X’Se Tagħti Int Biex Tibqaʼ Ħaj?

“X’se jagħti bniedem flok ruħu?”—MT. 16:26.

1. Ġesù għala ċaħad iċ-​ċanfir taʼ Pietru?

L-​APPOSTLU PIETRU ma setax jemmen lil widnejh. Ġesù Kristu, il-​Mexxej maħbub tiegħu, kien qed jgħid “ċar u tond” li Hu kien dalwaqt se jsofri u jmut! Bi tweġiba, Pietru—bla dubju b’intenzjoni tajba—ċanfar lil Ġesù, u qallu: “Kun ħanin miegħek innifsek, Mulej; żgur li mhux se jiġrilek dan.” Ġesù ta dahru lil Pietru u ħares lejn id-​dixxipli l-​oħrajn. X’aktarx li huma wkoll kellhom din l-​opinjoni żbaljata. Imbagħad qal lil Pietru: “Itlaq minn quddiemi, Satana! Int tfixkil għalija, għax m’intix taħseb il-​ħsibijiet t’Alla imma tal-​bnedmin.”—Mk. 8:32, 33; Mt. 16:21-23.

2. Ġesù x’qal li kienu l-​ħtiġijiet taʼ dixxiplu veru?

² Il-​kliem li Ġesù qal wara setaʼ għen lil Pietru biex jara r-​raġuni għala Ġesù rreaġixxa b’daqshekk qawwa għaċ-​ċanfira tiegħu. Ġesù “sejjaħ lill-​folla lejh mad-​dixxipli tiegħu” u qal: “Jekk xi ħadd irid jiġi warajja, ħa jiċħad lilu nnifsu u jerfaʼ z-​zokk tat-​tortura tiegħu u jibqaʼ miexi warajja. Għax kulmin irid isalva ruħu jitlifha; imma kulmin jitlef ruħu minħabba fija u minħabba l-​aħbar tajba jsalvaha.” (Mk. 8:34, 35) Ġesù uża l-​kelma “ruħ” hawnhekk biex ifisser “ħajja.” Jidher ċar li hu ma kienx biss wasal biex jissagrifika ħajtu imma wkoll kien jistenna li s-​segwaċi tiegħu kellhom ikunu lesti li jissagrifikaw ħajjithom fis-​servizz t’Alla. Kieku kienu se jagħmlu hekk, kienu se jirċievu premju kbir.—Aqra Mattew 16:27.

3. (a) Ġesù liema mistoqsijiet staqsiehom lis-​semmiegħa tiegħu? (b) It-​tieni mistoqsija taʼ Ġesù dwar xiex setgħet fakkret lis-​semmiegħa tiegħu?

³ F’dik l-​istess okkażjoni, Ġesù staqsa żewġ mistoqsijiet li jqanqlu l-​ħsieb: “X’jiswielu bniedem jekk jikseb id-​dinja kollha u jitlef ruħu?” u, “Tassew, x’se jagħti bniedem flok ruħu?” (Mk. 8:36, 37) Ir-​risposta għall-​ewwel mistoqsija hi ovvja għall-​bnedmin. Ma jiswielu xejn bniedem li jikseb id-​dinja kollha jekk jitlef ħajtu, ruħu. Il-​ġid hu utli biss jekk wieħed ikun ħaj biex igawdih. It-​tieni mistoqsija taʼ Ġesù: “Tassew, x’se jagħti bniedem flok ruħu?” setgħet fakkret lis-​semmiegħa tiegħu fl-​akkuża taʼ Satana fi żmien Ġob: “Raġel jagħti kulma jkollu għal ruħu.” (Ġob 2:4) Dan il-​kliem taʼ Satana jistaʼ jgħodd għal xi wħud li ma jqimux lil Ġeħova. Ħafna jagħmlu kwalunkwe ħaġa u jabbandunaw kwalunkwe prinċipju sempliċement biex jibqgħu ħajjin. Iżda, il-​Kristjani jaraw l-​affarijiet b’mod differenti.

