Imweldin fil-​Ġens Magħżul minn Alla

“Lilek għażel il-​Mulej, Alla tiegħek, biex tkun il-​poplu miksub tiegħu.”—DEWTERONOMJU 7:​6.

1, 2. Liema għemejjel taʼ qawwa wettaq Ġeħova għan-​nom tal-​poplu tiegħu, u l-​Iżraelin daħlu f’liema relazzjoni m’Alla?

FL-​1513 Q.E.K., Ġeħova daħħal lill-​qaddejja tiegħu fuq l-​art f’relazzjoni ġdida miegħu. Dik is-​sena, hu umilja lil qawwa dinjija u ħeles lill-​Iżraelin mill-​jasar. Minħabba li għamel dan, hu sar is-​Salvatur u s-​Sid tagħhom. Qabel m’aġixxa, Alla qal lil Mosè: “Għid lil ulied Iżrael: ‘Jiena Jaħweh, u jien noħroġkom minn taħt il-​madmad taʼ l-​Eġittu u neħliskom mill-​jasar tagħkom, u nifdikom bis-​saħħa taʼ driegħi u nagħmel ħaqq minnhom b’għemejjel kbar. Jien naħtarkom u neħodkom biex tkunu l-​poplu tiegħi, u jiena nkun Alla tagħkom.’”—Eżodu 6:​6, 7; 15:​1-7, 11.

² Ftit wara l-​Eżodu tagħhom mill-​Eġittu, l-​Iżraelin daħlu f’relazzjoni taʼ patt m’Alla tagħhom, Ġeħova. Minflok ma kien se jittratta maʼ individwi, familji, jew tribujiet, minn dakinhar ’il quddiem Ġeħova kien se jkollu poplu organizzat, ġens, fuq l-​art. (Eżodu 19:​5, 6; 24:7) Hu pprovda liġijiet għall-​poplu tiegħu li kienu jmexxuhom fil-​ħajja taʼ kuljum tagħhom u, iktar importanti minn hekk, fil-​qima tagħhom. Mosè qalilhom: “Liema ġens hu hekk kbir li għandu l-​allat hekk qrib tiegħu daqs kemm hu qrib tagħna l-​Mulej, Alla tagħna, kull xħin insejjħulu? Jew liema ġens hu hekk kbir li għandu liġijiet u ordnijiet hekk sewwa daqs dak kollu li fiha din il-​liġi li qiegħed noffrilkom illum jien?”—Dewteronomju 4:​7, 8.

Imweldin f’Ġens taʼ Xhieda

3, 4. X’kienet raġuni importanti għala Iżrael kien jeżisti bħala ġens?

³ Sekli wara, Ġeħova fakkar lill-​Iżraelin, permezz tal-​profeta Isaija, dwar raġuni importanti għala kienu jeżistu bħala ġens. Isaija qal: “Jgħid il-​Mulej, dak li ħalqek, Ġakobb, dak li sawwrek, Iżrael: ‘La tibżax, għax jien fdejtek: jien sejjaħtlek b’ismek; inti tiegħi. Għax jiena l-​Mulej, Alla tiegħek, il-​Qaddis taʼ Iżrael, is-​Salvatur tiegħek. . . . Ġibli s-​subjien mill-​bogħod, ’il bnieti minn tarf l-​art, lil kull min jissejjaħ b’ismi, lil min ħlaqt għall-​glorja tiegħi, lil min sawwart u għamilt. Intom ix-​xhieda tiegħi, oraklu tal-​Mulej, u l-​qaddej tiegħi li jiena ħtart, . . . il-​poplu li sawwart għalija, biex ixandar it-​tifħir tiegħi.’”—Isaija 43:​1, 3, 6, 7, 10, 21.

⁴ Bħala poplu msejjaħ bl-​isem taʼ Ġeħova, l-​Iżraelin kellhom iservu bħala xiehda għas-​sovranità tiegħu quddiem il-​ġnus. Huma kellhom ikunu poplu ‘maħluq għall-​glorja’ taʼ Ġeħova. Kellhom ‘ixandru t-​tifħir’ taʼ Ġeħova, billi jitkellmu dwar l-​għemejjel meraviljużi taʼ ħelsien tiegħu u b’hekk jigglorifikaw lill-​isem qaddis tiegħu. Fi kliem ieħor, huma kellhom ikunu ġens taʼ xhieda għal Ġeħova.

