Kuraġġ Imsaħħaħ bl-Imħabba
“Alla ma taniex spirtu beżżiegħ, imma spirtu taʼ qawwa u taʼ mħabba u taʼ moħħ f’loku.”—2 TIMOTJU 1:7.
1, 2. (a) L-imħabba x’tistaʼ tqanqal lil dak li jkun biex jagħmel? (b) Il-kuraġġ li wera Ġesù għala kien jispikka?
KOPPJA li kienu għadhom kif jiżżewġu kienu qed jgħoddsu bit-tankijiet viċin taʼ raħal fil-lvant taʼ l-Awstralja. Kienu waslu biex jitilgħu fil-wiċċ meta kelb il-baħar attakka lill-mara. B’att qalbieni, ir-raġel warrab lill-mara u ħalla lill-kelb il-baħar jaħtaf lilu. “Ta ħajtu għalija,” qalet l-armla fil-funeral tiegħu.
2 Iva, l-imħabba tqanqal lill-bnedmin juru kuraġġ li jispikka. Ġesù Kristu nnifsu qal: “Ħadd m’għandu mħabba akbar minn din, li xi ħadd jagħti ruħu għal ħbiebu.” (Ġwanni 15:13) Inqas minn 24 siegħa wara li Ġesù qal dan il-kliem hu ta ħajtu stess, mhux għal persuna waħda imma għall-umanità kollha. (Mattew 20:28) Iktar minn hekk, Ġesù ma tax ħajtu sempliċement minħabba kuraġġ li ħass dak il-ħin. Hu kien jaf minn qabel li kien se jiġi ridikolat u abbużat, sentenzjat b’mod inġust, u mogħti l-mewt fuq zokk tat-tortura. Hu saħansitra pprepara lid-dixxipli tiegħu għal dak li kellu jiġri: “Hawn aħna, telgħin Ġerusalemm, u Bin il-bniedem se jingħata f’idejn il-qassisin ewlenin u l-iskribi, u dawn jikkundannawh għall-mewt u jagħtuh f’idejn in-nies tal-ġnus, u jiddieħqu bih u jobżqulu u jsawtuh u joqtluh.”—Marku 10:33, 34.
3. X’għen lil Ġesù juri kuraġġ tant kbir?
3 X’wassal lil Ġesù juri kuraġġ tant kbir? Il-fidi u l-biżaʼ minn Alla kellhom sehem importanti f’dan. (Ebrej 5:7; 12:2) Madankollu, iktar minn kwalunkwe ħaġa oħra, il-kuraġġ taʼ Ġesù ġie mill-imħabba li kellu kemm għal Alla u kemm għal sħabu l-bnedmin. (1 Ġwanni 3:16) Jekk nikkultivaw imħabba bħal din flimkien mal-fidi u l-biżaʼ minn Alla, aħna wkoll inkunu nistgħu nuru kuraġġ bħalma wera Kristu. (Efesin 5:2) Kif nistgħu niżviluppaw imħabba bħal din? Hemm bżonn li nirrikonoxxu s-Sors minfejn ġejja.
“L-Imħabba Hi minn Alla”
4. Għala nistgħu ngħidu li Ġeħova huwa s-Sors taʼ l-imħabba?
4 Ġeħova huwa kemm il-personifikazzjoni taʼ l-imħabba kif ukoll is-Sors tagħha. L-appostlu Ġwanni kiteb: “Maħbubin, ħa nkomplu nħobbu lil xulxin, għax l-imħabba hi minn Alla, u kulmin iħobb twieled minn Alla u jsir jaf dwar Alla. Min ma jħobbx ma sarx jaf lil Alla, għax Alla hu mħabba.” (1 Ġwanni 4:7, 8) Għalhekk, l-imħabba bħalma juriha Alla tistaʼ tiżviluppa f’individwu biss jekk hu jersaq qrib Ġeħova permezz taʼ l-għarfien eżatt u jaġixxi fuq dak l-għarfien b’ubbidjenza mill-qalb.—Filippin 1:9; Ġakbu 4:8; 1 Ġwanni 5:3.