4. Il-​mistoqsijiet taʼ Ġesù għala għandhom tifsira iktar profonda għall-​Kristjani?

⁴ Aħna nafu li Ġesù ma ġiex fuq l-​art biex jagħtina saħħa, għana, u ħajja twila f’din id-​dinja. Hu ġie biex jiftħilna l-​opportunità li ngħixu għal dejjem fid-​dinja l-​ġdida, u huwa l-​prospett taʼ dik il-​ħajja li aħna napprezzaw l-​iktar. (Ġw. 3:16) Kristjan jifhem li l-​ewwel mistoqsija taʼ Ġesù tfisser, “X’jiswielu bniedem jekk jikseb id-​dinja kollha u jitlef it-​tama tiegħu taʼ ħajja taʼ dejjem?” Ir-​risposta hi, Ma jiswielu assolutament xejn. (1 Ġw. 2:15-17) Biex jgħinna nwieġbu t-​tieni mistoqsija taʼ Ġesù, nagħmlu tajjeb li nistaqsu lilna nfusna, ‘Kemm lest li nissagrifika issa biex it-​tama tiegħi taʼ ħajja fid-​dinja l-​ġdida nagħmilha ċerta?’ Ir-​risposta tagħna għal din il-​mistoqsija, kif tidher f’ħajjitna, tirrivela kemm hi b’saħħitha din it-​tama fi qlubna.—Qabbel Ġwanni 12:25.

5. Kif nistgħu nirċievu l-​għotja taʼ ħajja taʼ dejjem?

⁵ Naturalment, Ġesù ma kienx qed jgħid li l-​ħajja taʼ dejjem tistaʼ tinkiseb bis-​saħħa tagħna. Il-​ħajja—anki l-​ħajja relattivament qasira tagħna f’din is-​sistema—hi għotja. Ma nistgħux nixtruha jew nagħmlu xi ħaġa biex tkun tistħoqqilna. L-​uniku mod kif nistgħu nirċievu l-​għotja taʼ ħajja taʼ dejjem hu li ‘npoġġu l-​fidi tagħna fi Kristu Ġesù’ u f’Ġeħova, “li jippremja lil dawk li jfittxuh bil-​ħeġġa.” (Gal. 2:16; Ebr. 11:6) Minkejja dan, il-​fidi trid tintwera bl-​azzjonijiet, ladarba “fidi mingħajr l-​għemejjel hi mejta.” (Ġak. 2:26) Għaldaqstant, meta nimmeditaw iktar fuq il-​mistoqsija taʼ Ġesù, nagħmlu tajjeb li nikkunsidraw bis-​serjetà kemm lesti li nċedu affarijiet f’din is-​sistema u x’aħna lesti li nagħmlu fis-​servizz taʼ Ġeħova biex nuru li l-​fidi tagħna hi verament ħajja.

‘Kristu Ma Fittixx li Jogħġob Lilu Nnifsu’

6. X’kienet il-​prijorità taʼ Ġesù?

⁶ Minflok ma xeħet il-​ħarsa tiegħu fuq dak li kellha x’toffri d-​dinja taʼ żmienu, Ġesù ffoka fuq l-​affarijiet importanti u ċaħad it-​tentazzjoni li jikseb l-​affarijiet materjali biex ikollu ħajja komda. Ħajtu kienet waħda taʼ sagrifiċċju u ubbidjenza lejn Alla. Minflok ma jogħġob lilu nnifsu, hu qal: “Dejjem nagħmel dak li jogħġob [lil Alla].” (Ġw. 8:29) Ġesù x’kien lest li jagħmel sabiex jogħġob lil Alla?

7, 8. (a) Ġesù x’sagrifiċċju għamel, u kif ġie premjat? (b) Liema mistoqsija għandna nistaqsu lilna nfusna?

⁷ Darba minnhom, Ġesù qal lid-​dixxipli tiegħu: “Bin il-​bniedem ma ġiex biex ikun moqdi, imma biex jaqdi u jagħti ruħu b’fidwa għal ħafna.” (Mt. 20:28) Qabel, meta Ġesù beda jwissi lis-​segwaċi tiegħu li dalwaqt kien se jkollu “jagħti ruħu,” Pietru ħeġġu biex ikun ħanin miegħu nnifsu. Xorta waħda, Ġesù baqaʼ sod. Hu, minn rajh, ta ruħu, il-​ħajja umana u perfetta tiegħu, għall-​umanità. Minħabba l-​ħajja mhix egoistika tiegħu, il-​futur taʼ Ġesù kien fis-​sigurtà. Hu ġie rxoxtat u “tgħolla għal fuq il-​lemin t’Alla.” (Atti 2:32, 33) B’hekk, hu sar eżempju meraviljuż għalina.

⁸ L-​appostlu Pawlu ta parir lill-​Kristjani f’Ruma biex ‘ma jogħġbux lilhom infushom’ u fakkarhom li “lanqas il-​Kristu ma fittex li jogħġob lilu nnifsu.” (Rum. 15:1-3) Mela, sa liema punt se napplikaw dan il-​parir appostoliku u nagħtu minna nfusna biex nimitaw lil Kristu?

