 Korintin 4:7) Biex ikollna l-​ispirtu qaddis t’Alla u ngawdu l-​approvazzjoni tiegħu, aħna rridu nikkultivaw u nibqgħu nuru l-​umiltà.—Ġakbu 4:6.

“Tivvendikawx Ruħkom b’Idejkom”

7. X’opportunità ġietu lil David biex joqtol lis-​Sultan Sawl?

⁷ Għalkemm il-​fama taʼ David ma nisslet l-​ebda kburija f’qalbu, din qanqlet għira qattiela fis-​Sultan Sawl, li ma kienx għad baqagħlu l-​ispirtu t’Alla fuqu. Għalkemm David ma kien għamel xejn ħażin, hu ħarab biex isalva ġildu u beda jgħix fid-​deżert. Darba minnhom, waqt tfittxija bla ħniena għal David, is-​Sultan Sawl daħal f’għar bla ma kien jaf li David u sħabu kienu qegħdin mistoħbijin hemm ġew. L-​irġiel taʼ David ħeġġewh biex jaħtaf l-​opportunità li kienet donnha ġejja mingħand Alla biex joqtol lil Sawl. Nistgħu nġibuhom quddiem għajnejna fid-​dlam, jgħidu b’leħen baxx lil David: “Ara, dan hu l-​jum li għalih il-​Mulej qallek: Ara, jien se nagħtik l-​għadu tiegħek f’idejk, u tagħmel minnu kif jogħġbok.”—1 Samwel 24:3-7 (24:2-6, NW).

8. David għala rażżan lilu nnifsu u ma vvindikax ruħu?

⁸ David irrifjuta li jweġġaʼ lil Sawl. Hu wera l-​fidi u l-​paċenzja, u kien kuntent li jħalli l-​affarijiet f’idejn Jehovah. Wara li s-​sultan ħareġ mill-​għar, David sejjaħlu u qallu: “Jagħmel ħaqq il-​Mulej bejni u bejnek, u jitħallas minnek għalija l-​Mulej. Imma idi ma tintrefax fuqek!” (1 Samwel 24:13 [24:12, NW]) Għalkemm kien jaf li Sawl kien qed jiżbalja, David ma vvindikax ruħu b’idejh, u lanqas ma tkellem b’mod abbużiv maʼ Sawl jew dwaru. F’diversi okkażjonijiet oħra, David rażżan lilu nnifsu u ma ħax l-​affarijiet f’idejh. Minflok, hu ħalla f’idejn Jehovah biex jirranġa l-​affarijiet hu.—1 Samwel 25:32-34; 26:10, 11.

9. Għala m’għandniex nirritaljaw jekk nesperjenzaw oppożizzjoni jew persekuzzjoni?

⁹ Bħal David, int tistaʼ ssib ruħek f’sitwazzjonijiet diffiċli. Forsi qed tiffaċċja oppożizzjoni jew persekuzzjoni minn sħabek fl-​iskola, sħabek tax-​xogħol, membri tal-​familja, jew oħrajn li m’għandhomx l-​istess twemmin bħalek. Tirritaljax. Strieħ fuq Jehovah u itolbu għall-​ispirtu qaddis tiegħu biex jgħinek. Jistaʼ jkun li dawn l-​uħud li ma jemmnux bħalek jibqgħu impressjonati bil-​kondotta tajba tiegħek u jsiru jemmnu. (1 Pietru 3:1) Jiġri x’jiġri, ibqaʼ ċert li Jehovah jaf f’liema sitwazzjoni qiegħed u se jagħmel xi ħaġa dwarha meta jasal il-​waqt li jagħżel hu. L-​appostlu Pawlu kiteb: “Tivvendikawx ruħkom b’idejkom, għeżież tiegħi, imma ħallu l-​korla taʼ Alla tagħmel hi, għax hemm miktub: ‘Għalija l-​vendetta, jiena nħallas, jgħid il-​Mulej.’”—Rumani 12:19.