5, 6. X’għen lis-segwaċi tal-bidu taʼ Ġesù jiżviluppaw imħabba bħal taʼ Kristu?
5 Fl-aħħar talba tiegħu mal-11-il appostlu leali li kellu, Ġesù wera li hemm konnessjoni bejn li tkun taf lil Alla u li l-imħabba tikber meta qal: “Għarrafthom ismek u nibqaʼ ngħarrfu, sabiex l-imħabba li biha ħabbejtni tkun fihom u jien inkun f’unjoni magħhom.” (Ġwanni 17:26) Ġesù għen lid-dixxipli tiegħu jiżviluppaw it-tip taʼ mħabba li teżisti bejnu u bejn Missieru, billi wera kemm bil-kliem u kemm bl-eżempju dak li isem Alla jirrappreżenta—il-kwalitajiet meraviljużi t’Alla. Għalhekk, Ġesù setaʼ jgħid: “Min ra lili ra wkoll lill-Missier.”—Ġwanni 14:9, 10; 17:8.
6 L-imħabba bħal taʼ Kristu hija prodott taʼ l-ispirtu qaddis t’Alla. (Galatin 5:22) Meta l-Kristjani tal-bidu rċivew l-ispirtu qaddis imwiegħed f’Pentekoste tas-sena 33 E.K., huma mhux biss ftakru l-ħafna affarijiet li Ġesù kien għallimhom imma wkoll fehmu sew it-tifsira taʼ l-Iskrittura. Milli jidher il-fatt li kellhom iktar dehen saħħaħ l-imħabba tagħhom għal Alla. (Ġwanni 14:26; 15:26) X’kien ir-riżultat? Anki meta ħajjithom kienet fil-periklu, huma ppridkaw l-aħbar tajba b’kuraġġ u żelu.—Atti 5:28, 29.
Il-Kuraġġ u l-Imħabba fl-Azzjoni
7. Pawlu u Barnaba x’kellhom jissaportu fil-vjaġġ missjunarju li għamlu flimkien?
7 L-appostlu Pawlu kiteb: “Alla ma taniex spirtu beżżiegħ, imma spirtu taʼ qawwa u taʼ mħabba u taʼ moħħ f’loku.” (2 Timotju 1:7) Pawlu kien qed jitkellem mill-esperjenza persunali. Ikkunsidra dak li hu u Barnaba għaddew minnu fuq il-vjaġġ missjunarju tagħhom flimkien. Huma ppridkaw f’numru taʼ bliet inkluż Antjokja, Ikonju, u Listra. F’kull belt, xi wħud saru jemmnu, imma oħrajn kienu jopponu b’mod ostili. (Atti 13:2, 14, 45, 50; 14:1, 5) F’Listra folla rrabjata saħansitra ħaġġret lil Pawlu, u kważi ħallietu mejjet! “Madankollu, meta daru miegħu d-dixxipli, qam u daħal il-belt. U l-għada telaq maʼ Barnaba lejn Derbe.”—Atti 14:6, 19, 20.
8. Il-kuraġġ li wrew Pawlu u Barnaba kif irrifletta l-imħabba profonda għan-nies?
8 L-attentat fuq ħajjet Pawlu beżżagħhom lilu u lil Barnaba biex ma jibqgħux jippridkaw? Għall-kuntrarju! Wara li “għamlu ftit dixxipli mhux ħażin” f’Derbe, iż-żewġt irġiel “reġgħu marru Listra u Ikonju u Antjokja.” Għala? Sabiex jinkuraġġixxu lil dawk li kienu ġodda biex jibqgħu sħaħ fil-fidi. “Jeħtieġ li fis-saltna t’Alla nidħlu permezz taʼ ħafna tribulazzjonijiet,” qalu Pawlu u Barnaba. Jidher ċar li l-kuraġġ ġie minn imħabba profonda għan-“nagħaġ ċkejknin” taʼ Kristu. (Atti 14:21-23; Ġwanni 21:15-17) Wara li ħatru anzjani f’kull kongregazzjoni ġdida, iż-żewġ aħwa offrew talba u “rħewhom f’idejn Ġeħova li kienu saru jemmnu fih.”
