‘Agħti Ruħek Kollha Kemm Hi’ għall-​Ministeru Tiegħek

¹ Meta naqraw li l-​appostlu Pawlu kien jagħmel it-​tined waqt li kien f’Korintu, nistgħu nikkonkludu li dan setaʼ għamillu limitu fl-​opportunità tiegħu biex ixandar. Madankollu, Atti 18:5 jgħidilna: “Pawlu ta ruħu kollu kemm hu għax-​xandir tal-​kelma, u kien jixhed lil-​Lhud li Ġesù huwa l-​Messija.” (Korsiv tagħna.) Pawlu għala kien imħabbat daqshekk fl-​attività taʼ l-​ippridkar? Avolja ħafna f’Korintu kienu diġà emmnu, il-​Mulej ikkonferma li kien għad baqaʼ ħafna iktar min isir dixxiplu f’dik il-​belt. (Atti 18:​8-​11) Għandna aħna raġuni bħal din biex nagħtu ruħna kollha kemm hi għall-​ministeru tagħna? Iva. Ħafna iktar nies għadhom jistgħu jinstabu u jiġu mgħallma l-​verità.

² Qattaʼ Iktar Ħin fis-​Servizz Matul April: Probabbilment hija l-​mira tiegħek li żżomm ruħek bieżel biex tippriedka l-​aħbar tajba kull xahar. Iżda ċerti xhur jagħtuna opportunitajiet iktar minn oħrajn sabiex ‘nagħtu ruħna kollha kemm hi’ għal din l-​attività. Dawn jinkludu x-​xahar t’April, meta l-​istaġun tal-​Mafkar ikun fl-​aqwa tiegħu. Iċ-​ċirkustanzi tiegħek ħallewk taqdi bħala pijunier awżiljarju jew iżżid l-​isforzi tiegħek fil-​ministeru din ir-​rebbiegħa? Ħafna pubblikaturi li qed jagħmlu dan tbierku bil-​kbir. (2 Kor. 9:6) Jekk int qed tagħmel dak kollu li tistaʼ, ftakar li Jehovah qed jieħu gost bis-​servizz li qed tagħtih b’ruħek kollha. (Lq. 21:2-4) Huma x’inhuma ċ-​ċirkustanzi tiegħek, agħmilha mira li ‘tagħti ruħek kollha kemm hi’ għall-​ministeru tiegħek matul April. U tinsiex tagħti r-​rapport tiegħek tas-​servizz taʼ l-​għalqa fl-​aħħar tax-​xahar sabiex b’hekk l-​isforzi tiegħek jingħaddu maʼ dawk tal-​bqija tal-​poplu taʼ Jehovah.

³ Żur lil Uħud Ġodda li Attendew għall-​Mafkar: Is-​sena l-​oħra f’Malta, l-​attendenza għall-​Mafkar kienet taʼ 947. It-​total taʼ l-​attendenza għal din is-​sena għad irridu nsiru nafuh. Madankollu, ir-​rapporti juru li hemm potenzjal eċċellenti għal “ħsad” akbar. (Mt. 9:​37, 38) Għalhekk, malajr kemm jistaʼ jkun, irranġa biex iżżur lil dawk interessati li attendew għall-​Mafkar sabiex tgħinhom spiritwalment. Jekk tħalli dawn iż-​żjajjar għal iktar tard jistaʼ jiġri li ‘jersaq il-​ħażin u jisirqilhom il-​kelma tas-​Saltna li nżergħet f’qalbhom.’ (Mt. 13:19) Żjara fil-​pront se turi li int verament qed ‘tagħti ruħek kollha kemm hi’ għall-​ministeru tiegħek.

