Meta tħoss li qtajt qalbek mill-ħajja
ĠIELI ħassejtek daqshekk ħażin li ma xtaqtx tibqaʼ tgħix iktar? Mela forsi tifhem kif ħassitha Adriana. Hi batiet minn anzjetà qawwija u kienet tħossha mdejqa u bla tama. Adriana saret taf li kellha dipressjoni klinika.
Ikkunsidra wkoll kif ħassu raġel Ġappuniż jismu Kaoru, li kien jieħu ħsieb lill-ġenituri morda tiegħu li kienu kbar fl-età. “Dak iż-żmien kelli wkoll wisq pressjoni fuq ix-xogħol biex inkampa miegħu,” jispjega hu. “Maż-żmien tlift l-aptit, u ma bqajtx norqod sew. Bdejt naħseb kemm nistrieħ li kieku mmut.”
Raġel Niġerjan jismu Ojebode jgħid, “Kont inkun dejjem imdejjaq sal-punt li nibki, allura bdejt nipprova nara kif se noqtol lili nnifsi.” Fortunatament, Ojebode, Kaoru, u Adriana ma għamlux suwiċidju. Imma kull sena mijiet taʼ eluf hekk jagħmlu.
FEJN TISTAʼ SSIB L-GĦAJNUNA
Il-maġġoranza tan-nies li jikkommettu suwiċidju huma rġiel, li ħafna minnhom iħossuhom imbarazzati jitolbu l-għajnuna. Ġesù qal li n-nies morda għandhom bżonn tabib. (Luqa 5:31) Mela jekk int tħossok b’dan il-mod, jekk jogħġbok tiddejjaqx tfittex l-għajnuna. Ħafna li jbatu minn dipressjoni sabu li trattament mediku għenhom ikampaw. Kemm Ojebode, Kaoru, u kif ukoll Adriana rċivew għajnuna professjonali u issa qed ikampaw ħafna aħjar.
It-tobba jistgħu jużaw mediċina jew terapija jew it-tnejn li huma biex jikkuraw id-dipressjoni. Dawk li jbatu minnha għandhom bżonn li l-familja u l-ħbieb tagħhom jipprovaw jifhmuhom, juru paċenzja, jieħdu ħsiebhom, u jappoġġjawhom. L-aqwa ħabib li xi ħadd jistaʼ jkollu hu Alla Ġeħova, li jipprovdi għajnuna kbira fil-Kelma tiegħu, il-Bibbja.
HEMM SOLUZZJONI DEJJIEMA?
Vittmi taʼ dipressjoni ħafna drabi jkollhom bżonn trattament twil u jridu jitgħallmu jkampaw billi jagħmlu aġġustamenti fil-mod kif jgħixu. Imma jekk int għandek id-dipressjoni, tistaʼ tħares ’il quddiem għal futur sabiħ, bħal Ojebode. Hu jgħid: “Inħares ’il quddiem biex nara t-twettiq taʼ Isaija 33:24, li jbassar żmien fejn ħadd fuq l-art ma jgħid, ‘Jien marid.’” Bħal Ojebode, ikseb faraġ mill-wegħda t’Alla taʼ “art ġdida,” fejn mhux se jkun hemm iktar “uġigħ.” (Rivelazzjoni 21:1, 4) Din il-wegħda tfisser li mhux se jkun hemm iktar uġigħ mentali u emozzjonali. L-emozzjonijiet taʼ wġigħ li tħoss se jitilqu darba għal dejjem. L-uġigħ emozzjonali qatt iktar mhu se tibqaʼ ‘tiftakru, u lanqas iweġġaʼ l-qalb.’—Isaija 65:17.