9. L-anzjani minn Efesu kif wieġbu għall-imħabba li Pawlu kellu għalihom?
9 Pawlu tant kien bniedem mimli mħabba u kuraġġ li ħafna mill-Kristjani tal-bidu saru jħobbuh ħafna. Ftakar x’kien ġara f’laqgħa li Pawlu kellu maʼ l-anzjani minn Efesu, fejn hu kien qattaʼ tliet snin u kien esperjenza ħafna oppożizzjoni. (Atti 20:17-31) Wara li inkuraġġiehom biex jirgħu l-merħla li Alla kien fdalhom, Pawlu niżel għarkopptejh magħhom u talab. Imbagħad, “ilkoll infexxew jibku u nxteħtu fuq għonq Pawlu u bisuh b’tenerezza, għax l-iktar li nikkithom kien il-kliem li qalilhom, li ma kinux se jaraw lil wiċċu iktar.” Kemm kienu jħobbuh dawn l-aħwa lil Pawlu! Tabilħaqq, meta wasal iż-żmien biex jitilqu, l-anzjani lokali ma kellhomx qalb jarawhom sejrin u Pawlu u sħabu li kienu jivvjaġġaw miegħu sabuha diffiċli ħafna biex jitilquhom.—Atti 20:36–21:1.
10. Ix-Xhieda taʼ Ġeħova taʼ llum kif urew imħabba kuraġġuża għal xulxin?
10 Illum, l-indokraturi li jivvjaġġaw, l-anzjani tal-kongregazzjoni, u ħafna oħrajn huma maħbubin ħafna minħabba l-kuraġġ li juru għan-nagħaġ taʼ Ġeħova. Per eżempju, f’pajjiżi mifnijin mill-gwerer ċivili jew fejn ix-xogħol taʼ l-ippridkar huwa ristrett, l-indokraturi li jivvjaġġaw u n-nisa tagħhom irriskjaw ħajjithom u l-libertà tagħhom biex iżuru lill-kongregazzjonijiet. Bl-istess mod, ħafna Xhieda sofrew taħt idejn ħakkiema ostili u dawk li jappoġġawhom minħabba li huma ma ttradewx lil sħabhom ix-Xhieda u lanqas kixfu minfejn kienu qed jirċievu l-ikel spiritwali. Eluf t’oħrajn kienu persegwitati, torturati, u saħansitra maqtulin minħabba li huma la waqfu jippridkaw l-aħbar tajba u lanqas waqfu jissieħbu maʼ sħabhom fit-twemmin fil-laqgħat Kristjani. (Atti 5:28, 29; Ebrej 10:24, 25) Jalla nimitaw il-fidi u l-imħabba t’aħwa kuraġġużi bħal dawn!—1 Tessalonikin 1:6.
Tħallix l-Imħabba Tiegħek Tibred
11. Satana b’liema modi jiġġieled kontra l-qaddejja taʼ Ġeħova, u x’jeħtieġ li jagħmlu?
11 Meta Satana ġie mitfugħ ’l isfel lejn l-art, hu kien determinat li jisfoga r-rabja tiegħu fuq il-qaddejja taʼ Ġeħova minħabba li “josservaw il-kmandamenti t’Alla u li għandhom ix-xogħol li jixhdu dwar Ġesù.” (Rivelazzjoni 12:9, 17) Waħda mit-tattiki li juża x-Xitan hi l-persekuzzjoni. Madankollu, spiss din l-istrateġija taħdem kontrih għax din iġġiegħel lill-poplu t’Alla jersaq eqreb lejn xulxin fir-rabtiet taʼ mħabba Kristjana u tqanqal lil ħafna biex juru iktar żelu. Tattika oħra li Satana juża hi li jappella għall-inklinazzjonijiet umani midinbin. Biex nirreżistu din l-istrateġija hemm bżonn tip ieħor taʼ kuraġġ għax il-ġlieda hija waħda minn ġewwa, kontra x-xewqat mhux xierqa li hemm fil-‘qalb qarrieqa’ tagħna.—Ġeremija 17:9; Ġakbu 1:14, 15.
