Kun Preparat Sew għat-Tifkira
Kemm hu taʼ ferħ u privileġġ għas-segwaċi taʼ Ġesù li jippreparaw sew għal-lejla meta nfakkru l-mewt taʼ Ġesù Kristu! (Lq. 22:19) Liema affarijiet prattiċi għandna nagħmlu biex nippreparaw għat-Tifkira?
◼ Il-Ħin u l-Post: Kulħadd għandu jifhem ċar il-ħin u l-post eżatt fejn se ssir it-Tifkira. Jekk iktar minn kongregazzjoni waħda tkun se tuża tiltaqaʼ fis-Sala tas-Saltna, huwa importanti li naslu fil-ħin u nitilqu bl-ordni, ladarba l-ħin bejn laqgħa u oħra huwa limitat. Huwa importanti li jiġi evitat iffollar bla bżonn fl-intrata, fit-taraġ, fuq il-bankini, u fil-post taʼ l-ipparkjar.
◼ Inviti: Għandhom il-pubblikaturi kollha l-provvista tagħhom taʼ l-inviti, u jafu xi jgħid? Ipprattikajt int kif se tippreżenta dan l-invit? Lil min se tagħti invit? Għandu jsir sforz biex jitqassmu l-inviti kollha.
◼ Trasport: Xi wħud interessati kif ukoll għadd t’aħwa għandhom mnejn ikollhom bżonn trasport jew xi għajnuna oħra. Liema arranġamenti saru biex tingħata attenzjoni lill-bżonnijiet tagħhom?
◼ L-Emblemi: Kunu ċerti li l-emblemi ma jitqassmux qabel inżul ix-xemx. Għandhom isiru arranġamenti biex xi ħadd iservi lil dawk l-uħud mill-midlukin li huma morda u li ma jistgħux ikunu preżenti. Għandu jinkiseb u jitlesta t-tip xieraq taʼ ħobż u nbid.—Ara t-Torri taʼ l-Għassa tal-15 taʼ Frar, 2003, paġni 14-15, paragrafi 14, 17.
◼ Is-Sala tas-Saltna: Is-sala għandha titnaddaf sew minn qabel. Platti, tazzi taʼ l-inbid, kif ukoll mejda u tvalja adattati għandhom jinġiebu fis-sala u jitpoġġew f’posthom minn qabel. Jekk jintuża post ieħor għal-laqgħa, kunu ċerti li jkun hemm sistema tas-sawnd adattata sabiex kulħadd fl-udjenza jkun jistaʼ jismaʼ lill-kelliemi. L-attendants u dawk li jservu għandhom jintgħażlu u jingħataw istruzzjonijiet bil-quddiem rigward l-inkarigi tagħhom, il-proċedura xierqa li trid tiġi segwita, u dwar il-bżonn taʼ lbies u dehra rispettabbli.
F’din l-okkażjoni li hi l-iktar importanti, it-Tifkira tal-mewt taʼ Ġesù Kristu, aħna rridu nkunu preparati sew individwalment u bħala kongregazzjoni. Ċertament li l-barkiet għonja taʼ Ġeħova se jkunu fuq dawk kollha li juru apprezzament mill-qalb għal dak kollu li pprovda Ġeħova għall-umanità permezz tas-sagrifiċċju taʼ Ibnu l-maħbub, Ġesù Kristu.