5. B’liema mod kien Iżrael ġens dedikat?

⁵ Fis-​seklu 11 Q.E.K., is-​Sultan Salamun indika li Ġeħova għamel lil Iżrael ġens separat. F’talba lil Ġeħova, hu qal: “Int warrabthom għalik minn fost il-​popli kollha taʼ l-​art.” (1 Slaten 8:53) L-​Iżraelin individwali wkoll kellhom relazzjoni speċjali maʼ Ġeħova. Iktar kmieni, Mosè qalilhom: “Intom ulied il-​Mulej, Alla tagħkom . . . Għaliex int poplu qaddis għall-​Mulej, Alla tiegħek.” (Dewteronomju 14:​1, 2) Għalhekk, l-​Iżraelin żgħażagħ ma kellhomx għalfejn jiddedikaw ħajjithom lil Ġeħova. Huma twieldu bħala membri tal-​poplu dedikat t’Alla. (Salm 79:13; 95:7) Kull ġenerazzjoni ġdida kienet tiġi mgħallma fit-​tagħlim tal-​liġijiet taʼ Ġeħova u kellha l-​obbligu li żżomm miegħu minħabba l-​patt li kien jorbot lil Iżrael maʼ Ġeħova.​—Dewteronomju 11:​18, 19.

Ħielsa biex Jagħżlu

6. Liema għażla kellhom jagħmlu l-​Iżraelin individwalment?

⁶ Għalkemm l-​Iżraelin twieldu f’ġens dedikat, kull individwu kellu jagħmel deċiżjoni persunali biex jaqdi lil Alla. Qabel ma daħlu fl-​Art Imwiegħda, Mosè qalilhom: “Nsejjaħ illum is-​sema u l-​art b’xhieda kontrikom: il-​ħajja u l-​mewt, li jien illum qegħedt quddiemek, il-​barka u s-​saħta. Agħżel il-​ħajja biex tgħix int u nislek, billi tħobb lill-​Mulej, Alla tiegħek, u tismaʼ l-​kelma tiegħu, u torbot qalbek miegħu, għax din hi ħajtek u t-​tul taʼ jiemek li tgħammar fl-​art li Alla ħalef li jagħtiha lil missirijietek, lil Abraham, lil Iżakk u lil Ġakobb.” (Dewteronomju 30:​19, 20) Għalhekk, l-​Iżraelin individwalment kellhom jagħżlu li jħobbu lil Ġeħova, jisimgħu l-​kelma tiegħu, u jorbtu qalbhom miegħu. Ladarba l-​Iżraelin kellhom ir-​rieda ħielsa, huma kellhom iġorru l-​konsegwenzi taʼ l-​għażla li jagħmlu.​—Dewteronomju 30:​16-18.

7. X’ġara wara li mietet il-​ġenerazzjoni taʼ Ġożwè?

⁷ Il-​perijodu taʼ l-​Imħallfin jipprovdi eżempju tajjeb tal-​konsegwenzi li ġġib magħha l-​lealtà u n-​nuqqas taʼ lealtà. Eżatt qabel ma beda dan il-​perijodu, l-​Iżraelin segwew l-​eżempju taʼ Ġożwè u ġew imberkin. “Il-​poplu serva lill-​Mulej il-​jiem kollha taʼ Ġożwè u l-​jiem kollha tax-​xjuħ li baqgħu ħajjin wara Ġożwè, u li kienu raw kull ma kien għamel il-​Mulej, l-​opri kbar kollha li għamel għal Iżrael.” Madankollu, ftit wara l-​mewt taʼ Ġożwè, “telgħet ġenerazzjoni oħra warajhom, li ma kinitx taf il-​Mulej u anqas x’għamel il-​Mulej għal Iżrael. U wlied Iżrael għamlu l-​ħażin f’għajnejn il-​Mulej.” (Mħallfin 2:​7, 10, 11) Milli jidher, membri tal-​ġenerazzjoni li telgħet wara, li kienet bla esperjenza, m’apprezzawx il-​wirt bħala parti mill-​poplu dedikat, li għalih Alla tagħhom, Ġeħova, kien wettaq għemejjel taʼ qawwa fil-​passat.—Salm 78:​3-7, 10, 11.

Jgħixu Skond id-​Dedikazzjoni Tagħhom

8, 9. (a) Liema arranġament ippermetta lill-​Iżraelin juru d-​dedikazzjoni tagħhom lil Ġeħova? (b) Dawk li għamlu l-​offerti volontarji x’kisbu għalihom infushom?