‘Agħti Widen għad-​Dixxiplina’

10. David kif waqaʼ fid-​dnub, u kif ipprova jaħbih?

¹⁰ Għaddew is-​snin u David sar sultan maħbub taʼ prominenza kbira. Il-​mod kif matul ħajtu wera lealtà impressjonanti, flimkien mas-​salmi sbieħ li kiteb bħala tifħir lil Jehovah, jistgħu faċilment jagħtu l-​impressjoni li dan kien raġel li qatt ma kien se jasal biex jagħmel dnub serju. Imma anki hu waqaʼ fid-​dnub. Jum wieħed, is-​sultan kien fuq il-​bejt u ra mara sabiħa tinħasel. Hu tkixxef min kienet. Meta sar jaf li l-​mara kienet Batseba u li żewġha, Urija, kien mar għall-​gwerra, David bagħat għaliha u mtedd magħha. Iktar tard, hu sar jaf li ħarġet tqila. Xi skandlu kien se jkun hemm jekk il-​biċċa toħroġ fil-​beraħ! Taħt il-​Liġi Mosajka, min jagħmel adulterju kien jistħoqqlu l-​piena tal-​mewt. Mid-​dehra s-​sultan ħaseb li setaʼ jaħbi dnubu. Għalhekk, bagħat messaġġ lill-​armata u ordna li Urija jirritorna Ġerusalemm. David kien qed jittama li Urija jgħaddi l-​lejl maʼ Batseba, imma dan m’għamilx hekk. Issa David kien iddisprat, u għalhekk bagħat lil Urija lura għall-​gwerra b’ittra indirizzata lil Ġowab, il-​kmandant militari. L-​ittra kien tgħid li waqt il-​battalja, Urija kellu jitqiegħed f’post partikulari biex imut żgur. Ġowab obda, u Urija nqatel. Wara li Batseba osservat id-​drawwa taʼ żmien il-​vistu, David ħadha biex tkun martu.—2 Samwel 11:1-27.

11. Natan liema storja rrakkonta lil David, u dan kif irreaġixxa?

¹¹ Il-​pjan kien donnu rnexxa, għalkemm David missu kien jaf li Jehovah kien jaf l-​istorja mill-​bidu sa l-​aħħar. (Lhud 4:13) Għaddew ix-​xhur, u twieldet it-​tarbija. Imbagħad, Alla dderieġa lil Natan il-​profeta biex imur għand David. Il-​profeta rrakkonta storja lis-​sultan dwar wieħed raġel sinjur li kellu ħafna nagħaġ u li qatel l-​unika nagħġa għażiża taʼ wieħed raġel fqir. L-​istorja qanqlet is-​sens taʼ ġustizzja taʼ David imma hu xejn ma ssuspetta x’ried ifisser eżatt biha. David minnufih għadda ġudizzju kontra r-​raġel sinjur. Mimli għadab, hu qal lil Natan: “Il-​bniedem li għamel dan ħaqqu l-​mewt.”—2 Samwel 12:1-6.

12. Jehovah liema ġudizzju għadda kontra David?

¹² “Inti hu dak il-​bniedem!” wieġbu l-​profeta. David kien għadda ġudizzju kontrih stess. Mingħajr ebda dubju, ir-​rabja taʼ David malajr inbidlet f’mistħija kbira u dispjaċir profond. Miblugħ, hu semaʼ lil Natan jgħidlu l-​ġudizzju inevitabbli taʼ Jehovah. Ma kienx hemm kliem taʼ faraġ jew konsolazzjoni. David kien stmerr il-​kelma taʼ Jehovah billi għamel dak li hu ħażin. Ma kienx hu qatel lil Urija bix-​xabla taʼ l-​għadu? Mela x-​xabla qatt ma kienet se titwarrab minn dar David. Ma kienx hu ħa l-​mara taʼ Urija bil-​moħbi? Mela l-​istess ħażen kien se jiġi fuqu, mhux bil-​moħbi, imma fil-​beraħ.—2 Samwel 12:7-12.