Ġeħova Jixtieq li Nagħtu l-​Aqwa Tagħna

9. Kristjan x’jagħmel attwalment meta jiddedika ruħu lil Alla?

⁹ F’Israel tal-​qedem, skond il-​Liġi Mosajka l-​ilsiera Ebrej kellhom jinħelsu jew fis-​sebaʼ sena tal-​jasar jew inkella matul is-​sena tal-​Ġublew. Madankollu, kellhom għażla oħra. Jekk ilsir kien isir iħobb lil sidu, hu setaʼ jagħżel li jibqaʼ lsir fid-​dar għall-​bqija taʼ ħajtu. (Aqra Dewteronomju 15:12, 16, 17.) Aħna nagħmlu għażla simili meta niddedikaw ruħna lil Alla. Minn jeddna naqblu li nagħmlu r-​rieda t’Alla, minflok ma nsegwu l-​inklinazzjonijiet tagħna stess. Meta nagħmlu hekk nuru l-​imħabba profonda tagħna lejn Ġeħova u x-​xewqa tagħna li naqduh għal dejjem.

10. B’liema mod aħna l-​proprjetà t’Alla, u dan il-​fatt kif għandu jeffettwa l-​ħsibijiet u l-​azzjonijiet tagħna?

¹⁰ Jekk bħalissa qed tistudja l-​Bibbja max-​Xhieda taʼ Ġeħova, qed tieħu sehem fl-​ippridkar taʼ l-​aħbar tajba, u qed tattendi l-​laqgħat Kristjani, ħaqqek prosit. Aħna nittamaw li dalwaqt se tħossok imqanqal biex tiddedika ruħek lil Ġeħova u tistaqsi l-​mistoqsija li l-​Etjopjan staqsa lil Filippu: “X’qed iżommni milli nitgħammed?” (Atti 8:35, 36) Imbagħad ir-​relazzjoni tiegħek m’Alla se tkun bħal taʼ dawk il-​Kristjani li lilhom Pawlu kiteb: “M’intomx tagħkom infuskom, għax kontu mixtrijin bi prezz.” (1 Kor. 6:19, 20) Kemm jekk it-​tama tagħna hi għas-​sema u kemm jekk hi għall-​art, jekk iddedikajna ruħna lil Ġeħova, hu s-​Sid tagħna. Għalhekk, kemm hu importanti li rrażżnu x-​xewqat egoistiċi u ma ‘nibqgħux insiru lsiera tal-​bnedmin’! (1 Kor. 7:23) Xi privileġġ hu li tkun qaddej leali biex Ġeħova jużak kif jogħġbu!

11. Il-​Kristjani x’sagrifiċċju huma mħeġġin biex joffru, u dan xi jfisser tassew, kif muri mis-​sagrifiċċji taħt il-​Liġi Mosajka?

¹¹ Pawlu wissa lil sħabu fit-​twemmin: ‘Ippreżentaw ġisimkom bħala sagrifiċċju ħaj, qaddis, aċċettabbli għal Alla, jiġifieri, servizz sagru bil-​qawwa tar-​raġuni tagħkom.’ (Rum. 12:1) Dan il-​kliem għandu mnejn fakkar lill-​Kristjani Lhud dwar is-​sagrifiċċji li kienu karatteristika tal-​qima tagħhom qabel ma saru segwaċi taʼ Ġesù. Huma kienu jafu li taħt il-​Liġi Mosajka, l-​annimali offruti fuq l-​artal taʼ Ġeħova riedu jkunu l-​aqwa li kellhom. Kwalunkwe ħaġa inferjuri ma kinitx aċċettabbli. (Mal. 1:8, 13) L-​istess hu minnu meta nippreżentaw l-​iġsma tagħna bħala “sagrifiċċju ħaj.” Lil Ġeħova nagħtuh l-​aqwa tagħna, mhux sempliċement dak li jifdal wara li nkunu ssodisfajna x-​xewqat persunali kollha tagħna. Meta niddedikaw ruħna lil Alla, nagħtuh ‘ruħna,’ ħajjitna bla riserva—inkluż is-​saħħa, il-​ġid materjali, u l-​abbiltajiet tagħna. (Kol. 3:23) Xi jfisser dan b’mod prattiku?

