Kelli Ħafna Barkiet Sbieħ Għax Tgħallimt minn Eżempji Tajbin

Jien twilidt fi Quebec City, fil-​provinċja taʼ Quebec fejn jitkellmu bil-​Franċiż. Il-​ġenituri tiegħi, Louis u Zélia, kienu jħobbuni ħafna u wrew qalb tajba miegħi. Missieri kien raġel mistħi ħafna u kien iħobb jaqra. Kont inħobb nikteb, u allura kont nittama li nsir ġurnalist.

Meta kelli madwar 12-​il sena, Rodolphe Soucy, wieħed li kien jaħdem maʼ missieri, ġie jżuruna d-​dar mal-​ħabib tiegħu. Huma kienu Xhieda taʼ Ġeħova. Ftit li xejn kont naf dwar ix-​Xhieda u ma tantx kont interessat fir-​reliġjon tagħhom. Però, kien jogħġobni kif kienu jwieġbu l-​mistoqsijiet b’mod raġonevoli mill-​Bibbja. Anki l-​ġenituri tiegħi kien jogħġobhom dak li kienu jgħidu, u allura bdejna nistudjaw il-​Bibbja.

Dak iż-​żmien, kont immur skola tal-​Knisja. Kultant, kont nitkellem maʼ tal-​klassi dwar dak li kont qed nitgħallem mill-​istudju tal-​Bibbja. Maż-​żmien, l-​għalliema, li kienu qassisin, saru jafu b’dan. Wieħed minnhom, biex juri li ma jaqbilx miegħi, minflok uża l-​Bibbja, akkużani quddiem klassi sħiħa li kont qed inkun ribelluż! Għalkemm kienet sitwazzjoni stressanti, dan ġabli barkiet għax għenni nifhem li l-​għalliema reliġjużi tal-​iskola tiegħi ma kinux jaqblu mal-​Bibbja. Irrealizzajt li posti ma kienx hemm. Bil-​permess tal-​ġenituri tiegħi, bdejt immur fi skola oħra.

KIF TGĦALLIMT INĦOBB L-​IPPRITKAR?

Komplejt nistudja l-​Bibbja, imma ma tantx għamilt progress spiritwali għax kont nibżaʼ noħroġ nipprietka minn dar għal dar. Il-​Knisja Kattolika kienet tħalli impatt kbir fuq in-​nies u kienet topponi ħafna kontra l-​ippritkar tagħna. Maurice Duplessis, il-​mexxej politiku taʼ Quebec, kien jappoġġa ħafna lill-​Knisja. Bl-​għajnuna tiegħu, gruppi taʼ nies bdew jaqilgħu l-​inkwiet lix-​Xhieda u saħansitra sawtuhom. Dak iż-​żmien, kellek bżonn il-​kuraġġ biex tipprietka.

Ħu li għenni negħleb il-​biżaʼ kien jismu John Rae. Dan kien gradwa mid-​disaʼ klassi tal-​Iskola taʼ Gilegħad. John, li kellu ħafna esperjenza, kien umli u dħuli. Rari kien jiġi fuqi u jtini parir, imma l-​eżempju tajjeb tiegħu kellu impatt kbir fuqi. John kien ibati biex jitkellem bil-​Franċiż, allura spiss kont noħroġ nipprietka miegħu u ngħinu bil-​lingwa. Peress li kont inqattaʼ ħafna ħin maʼ John, fl-​aħħar rabbejt il-​kuraġġ u sirt Xhud taʼ Ġeħova. Tgħammidt fis-​26 taʼ Mejju 1951, jiġifieri għaxar snin wara li kellmuni x-​Xhieda taʼ Ġeħova għall-​ewwel darba.

Fil-​kongregazzjoni żgħira tagħna fi Quebec City, kważi kollha kienu pijunieri. Tant ħallew impatt tajjeb fuqi li bdejt naqdi bħala pijunier ukoll. Dak iż-​żmien, konna nippritkaw minn dar għal dar billi nużaw il-​Bibbja biss. Peress li ma konniex nużaw letteratura biex nippritkaw, kellna nitgħallmu nużaw il-​Bibbja aħjar. Allura, jien provajt nitgħallem xi versi tal-​Bibbja li setgħu jgħinuni niddefendi l-​verità. Però, ħafna kienu saħansitra jirrifjutaw jaqraw il-​Bibbja jekk ma jkollhiex l-​imprimatur, jew approvazzjoni uffiċjali, mill-​Knisja Kattolika.