13. David kif irreaġixxa għad-​dixxiplina mingħand Jehovah?

¹³ Xi ħaġa favur David kienet li hu ma ċaħadx li kien ħati. Hu ma ħadhiex kontra l-​profeta Natan, u la waħħal f’ħaddieħor u lanqas ma ġġustifika dak li kien għamel. Meta ġie ffaċċjat bid-​dnubiet tiegħu, David aċċetta r-​responsabbiltà u qal: “Jiena dnibt kontra l-​Mulej!” (2 Samwel 12:13) Salm 51 juri l-​agunija li għadda minnha minħabba l-​ħtija tiegħu, u l-​indiema kbira li wera. Hu talab bil-​ħniena lil Jehovah: “La twarrabnix minn quddiemek; tneħħix minni l-​ispirtu qaddis tiegħek.” Kien jemmen li Jehovah, bil-​ħniena kollha li għandu, ma kienx se jwarrab “qalb maqsuma u sogħbiena” minħabba xi dnub. (Salm 51:13, 19 [11, 17, NW]) David kompla jistrieħ fuq l-​ispirtu t’Alla. Għalkemm Jehovah ma pproteġiex lil David mill-​konsegwenzi koroh taʼ dnubu, hu ħafirlu.

14. Kif għandna nirreaġixxu għad-​dixxiplina taʼ Jehovah?

¹⁴ Ilkoll kemm aħna imperfetti, u lkoll nidinbu. (Rumani 3:23) Xi drabi nistgħu naqgħu fi dnub serju, bħalma għamel David. Sewwasew bħalma missier jiddixxiplina lil uliedu għax iħobbhom, Jehovah jikkoreġi lil dawk li jirsistu biex jaqduh. Madankollu, għalkemm id-​dixxiplina tkun taʼ ġid, m’hijiex faċli biex naċċettawha. Fil-​fatt, xi drabi din “tnikkitna.” (Lhud 12:6, 11) Madankollu, jekk ‘nagħtu widen għad-​dixxiplina,’ nistgħu nerġgħu nitħabbu maʼ Jehovah. (Proverbji 8:33, NW) Biex inkomplu ngawdu l-​barka taʼ l-​ispirtu taʼ Jehovah, irridu naċċettaw il-​korrezzjoni u naħdmu biex niġu approvati minn Alla.

Tittamax f’Rikkezzi li Ma Tistax Torbot Fuqhom

15. (a) Xi nies b’liema modi jużaw ir-​rikkezzi tagħhom? (b) David kif xtaq juża l-​ġid li kellu?

¹⁵ M’hemm l-​ebda indikazzjoni li David kellu xi pożizzjoni għolja jew li kien ġej minn familja tat-​tajjeb. Madankollu, matul ir-​renju tiegħu David kiseb ġid enormi. Bħalma taf, ħafna wħud igeddsu ġidhom, jaraw kif se jkomplu jżiduh, jew jonfquh għalihom infushom. Oħrajn jużaw flushom biex jigglorifikaw lilhom infushom. (Mattew 6:2) David uża l-​ġid li kellu b’mod differenti. Hu kellu xewqa kbira li jonora lil Jehovah. David qal lil Natan kemm xtaq jibni tempju għal Jehovah sabiex titpoġġa fih l-​arka tal-​patt, li dakinhar kienet tinsab f’Ġerusalemm “f’nofs taʼ tinda.” Jehovah kien kuntent bl-​intenzjoni taʼ David imma permezz taʼ Natan qallu li l-​bini tat-​tempju kien se jitħalla f’idejn ibnu, Salamun.—2 Samwel 7:1, 2, 12, 13.

16. David liema tħejjijiet għamel għall-​bini tat-​tempju?

¹⁶ David ġabar ħafna mill-​materjal li kellu jintuża f’dan il-​proġett kbir taʼ bini. Hu qal lil Salamun: “Ħejjejt għal dar il-​Mulej mitt elf talent tad-​deheb u miljun talent tal-​fidda; u bronż u ħadid bla qjies għax hemm bil-​kotra; u injam u ħaġar ħejjejt ukoll, u int tkompli żżid magħhom.” Mir-​rikkezzi persunali tiegħu, hu kkontribwixxa 3,000 talent tad-​deheb u 7,000 talent tal-​fidda.a (1 Kronaki 22:14; 29:3, 4) David ma weriex ġenerożità biex jiffanfra imma biex juri l-​fidi u d-​devozzjoni tiegħu lejn Alla Jehovah. Hu kien jaf min hu s-​Sors tar-​rikkezzi tiegħu u qal lil Jehovah: “Kollox minnek ġej; u minn idejk nagħtuh lilek.” (1 Kronaki 29:14) Il-​qalb ġeneruża taʼ David qanqlitu jagħmel kulma jistaʼ sabiex jappoġġa l-​qima pura.