Uża Ħinek bil-​Għaqal

12, 13. X’inhu mod wieħed kif nistgħu nagħtu l-​aqwa tagħna lil Ġeħova?

¹² Mod wieħed kif nagħtu lil Ġeħova l-​aqwa tagħna hu billi nużaw il-​ħin tagħna bil-​għaqal. (Aqra Efesin 5:15, 16.) Dan jirrikjedi r-​rażna. L-​influwenzi mid-​dinja flimkien maʼ l-​imperfezzjoni li writna għandhom it-​tendenza li jġegħluna nużaw il-​ħin purament għat-​tgawdija tagħna stess jew għall-​benefiċċju persunali. Veru, “għal kollox hemm żmien stabbilit,” li jinkludi r-​rilassament pjaċevoli u l-​impjieg sekulari biex inkunu nistgħu nwettqu l-​obbligi Kristjani tagħna. (Ekk. 3:1) Madankollu, Kristjan dedikat jeħtieġ li jibqaʼ bilanċjat u juża l-​ħin tiegħu bil-​għaqal.

¹³ Meta Pawlu żar Ateni, hu nnota li “n-​nies kollha t’Ateni u l-​barranin li kienu jżuruha f’xejn ma kienu jqattgħu l-​ħin liberu tagħhom għajr li jgħidu jew jisimgħu xi ħaġa ġdida.” (Atti 17:21) Illum, ħafna bl-​istess mod jaħlu l-​ħin tagħhom. Distrazzjonijiet moderni jinkludu li wieħed jara t-​televixin, jilgħab logħob tal-​kompjuter, u jfittex fuq l-​Internet. Iktar u iktar distrazzjonijiet jikkompetu dejjem iżjed għall-​ħin tagħna. Jekk inċedu għalihom, nistgħu nittraskuraw il-​ħtiġijiet spiritwali tagħna. Għandu mnejn saħansitra nibdew nemmnu li għandna wisq x’nagħmlu biex nieħdu ħsieb “dak li hu iktar importanti”—kwistjonijiet relatati maʼ li naqdu lil Ġeħova.—Flp. 1:9, 10.

14. Liema mistoqsijiet jixraq li nikkunsidrawhom bis-​serjetà?

¹⁴ Għalhekk, bħala qaddej dedikat taʼ Ġeħova, staqsi lilek innifsek, ‘Tinkludi l-​iskeda taʼ kuljum tiegħi ħin għall-​qari tal-​Bibbja, il-​meditazzjoni, u t-​talb?’ (Salm 77:12; 119:97; 1 Tess. 5:17) ‘Inwarrab ħin biex nipprepara għal-​laqgħat Kristjani? Ninkuraġġixxi lil oħrajn billi nikkummenta fil-​laqgħat?’ (Salm 122:1; Ebr. 2:12) Il-​Kelma t’Alla tistqarr li Pawlu u sħabu qattgħu “ħafna ħin jitkellmu bil-​qlubija permezz taʼ l-​awtorità li tahom Ġeħova.” (Atti 14:3) Tistaʼ int taġġusta ċ-​ċirkustanzi tiegħek sabiex tqattaʼ iktar ħin, saħansitra “ħafna ħin,” fix-​xogħol taʼ l-​ippridkar, forsi billi taqdi bħala pijunier?—Aqra Ebrej 13:15.

15. L-​anzjani kif jużaw il-​ħin tagħhom bl-​għaqal?

¹⁵ Meta l-​appostlu Pawlu u rġiel leali oħrajn żaru l-​kongregazzjoni Kristjana f’Antjokja, “għamlu ftit taż-​żmien mhux ħażin mad-​dixxipli” sabiex jinkuraġġuhom. (Atti 14:28) Illum, anzjani kollhom imħabba bl-​istess mod jużaw ħafna mill-​ħin tagħhom biex isaħħu lil oħrajn. Minbarra l-​ministeru tagħhom taʼ l-​għalqa, l-​anzjani jaħdmu iebes biex jirgħu l-​merħla, ifittxu n-​nagħaġ mitlufin, jgħinu lill-​morda, u jieħdu ħsieb ħafna responsabbiltajiet oħrajn ġewwa l-​kongregazzjoni. Jekk int ħu mgħammed, jippermettulek iċ-​ċirkustanzi tiegħek biex tirsisti għal iktar minn dawn il-​privileġġi taʼ servizz?