12. Satana kif juża “l-ispirtu tad-dinja” fl-attentat tiegħu li jdgħajjef l-imħabba tagħna għal Alla?
12 Fl-armerija taʼ Satana hemm arma qawwija oħra—“l-ispirtu tad-dinja,” jiġifieri, l-inklinazzjoni jew il-motivazzjoni dominanti tagħha, li tmur direttament kontra l-ispirtu qaddis t’Alla. (1 Korintin 2:12) L-ispirtu tad-dinja jinkuraġġixxi r-regħba u l-materjaliżmu—“ix-xewqa taʼ l-għajnejn.” (1 Ġwanni 2:16; 1 Timotju 6:9, 10) Għalkemm l-affarijiet materjali u l-flus fihom infushom m’humiex taʼ ħsara, jekk l-imħabba għalihom tkun akbar mill-imħabba għal Alla, mela Satana jkun ħareġ rebbieħ. Il-qawwa, jew “l-awtorità,” taʼ l-ispirtu tad-dinja qiegħda fil-mod kif jappella għall-ġisem midneb, fil-mod kif jidħol fin fin, kif ma jieqaf qatt, u kif jinxtered bħall-arja maʼ kullimkien. Tħallix l-ispirtu tad-dinja jinfettalek qalbek!—Efesin 2:2, 3; Proverbji 4:23.
13. Il-kuraġġ biex inżommu l-indafa morali kif jistaʼ jiġi ttestjat?
13 Madankollu, sabiex nirreżistu u nwarrbu l-ispirtu mill-agħar tad-dinja hemm bżonn li jkollna kuraġġ biex inżommu l-indafa morali. Per eżempju, jeħtieġ kuraġġ biex tqum u titlaq mit-teatru jew titfi l-kompjuter jew it-televixin meta jkun hemm xi xena indeċenti. Jeħtieġ kuraġġ biex tirreżisti pressjoni negattiva minn dawk taʼ mparek u biex taqtaʼ minn sħubija ħażina. Bl-istess mod, jeħtieġ kuraġġ biex iżżomm mal-liġijiet u l-prinċipji t’Alla meta tkun qed tiġi ridikolat, kemm jekk minn sħabek taʼ l-iskola, kif ukoll minn sħabek taʼ fuq ix-xogħol, ġirien, jew qraba.—1 Korintin 15:33; 1 Ġwanni 5:19.
14. X’għandna nagħmlu jekk ġejna infettati mill-ispirtu tad-dinja?
14 Mela għalhekk, kemm huwa importanti li nsaħħu l-imħabba tagħna għal Alla u għal ħutna spiritwali! Ħu l-ħin biex teżamina l-miri tiegħek u ħajtek sabiex tara jekk l-ispirtu tad-dinja infettakx b’xi mod. Jekk iva—anki jekk ftit—itlob lil Ġeħova għall-kuraġġ biex tqaċċtu ’l barra darba għal dejjem. Ġeħova mhux se jinjora talb sinċier bħal dan. (Salm 51:19 [51:17, NW]) Iktar minn hekk, l-ispirtu tiegħu huwa bil-wisq iktar qawwi minn dak tad-dinja.—1 Ġwanni 4:4.
Niffaċċjaw il-Provi Persunali b’Kuraġġ
15, 16. L-imħabba bħal taʼ Kristu kif tgħinna nkampaw maʼ provi persunali? Agħti eżempju.
