L-Imħabba Tqanqalna Nippridkaw
1 Bħala Xhieda taʼ Jehovah, aħna l-iktar magħrufin bħala xandara żelużi tal-messaġġ tas-Saltna. (Mt. 24:14) Iktar minn sitt miljuni huma attivi madwar id-dinja, u wħud ġodda jiżdiedu man-numru meta jingħaqdu magħna biex jippridkaw. Il-figuri huma kalkulati fuq kemm xandara jieħdu sehem f’dan ix-xogħol.
2 X’iqanqalna biex nieħdu sehem b’mod volontarju f’dan l-inkarigu taʼ sfida? Aħna m’aħniex imġagħlin, lanqas imħajrin b’xi qligħ materjali, jew mogħtijin xi ġieħ speċjali. Għall-ewwel, ħafna minna konna nibżgħu minħabba li ħassejna li ma konniex kwalifikati biżżejjed, u n-nies taʼ spiss kienu jirreaġixxu b’mod negattiv. (Mt. 24:9) Ħafna minn dawk li jarawna ma jifhmux x’inhu li jqanqalna nagħmlu dan ix-xogħol. Irid ikun hemm raġuni li tħeġġiġna u li biha ma naqtgħux qalbna.
3 Il-Qawwa taʼ l-Imħabba: Ġesù wera liema hu l-akbar kmandament meta qal li ‘għandna nħobbu lill-Mulej b’qalbna, b’ruħna, b’moħħna u bil-qawwa tagħna kollha.’ (Mk. 12:30) L-imħabba tagħna lejn Jehovah ġejja minn sentimenti profondi t’apprezzament għal dak kollu li hu—il-Ħakkiem Sovran, il-Ħallieq taʼ kollox, li ‘jistħoqqlu li jilqaʼ l-glorja u l-ġieħ u s-setgħa.’ (Apk. 4:11) Il-kwalitajiet taʼ l-għaġeb tiegħu ma jistgħu jitqabblu maʼ xejn.—Eżo. 34:6, 7.
4 L-għarfien li għandna dwar Jehovah u l-imħabba tagħna lejh iqanqluna biex inħallu d-dawl tagħna jiddi quddiem il-bnedmin. (Mt. 5:16) Id-dawl tagħna jiddi meta aħna nfaħħruh, nitkellmu dwar l-affarijiet meraviljużi li għamel, u nxerrdu l-messaġġ dwar is-Saltna tiegħu fil-pubbliku. Preċiż bħall-anġlu fl-għoli tas-sema, aħna għandna ‘Evanġelju taʼ dejjem ħalli nxandru lil kull ġens, tribù, lsien u poplu.’ (Apk. 14:6) L-imħabba hija l-qawwa li ġġagħalna nxandru madwar id-dinja.
5 Id-dinja tara x-xandir tagħna bħala “bluha” u li għandu jiġi injorat. (1 Kor. 1:18) Saru ħafna sforzi biex jitwaqqaf xogħolna. L-imħabba leali tagħna saħħitna biex b’kuraġġ niddikjaraw: “Ma nistgħux ma nitkellmux fuq dak li rajna u smajna. . . . Jeħtieġ nobdu aktar lil Alla milli l-bnedmin.” (Atti 4:20; 5:29) Ix-xogħol tax-xandir ikompli jinfirex fi kwalunkwe parti tad-dinja minkejja l-oppożizzjoni.
6 L-imħabba tagħna għal Jehovah hija bħal nar jaqbad li jħeġġiġna biex inxandru t-tifħir tiegħu. (Ġer. 20:9; 1 Pt. 2:9) Aħna se nkomplu ‘ngħarrfu lill-ġnus bl-għemejjel tiegħu . . . għax għamel ħwejjeġ kbar’!—Is. 12:4, 5.