Fl-​1952, iżżewwiġt lil Simone Patry, oħt leali li kienet taqdi fl-​istess kongregazzjoni tiegħi. Aħna morna noqogħdu Montreal, u fi żmien sena, ġejna mbirkin b’tifla, Lise. Għalkemm kont waqaft naqdi bħala pijunier ftit qabel ma żżewwiġna, jien u Simone bqajna nipprovaw ngħixu ħajja sempliċi biex inkunu nistgħu nieħdu sehem kemm jistaʼ jkun fl-​attivitajiet tal-​kongregazzjoni bħala familja.

Għaddew għaxar snin mindu rġajt bdejt naħseb biex naqdi bħala pijunier. Fl-​1962, peress li kont anzjan, attendejt l-​Iskola tal-​Ministeru tas-​Saltna li damet xahar fil-​Betel tal-​Kanada. Hemmhekk qsamt il-​kamra maʼ Camille Ouellette. Iż-​żelu taʼ dan il-​ħu impressjonani—speċjalment peress li kien raġel tal-​familja. Dak iż-​żmien, fi Quebec, bilkemm kien hemm aħwa pijunieri u jrabbu t-​tfal fl-​istess ħin. Minkejja dan, din kienet il-​mira taʼ Camille. Matul iż-​żmien li qattajna flimkien, hu inkuraġġieni biex naħseb dwar is-​sitwazzjoni tiegħi. Wara ftit xhur biss, irrealizzajt li stajt nerġaʼ nibda naqdi bħala pijunier regolari. Xi wħud iddubitaw kemm id-​deċiżjoni tiegħi kienet waħda għaqlija, imma jien xorta bdejt naqdi bħala pijunier għax kont ċert li Ġeħova se jgħinni biex nipprietka iktar.

LURA FI QUEBEC CITY BĦALA PIJUNIERI SPEĊJALI

Fl-​1964, jien u Simone ġejna maħturin biex naqdu bħala pijunieri speċjali fi Quebec City, fejn trabbejna u rġajna qdejna għal diversi snin. Sa dak iż-​żmien, l-​oppożizzjoni naqset, imma xorta kien għad hemm min jagħmlilna l-​bsaten fir-​roti.

Darba, kien is-​Sibt waranofsinhar, u ġejt arrestat f’Sainte-​Marie, belt mhux ’il bogħod minn Quebec City. Pulizija ħadni l-​għassa u tefagħni l-​ħabs għax kont qed nipprietka minn dar għal dar bla permess. Imbagħad, ħaduni quddiem l-​Imħallef Baillargeon, raġel li jġiegħlek tħossok beżgħan. Hu saqsieni min kien se jkun l-​imħallef tiegħi. Meta semmejtlu lil Glen How,a Xhud li kien avukat magħruf, bil-​biżaʼ fuqu qalli: “Illaħwa! Dak minn tant?!” Dak iż-​żmien, Glen How diġà kellu reputazzjoni tajba f’li jiddefendi lix-​Xhieda taʼ Ġeħova b’mod legali. Il-​qorti ma damitx biex tgħidli li waqqgħet il-​każ li kellha kontrija.

L-​oppożizzjoni għall-​ippritkar fi Quebec għamlitha diffiċli wkoll biex jinkrew postijiet adattati għall-​laqgħat. Il-​kongregazzjoni żgħira tagħna ma setgħetx issib post aħjar minn garaxx. Sabiex l-​aħwa jsaħħnu l-​post fiż-​żminijiet tax-​Xitwa fejn il-​kesħa xxoqq il-​għadam, kienu jużaw heaters taż-​żejt. Aħna spiss konna ninġabru madwaru xi ftit sigħat qabel il-​laqgħa biex naqsmu esperjenzi t’inkuraġġiment.