⁸ Ġeħova pprovda opportunitajiet lin-​nies tiegħu biex jgħixu skond id-​dedikazzjoni li għamlu bħala poplu. Per eżempju, il-​Liġi tiegħu pprovdiet sistema taʼ sagrifiċċji, jew offerti, li fosthom kien hemm dawk obbligatorji waqt li oħrajn kienu volontarji. (Ebrej 8:3) Dawn is-​sagrifiċċji inkludew offerti tal-​ħruq, offerti tal-​qamħ, u offerti tas-​sliem li kienu volontarji—għotjiet preżentati lil Ġeħova biex jiksbu l-​favur tiegħu u biex jesprimu l-​gratitudni.—Levitiku 7:​11-13.

⁹ Dawn l-​offerti volontarji kienu jogħġbu lil Ġeħova. L-​offerti tal-​ħruq u tal-​qamħ kienu kunsidrati bħala “riħa tfuħ quddiem il-​Mulej.” (Levitiku 1:9; 2:2) Fis-​sagrifiċċju tas-​sliem, id-​demm u x-​xaħam taʼ l-​annimal kienu jiġu offruti lil Ġeħova, waqt li l-​porzjonijiet tal-​laħam kienu jittieklu mill-​qassisin u minn dak li joffrihom. Għalhekk, din kienet ikla simbolika li tfisser relazzjoni paċifika maʼ Ġeħova. Il-​Liġi kienet tgħid: “Meta toffru s-​sagrifiċċju tas-​sliem lill-​Mulej, qisu li toffruh b’mod li tkunu milqugħin tajjeb.” (Levitiku 19:5) Waqt li l-​Iżraelin kollha twieldu bħala wħud dedikati lil Ġeħova, dawk li xtaqu tassew jaqdu lil Ġeħova bħala Alla tagħhom billi jagħtu offerti volontarji ‘ġew milqugħin tajjeb’ u tbierku bil-​kbir.—Malakija 3:10.

10. Ġeħova kif esprima d-​diżapprovazzjoni tiegħu fi żmien Isaija u fi żmien Malakija?

¹⁰ Madankollu, spiss il-​ġens dedikat taʼ Iżrael ma kienx leali lejn Ġeħova. Permezz tal-​profeta tiegħu Isaija, Ġeħova qalilhom: “Ma ġibtlix in-​nagħaġ tiegħek għas-​sagrifiċċju tal-​ħruq, u ma weġġaħtnix bis-​sagrifiċċji tiegħek. Jien ma għabbejtekx bl-​offerti.” (Isaija 43:23) Barra minn hekk, l-​offerti li ma sarux mill-​qalb u bl-​imħabba ma kellhom ebda valur f’għajnejn Ġeħova. Per eżempju, tliet sekli wara Isaija, fi żmien il-​profeta Malakija, l-​Iżraelin offrew annimali difettużi. Minħabba f’hekk, Malakija qalilhom: “‘M’għandix pjaċir bikom,’ jgħid il-​Mulej taʼ l-​eżerċti, ‘u minn idejkom ma nilqax offerti.’ . . . ‘Intom iġġibu vittmi misruqa u dak li hu magħtub u dak li hu marid, u dan iġġibuh bħala offerta. U jien se nilqagħha minn idejkom?’ Jgħid il-​Mulej taʼ l-​eżerċti.”—Malakija 1:​10, 13; Għamos 5:22.

Miċħud Bħala Ġens Dedikat

11. Liema opportunità ngħatat lil Iżrael?

¹¹ Meta l-​Iżraelin saru ġens dedikat lil Ġeħova, hu wegħedhom: “Jekk tisimgħu leħni u żżommu l-​patt tiegħi, intom tkunu l-​wirt tiegħi minn fost il-​popli kollha, għax l-​art kollha tiegħi. Intom tkunu għalija saltna taʼ qassisin u ġens qaddis.” (Eżodu 19:​5, 6) Il-​Messija mwiegħed kellu jidher fosthom u jagħtihom l-​ewwel opportunità biex isiru membri tal-​gvern tas-​Saltna t’Alla. (Ġenesi 22:​17, 18; 49:10; 2 Samwel 7:​12, 16; Luqa 1:​31-​33; Rumani 9:​4, 5) Imma l-​maġġuranza mill-​membri tal-​ġens taʼ Iżrael m’għexux skond id-​dedikazzjoni tagħhom. (Mattew 22:14) Huma ċaħdu lill-​Messija u sa fl-​aħħar waslu biex qatluh.—Atti 7:​51-53.