⁴ Kompli Għin lil Dawk Inattivi: Fi Frar beda jsir sforz speċjali biex jiġu megħjuna dawk li huma inattivi. Jekk hemm xi wħud li għad ma saritilhomx żjara pastorali, l-​anzjani għandhom ikunu ċerti li jżuruhom ħafna qabel ma jispiċċa April. L-​anzjani se jagħmlu ħilithom kollha biex jagħrfu x’inhu l-​għerq tal-​problema taʼ l-​individwu u kif jistgħu jagħtuh l-​aħjar għajnuna biex jerġaʼ jibda jaqdi lil Jehovah b’mod attiv. Din l-​għajnuna mimlija mħabba turi li l-​anzjani jieħdu r-​responsabbiltà tagħhom bis-​serjetà bħala rgħajja tal-​“merħla taʼ Alla.” (1 Pt. 5:2; Atti 20:28) Il-​ħarġa tal-​15 taʼ Settembru, 1993, taʼ The Watchtower, f’paġni 22-3, tipprovdi suġġerimenti eċċellenti li jistgħu jintużaw mill-​anzjani meta jkunu qed jikkunsidraw xi waħda mill-​ħames problemi normali li tistaʼ tkun qed teffettwa lil uħud inattivi. L-​iktar ħaġa mixtieqa hi li xi wħud jerġgħu jsiru attivi fil-​ministeru taʼ l-​għalqa matul April.

⁵ Għin lil Iktar Uħud biex Isiru Pubblikaturi Mhux Mgħammdin: It-​tfal tiegħek ikkwalifikaw biex isiru pubblikaturi ġodda taʼ l-​aħbar tajba? Xi ngħidu għal oħrajn li qed tistudja l-​Bibbja magħhom? Jekk uħud bħal dawn huma approvati mill-​anzjani, ma jkunx April żmien eċċellenti għalihom biex isiru pubblikaturi? Jekk xi ħadd qed jagħmel progress u studja l-​browxer X’Jirrikjedi u l-​ktieb Għarfien, l-​istudju tal-​Bibbja jistaʼ jitkompla bil-​ktieb Magħqudin fil-​Qima. Il-​mira tiegħek hi li tgħin lill-​istudent jikseb għarfien akbar tal-​verità, jikkwalifika bħala pubblikatur mhux mgħammed, u jsir Xhud dedikat u mgħammed taʼ Jehovah.​—Efes. 3:​17-​19; 1 Tim. 1:​12; 1 Pt. 3:​21.

⁶ L-​interess konsistenti u ġenwin li turi fl-​istudenti tal-​Bibbja tiegħek jistaʼ jgħinhom biex maż-​żmien il-​verità jagħmluha tagħhom stess. Xhud wieħed iltaqaʼ maʼ koppja anzjana li minn qalbhom aċċettaw li jibdew jieħdu studju tal-​Bibbja. Iżda l-​koppja ħassru l-​istudju darba wara l-​oħra għal tliet ġimgħat wara xulxin. Maż-​żmien l-​istudju nbeda. Imbagħad il-​koppja bdiet kważi dejjem tħassar l-​istudju ġimgħa iva u ġimgħa le. Sa fl-​aħħar, però, il-​mara għamlet progress u waslet sal-​magħmudija. “Wara li tgħammdet,” jiftakar il-​ħu, “għajnejha kienu mimlijin bid-​dmugħ daqs kemm kienet ferħana, u dan wassal lili u lil marti biex nibku bil-​ferħ aħna wkoll.” Iva, li tkun qed ‘tagħti ruħek kollha kemm hi’ għall-​aħbar tajba jġib ferħ kbir ferm!

⁷ Il-​profezija tal-​Bibbja u l-​affarijiet li qed jiġru madwar id-​dinja juruna li qegħdin ngħixu fl-​aħħarnett taż-​żmien tat-​tmiem. Issa huwa ż-​żmien li l-​poplu kollu t’Alla jrid ‘jagħti ruħu kollha kemm hi’ biex jaqsam l-​aħbar tajba maʼ ħaddieħor. L-​appostlu Pawlu jiżgurana li din il-​ħidma “fil-​Mulej m’hijiex għalxejn.”​—1 Kor. 15:58.