15 Sfidi oħra li l-qaddejja taʼ Ġeħova jridu jissieltu magħhom jinkludu l-effetti taʼ l-imperfezzjoni u xxjuħija, li ħafna drabi jirriżultaw f’mard, diżabilità, dipressjoni, u ħafna problemi oħrajn. (Rumani 8:22) L-imħabba bħal taʼ Kristu tistaʼ tgħinna nkampaw maʼ dawn il-provi. Ikkunsidra l-eżempju taʼ Namangolwa, li trabbiet ġo familja Kristjana fiz-Zambja. Namangolwa kellha diżabilità minn mindu kellha sentejn. “Kont konxja tiegħi nnifsi,” tgħid hi, “kont naħseb li l-apparenza tiegħi kienet se taħsad lin-nies. Imma ħuti spiritwali għenuni nara l-affarijiet b’mod differenti. B’riżultat taʼ dan, ma bqajtx konxja tiegħi nnifsi, u maż-żmien tgħammidt.”
16 Għalkemm Namangolwa għandha siġġu tar-roti, ħafna drabi jkollha timxi fuq idejha u rkopptejha meta tgħaddi minn toroq maħmuġin u kollhom ramel. Madankollu, hi tieħu sehem fil-ministeru bħala pijuniera awżiljarja minn taʼ l-inqas darbtejn f’sena. Waħda mill-inkwilini nfaqgħet tibki meta Namangolwa bdiet tagħtiha xiehda. Għala? Għax kienet verament imqanqla mill-fidi u l-kuraġġ t’oħtna. Ħamsa mill-istudenti tal-Bibbja taʼ Namangolwa tgħammdu, u wieħed jaqdi bħala anzjan fil-kongregazzjoni, u dan kollu huwa evidenza tal-barka taʼ Ġeħova. “Saqajja spiss tgħidx kemm juġgħuni,” tgħid hi, “imma dan ma nħallihx iwaqqafni.” Din l-oħt hija biss waħda mill-ħafna Xhieda madwar id-dinja li għandhom ġisem dgħajjef imma spirtu b’saħħtu minħabba l-imħabba li għandhom għal Alla u għal għajrhom. Kemm huma għeżież uħud bħal dawn f’għajnejn Ġeħova!—Ħaggaj 2:7.
17, 18. X’jgħin lil ħafna wħud jissaportu l-mard u provi oħra? Semmi xi eżempji lokali.
17 Il-mard kroniku jistaʼ jkun skuraġġanti, saħansitra dipressanti. “Fil-grupp fejn nattendi għall-istudju tal-ktieb,” jgħid wieħed anzjan tal-kongregazzjoni, “oħt tbati mid-dijabete u għandha kilwa waħda ma taħdimx, oħt oħra għandha kanċer, tnejn ibatu minn artrite qalila, u oħra għandha kemm marda fil-ġilda bil-ġrieħi kif ukoll fibromijalġija. Kultant iħossuhom skuraġġiti. Madankollu, l-uniċi drabi li jfallu l-laqgħat huwa meta jkunu verament morda jew għax ikunu l-isptar. Ilkoll jieħdu sehem fis-servizz taʼ l-għalqa b’mod regulari. Ifakkruni f’Pawlu li qal: ‘Meta nkun dgħajjef, inkun setgħan.’ Jien nammira l-imħabba u l-kuraġġ li għandhom. Forsi s-sitwazzjoni tagħhom tgħinhom jiffokaw iktar fuq il-ħajja u dak li verament huwa importanti.”—2 Korintin 12:10.
