L-​Imħabba​—Iċ-​Ċavetta għal Ministeru Produttiv

¹ “Ejjew għandi, . . . u jien inserraħkom.” (Mt. 11:28) Dan il-​kliem mimli ħlewwa rrifletta l-​imħabba profonda taʼ Ġesù għan-​nies. Bħala ministri Kristjani, aħna nixtiequ nimitaw lil Ġesù f’li nuru mħabbitna għan-​nies li huma mifnijin minn din id-​dinja mingħajr imħabba. Kif nistgħu nagħmlu dan hekk kif naqsmu l-​aħbar tajba?

² Bil-​Kliem: L-​imħabba għan-​nies qanqlet lil Ġesù biex jieħu vantaġġ minn kull opportunità biex jaqsam l-​aħbar tajba. (Ġw. 4:​7-​14) L-​imħabba se tgħinna ma nżommux lura milli nagħtu xiehda informali. Tifla taʼ sitt snin tat xiehda mill-​aqwa lil waħda mara li kienet bil-​qiegħda ħdejha huma u jistennew biex jidħlu għand it-​tabib. X’ġagħalha tagħmel dan? Hi spjegat, “Il-​mara donnha kellha bżonn tkun taf dwar Ġeħova.”

³ Aħna nistgħu nuru l-​interess tagħna fin-​nies billi jkollna tbissima dħulija u sinċiera u nkunu ħelwin fit-​ton taʼ leħinna. Ukoll, nistgħu nuru mħabbitna billi nagħtu widen bir-​reqqa għall-​kummenti t’oħrajn, nirrikonoxxu dak li tassew jinteressahom, u nuru interess persunali ġenwin. (Prov. 15:23) Billi nimitaw lil Ġesù, għandna nenfasizzaw il-​messaġġ inkuraġġanti tas-​Saltna u l-​mogħdrija kollha mħabba taʼ Ġeħova lejn in-​nies.​—Mt. 24:14; Lq. 4:​18.

⁴ Bl-​Għemejjel: Ġesù kien jaġixxi minnufih għall-​bżonnijiet t’oħrajn b’modi prattiċi u fiżiċi. (Mt. 15:32) Aħna wkoll jistaʼ jkollna opportunitajiet biex nuru qalb tajba bl-​imħabba fil-​ministeru. Waħda oħt osservat mara li kienet qed tipprova tifhem telefonata importanti. Oħtna offriet li tgħinha billi tittraduċilha x’kienet qed tgħidilha l-​persuna fuq it-​telefon. Dan il-​ġest kollu mħabba fetaħ it-​triq għal diskussjoni Skritturali li wasslet biex il-​mara taċċetta studju tal-​Bibbja. F’każ ieħor, wieħed ħu waqt li kien qed jagħmel żjara lura sab lill-​inkwilin irrabjat, għax kien qed jipprova jdaħħal sufan tqil fl-​intrata imma kien weħel fil-​bieb. Wara li għenu jdaħħlu, il-​ħu poġġa bil-​qiegħda fuq l-​istess sufan u beda studju tal-​Bibbja mar-​raġel li apprezza l-​għajnuna tiegħu.

⁵ Hekk kif nieħdu sehem fil-​ministeru, aħna nuru mħabbitna għal Alla u għall-​proxxmu. (Mt. 22:​36-40) Meta nuru dan bil-​kliem u bl-​għemejjel ngħinu lil uħud taʼ qalb onesta jirrealizzaw li għandna l-​verità.