Hija xi ħaġa sabiħa li tara r-​riżultati tajbin tal-​ippritkar. Fis-​sittinijiet, kien hemm xi ftit kongregazzjonijiet żgħar biss fi Quebec City, fir-​reġjun taʼ Côte-​Nord, u f’Gaspé Peninsula. Illum, hemm iktar minn żewġ circuits f’dawn l-​inħawi, u l-​aħwa jiltaqgħu fi Swali tas-​Saltna sbieħ.

INKARIGA TAʼ INDOKRATUR LI JŻUR IL-​KONGREGAZZJONIJIET

Jien u Simone konna mistidnin biex naqdu fix-​xogħol tas-​circuit fl-​1970. Imbagħad, fl-​1973, ġejna assenjati fix-​xogħol tad-​distrett. Matul dawk is-​snin, tgħallimt ħafna minn aħwa kapaċi bħal Laurier Saumurb u David Splane,c indokraturi li kienu jżuru l-​kongregazzjonijiet. Wara kull assemblea, jien u David konna nagħtu suġġerimenti lil xulxin dwar kif nistgħu ngħallmu aħjar. Niftakar meta darba David qalli: “Léonce, ħadt pjaċir nismaʼ l-​aħħar taħdita tiegħek. Kienet tajba, imma kont nagħmel tliet taħditiet mill-​materjal kollu li kellek!” Kelli t-​tendenza li jkolli wisq informazzjoni fit-​taħditiet tiegħi. Allura, kelli bżonn nitgħallem niffoka fuq l-​iktar punti importanti.

L-​indokraturi tad-​distrett kienu inkarigati biex jinkuraġġixxu lill-​indokraturi li jżuru l-​kongregazzjonijiet. Però, ħafna pubblikaturi fi Quebec kienu jafuni sew. Spiss kienu jkunu jridu jippritkaw miegħi meta kont inżur is-​circuits. Għalkemm kont nieħu pjaċir naħdem magħhom, ma kontx qed inqattaʼ biżżejjed ħin mal-​indokratur li jżur il-​kongregazzjonijiet. Darba minnhom, indokratur li jżur il-​kongregazzjonijiet bi mħabba qalli: “Huwa sabiħ li tagħti l-​attenzjoni lill-​aħwa, imma tinsiex li int dil-​ġimgħa ġejt hawn biex tiltaqaʼ miegħi. Jien għandi bżonn l-​inkuraġġiment ukoll!” Dan il-​parir mogħti b’qalb tajba għenni nkun iktar bilanċjat.

Fl-​1976, ġrat xi ħaġa li ma kontx qed nistenna u ġabitli dwejjaq kbar. L-​għażiża marti, Simone, mardet serjament u raqdet fil-​mewt. Hi kienet mara mill-​aħjar għax ma kinitx egoista u kienet tħobb ħafna lil Ġeħova. Peress li kont inqattaʼ ħafna ħin fil-​ministeru, stajt nissaporti l-​uġigħ li kelli, u nirringrazzja lil Ġeħova għall-​għajnuna bi mħabba li tani matul dak iż-​żmien diffiċli. Imbagħad, iżżewwiġt lil Carolyn Elliott, pijuniera żeluża li titkellem bl-​Ingliż u li kienet marret tgħix Quebec biex taqdi fejn il-​bżonn hu ikbar. Carolyn hi dħulija u vera tinteressa ruħha f’oħrajn, speċjalment f’dawk li jistħu jew iħossuhom waħedhom. Hi għenitni ħafna meta bdiet tiġi miegħi biex inżur il-​kongregazzjonijiet.

SENA LI MA NINSA QATT

F’Jannar tal-​1978, ġejt mitlub biex ngħallem l-​ewwel Skola tas-​Servizz taʼ Pijunier fi Quebec. Kont ansjuż ħafna minħabba li l-​kotba kienu ġodda għalija bħalma kienu ġodda għall-​istudenti. Ħadt pjaċir li l-​ewwel klassi li għallimt kien hemm ħafna pijunieri tal-​esperjenza. Għalkemm kont għalliem, tgħallimt ħafna mill-​istudenti!

