Iżżommx Lura —Tħossokx li M’Intix Kapaċi
1. Xi wħud għala jżommu lura milli joffru studju tal-Bibbja?
1 Iżżomm lura int milli toffri studju tal-Bibbja għax ma tħossokx kunfidenti bl-abbiltà tiegħek biex tikkonduċih b’mod effettiv? Xi drabi, qaddejja leali tal-passat, bħalma kienu Mosè u Ġeremija, ma ħassewhomx kwalifikati għall-inkarigi tagħhom. (Eżo. 3:10, 11; 4:10; Ġer. 1:4-6) Ħafna jħossuhom bl-istess mod. Wieħed kif jistaʼ jegħleb dawn is-sentimenti?
2. Għala m’għandniex inkunu kuntenti li nillimitaw il-ministeru tagħna għax-xogħol tal-ippritkar minn dar għal dar biss filwaqt li nħallu l-istudji tal-Bibbja għal ħaddieħor?
2 Irridu niftakru li Ġeħova qatt ma jitlobna nagħmlu xi ħaġa li ma nkunux kapaċi nagħmluha. (Salm 103:14) Mela l-inkarigu tagħna biex ‘nagħmlu dixxipli’ u ‘ngħallmuhom’ huwa wieħed li nistgħu nwettqu. (Mt. 28:19, 20) Mhuwiex privileġġ li Ġeħova ta biss lil dawk li huma l-iktar tal-esperjenza jew li huma l-iktar kapaċi fostna. (1 Kor. 1:26, 27) Għalhekk, m’għandniex inkunu kuntenti li nillimitaw il-ministeru tagħna għax-xogħol tal-ippritkar minn dar għal dar biss u nħallu l-istudji tal-Bibbja għal ħaddieħor.
3. Ġeħova kif ikkwalifikana biex nikkonduċu studji tal-Bibbja?
3 Ġeħova Jikkwalifikana: Il-kwalifiki tagħna biex nagħmlu dixxipli jiġu minn Ġeħova. (2 Kor. 3:5) Permezz tal-organizzazzjoni tiegħu, hu għallimna veritajiet Bibliċi li saħansitra lanqas l-iktar nies taʼ skola fid-dinja ma jafuhom. (1 Kor. 2:7, 8) Hu għamel ċert li jinkitbu l-metodi taʼ tagħlim tal-Għalliem il-Kbir, Ġesù, biex aħna nimitawhom, u hu jagħtina taħriġ kontinwu permezz tal-kongregazzjoni. Iktar minn hekk, Ġeħova tana l-materjal li neħtieġu biex ngħallmu l-Bibbja. Hu pprovda għodod, bħalma hu l-ktieb Il-Bibbja X’Tgħallem?, li jgħallmu l-verità b’mod loġiku u faċli biex tifhimhom. Li tikkonduċi studju tal-Bibbja jistaʼ jkun inqas taʼ sfida milli naħsbu.
4. Għala nistgħu nkunu fiduċjużi li Ġeħova se jgħinna?
4 Mosè u Ġeremija kienu kapaċi jwettqu l-inkarigi tagħhom bl-għajnuna taʼ Ġeħova. (Eżo. 4:11, 12; Ġer. 1:7, 8) Anki aħna nistgħu nitolbu l-għajnuna taʼ Ġeħova. Wara kollox, meta nikkonduċu studju tal-Bibbja, aħna nkunu qed ngħallmu lil xi ħadd il-verità dwar Ġeħova, u dan jogħġob ħafna lil Alla. (1 Ġw. 3:22) Għalhekk, agħmilha mira tiegħek li tikkonduċi studju tal-Bibbja, aspett mill-iktar pjaċevoli u premjanti tal-ministeru.