17. Il-​parir fl-​1 Timotju 6:17-19 kif japplika kemm għas-​sinjuri kif ukoll għall-​foqra?

¹⁷ Jalla aħna bl-​istess mod nużaw l-​affarijiet materjali tagħna biex nagħmlu l-​ġid. Minflok ma niġru wara ħajja materjalistika, ikun aħjar jekk infittxu l-​approvazzjoni t’Alla—jiġifieri ħajja li tirrifletti għerf u hena veru. Pawlu kiteb: “Lil dawk li huma għonja bil-​ġid taʼ din l-​art widdibhom biex ma jitkabbrux u ma jqegħdux it-​tama tagħhom f’għana li ma tistax torbot fuqu, imma li għandhom jittamaw f’Alla li jagħtina kollox bix-​xabaʼ biex ingawdu bih; għidilhom jagħmlu l-​ġid, jistagħnu b’opri tajba, li jkunu ġenerużi u jaqsmu maʼ oħrajn. Hekk ikunu qegħdin jaħżnu għalihom infushom teżor sabiħ għal li ġej, biex bih jiksbu l-​ħajja, il-​ħajja vera.” (1 Timotju 6:17-19) Hi x’inhi l-​qagħda ekonomika tagħna, ejja nistrieħu fuq l-​ispirtu t’Alla u ngħixu ħajjitna b’tali mod li ‘nistagħnew quddiem Alla.’ (Luqa 12:21) M’hemm xejn iktar prezzjuż milli nkunu approvati minn Missierna tas-​sema li tant iħobbna.

Idher Quddiem Alla Bħala Bniedem Approvat

18. David b’liema mod ħalla eżempju mill-​aħjar għall-​Kristjani?

¹⁸ Matul ħajtu, David fittex l-​approvazzjoni taʼ Jehovah. F’waħda mill-​għanjiet tiegħu kanta: “Ħenn għalija, o Alla, ħenn għalija, għax fik jiena nsib il-​kenn tiegħi.” (Salm 57:2 [57:1, NW]) Il-​fidi li wera f’Jehovah ma kinitx għalxejn. David xjaħ u kien sodisfatt u “mimli bl-​għomor.” (1 Kronaki 23:1) Għalkemm David għamel żbalji serji, hu baqaʼ magħruf bħala wieħed mill-​ħafna xhieda t’Alla li wrew fidi taʼ l-​għaġeb.—Lhud 11:32.

19. Kif nistgħu nidhru quddiem Alla bħala bnedmin approvati?

¹⁹ Hekk kif tiffaċċja bidliet fil-​ħajja, ftakar li bħalma Jehovah sostna, saħħaħ, u kkoreġa lil David, Hu jistaʼ jagħmel l-​istess miegħek. Bħal David, l-​appostlu Pawlu ffaċċja ħafna bidliet f’ħajtu. Madankollu, hu wkoll baqaʼ leali billi straħ fuq l-​ispirtu t’Alla. Hu kiteb: “Kollox niflaħ bis-​saħħa taʼ dak li jqawwini.” (Filippin 4:12, 13) Jekk nistrieħu fuq Jehovah, hu se jgħinna nirnexxu. Hu jixtieqna nirnexxu. Jekk nisimgħu minnu u nersqu qrib lejh, se jagħtina s-​saħħa biex nagħmlu r-​rieda tiegħu. U jekk inkomplu nistrieħu fuq l-​ispirtu t’Alla, se nkunu nistgħu ‘nidhru quddiem Alla bħala bnedmin approvati’ issa u għall-​eternità kollha.—2 Timotju 2:15.

[Nota taʼ taħt]

Int Kif Twieġeb?

• Kif nistgħu ngħassu kontra l-​kburija?

• Għala m’għandniex nivvendikaw ruħna b’idejna?

• Kif għandna nqisuha d-​dixxiplina?

• Għala għandna nafdaw f’Alla u mhux fir-​rikkezzi?

[Stampa f’paġna 16 , 17]

David straħ fuq l-​ispirtu t’Alla u fittex l-​approvazzjoni divina. Qiegħed int tagħmel l-​istess?

[Stampa f’paġna 18]

“Kollox minnek ġej; u minn idejk nagħtuh lilek”