16. X’inhuma xi modi kif nistgħu “nagħmlu t-​tajjeb maʼ . . . min jiġi minna fil-​fidi”?

¹⁶ Ħafna sabu l-​ferħ f’li jgħinu biex jipprovdu serħan lil dawk li batew xi telf minħabba diżastri naturali jew dawk magħmulin mill-​bniedem. Per eżempju, waħda oħt li għandha madwar 65 sena u li taqdi f’Betel ivvjaġġat distanzi twal f’diversi okkażjonijiet biex tagħti l-​għajnuna bħala volontiera. Għala użat il-​leave tagħha b’dan il-​mod? Hi tgħid: “Għalkemm m’għandix xi sengħa speċjali, kien privileġġ li nagħmel kulma kien hemm bżonn. Ksibt ħafna inkuraġġiment meta rajt il-​fidi qawwija taʼ ħuti rġiel u nisa li kienu sofrew telf materjali kbir.” Barra minn hekk, eluf madwar id-​dinja jgħinu fil-​bini taʼ Swali tas-​Saltna u Swali taʼ l-​Assembleat. Billi jkollna sehem f’dawn l-​attivitajiet, bla egoiżmu “nagħmlu t-​tajjeb maʼ . . . min jiġi minna fil-​fidi.”—Gal. 6:10.

“Jien Magħkom il-​Jiem Kollha”

17. X’se tagħti int personalment biex tikseb il-​ħajja taʼ dejjem?

¹⁷ Is-​soċjetà umana mbiegħda minn Alla dalwaqt se tgħaddi. Ma nafux eżatt meta se jseħħ dan. Xorta waħda, żgur li nafu li “ż-​żmien li fadal tqassar” u “x-​xena taʼ din id-​dinja qed tinbidel.” (Aqra l-​1 Korintin 7:29-31.) Dan jagħti iktar tifsir lill-​mistoqsija taʼ Ġesù: “Tassew, x’se jagħti bniedem flok ruħu?” Aħna żgur li se nagħmlu kwalunkwe sagrifiċċju li jitlobna nagħmlu Ġeħova sabiex niksbu l-​“ħajja vera.” (1 Tim. 6:19) Tabilħaqq, hu imperattiv li nagħtu kas it-​twissija taʼ Ġesù biex ‘nibqgħu mexjin warajh’ u biex ‘infittxu l-​ewwel is-​saltna.’—Mt. 6:31-33; 24:13.

18. Liema fiduċja jistaʼ jkollna, u għala?

¹⁸ M’għandniex xi ngħidu, li ssegwi lil Ġesù m’huwiex dejjem faċli, u fi qbil mat-​twissija taʼ Ġesù, lil xi wħud switilhom ħajjithom f’din is-​sistema dinjija. Minkejja dan, bħal Ġesù, aħna nevitaw it-​tentazzjoni biex nuru ‘ħniena magħna nfusna.’ Għandna l-​fidi fl-​assiguranza li hu ta lis-​segwaċi midlukin tiegħu taʼ l-​ewwel seklu: “Jien magħkom il-​jiem kollha sal-​konklużjoni tas-​sistema.” (Mt. 28:20) Għalhekk, ejja nużaw kemm jistaʼ jkun possibbli l-​ħin u l-​abbiltajiet tagħna fis-​servizz sagru. Hekk kif nagħmlu dan, aħna nkunu qed nuru l-​fiduċja tagħna li Ġeħova se jħallina ħajjin biex ngħaddu mit-​tribulazzjoni l-​kbira jew inkella jerġaʼ jagħtina l-​ħajja fid-​dinja l-​ġdida. (Ebr. 6:10) B’hekk, inkunu wrejna kemm napprezzaw bil-​kbir l-​għotja tal-​ħajja.

Int Kif Twieġeb?

• Ġesù kif wera b’mod taʼ l-​għaġeb li kien lest li jaqdi lil Alla u lill-​bniedem?

• Wieħed għala għandu jiċħad lilu nnifsu, u dan kif isir?

• F’Israel tal-​qedem, liema kien l-​uniku tip taʼ sagrifiċċju li kien aċċettat minn Ġeħova, u llum dan kif jiggwidana?

• B’liema modi nistgħu aħna nużaw il-​ħin tagħna b’mod għaqli?

[Stampi f’paġna 26]

Ġesù dejjem għamel dak li kien jogħġob lil Alla

[Stampa f’paġna 28]

L-​Israelin li kienu japprezzaw taw l-​aqwa tagħhom biex jappoġġaw il-​qima vera

[Stampi f’paġna 29]

Aħna nogħġbu lil Alla billi nużaw il-​ħin tagħna b’mod għaqli