18 Jekk qed tikkumbatti xi nuqqas taʼ saħħa, mard, jew xi problema oħra, ‘itlob bla waqfien’ għall-għajnuna sabiex ma ssirx vittma taʼ l-iskuraġġiment. (1 Tessalonikin 5:14, 17) M’għandniex xi ngħidu, x’aktarx li se jkun hemm drabi meta se tħossok tajjeb emozzjonalment u drabi oħra le, imma pprova ffoka fuq affarijiet pożittivi u spiritwali, speċjalment fuq it-tama tas-Saltna prezzjuża li għandna. “Għalija, il-ministeru taʼ l-għalqa huwa terapija,” tgħid waħda oħt. Il-fatt li taqsam l-aħbar tajba m’oħrajn jgħinha żżomm attitudni pożittiva.
L-Imħabba Tgħin lil Dawk li Jagħmlu l-Ħażen Iduru Lejn Ġeħova
19, 20. (a) X’għandu mnejn jgħin lil dawk li waqgħu fid-dnub biex jerġgħu jagħmlu l-kuraġġ u jduru lejn Ġeħova? (b) X’se jiġi kunsidrat fl-artiklu li jmiss?
19 Ħafna li ddgħajfu spiritwalment jew li ġew megħlubin mid-dnub ma jsibuhiex faċli li jduru lura lejn Ġeħova. Imma l-kuraġġ meħtieġ jinstab jekk uħud bħal dawn jindmu sinċerament u jerġgħu jkebbsu l-imħabba tagħhom għal Alla. Ikkunsidra lil Mario,a li jgħix l-Istati Uniti. Mario telaq il-kongregazzjoni Kristjana, sar alkoħoliku u beda jabbuża mid-drogi u, wara 20 sena, spiċċa l-ħabs. “Bdejt naħseb serjament dwar il-futur tiegħi u rġajt bdejt naqra l-Bibbja,” jgħid Mario. “Maż-żmien bdejt napprezza l-kwalitajiet taʼ Ġeħova, speċjalment il-ħniena tiegħu, li għaliha kont nitlob spiss. Wara li ħriġt mill-ħabs, evitajt lil dawk li kont nissieħeb magħhom qabel, bdejt nattendi l-laqgħat Kristjani, u eventwalment ġejt aċċettat lura fil-kongregazzjoni. Jien qed naħsad il-konsegwenzi fiżiċi taʼ dak li żrajt, imma għallinqas issa għandi tama mill-aqwa. Ma nistax nirringrazzja lil Ġeħova biżżejjed għall-mogħdrija u l-maħfra tiegħu.”—Salm 103:9-13; 130:3, 4; Galatin 6:7, 8.
20 Ovvjament, dawk li qegħdin f’sitwazzjoni bħal dik taʼ Mario jridu jaħdmu iebes biex iduru lura lejn Ġeħova. Imma l-imħabba li jerġgħu jkebbsu—permezz taʼ studju tal-Bibbja, talb, u meditazzjoni—se tagħtihom il-kuraġġ u d-determinazzjoni li jkollhom bżonn. Mario ġie msaħħaħ ukoll permezz tat-tama tas-Saltna. Iva, flimkien maʼ l-imħabba, il-fidi, u l-biżaʼ minn Alla, it-tama tistaʼ tkun forza qawwija li tgħinna nagħmlu t-tajjeb f’ħajjitna. Fl-artiklu li jmiss, se nagħtu ħarsa iktar mill-qrib lejn dan ir-rigal spiritwali prezzjuż.
[Nota taʼ taħt]
a L-isem ġie mibdul.
Taf Twieġeb?
• L-imħabba kif għenet lil Ġesù juri kuraġġ li jispikka?
• L-imħabba għall-aħwa kif tat kuraġġ li jispikka lil Pawlu u Barnaba?
• Satana b’liema modi jipprova jherri l-imħabba Kristjana?
• L-imħabba għal Ġeħova tistaʼ tagħtina l-kuraġġ biex nissaportu liema provi?
[Stampa f’paġna 23]
L-imħabba li Pawlu kellu għan-nies tatu l-kuraġġ biex iżomm sħiħ
[Stampa f’paġna 24]
Jeħtieġ kuraġġ biex iżżomm mal-livelli t’Alla
[Stampa f’paġna 24]
Namangolwa Sututu