Imbagħad, fl-​1978, kien hemm il-​Konvenzjoni Internazzjonali bl-​isem “Victorious Faith” fl-​Olympic Stadium taʼ Montreal. Kienet l-​akbar konvenzjoni li qatt saret fi Quebec. Konna iktar minn 80,000 ruħ! Kont ġejt inkarigat biex naħdem fid-​Dipartiment tas-​Servizz tal-​Aħbarijiet fil-​konvenzjoni. Kont tkellimt maʼ ħafna ġurnalisti u kont ferħan se ntir meta rajt li kitbu ħafna affarijiet tajbin dwarna. Huma intervistawna fuq it-​televixin u r-​radju għal iktar minn 20 siegħa, u ppubblikaw mijiet t’artikli. Kienet ingħatat xhieda tal-​għaġeb!

INKARIGU ĠDID

Fl-​1996, esperjenzajt bidla kbira. Wara li kont ilni naqdi fi Quebec bil-​lingwa Franċiża minn meta tgħammidt, ġejt inkarigat biex naqdi bħala indokratur tad-​distrett fl-​inħawi taʼ Toronto bil-​lingwa Ingliża. Ma kontx inħossni kwalifikat u bdejt nibżaʼ ħafna biex nagħti taħditiet għax ma kontx naf nitkellem sew bl-​Ingliż. Kelli bżonn nitlob iktar spiss u nistrieħ ħafna iktar fuq Ġeħova.

Kont eċitat ħafna qabel bdejt naqdi f’dan id-​distrett, imma issa nistaʼ ngħid li gawdejt sentejn mill-​isbaħ naqdi fl-​inħawi taʼ Toronto. Carolyn bil-​paċenzja għenitni ntejjeb l-​Ingliż tiegħi, u l-​aħwa kienu taʼ inkuraġġiment kbir għalija u appoġġawni ħafna wkoll. Aħna malajr għamilna ħafna ħbieb.

Minbarra l-​attivitajiet u l-​preparamenti għall-​assemblea, jien spiss kont inqattaʼ madwar siegħa l-​Ġimgħa flgħaxija nipprietka minn dar għal dar. Xi wħud forsi ħasbu: ‘Ikollok tant x’tagħmel eżatt qabel l-​assemblea, ħa toħroġ tipprietka wkoll?’ Madankollu, irrealizzajt li meta jkolli konversazzjonijiet tajbin fil-​ministeru kont ninkuraġġixxi ruħi. Anki llum, meta noħroġ fil-​ministeru, dejjem inħossni aħjar.

Fl-​1998, Carolyn u jien ġejna inkarigati biex immorru Montreal bħala pijunieri speċjali. Għal xi snin, l-​inkarigu tiegħi kien jinkludi li norganizza l-​ippritkar f’postijiet pubbliċi partikolari u nikkomunika maʼ dawk tal-​aħbarijiet biex in-​nies jifhmu iktar min aħna u ma jiħduhiex kontra x-​Xhieda taʼ Ġeħova. Jien u Carolyn illum qed nieħdu pjaċir nippritkaw lill-​barranin li dan l-​aħħar ġew joqogħdu l-​Kanada u li spiss iħarsu ’l quddiem biex jitgħallmu iktar dwar il-​Bibbja.

Hekk kif nirrifletti fuq it-​68 sena bħala qaddej mgħammed taʼ Ġeħova, inħossni mbierek. Inħossni ferħan ħafna peress li tgħallimt nieħu pjaċir nipprietka u għent lil ħafna nies isiru jafu l-​verità. Wara li binti, Lise, u r-​raġel rabbew familja, huma bdew jaqdu bħala pijunieri regolari. Jagħmilni ferħan li naf kemm għadha żeluża għall-​ministeru. Ninsab grat ħafna għal ħuti l-​Kristjani li bl-​eżempju u l-​pariri tajbin tagħhom għenuni jkolli ħbiberija iktar b’saħħitha maʼ Ġeħova. Ukoll, dawn għenuni naqdih b’modi differenti. Indunajt li l-​uniku mod biex nibqgħu leali fl-​inkarigu tagħna huwa possibbli biss jekk nistrieħu fuq il-​qawwa tal-​ispirtu qaddis taʼ Ġeħova. (Salm 51:11) Jien nibqaʼ nirringrazzja lil Ġeħova talli tani l-​privileġġ prezzjuż taʼ li nfaħħar lil ismu!—Salm 54:6.