12. Liema stqarrijiet minn Ġesù juru li Iżrael ġie miċħud bħala ġens dedikat lil Ġeħova?

¹² Ftit jiem qabel mewtu, Ġesù qal lill-​mexxejja reliġjużi Lhud: “Qatt ma qrajtu fl-​Iskrittura, ‘Il-​ġebla li twarrbet mill-​bennejja saret il-​ġebla tax-​xewka ewlenija. Mingħand Ġeħova seħħ dan u f’għajnejna din hi xi ħaġa meraviljuża’? Għalhekk ngħidilkom, Is-​Saltna t’Alla tittieħed mingħandkom u tingħata lil ġens li jagħti l-​frott minnha.” (Mattew 21:​42, 43) Biex jurihom li Ġeħova kien ċaħadhom bħala ġens dedikat Lilu, Ġesù qal: “Ġerusalemm, Ġerusalemm, il-​qattiela tal-​profeti u l-​ħaġġara taʼ dawk li ntbagħtulha! Kemm-il darba ridt niġbor lil uliedek flimkien, kif qroqqa tiġbor il-​flieles tagħha taħt ġwinħajha! Imma intom ma ridtuhx. Ara! Darkom mitluqa f’idejkom.”—Mattew 23:​37, 38.

Ġens Dedikat Ġdid

13. Liema stqarrija profetika għamel Ġeħova fi żmien Ġeremija?

¹³ Fi żmien il-​profeta Ġeremija, Ġeħova bassar xi ħaġa ġdida dwar il-​poplu tiegħu. Hemmhekk naqraw: “Araw, għad jiġi żmien, oraklu tal-​Mulej, meta jien nagħmel patt ġdid maʼ dar Iżrael u dar Ġuda; mhux bħall-​patt li għamilt maʼ missirijiethom fiż-​żmien meta qbadthom minn idejhom biex ħriġthom mill-​art taʼ l-​Eġittu, il-​patt tiegħi li huma kisru, għalkemm jien kont l-​għarus tagħhom, oraklu tal-​Mulej. Imma dan ikun il-​patt li għad nagħmel maʼ dar Iżrael wara dawk il-​jiem, oraklu tal-​Mulej. Nqiegħed il-​liġi tiegħi fosthom u niktibha f’qalbhom; u jiena nkun Alla tagħhom, u huma jkunu l-​poplu tiegħi.”—Ġeremija 31:​31-33.

14. Meta u fuq liema bażi beda jeżisti l-​ġens dedikat ġdid taʼ Ġeħova? Spjega min hu dan il-​ġens il-​ġdid.

¹⁴ Il-​bażi taʼ dan il-​patt il-​ġdid tpoġġiet meta Ġesù miet u iktar tard ippreżenta l-​valur tad-​demm imxerred tiegħu lil Missieru, fis-​sena 33 E.K. (Luqa 22:20; Ebrej 9:​15, 24-26) Madankollu, meta ġie mferraʼ l-​ispirtu qaddis f’Pentekoste tas-​sena 33 E.K. u twieled ġens ġdid, “l-​Iżrael t’Alla,” il-​patt il-​ġdid beda jiffunzjona. (Galatin 6:16; Rumani 2:​28, 29; 9:6; 11:​25, 26) Meta kien qed jikteb lill-​Kristjani midlukin, l-​appostlu Pietru ddikjara: “Intom ‘razza magħżula, saċerdozju rjali, ġens qaddis, poplu miksub bħala proprjetà speċjali, sabiex ixxandru maʼ kullimkien il-​kwalitajiet eċċellenti’ taʼ dak li sejħilkom mid-​dlam għal ġod-​dawl tiegħu taʼ l-​għaġeb. Għax darba ma kontux poplu, imma issa l-​poplu t’Alla.” (1 Pietru 2:​9, 10) Ir-​relazzjoni speċjali bejn Ġeħova u Iżrael naturali ntemmet. Fis-​sena 33 E.K., il-​favur taʼ Ġeħova ma baqax fuq Iżrael taʼ l-​art imma mar fuq Iżrael spiritwali, il-​kongregazzjoni Kristjana, “ġens li jagħti l-​frott” mis-​Saltna Messjanika.—Mattew 21:34.

