Ittra mingħand il-​Ġemgħa li Tiggverna

Għeżież qaddejja sħabna:

Hu l-​pjaċir tagħna li nistgħu niktbulkom fil-​bidu taʼ din is-​sena sinifikanti! Sal-​aħħar tal-​2014, ikun għadda seklu sħiħ minn meta s-​Sultan maħbub tagħna Ġesù Kristu beda jsaltan f’nofs l-​għedewwa tiegħu.—Salm 110:1, 2.

Fil-​bidu taʼ din is-​sena taʼ servizz, fil-​laqgħa annwali tal-​Watch Tower Bible and Tract Society of Pennsylvania, il-​Kumitat tat-​Traduzzjoni tal-​Bibbja tad-​Dinja l-​Ġdida nieda l-​edizzjoni bl-​Ingliż, riveduta mill-​ġdid, tal-​aqwa traduzzjoni tal-​Bibbja disponibbli għall-​umanità. Ġeħova oriġinalment uża lil uliedu mnisslin bl-​ispirtu biex jipprovdi t-​Traduzzjoni tad-​Dinja l-​Ġdida. (Rum. 8:15, 16) Ma taqbilx li dan il-​fatt biss żgur li jagħmilha traduzzjoni speċjali?

Għal ħafna snin, il-​Kumitat tal-​Kitba tal-​Ġemgħa li Tiggverna ta prijorità lit-​traduzzjoni tal-​Bibbja. Illum, it-​Traduzzjoni tad-​Dinja l-​Ġdida hi disponibbli sħiħa jew parti minnha b’121 lingwa. Ninkuraġġukom turu lil Ġeħova kemm tapprezzaw il-​Bibbja li għandkom. Aqrawha u mmeditaw fuqha kuljum. B’hekk, tersqu eqreb lejn l-​Awtur tagħha, Alla Ġeħova.—Ġak. 4:8.

Aħna nitnikktu meta nisimgħu dwar il-​provi li ħutna rġiel u nisa l-​għeżież qed iħabbtu wiċċhom magħhom. Hu naturali li minn żmien għal żmien jistgħu jsibuha diffiċli jifirħu maʼ ħuthom. Pereżempju, reċentement il-​ħajja taʼ familja fl-​Asja nqalbet taʼ taħt fuq meta l-​omm ħabta u sabta spiċċat ipparalizzata kompletament. Konfużi, l-​esperti mediċi ma setgħux jgħinuha. X’sitwazzjoni taʼ niket! Ir-​raġel issa jipprovdi għajnuna 24 siegħa kuljum lil martu. Binhom u ż-​żewġt ibniet tagħhom qed jagħtu eżempju tajjeb bħala Kristjani billi jappoġġaw bl-​imħabba lill-​ġenituri tagħhom. Din il-​familja mill-​aħjar kif ukoll intom ilkoll li tiffaċċjaw provi diversi tistgħu tesperjenzaw il-​ferħ li jiġi meta tissaportu l-​provi tal-​fidi tagħkom. (Ġak. 1:2-​4) Ġeħova jassigura lill-​midlukin tiegħu fuq l-​art u lin-​nagħaġ oħrajn li se nkunu ferħanin li bqajna nissaportu l-​provi, għax se nkunu mberkin bl-​għotja taʼ ħajja eterna!—Ġak. 1:12.

Is-​sena l-​oħra, l-​attendenza għat-​Tifkira kienet taʼ 19,241,252. Kemm hu inkuraġġanti li naraw tant nies jonoraw lil Ġeħova u lil Ġesù billi jattendu l-​iktar laqgħa importanti tas-​sena għall-​poplu t’Alla! Matul żmien it-​Tifkira, għajta kbira taʼ tifħir instemgħet hekk kif miljuni qdew bħala pijunieri awżiljarji f’Marzu u April. X’inkuraġġiment! U ma kontux ferħanin li ssiru tafu li dawk li qdew bħala pijunieri awżiljarji matul iż-​żjara tal-​indokratur li jżur il-​kongregazzjonijiet jistgħu jattendu l-​laqgħa kollha li jkollu mal-​pijunieri, anki jekk iż-​żjara tiegħu ma tkunx matul Marzu jew April? Dawk għaqlin spiritwalment jifhmu l-​valur taʼ li jibqgħu attivi fix-​xogħol tal-​ippritkar u fl-​attività tal-​kongregazzjoni. Li nkunu medhijin jgħinna nibqgħu sodi u ma nitħarrkux, u b’hekk infixklu l-​pjanijiet tax-​Xitan biex idgħajfilna l-​fidi u jiżvijana.—1 Kor. 15:58.

Kemm isaħħaħna li naraw li matul is-​sena taʼ servizz li għaddiet, 277,344 issimbolizzaw id-​dedikazzjoni tagħhom bil-​magħmudija tal-​ilma u issa huma fit-​triq li tieħu għall-​ħajja flimkien maʼ ħuthom madwar id-​dinja! (Mt. 7:13, 14) Dawn l-​uħud ġodda għandhom bżonn is-​sapport tagħna biex ‘jissodaw fil-​fidi.’ (Kol. 2:7) Komplu inkuraġġixxu lil xulxin biex tissaportu sat-​tmiem. (Mt. 24:13) “Ikkonslaw lid-​dipressi, wieżnu lid-​dgħajfin, uru sabar fit-​tul lejn kulħadd.” (1 Tess. 5:14) Fl-​aħħar, jalla kull wieħed minna ‘jitlob bla waqfien,’ u jgħid: “Ħa tiġi saltnatek.”—1 Tess. 5:17; Mt. 6:10.

Jekk jogħġobkom ħudu pjaċir aqraw . . . il-​Yearbook, u kunu afu li nħobbu lil kull wieħed u waħda minnkom, intom li tħobbu lil Ġeħova!

Ħutkom,

Il-​Ġemgħa li Tiggverna tax-​Xhieda taʼ Ġeħova