Dedikazzjoni Individwali

15. Fil-​jum taʼ Pentekoste tas-​sena 33 E.K., Pietru liema magħmudija ħeġġeġ lis-​semmiegħa tiegħu biex ikollhom?

¹⁵ Wara Pentekoste tas-​sena 33 E.K., kull individwu, Lhudi jew Ġentili, kellu jagħmel dedikazzjoni persunali lil Alla u jitgħammed “fl-​isem tal-​Missier u taʼ l-​Iben u taʼ l-​ispirtu qaddis.”a (Mattew 28:19) F’Pentekoste, l-​appostlu Pietru qal lil-​Lhud u l-​proseliti li semgħu: “Indmu, u ħa jitgħammed kull wieħed minnkom f’isem Ġesù Kristu għall-​maħfra tad-​dnubiet, u tirċievu l-​ispirtu qaddis bħala għotja b’xejn.” (Atti 2:38) Dawn il-​Lhud u l-​proseliti kellhom juru bil-​magħmudija tagħhom mhux biss li kienu ddedikaw ħajjithom lil Ġeħova, imma wkoll li kienu aċċettaw lil Ġesù bħala l-​mezz li bih Ġeħova kien se jaħfrilhom dnubiethom. Huma kellhom jirrikonoxxuh bħala l-​Qassis il-​Kbir taʼ Ġeħova u l-​Mexxej tagħhom, il-​Kap tal-​kongregazzjoni Kristjana.—Kolossin 1:​13, 14, 18.

16. Fi żmien Pawlu, dawk li kellhom attitudni xierqa—Lhud u Ġentili—kif saru parti minn Iżrael spiritwali?

¹⁶ Snin wara, l-​appostlu Pawlu qal: “Ħadt il-​messaġġ l-​ewwel lil dawk f’Damasku, imbagħad lil dawk f’Ġerusalemm, u l-​pajjiż kollu tal-​Lhudija, u lill-​ġnus biex jindmu u jduru lejn Alla billi jagħmlu għemejjel li jixirqu lill-​indiema.” (Atti 26:20) Wara li kkonvinċa lin-​nies—Lhud u Ġentili—li Ġesù kien il-​Kristu, il-​Messija, Pawlu għenhom jiddedikaw ruħhom u jitgħammdu. (Atti 16:​14, 15, 31-​33; 17:​3, 4; 18:8) Billi daru lejn Alla, dawn id-​dixxipli ġodda saru membri taʼ Iżrael spiritwali.

17. Liema xogħol taʼ ssiġillar dalwaqt se jintemm, u liema xogħol ieħor qed isir bil-​ħeffa?

¹⁷ Illum, l-​issiġillar finali taʼ dak li baqaʼ minn Iżrael spiritwali jinsab fil-​qrib. Ladarba jitlesta, l-​“erbaʼ anġli” li qed iżommu lura l-​irjieħ tal-​qerda tat-​“tribulazzjoni l-​kbira” se jingħataw il-​permess biex jitilquhom. Sadanittant, il-​ġbir tal-​“folla kbira,” li tittama li tgħix għal dejjem fuq l-​art, qed isir bil-​ħeffa. Dawn in-​“nagħaġ oħrajn” jagħżlu minn jeddhom li jeżerċitaw fidi “fid-​demm tal-​Ħaruf” u jitgħammdu bħala simbolu tad-​dedikazzjoni tagħhom lil Ġeħova. (Rivelazzjoni 7:​1-4, 9-​15; 22:17; Ġwanni 10:16; Mattew 28:​19, 20) Fosthom hemm ħafna żgħażagħ li trabbew minn ġenituri Kristjani. Jekk int wieħed minn dawn iż-​żgħażagħ, se tkun interessat biex taqra l-​artiklu li jmiss.

[Nota taʼ taħt]

Bħala Reviżjoni

• L-​Iżraelin żgħażagħ għala ma kellhomx għalfejn jagħmlu dedikazzjoni persunali lil Ġeħova?

• Kif setgħu l-​Iżraelin juru li huma jgħixu skond id-​dedikazzjoni tagħhom?

• Ġeħova għala ċaħad lil Iżrael bħala l-​ġens dedikat tiegħu, u dan kif ġie mibdul?

• Minn Pentekoste tas-​sena 33 E.K. ’il quddiem, il-​Lhud u l-​Ġentili x’kellhom jagħmlu biex isiru membri taʼ Iżrael spiritwali?

[Stampa f’paġna 21]

L-​Iżraelin żgħażagħ twieldu bħala parti mill-​ġens magħżul t’Alla

[Stampa f’paġna 23]

Kull Iżraeli kellu jagħmel deċiżjoni persunali biex jaqdi lil Alla

[Stampa f’paġna 23]

L-​offerti volontarji taw l-​opportunità lill-​Iżraelin biex juru l-​imħabba tagħhom għal Ġeħova

[Stampa f’paġna 25]

Wara Pentekoste tas-​sena 33 E.K., is-​segwaċi taʼ Kristu kellhom jagħmlu dedikazzjoni persunali lil Alla u jissimbolizzawha bil-​magħmudija